Frankfurt Freewalk 2011 Episode 11：2.4法蘭克福自由行．動物園

Frankfurt Freewalk 2011
Episode 11
2.4法蘭克福自由行．動物園

****************************************************************************************************

4/2/2011 FRI　法蘭克福

口桀口桀口桀

唔擺隻草泥馬做封面，點拉高收視呀。劉Sir寫野出晒名字多圖少，今次唔同喇多相睇到你唔想睇。當然仲有萬眾期待的草泥馬真身啦。

琴日去完科隆行過全德國最大動物園，意猶未盡，再戰法蘭克福動物園－實際上係唔行的話，其實唔多知有乜好做。講就噉講嗟，動物園我一定行的，與其睇名勝古蹟，寧願睇生勾勾飛禽走獸行黎行去。

門面已較科隆動物園輸蝕，位置係低密度市集中心，落左車見唔到牆上面公仔都唔知道原來係動物園，就噉睇外牆亦已經感受到比科隆細得多。上面個地點係一個人生交叉點，完全冇路牌同指示同你講點行，左邊係行一陣路就到的入口，行右邊就要兜好大個圈先至去到側門入去，你估黑仔開的劉Sir揀左行邊一邊？

張飛都頹好多，科隆係張barcode白卡要過電子閘，法蘭克福張飛呢拍得住豪華戲院張陳年影印戲飛，一手交錢一手交票後自己行過隔籬推閘唔該，即係我明人地收十四歐羅你收八蚊（有Frankfurt Card再五折我只需要俾四歐羅yeah～），都唔使灰到噉卦。

初頭真係唔覺得自己入左動物園，好靜亦唔會第一步立即見到成班動物。先入左近門口間屋仔。

一入到去，立即改觀。間屋原來係觀鳥園，穿過門口已經置身一個開放樹林，乜野壞印象都變晒好感。令我諗起香港公園個號稱全球最大的尤德觀鳥園。返到香港之後，要搵次去睇睇先。

做乜後面有聲，擰轉頭見到有好大隻靚雀見有人入黎蒲頭睇睇咩事。

難得全開放班雀又唔驚人，可以俾你真正近距離接觸，我同隻雀只相距一隻手唔夠。非常好彩大陸人唔會黎動物園。唔係班雀仔冇俾人玩死都冇晒毛。

但防大陸人之心不可無，開放樹林只佔一小角，其他空間都有玻璃阻隔，不過距離、景觀、數量和種類，都足夠滿足各位想打雀的龍友。

嘩，呢隻雀好肥。

「啤咩呀啤死肥仔！」

嘩原來世界上有雀仔只會游水唔曉飛

香港常見的麻雀，在這裏是寶

「丫叫左你唔好啤你仲啤！」

大雀好鍾意群埋人度，你行近窗就會自動波行過黎，細雀相反唔鬼理你匿埋樹上邊自己擔天望地唱歌仔。

睇左咁多細雀仔，好似仲有孔雀，不過唔知放邊間館，同天氣咁凍唔會放出黎，撞唔到。

有好大個公園，不過廢事俾各位德國小朋友笑，唔敢入去同佢地爭野玩。

Exotarium，點睇都似小說名或者band名啦。所以一定係正野，點都要入去逛逛。

果然exotic，原來係睇水底同熱帶生物。

水魚呀～

水池面有舊石，比烏龜們水魚們上去曬曬日光燈，附近幾棵樹仲住左群雀仔。有隻雀同隻龜對峙左好耐，本身大家相安無事，跟住隻雀好似想霸晒成舊石就走行埋去隻龜度想啄佢噉款，點知另一隻龜游左上黎變成二對一，隻雀立即縮埋一邊唔敢行咁近，最後飛走左。

