放假了好野。雖然分別唔太大。香港同外國放復活節假嗟，大陸唔係丫嘛，照樣一朝早立即工廠同客大把電話打黎，鬧鐘都唔使已經八點幾起左身開機做野。梗唔會咁順利啦。首先又上唔到網。又打電話去PCCW怒小。以前可能一季一次，而係係每個月最少一次。上得番網已經差唔多食得飯，跟住仲大鑊：唔知乜事駁唔到去公司部機。因為幾多重要野跟緊，琴晚返到屋企已經特登試連線一次，明明連到點知而家第二朝真係要做野時唔掂。仲有幾封急email要send添。好在我都知自己黑仔，琴日臨放工已有預感會出事，立即將所有file backup晒落隻手指度先，果然中招呀而家開唔到公司部機都可以用自己個email做野頂住先。復活節假又點？匿埋屋企，咪又係朝九晚六？
不過就算想出街，一樣冇行。自從放左成個禮拜假，廢事老細詐型，復活節假前返返工，行左幾日，本來好番大半的左腳立即腫番晒，仲要抵死到放假前果晚放工走去尖咀，買左飛睇《大都會》嘛，一個禮拜唔夠之前先豪左三舊水，而且幫Stan哥買左飛更唔放得飛機，襯行到一定要出啦。行得慢搞到趕頭趕命連食個Burger King都食得匆忙過人，開turbo夾硬用番平時步速，去到文化中心仲要上上落落大量樓梯，返到屋企隻腳齋睇都睇到腫左幾個碼，腳爭腳趾僵到郁唔到，隻腳包實晒磨左成日，除隻涼鞋除埋隻襪，大塊皮爛晒仲成腳勁爆膿瘡，直頭睇鬼片聽death metal咁恐怖，如果影張相擺上Facebook，會俾人投訴到Facebook ban我account。所以今個復活節假，一連五日都會／要留係屋企，要出街都應該因為發炎到好唔番要搵醫生求救。本來諗住搵日去睇《不赦島》，一日比一日少場套戲未必過到復活節添，睇黎都係冇行。
「《大都會》終極修復版，最大得著唔係睇左套經典電影，而係完場後樂團指揮解答觀眾問題，講解番點樣帶住隊交響樂團現場同套戲一齊夾、夾得咁合拍。雖然論戲，《Metropolis》層次實在太高，都係DREAM THEATER個《Metropolis》較適合我。」
「睇戲，始終打打殺殺好先係我杯茶。豪華下期上映《未來警察》搭《人神魔戰》，有冇人有興趣陪我終極歡樂早場，搵個禮拜日十點十二點直落兩場，一次過睇晒兩套（爛）片？」
因為日日匿屋企咁得閒，除左打機睇書睇戲，就係寫野。近來Yahoo blog個系統發生左好多問題，不如講講今期流行的spam。到而家我都唔明點解Yahoo blog可以有咁多垃圾流言。大半年前開始出現，當時只得放成堆產品相擺明賣廣告，又或大段字內藏勁多鹹網賭網download網link，情況未算好嚴重，因為廣告都係經bot自動登，spam程式睇實blog排行榜，上得榜即知名度高人流多，bot就會做野自動去榜上有名者最新文章登廣告。果陣唔多關我事，因為死親都係每日瀏覽人數幾百甚至四五位數字地盤如明星blog，我個blog得幾十人睇，只得spam程式大包圍random出廣告時先間中中招。後來出現金句情況立即嚴重十幾倍，基本上冇一個blog網誌同留言板未試過出現扮晒關心你扮晒有哲理但完全九唔搭八的垃圾留言，得字又唔覺有link冇乜宣傳意識，而睇文筆明顯來自台灣，點解會搬到黎香港就唔鬼知，但當金曲spam入侵大家就灰了，因為Yahoo唔識點杜絕只有不斷更新blog系統，結果成日出現問題，好似打晒篇網誌發佈時話「包含spam字元」唔俾出，就算出到又會話「正在處理中」不斷reload但死唔登，如果停佢之前打ｄ野就會全部冇晒，一時間玩死所有人。