Frankfurt Freewalk 2011
Episode 2
1.27晚間自由行+夜攝大教堂
Episode 3：1.28-2.1之做乜鬼野展覽丫落吧蒲去睇show才是王道
27/1/2011 THU 法蘭克福．夜
行完食完名店街，想到馳名教堂望望，今次黎到德國又有位朋友要探探，第一個夜晚完全唔需要擔心冇節目。人生路不熟路線複雜到爆的火車超難坐，搭錯左兩次先返得到火車總站，跟住未習慣行車路方向同香港相向單軌電車又坐錯車，把鬼火自己睇地圖行路過去好過。
火車站對面大街係紅燈區，廢事第一日到步就出事行隔籬內街。點知街撞正大大間新中國城酒家。好在裝修同格局的確好港式酒樓。合格啦我俾你。
仲歡迎外賣，唔係食左漢堡包當晚餐，我會買番隻燒鵝一路行一路食。（咦隔籬有檔賣燒春雞差唔多大細但平一半喎，黎到德國食燒鵝，又好似戇居左少少喎．．．）
再行過幾步，對面街有間翠園美食鑊（？），隔籬係鼎鼎盛（？？）。呢條街勁多中餐館。完全唔明點解次次去親外國都見到咁多中菜館，仲多過麥當奴果隻。莫非鬼佬真係咁易呃？
這是Oper Frankfurt法蘭克福歌劇院。真係睇唔出歌劇院黎，人地建築好多時玩前衛摩登。第一次經過冇特別留意，因為．．．
歌劇院雖靚，俾對面大大個歐盟標誌搶晒鏡。德國係歐盟經濟事務國，歌劇院對面就係歐洲中央銀行，但行過好多次都冇影到座大樓，次次只顧住望個超巨型歐盟logo。
這是德國商業銀行總行，屬全區難得摩天大廈，係法蘭克福地標之一。行到邊實見到，每次睇地圖搵路都係靠佢定位同辨別方向。
行到七點幾，終於到達目的地Berliner Street。黎到先發現，頂，原來之前上錯左架電車，落左車過對面馬路個站再上，兩個字就到唔使行成半個鐘咁戇居。又如果離開名店街時唔返火車站而向住教堂方向直行，都快過而家一半。
專誠走咁遠路，係為探探北京朋友李哥。雖然劉Sir已從香港metal界幕前淡出，好多朋友特別外國朋友仍然保持聯絡（係，外國人比香港人更關心劉Sir，真諷刺），李哥做空中少爺，因為超鍾意Megadeth又想知佢地首《A Tout le Monde》歌詞意思專誠學德文，雖然歌詞明明法文黎我又唔好意思問佢點解會走去學德文聽落好中伏feel，但後來練德文練到德國請佢北京移民過黎法蘭克福，是身邊罕有因為metal達到成功人生的故事。就算真係中伏，都中得抵啦。
以前佢飛親香港必定探探我，劉Sir淡出後只MSN見面時嗲嗲，今次我黎法蘭克福參展個星期咁好彩遇著佢stand by唔使飛，估唔到大家再見面會係法蘭克福。兩公婆一齊移民黎德國，老公飛老婆做免稅店，今晚李哥唔得閒，先黎免稅店搵李老婆買張儲值卡先，黎緊大家聯絡同打電話返香港都方便。
因為展覽帶黎大量大陸客，生意相當興隆，我都唔好意思阻住人地發達買完電話卡就走人。雖然距離名店街兩個字路程，間免稅店仍然處於消費區，條街有好多特色舖頭。出奇地見到唔少畫廊，證明外國藝術教育絕對好過香港，同搞藝術唔代表一定搵唔到食／一定要乞食。最少，你住香港又唔係有錢人但學歐洲人買幅畫返屋企掛，會俾人笑。當然前提是你搵得到畫買，真係冇乜地方。
仲好難得搵到間漫畫舖。Marvel加DC兩大美漫label為主，絕大部份係德文版，英文版要落地牢搵亦唔多，本土作品又以兒童漫畫為主，結果冇乜斬獲。反而日漫賣唔少，門口已經有成個架專放日本漫畫，都係德文翻譯本，睇落慢香港一期左右。其實好有興趣買番本德文版《爆漫》紀念。
免稅店正對面就係保羅教堂Paulskirche，經常有旅行團逗留，佔盡地利難怪咁多客人。越過大教堂更多好野睇。
