話話2003的五月四日，晏晝舖頭一個人都冇，二寶樂走左去電梯口煲煙，當佢知道左我放左Slipknot隻Live係舖頭之後，

「Slipknot我未睇過喎！」

即時整熄支煙衝返入舖排排坐睇電視。時值七點八。

當去到第二首歌中段時，左手邊突然傳出巨響！擰轉頭一睇，嘩個天花突然爆左仲瘋狂漏水，見到噉情況當然立即衝出 去樓梯口釘住果塊板度搵管理處個電話打去求助！管理處班友一句「知喇！」就cut左線，跟住立即飛落地庫搵管理員同摷下有冇野有用，結果執左幾本書同一疊報紙。途經管理處見到入邊空左一個人都冇，ｄ阿姐又唔知去晒邊搞乜？

上返樓上之後個天花又再爆多野，今次直頭成個天花跌晒落黎再漏勁ｄ，同之前個情況相比簡直係水喉滴水同爆水管之別！掟低疊野俾二寶樂 之後又再飛落地庫搵野，幾經辛苦搵到入後樓梯先俾我搵到支掃帚同垃圾剷。上返黎見二寶樂拎本書潑極都唔掂就用掃帚同個垃圾剷掃水，一面掃一面趕客：

「唔好過黎！你地走！今日唔做你生意！」

有幾個客唔走留係度就叫佢地落地庫搵地拖，隔一陣佢地就班到幾支返黎幫手。之前我落去兜左成個圈乜都搵唔到又唔見阿姐都唔知佢地係邊度搵到呢ｄ野出黎？見就噉掃都唔多掂，掃出走廊又累街坊就開左度廁所門等ｄ水可以係有渠走。當連垃圾桶都可以飄浮果陣你就知當其時戰況係幾咁激烈。為左等少ｄ水湧出黎走廊，我就去電梯口閂埋度門，幾經辛苦撬走左攝住度門張野再夾硬黎終於扯埋左度門。之後再立即衝入舖頭拎膠袋墊高ｄ電掣，唔係一濕漏電就真係大家攬住一齊死。當然潑緊水果陣都可忘撥個輪：

「老細，希望你間舖有買保險啦！」

之後大家一面潑水阿樂一面勁小人，佢企正係舖頭門口掃而我就將舖頭ｄ水掃出去，野野掃親都一定中佢搞到佢成腳濕晒對波鞋都入晒水。就係唔知點解無論佢走去走廊頭定走廊尾，企係邊度都好次次我都係會掃中佢。掃掃下仲連Fuse都跳埋忝。閂左電梯口門情況係好ｄ，不過水始終係陸續有黎，最重要就係塌天花果度排燈仲未熄（管理處仲未有人上黎都唔知做乜），二寶樂話以防萬一報左警先，既然係噉就立即拎部手電出黎 打我呢個除左細個玩電話之外人生第一個三條九。大佬已經成層浸晒一漏電的話就真係陷家產架喇。電梯口班保險妹仲要連鞋都除埋忝痴線！

九九九中心個接線生問左一大輪問題，又「有冇人受傷」又「有冇人被困」又乜又物之後先駁去消防部，點知消防部果度個阿姐又係問由頭到尾問返同一堆問題一次，再搞一大輪佢地先話

「調配到的話派幾個差佬黎睇睇情況點先啦。」

嘩咁報案要問長問短效率咁低架，如果真係出事的話未答完一半已經死Ｑ晒啦！報完警節目又係潑水，幫手班客都掃到盡索晒氣就，始終佢地係客冇理由叫佢地噉樣白做，加埋當中有個女仔搞到差唔多濕晒身就叫佢地走先。

隔左一陣水終於都停左，再隔一陣就差佬都到埋。你點都估唔到當中一個係我中學同學關堅！（第時見面要改口叫關Sir喇！）而由爆水管到停水都冇出現過之管理員亦終於蒲頭。跟住管理處ｄ人就慢慢熄電掣，唔知點解就係熄淨最後一盞入邊最後一盞燈熄極都熄唔到。點解唔索性一次過熄晒所有 管電梯口ｄ燈ｄ掣？