就算想簡簡單單留個言都要驗證碼，假如你咁唔好彩唔記得左打又或者打錯左，唔好意思你頭先打落段留言已經被自動刪除了請從頭打過，而最戇居係好多時就算你打中晒冇錯到，都要入最少兩次至留到言，換言之唔記得copy定自己段留言就恭喜晒冇入錯驗證碼唔代表大晒。加上事實證明搞咁多野只為大家添麻煩，根本完全阻截唔到垃圾留言，後來Yahoo直頭放棄埋驗證碼系統，對整個垃圾留言同廣告留言現象持消極放棄態度。
「所以我成日覺得ｄ垃圾留言係其他廠家的商業戰兵器。知唔知幾多人自從垃圾留言殺之不盡，轉投Xanga同Sina陣營？」
自己地頭情況素來屬可接受程度，每日清清唔算太麻煩，有時間有心情仲可以同班bot玩下野添。點知我居然有幸做到「明星」。幾日前出現一個非常不尋常狀況，兩三日間瀏覽人數居然可以去到一日二千幾，自從廣告程式當道，Yahoo blog人流計算已不能盡信全無意思（呢個亦係有ｄ人唔再用Yahoo blog原因）（同你真係恨人流，係可以搵外掛改的，我見過有個blog一篇網誌都冇，累積瀏覽人數居然有六位數，可惜假的真不了呀），加上Yahoo blog系統間唔中就會計錯數或唔計數就唔再留意。跟住就仆街了。可能二千幾人次已達「榜上有名」級數，開始勁多垃圾浮現，第一次有bot上我個blog登圖文並茂廣告留言，消聲匿跡一排的鹹網link留言都蒲番頭，金句spam更加多不勝數，由以往一日清一次都唔叫密，到每個鐘上去都有幾篇新野迫住不斷大掃除。我相信係不知名原因令好多bot 睇中我個blog，跟住一齊入黎推人流再登廣告，越推越高又引到更多bot入黎，最後惡性循環導致此下場，好在我一向勤洗垃圾留言，戰鬥左兩晚，人流終於回落接近100%去番每日幾十人，垃圾留言終於遠－ ．去了。
「始終劉Sir個網，冇人睇先至係正常嘛！」
其實我都有諗過轉用其他blog。最初會揀Yahoo因為熟開一班都係用佢，但我第一日已經覺得Yahoo blog個介面真係超極廢，尤其似我呢種第二個介面整好後搬字過紙黎呢邊排版，系統上遇到之問題同限制、每次劉Sir個網內容移到劉Sir個blog需要多少時間，你唔會想像得到。加上幾個禮拜就黎一次只有退步永無進步的系統更新，實在非常非常難頂。只不過一直用儲存左太多文章同留言，想走都冇得走，唔係一早過左Sina啦，介面好睇過又好用過Yahoo，同對比下Sina果邊修養水平普遍比Yahoo高，比較認真冇咁純粹消閒。可惜而家講乜都冇用了。
慢慢重新籌備每週一唱片大行動，其實本身唔係出呢篇，不過個幾禮拜前睇完古幽靈場show完場後Oliver叫到，加上斷左腳之後好多時間聽歌，平時一首歌的路程而家可以變成一隻EP路程，每次出街就會不斷地聽古幽靈隻single，日日聽幾次順便寫埋。
「古幽靈場show隊band用中英德日四語宣傳，小弟不才只曉中文英文，還請見諒。至於場show，真係有排先寫得起。」
題外話：小弟有幸成為網上音樂雜誌Mugazine編輯，已故專欄《Kowloon Metal City》暫時性重生，有空請去支持一下，雖然主要是電子野，相信劉Sir會係難得之band sound編輯、更加會係唯一一個寫metal。短期內只會將舊文擺番上去，老實講齋舊文都夠用半年啦，仲未計果差唔多二百篇metal碟評喎。不過多個職位，即多個動機keep住定期寫新野。每週一唱片大行動可能真係會復活架。（但，幾多人恨／理？）