企鵝館變左玻璃密封，仲要塊玻璃朦查查，都係科隆露天水池隻企鵝近到屙屎可以射落你身上面先有feel。

睇完凍魚，仲有熱帶魚睇。

呢隻過癮

好似去左海鮮酒家

龍

肥龍

瘦龍

懶訓的青蛙

舊石下面好似成班青蛙一齊ＺＺＺＺＺＺ

樹蛙都有，估唔到Exotarium原來咁多野睇，好多珍禽異獸。

好很大的龜

好很慢的龜

呢隻水底巨獸唔知咩生物，好鬼有霸氣，對住佢好似睇緊《哥斯拉》。

兩條鱷魚個陣好型

水魚又見水魚

估唔到黎到昆蟲館都有得睇AV

終於可以戶外見到犀牛，梗係開心啦，如果入展館睇，臭到仆街呀。可能悶到傻左，次次見到佢，唔係原地自轉，就係不斷兜圈走。

「喂，做乜唔曉郁的」

又見唔知海狗定海豹，都係影唔到，游水游得好鬼快，又唔肯上岸。

Pink Flamingo

野豬，好似科隆冇得睇喎反而。

行落先知唔夠人地大，但多好多科隆冇得睇的動物，好似山羊仔。

呢隻好似俾其他羊仔迫左上舊石唔敢落番黎。

第一次知道羊咩咩係咩一回事。當一隻「咩」，就會成群一齊「咩」，嘈到你都爆番句「嘈咩呀嘈！」

班羊仔有好大塊地，入面有間另外加左圍欄的屋仔，細圍欄角落頭放左棵樹枝，以為俾佢地趙，原來用黎Ｒ痕。

「影完未呀？趕住收工放lunch呀！」

好多大駱駝。影完大駝，就梗要影細啦！見唔見到兩隻大駝中間？

雖然羊駝區好細，我諗大細駝館加埋都冇科隆動物園個草泥馬區咁大，但在此質重於量，細即係有機會近距離接觸，同有科隆見唔到的白色版，草泥馬始終白色才是正宗。

而且隻白色草泥馬唔止靚，仲好鬼醒。本身企屋企門口唔知做乜，就同旁邊坐低左果隻啡色一樣戇居居（坐低個樣好過癮呀），但一見到我行近舉起相機．．．

「行埋黎喇行埋黎喇～～～」

「仲引到連本來坐低唔郁果隻啡色都起埋身～～～」

琴日影餐死百幾張都影唔到，點知今日一影就影到草泥馬大頭，仲要係白色正宗種，得來全不廢功夫。

唔知品種係咪真係咁大關係，幾隻啡色草泥馬硬係唔多理人，係白色一隻黐人，本來坐低訓低啡色果班都要等「大佬」帶頭，先至肯起身行黎行去。

只係黐人唔等於鍾意人地摸佢，雖然企欄邊同你面對面好耐，但試過幾次想摸佢都縮，縮左幾次就行開左了。

不過，隻白色草泥馬始終八卦同鍾意人撩佢，走開左翻轉頭見到你未走，又會行埋黎搵你。

口桀口桀口桀

兄弟這個髮型很yeah，再咬住條樹枝型過梁朝偉

難得有隻動物肯俾你撩主動行近人，仲要係神獸草泥馬！同佢地玩左好耐，玩到佢食lunch，都係時間去睇其他了。行左唔算好多地方咋其實。

靚鶴

長頸鹿，雖然一樣只可以館內睇，數量多之餘更活躍，有時食食下草會突個頭出鐵欄望望你做緊乜。

唔知叫乜，但一定記得佢，因為完全唔郁乜動靜都冇，話係公仔或者標本都會信。

對於兩個動物園採半開放式設計感到好好奇，大多數飛禽類冇困住，好似隻鴨可以成個動物園四處走，我幾個唔同地方撞過佢。其實點管佢地？遊人多，動物園職員有時會開車，好容易就撞到踩到佢地，同如果唔覺意行左入其他動物地盤，分分鐘死左都唔知咩事。如果話鴨仔呢類只會四圍走，可能都唔叫大問題，但連曉飛的都唔係隻隻困入籠，有時行行下頭頂就會有隻野飛過，睇樣同大細肯定唔係外來雀，而動物園唔大加一過牆已經馬路民宅，真係俾佢地走甩左點捉番？

