Frankfurt Freewalk 2011
Episode 6
2.2夜行法蘭克福
Episode 3：1.28-2.1之做乜鬼野展覽丫落吧蒲去睇show才是王道
2/2/2011 WED 法蘭克福
海德堡之行三點九結束，一個鐘火車即係四點九返到法蘭克福，同事一家第二朝過巴黎，收左佢封利是就分道揚鑣了。收利是因為今日係年三十呀，本身想搵北京李哥但我黎德國避年人地全家要過年嘛，去到酒店抖陣就出門口自己亂咁行。
住火車站附近好似係站入面好多野食，款多價錢又唔太高，一路行一路食除左睇雀仔，仲搵到個火車模型。想玩架，不過見到有個爺爺帶住兩個小朋友，就廢事爭啦。
黎左咁耐，都未試過行美茵河河邊。
搵次要過對面睇睇岸先得。（雖然結果都冇）
亂行都唔驚，德國商業銀行係地標，望得到佢就一定識路返酒店。
「由海德堡返到黎法蘭克福，都要俾我遇著咁多地盤同工程。」
河邊沿路非常廣闊，好多人跑步同踩單車，仲有個由頭到尾行足成大半個字的公園，單睇河邊已睇到人地城市規劃好過香港幾多。幻想一下尖沙咀海傍酒店變晒兒童遊樂場、跑步徑同單車徑，做運動的開心班小朋友又有排玩返工放工又方便，這才是利民之舉。
睇見個電箱廣告先知道，原來活地亞倫原來唔止識拍戲，仲係jazz友黎組埋band四圍表演。
貓王精選碟《50,000,000 Elvis Fans Can’t Be Wrong》音樂固然好，但更出名係封面，Bon Jovi除左搭過時光機向宇宙勁band Mr.偷師，亦都有tribute過個封面架。
琴晚去左Batschkapp睇Neckbreakers Ball，但更多精彩節目在後頭，好似三月一日有Apocalyptica。一路好想睇Apocalyptica同Van Canto演唱會，但兩隊分別我德國行之後同之前先上Batsckapp開show，可惜。
亂咁行都唔驚，咁多日摸熟左地區地圖治安又好，行左差唔多兩個鐘，玩到相機冇電同吹河風吹到開始有少少鼻水，加上好多舖頭七點已經閂門，係時候返酒店。當然唔係住呢間啦，我間酒店好頹架。
唔好俾張相呃到其實間房好細，同中間無端端整左條柱阻定到爆，係間隔拉長左空間感先大左。浴室仲勁沖涼個位入到去起個爭已經撞牆，雖然劉Sir好肥但同外國人比可以叫做瘦，唔知鬼佬尤其美國佬點住，個企缸佢地分分鐘入都入唔到。已經收五十五歐羅一晚架喇唔平架。仲未講個所謂行李寄存係叫你自己放件行李落佢地地牢個雜物倉有乜閃失貴客自負的盡責服務。
枕頭放左張卡仔，都係客套說話同點樣用免費wifi之類，展覽時開果張sim卡仲用到唔使靠預左慢過56K的wifi（yeah所以點解當初死都要上台），舊朱古力就唔敢食，成日型住係平價貨仲要冇人食放足唔知幾多年果隻。
此乃海德堡一行收獲，Sam少黎德國前特別落柯打要買柯華田醬，法蘭克福未見過走到去海德堡先搵到，都叫做買到當地的特色手信返香港呀，唔係拎唔到太多同驚打爛又點會只買咁少丫。至於枝酒，一睇就知唔關落到酒吧都只會飲維他奶的劉Sir事啦。
唔好俾度數呃到，無論點樣低過香港十幾度天氣都唔多凍，純粹大風嗟，但行左幾晚名店街，最後都係應應景同阿叔買左個耳罩仔。買完先發現中伏，個耳罩細到死，除非你個頭小過小朋友，唔係根本冇可能同時笠晒兩隻耳仔，戴上頭會好似DJ戴headphone噉。想拎番去叫回水，先發現個阿叔已經不知所蹤了。
等我仲特登使左EU6.2買左張火車日票，搭三程車就抵番，結果搭得兩程，蝕灼左。搞到今晚訓都訓得唔自在，第二朝就發現，大鑊了。