住左五日醫院，終於出廠了。可能是《大都會》惹的禍，傷腳之後真正叫出街只得一次咁大把，就搞到入院了。歷時半個月，不如從頭到尾講晒成個故仔：
三個禮拜前拗柴，放左成個禮拜睇跌打敷山草藥，照計應該越來越好，點知師傅反而將我隻腳包得越黎越大：
抖左好多隻隻腳先叫做消左腫不過仲未太行得，不過一返到公司問左會計靚女先知公司個保險plan － 同好多保險plan － 原來唔包跌打同中醫。即係我睇左六日跌打，一蚊都claim唔到。所以跌打左個星期隻腳細番好多都轉睇西醫。正好我屋企樓下就係播道，照過X光骨冇野係發炎累事，理論上食同搽多個禮拜藥就大致搞番掂。見冇乜事就身痕返工啦，仲要睇《大都會》呢，點知正常番兩日隻腳就爛晒，食晒藥都冇好轉復活節去覆診，醫生一望就
「入院訓番一兩個禮拜啦！唔使睇架喇！」
已經派埋護士即場夾我上房架喇，好在間醫院近我屋企，立即飛番去執野先啦唔係點頂咁多日？除左帶衫帶沖涼野，撻埋細妹部手提電腦，拎定書呀小說呀漫畫呀大量野，呢ｄ先係重點唔係點消磨時間？真係睇電視聽收音機過成個禮拜咩大佬！
醫生話細菌感染發炎發到口服藥唔夠力，次算打針打籮柚都唔夠，要直隊血管先得。因為發炎到幾嚴重所以勁發燒（但我一直唔覺！），一訓低立即成班護士同醫護員圍埋黎，左邊姑娘隊個針頭落隻手度痛到爆，都唔夠右手抽血第一次篤到嗌救命先話「枝分篤唔正血管」二次先隊得正咁大鑊，再加多個冰袋，四個鐘頭食次藥、八個鐘頭右手針頭打兩劑大到見到都驚的藥水入去，每幾個鐘要量體溫量血壓夜晚訓緊覺都照摷醒你，第一日就係噉過：
我只有好細個好細個時試過一次夜晚盲腸炎入急症室，都唔使留院過夜，今次可以話係成世人第一次入醫院。訓四人房，不過星期一5/4/2010復活節假入院，因為紅緊假冇乜人入院，頭兩日我一個人包晒成間四人房，冇人爭廁所冇人爭沖涼冇人嘈加冇人嫌我嘈簡直住私人病房咁嘆。就連套病人睡衣都非常新淨。
「姑娘，乜醫院衫都可以乾淨到冇人著過噉？」
「梗係啦！我地醫院得加大碼你著得落咋！平時邊有人著咁大架！」
曲線話我肥阿姑娘。搞到我好唔開心。係噉玩張床。自己第一次入，親戚都唔係成日話出事，我對醫院病床印象仲係要人幫手較高低的十幾年前世代，原來換晒電動床了而家幾個掣升高飛低想訓想坐想嘆乜都得十分開心，問問價，萬七蚊一張唔包床褥，最重要電動床牌子係 Avantgarde。努力工作了要。
因為頭兩日仲係紅假，可以咩都唔使做齋訓覺齋睇電視，今個禮拜學校放復活節假，朝早電視好多動畫睇，醫院又包早餐成房我霸晒，食完抖夠躝去沖個涼再訓，訓醒屋企人整好飯拎過黎，如果叫醫院飯一個五十蚊呀頂你！食飽飯就開機了。原來唔止電動床，而家醫院仲有得上網，不過同醫院飯一樣很貴日租一百，租兩日線夠我屋企成個月網喇，好在老細話肯俾錢包我上網先有得玩。條線唔係好快，本來諗住入院咁多時間，又終於遠離Diablo，大把時間寫野／寫碟評啦？點知仲大劑。近來鑽研RSS，條線上網慢反而消磨更多時間。仲帶左大量野去睇，齋睇漫畫都夠渡日辰。同最緊要細妹部電腦係IBM大機，完全唔識用個keyboard，部機前排壞左整番變左Windows 7，個中文輸入法唔知點解搞到勁麻煩打唔慣，到頭來咁多日夾埋差唔多一隻字都冇打過。講緊自己野嗟。