「要逐個掣試先知邊個掣係熄到呢一盞架嘛！」

有冇搞錯！真係肴架大家成層都浸晒水，就係因為呢一盞燈漏搞到大家一齊死邊個負責？係管理員仍然苦思緊「邊個掣可以熄到呢盞燈」果陣我地就乜都唔理繼續掃水。之後再搞一大輪班友終於搵到個掣熄燈，件事暫時告一段落。關堅問邊個報警，即係講緊我啦就俾左身份證佢抄，噉先有得同佢吹少少水。佢當緊更架大佬冇理由同佢企係度吹卦？最後佢問埋我地址電話就拉隊走人，仲諗住可以返差館落口供拎封「警長信」擺明聽日唔上堂＆唔做功課忝！

水停左，走廊同舖頭入邊ｄ水又大致上掃清晒，燈又熄埋唔使再驚，都係時候嘆返下落去地庫睇睇咩情況，不過行之前都要拎埋ｄ錢先，而二寶樂就搵左個膠袋黎裝佢果對一早（俾我搞到）濕晒既襪。落到去之後發現好似冇事發生噉，係近電梯口果邊因為上層部電梯係噉倒水落黎大劑ｄ之外一切都好似好正常。而最重要果一間結他舖就真係好野，個舖位剛剛好位處事發位置另一個角落頭，就算點浸法佢地都一定唔會有事因為之前果十幾間舖頭一定會幫佢地擋晒。行完上返黎見冇野做就走左去七記買返罐野飲先，本來諗住買對拖鞋換不過一來懶二來貴就廢事。上返舖頭見到有個師傅黎左，佢想開門但係因為塌天花吊燈條軌剛剛頂住度門開唔到，入邊走火通道度門又要係入邊推，電梯又浸晒暫時用唔到唔知點算。見噉情況我就入舖頭拎左支士巴拿俾佢，跟住就閃返入舖隔住塊玻璃睇佢打爆度門塊玻璃移開條軌開門廢事中招。

暫時都冇咩野做就嘆返下先，行行下見電梯口又有聲就立即飛去睇睇，原來冇左度門撐住條軌跌左落地，好在今次冇水如果唔係真係大家一齊觸電。之後問下師傅發生咩事，佢話用黎運鹹水條膠喉爆左。佢都問

「點解唔用鐵喉？」

睇完條喉之後師傅幫手開返舖頭電掣，跟住再行行下老細終於趕到。佢聽到我個留言果時好驚，因為以為出事果個係舖頭個天花板。三個人唔知有咩做就走返入舖頭，跟住二寶樂成為左災後TRHK第一個客買左一隻碟。等緊下一件事發生之時二寶樂講得最多就係呢句：

「想知咩事問我地就最適合，受害人又有目擊證人又有！」

之後管理處終於有返ｄ用處喇派左人黎吸水，不過對我地黎講又冇咩用處因為舖頭ｄ水一早就掃晒個地都差唔多乾晒噉滯。班友係噉倚目及下（都冇得唔係噉倚架喇根本都冇咩水俾佢地吸）果陣有人黎影相搞保險ｄ野，等埋佢地搞埋之就收舖走人。臨走到樓梯口果陣街口果檔彈面彈出黎

「你地影唔影相？」

影左啦不過橫掂我又有相機就再影多次。開機果陣發現

「冇電喎！」

點算？使乜驚我個袋永遠都會有幾粒後備叉電。點解？明顯因為我懶執袋乜垃圾都有，多過因為我精明啦。

事後二寶樂大嗌。梗係啦，唔係剛剛事發前個零字有得睇Slipknot的話，仲係電梯口煲緊煙之佢一早俾個天花責死左。

唔好以為咁得閒打蠟黎，係個地板浸完之後仲未乾晒先咁閃，換著係平時TRHK之地板同你個印堂一樣係發晒黑架。不過其實今次水浸對我地之破壞力係好低好低，就算我地完全唔掃ｄ水出去，
ｄ水都唔會浸得過地下最低果個櫃之四份一，亦即係點浸法ｄ貨都唔會有事。所以某程度上我只係當今次水浸係洗地架咋。我都同老細講

「我地當呢個係『遊戲』黎架咋！」

「挑！咁好玩你就早ｄ影相好過啦！影張浸得勁ｄ既可以呃多ｄ保險金丫嘛！」

九點半影完相就功成身退。跟住三條友走左去開飯同埋「深夜極速完成GS功課」，不過此乃後話．．．