「有乜咁好望？」

這就是人間天堂

咁大個水池，一隻鴨都冇，得湖邊草叢底有幾隻躝黎躝去。春天夏天黎的話，場面應該會好壯觀。

三傻雀

去到另一個館，有好多特別走地獸睇，好似食蟻獸。

丫隻老鼠都幾Ｑcute喎

有澳洲箭豬，好大隻。卦。我睇相估咋。真正果隻搵唔到。

唔知叫咩，沙漠松鼠？

見到人就會企直起身望實你扮兇。

唔知乜東東（鬼叫全部介紹牌得德文咩），其實好想睇狐蝠。

話講就有，有間夜行獸館，專放各類晝伏夜出動物。

門口有好大隻蝙蝠。館入面只開紫外光燈好暗，同叫得晝伏夜出，就梗係收收埋埋唔會咁易俾你見到啦。行左成間館，泥地地道樹林就大把，動物見唔到幾多隻，好鬼神秘。

獅子放戶外，但去果時老虎未到活動時間，要入佢間館先見到佢。

以為會有大大隻老虎大聲叫撲黎撲去抓玻璃迎接你，點知得一隻老虎，仲要挨住玻璃好鬼姿悠，肯望望你已經算俾面，任你點搞點撩睬你都傻。仲乖過貓。

玩夠了，臨走前點都要探多探草泥馬們同佢地道個別。

已經成班坐低晒，不過仍然好八卦，見到人經過個頭跟住你轉。

啡色幾隻都係冇心機理人，唯獨白色草泥馬寧舍唔同，見到你經過，又會起身行埋黎。

點知，原來係吹夠風曬夠太陽，想返屋企．．．

「好啦！見你山長水遠黎到探我，擺多個靚甫士俾你影多張相啦！」

已經走緊番屋仔入面，知你想影佢，立即企定定加企到靚靚，等你影夠相先至走人，草泥馬真係醒到爆。

得以朝拜神獸，是在德國兩個星期的一大開心得著。

雖則較細，但法蘭克福動物園係德國第二古老動物園，好多地方充滿本土歷史特色，同細好處就係集中比較好行，出奇在比科隆多好多特別款神奇動物，仲要平咁多，仲要俾我撞到隻話頭醒尾的白色草泥馬加影到神獸大頭，黎左德國行左咁多地方，法蘭克福動物園肯定係最超值最開心。

可能之前一日行過大園有經驗，又或者的確細好多，睇多左好多野，但比科隆早走一個鐘，見到張飛咁頹冇barcode，同出口個單向旋轉閘，我諗冇得搏慒入多次了。一穿過旋轉閘就見到一列平房，住宅同動物園只一條雙線馬路之隔，住得好一開窗已經會見到成堆動物，可能會有人覺得朝早夜晚成日聽住獅子老虎大笨象「wooooooowwwwwwww」嘈生晒，換著我可以住動物園站實會好開心。

Episode 12：2.4法蘭克福自由行．博物館行

****************************************************************************************************

Episode 1：從香港的1.27到德國的1.27

Episode 2：1.27晚間自由行+夜攝大教堂

Episode 3：1.28-2.1之做乜鬼野展覽丫落吧蒲去睇show才是王道

Episode 4：2.2日遊海德堡．舊鎮區

Episode 5：2.2日遊海德堡．古堡行

Episode 6：2.2夜行法蘭克福

Episode 7：2.3科隆自由行．火車總站＆大教堂

Episode 8：2.3科隆自由行．動物園

Episode 9：2.3科隆自由行．午＆夜行

Episode 10：2.4法蘭克福自由行．亂行篇

Episode 11：2.4法蘭克福自由行．動物園

Episode 12：2.4法蘭克福自由行．博物館行

Episode 13：天堂＞地獄德遊後記