香港地復活節假一連五日，大陸唔係清明完就返番工，禮拜二已經有客打黎，到禮拜三正式全世界復正，仲大鑊八點幾大陸已經可以打電話call醒你仲早過姑娘，訓醫院一樣朝九晚六，甚至更夜，試過做到夜晚七八晚，平時返工就可以話「六點後我唔係公司」唔做，而家ｄ客知你成日對住部機仲大鑊擺明幾夜佢要你做野都照call你，結果入院本應係俾我抖同嘆，反而做得仲多過、辛苦過返工，一連幾日都係八點幾摷起身＞起身刷牙沖涼＞食早餐食藥順便開機睇email＞做到屋企人拎飯俾我＞食住飯都要做鬼叫部機load得慢＞晏覺都冇得訓踩到六點＞通常夜晚ｄ客仲會打幾個電話嘈你，我試過部電話一日要叉兩次電，俾班友call到冇晒電黐Ｑ線。唔係老細點會咁好死俾錢我租線上網呀，就係等我斷腳都要做公司野呀。噉都叫住醫院養病、噉都叫做「請假」，先最吹脹。夜晚睇書睇漫畫時光才是生活。
「結果咁多日做最多就係公司野，計劃中之show同碟評全無進展，唯二得著是大概明白點樣用RSS，同睇左咁多日，黎緊可能會開先河寫漫畫，因為我搵到個好過癮的開頭。」
星期一晏晝入院，經過多日黎各位姑娘們悉心照料（公院唔知，不過私院姑娘真係大半都後生又見得人又肯同你玩的，果真一分錢一分貨），訓到星期六隻腳終於似番隻腳，不過搽左幾日殺菌膏殺到全隻腳掌黑晒，因為ｄ藥殺菌殺到基本上成塊皮結成一大塊焦（請想像一下，其實幾撚恐怖的，將你塊皮換成一塊殼），所以行得番路但隻腳硬晒腳趾都唔多郁到行得慢，同仍然未消腫／未去焦到著得到鞋，但頂唔順之前三日黎大陸客無盡朝八晚八煎熬，跟住個禮拜公司擺fair更大單，同醫生講快ｄ放我走算，我住咁近有乜事行個零字搵到佢地求救啦，同最重要，真係好鬼貴。大概計計今次斷腳條數，你就會明點解我咁想快ｄ出院，同點解要買保險（我冇買）：
跌打 = $400 x 6日 = $2,400
睇西醫+照X光 = ~$850
入私家醫院 = 房租每日$550，醫生費每日$550*起*，加化驗費、療程、藥費、雜費，埋單~$15,000
帳面 = $18,250
仲未計同公司請左近兩個禮拜假。
斷一斷腳，就跌左兩個月人工。我從來唔信保險，因為永遠錢你俾足加有排俾，但真係問佢拎錢果陣總大把理由拎唔足甚至拎唔到，聽 漢 講過，佢而家教緊體育，因為間唔中就傷、耐唔耐就要入院，明明俾足錢供足年期，但間保險公司受佢保之餘，可以出封警告信話「你claim咁多次咁多錢，唔該你第時唔好再受咁多傷」咁戇居，喂而家我俾錢點解我唔係老細？加咁大個人都未出過意外，更加冇預過買住院險意外險之類。公司份保單主要包門診，咁多夾埋可能幫我拎得番一千蚊都冇。基本上呢萬八係硬食。大家可以諗下，係咪時候、係咪需要買番份醫療保險。而我，仍然唔相信保險。
「係時間重溫《恐懼鬥室》第六集了大家！」（仲未寫．．．）
拗左柴到而家差唔多成個月，請左幾個禮拜假豪左萬八蚊（唉），總叫搞番掂隻腳，新一個禮拜旋返工了。醫生建議就算唔住醫多幾日院（梗係唔住，貴到），最好留係屋企養多幾日病，我夠知要抖抖啦，老細同大陸班客仔唔係噉諗嘛。訓醫院一個禮拜的經驗，當你全日黐住張床冇得走時，「唔係公司」、「我出左街」之類理由通通無效，夜晚八點鐘之前休息養病此回事係唔存在的，唯一叫較安慰係公司包租線上網錢，不過「放假」仲做野多過返工時，俾你免費上網又算係乜計番晒咪仲蝕？出左院留係屋企唔會好得幾多，全年假期又差唔多玩晒，幾大返左公司先算啦。另一個原因，係今個星期公司會過會展擺fair，隻腳而家噉，我成為reserve member留守公司。第一日全公司走去砌場，跟住全個禮拜每日都得番一半人唔夠，唔代表好舒服照樣俾客纏到七點至放得工，早知扮晒野過會展fair好過啦點遲都一定早過而家放工。