這是著名的羅馬廣場Romerberg，好多重要建築同名勝位於廣場附近，有逢節日同大型活動一定黎呢度大搞。同事話往年參加開個展覽近夏天舉行，天氣好得多，收工夜晚過黎仍然好多人好多遊客。而家冬天自然差得遠，多數係附近居民同商戶放工返屋企、襯舖頭未收前趕黎買野、去食飯去飲酒，同放狗。
羅馬廣場夜景真係一流，加上唔太凍唔太大風空氣又好，平常散步都行到個人好舒服。唯一可惜係，差噉場雪喎。
．．．唔知點解，明明座大教堂就係前面正面，就係一直行黎行去但冇埋到去，結果到走都好似未試過走近過間皇帝大教堂。好邪。證明我冇耶撚命。所以都係回程算了。
黎德國時正值Linkin Park出新碟《A Thousand Suns》，一街都是廣告。音樂在德國具相當地位，不論流行還是另類，去流行CD舖甚至有heavy metal專區，成行成列近千隻metal碟非常壯觀。
仲有好多主流同indie音樂會。好可惜唔熟路加冇時間發掘。
內街冇乜燈，加埋古建築，整多棵大樹同好多烏鴉飛黎飛去不停叫，十分gothic。
行入內街，閃一閃燈立即成棵樹搖晒大班烏鴉邊邪叫邊飛走，以免跟架車一樣命運勁中頭獎，都係早閃早著。
呢間係城市歷史學院Institut fur Stadtgeschichte，日頭冇乜野，但夜晚投影個人像落牆身，非常型。我睇左幾日，都研究唔到點樣投影出黎同點解可以投影得咁靚。
Berliner Street中間有條地下行車道，上面整左個行人島加行人天橋，裝飾得好鬼靚。唔似香港地度度一樣樣又要死氣沉沉。
樓梯加左兩條軌，一來方便BB車上落，二來市內兩種主要輕型交通工具係單車同埋 － 你一定估唔到 － 滑板車。冇錯踩單車歐洲普遍過普遍，但黎到德國先知連滑板車都可以做正規交通工具，行人路有唔同顏色分線俾單車同滑板友行，行人天橋加條軌佢地過馬路就唔使特登兜路或者冒險，唯一美中不足是輪椅未能受惠。
睇番香港，所謂國際都會，同人地西方真正都會比一比，點解香港城市規劃可以差咁多？成日鼓吹大家做運動同環保，但即使你有心單車代步，就算唔講馬路點樣多人多車，單車唔上得行人路、唔入得火車等擾民法例已經收左你皮啦，而次次話起單車徑，總因為種種原因（從不離「影響治安」、「影響樓價」之類）俾人反對。更加唔使講滑板車啦。香港地你踩親滑板車出街，立即俾人話你潮童。如果你同人講你踩滑板車係為左返工返學，應該會俾人笑到仆街，如果笑果個未早過你笑到仆街先。
德國節奏十分緩慢，我只用香港正常速度行路，已經係全條街走得最急果個，佢地慢到就算條馬路冇車，紅燈都可以有一半人企定等轉綠燈先過唔衝燈。我都入鄉隨俗頹埋一份，人地街景同樓真係整得靚，你都唔會介意停低慢慢睇。
又回來了。法蘭克福話劇院Schauspielfrankfurt。
其實同之前經過間歌劇院相連，大家係同一座建築物。全玻璃透視，搞到個個人行過都會八卦入面做緊乜野。都是一種藝術行為。
差唔多每一晚都會黎到歌劇院，因為對面就係電車站，每晚黎呢頭蒲完都係歌劇院站上車返歸。有歌劇院同大大個歐羅logo識別，一定唔會搵唔到車返屋企。
由始至終都係冇閘加自助俾錢，我逗留咁多日都未見過有人查飛，尤其咁夜查飛友一早收晒工。你唔買飛坐霸王車真係冇人吹得你脹的。
八點幾上單軌電車即係輕鐵，但同香港輕鐵唔同係德國人好興搭火車時睇書，香港地一坐定企定第一件事梗係拎部愛瘋出黎掃掃掃先啦。同好過癮，有狗。有兩隻狗上左車，輪流勁吼，香港地一定冇機會見到，而德國唔止可以拖隻狗上車，好多地方地俾狗入，商場都得算平常啦我做緊展覽都可以有buyer拖住隻狗入黎一齊行先抵死呀。德國真是狗主天堂。
香港地晚晚賴死唔訓，去外國相反慣左一早訓覺一早起身，今日成朝砌場跟住又行左成日想玩都支力到玩唔到啦，法蘭克福的第一日未夠夜晚九點已經結束。