而家返到公司，最安慰最懷念，係終於有番啖好食。劉Sir肥肥白白（唔白，其實好黑，人同運都係），全靠公司負責好多間食過返尋味的茶餐廳，同各位係唔係都分一半飯俾劉Sir先的女同事。差唔多半個月未食過公司飯，重投垃圾食物茶餐廳懷抱諗住揀食乜會好傷神，點知望見個餐牌十分一秒唔使立即揀好。
相當奇特的一味。粟米煙肉乜乜飯／意係非常普通的茶記飯款，但個乜乜通常係石班、扒甚至芝士之類較正路較西化，會用炸豆腐配粟米煙肉我真係成世人第一次見。唔知係果間茶記獨門秘方？定係寫餐牌條友求祈，寫晒印晒出晒街先知，唯有柒左都照做？邊個原因都好，最緊要結果係兩樣都好食，呢間茶記粟米汁整到好甜豆腐又炸得夠趣，而家撈埋梗無敵啦，下一次再有時食夠兩盒先得。同要繼續發掘公司附近茶記仲有乜呢類神奇野。
「腳傷半個月令我食少左野、食多番屋企飯，瘦番少少。睇黎好快又會暴肥。」
早排因為薩頂頂演唱會特別寫番佢兩隻碟，老實講唔覺得香港有好多／幾多人會留意會聽佢，我從來相信如果佢唔簽大label的話，好大機會成為又一個Vitas，即網上熱傳後forum Facebook各大專家紛紛轉載高呼「我發現／我搵到」進而變成一個underground cult indie潮物，而家簽左大label「挑pop野」「挑搵錢」自不然唔多理，雖則第一隻碟論音樂同製作根本indie，同好矛盾地同一間大公司擺到明當成潮流pop野谷的表面indie band（好多甚至表面都冇），同一班人又可以無止境地（盲目）吹捧追隨。呢兩點將會另找機會再討論，同我係薩頂頂有得簽我都簽大label啦專家們講乜點威係佢地事兩張碟夾埋名同利知唔知賺左幾多？
出乎意料在於，《萬物生》時討論到當年丁菲飛玩中樂new age，冇乜人理薩頂頂，但成棚人走出黎講丁菲飛。七年前《樂源》一出立即飛出去買快手寫埋，寫完撞正細妹學校音樂堂有個project要做樂曲賞識，唔爭在拎埋隻碟幾首歌黎幫佢做埋份功課。而《樂源》屬於難得寫完碟評之後，至今時今日仍會間唔中拎出黎重溫之常聽類唱片。好多碟真係借番黎甚至買番黎，聽（十）幾次到寫好，就接近永不超生唔會再拎黎聽甚至連自己有呢隻碟都唔記得左架喇。
因為頭兩隻碟實在鍾意，音樂底玩好多新意，只不過同樣《萬物生》時講過，對好多香港人黎講一掂親中國野就好易俾人話娘話唔掂，佢唱歌同薩頂頂一樣玩民族feel（當然未去到薩頂頂咁盡仍然好pop，但已夠趕客），又冇樣搭救，當年唱作亦毫無價值全無代表性，仲要做歌手你拉二胡做乜春？好難怪兩三年仍冇乜進展，而《樂源》去得更盡，明顯盡地一舖搏奇招彈起或打入新市場、打入國際。唔係冇人支持丫跟住果年文化中心同SECRET GARDEN開show，開兩場我都買唔到飛，就連學校修音樂有窿路優先買飛果班都買唔到，可惜人在香港，隻碟點勁都冇用，擺明玩中樂玩new age樣只會俾人話「另類」，出左唱片公司都差唔多完全唔宣傳，就同佢退出樂壇一樣咁無聲無息，隻碟見街冇耐已經得番好少地方搵到。實際上而家我仍然唔太明點解佢會選擇黎香港，反正兩個地方都由零開始，當丁薇大陸撈得唔錯時，佢同樣留守內地甚至姊妹檔式發展，成績同前景點都一定好過走到自己人都冇得爭／廢事爭的死寂香港樂壇中冒險。
事隔多年，因為薩頂頂諗番起丁菲飛，寫佢兩隻碟時再度重溫《樂源》，篇文出街後大家關心佢多過主角，既然篇碟評已經七年前，順手拎出黎執執佢update一番，雖然內容差唔多，但用而家寫作手法加番史料同時局評論立即長晒，舊時好多碟評只有而家寫開一半甚至三分一。呢個亦係而家少寫碟評原因：壓力大呀大佬，已經好難再似以前百零幾百字寫一隻碟，過唔到自己果關呀。寫到自己都唔敢寫咁多，實際ｄ，不如聽聽歌。借機，重溫番兩首丁菲飛。
雖然譚詠麟唱，丁菲飛全靠呢首歌出道，坦白講聽左廿幾年都未覺得譚伯好識唱歌，耳中佢係歌紅人果種歌手，而呢首就擺到明紅起果個唔係佢啦，如果冇左丁菲飛chrous、冇左二胡solo，首歌當堂冇晒值得聽的地方，我亦一定唔會理。
「唔係講笑，《自選角度》係BEYOND與樂隊沒落至謝安琪出現前，冇幾多首我真心鍾意之香港流行曲，甚至係最愛之一，而家仲聽極唔厭、每次一聽就連播幾次先夠癮。」
編曲簡直一流。遺憾在，上番YouTube睇個MV先知，原來．．．
「首先，要非常特登嚴重鳴謝YouTube同唱片公司落力剷片，全個YouTube都搵唔到原版，叫見得下人只得呢個live版。不過都同原版差得遠，因為首歌《Never Never》本來係synthpop。」
「相比個official live，我更喜歡這個cover。好在唱片公司只顧自己，完全借用首歌先剷先小，自己唱歌仔cover呢ｄ濕昇垃圾不屑去理，大家先至有得繼續欣賞。」
當我一廂情願以為香港流行曲深淵期有番首驚人創作時，原來係外國歌改編，衰ｄ講句：難怪可以聽到今日仲未聽厭咁成功。不過香港人亦非一無是處，將synthpop變成rock，再加一點點中樂，撇除譚伯把聲同唔算特別的歌詞（唔係情題已經好足夠了對我黎講香港流行曲），聽過咁多個版，《自選角度》乃個人首選。又要多謝丁菲飛啦。
另一首遺珠《同步過冬》，比環球懶係玩花臣叫齊全label歌手crossover宣揚正能量的《Uni-Power》早十年的正能量歌，其實麻麻不過唔會反感間唔中播下聽聽又覺得幾OK，肯者因為由我從來唔妥的甄健強填詞（算佢填得較似樣的一首了）。除左丁菲飛仲有黃貫中，仲有哥哥，同最重要仲有臨記。MR.之前環球曾幾何時都band過下rock過下，噉梗係話咁快就收檔啦。因為首歌咁多部合唱，大把嗌位加埋黃貫中，曾幾何時係爆K首選，點完成班人玩到全層爆粗。懷念也。聽完《同步過冬》，再聽《Uni-Power》首主題曲《人人英雄》．．．唉。旋收皮。點解而家ｄ歌可以白痴咁多？
Facebook樂評回應其中一個啟示，係唔少人事隔多年仍記得、仍支持丁菲飛，奈何可以點？Facebook幫佢開個group可能係個好方案，一次過搵番佢班fans出黎，但自問未夠班、未知得夠多，叫我吹吹水可以，呢家野幾時到我。寫完《樂源》想煲埋頭兩隻碟，發現搵都搵唔到，兩隻碟咁多年前買冇MP3，屋企茫茫碟海一隻碟過幾日已經搵唔番啦何況而家？
「如果有人有佢頭兩隻碟MP3，請send番俾我。買碟買到搵唔番隻碟、有碟都冇得聽要靠人send，都算on9。」
5 years after the misinterpretation of silence and Its disastrous consequences, and unsuccessfully coping with the natural beauty of infidelity, Peter Steele is dead again.
In praise of bacchus, white slavery and a dish best served coldly, sinus, liver, lung...everything dies like burnt flowers fallen before the blowing of summer breeze, the befalling of october rust, and the Glorious Liberation of the People's Technocratic Republic of Vinnland by the Combined Forces of the United Territories of Europa.
48 years of "we hate everyone" and "life is killing me" agony meet all ends on 2010/4/14.
Tripping a blind man without prelude to agony, (we were) electrocute, haunted. No more creepy green light, nor red water. Just some stupid tomorrow. The dream is dead.
Skip it.
記敘香港少年鋼琴天才黃家正六年間「想做人」之土產紀錄片《音樂人生》，繼得幾個院有得睇到全港院線同步上映，繼小本製作但連續幾個月場場爆滿收過百萬仲勁過好多港產片，繼由副刊版跳入娛樂版，再獻新猷是成為金像獎最佳電影五強之一。拍紀錄片拍成噉，都算個香港地奇蹟卦。咁大單野，蘋果娛樂版當然再度訪問張導演。雖然我仍覺得套戲只係「給上流社會人士看的獨立電影」，窮一班地下一班indie一班睇感覺絕對冇咁大，未叫好受都會係2009個人最愛最重要香港電影，最鍾意唔一定代表最好的。入埋金像獎爭最佳電影，可以有兩個詮釋：1) 套戲的確咁強。2) 2009本地電影創作與市道好弱。前者絕對冇錯，但我好衰我是後者的擁護者．．．入到選一回事，我點都唔相信佢會拎到最佳電影，睇睇另外四套：《赤壁．決戰天下》得個殼，《新宿事件》偏激進，《竊聽風雲》港味最重但帶點異類，《十月圍城》無論台前幕後還是所有計算都係冠軍格，單只同《十會圍城》鬥，《音樂人生》都冇理由鬥得贏卦？就好似HIBRIA同Lady Gaga，點問都係HIBRIA勁啦，灰在邊個多人識ｄ多人鍾意ｄ先？
蘋果新訪問內容冇乜大新意大啟示，反而有一點睇完好想講。上畫初期導演提到花左好多年時間製作、籌集資金困難，要多年後CNEX注資，套戲先堆到尾上到畫。果陣以為好大陣仗心諗會係六位數字二三十萬起碼。直到入選金像獎再受訪，終於開估：「前後經歷六年製作，製作費不過 9萬元」，就連最開頭一齊去歐洲錄音，張機票都係人地讓出唔使錢。背後理由，係導演自己點鍾意電影，都唔會用自己錢拍，一定要靠人投資。我相信佢絕對唔屬於生活艱難、動輒需節衣縮食維生養家雒人，甚至較為小康。而九萬蚊完成一套能夠如此成功之（另類）電影其實真係唔算花費好大，特別去到佢個層次而言。對於《音樂人生》觀感，為藝術俾錢仲多過俾自己的我，又再改變一點兒了。
「所以咪話《音樂人生》是屬於上流社會的獨立電影。實際上香港地藝術界，主流好、地下好，願意為自己支持喜愛之藝術犧牲自己生活素質者，少之又少。」
單單一個星期二，發生好多事。唔係講癱住隻腳都要返大陸見個客，而個客叫Steve Harris；亦唔係講《Kick Ass》，我冇睇過原著漫畫，或者始終揹住Mark Millar個名期望太高，到頭來似套兩頭唔到岸的《蜘蛛俠》，「屌爆俠」之名比套戲更kick ass，不過西片黎講少見動作同場面設計咁高水準，選曲更是一絕，如果肯去得更盡，再卡通化漫畫化更好，反正點都三級架啦唔爭在。
講果單野發生於皆旺，聽落幾大，但實際上又唔算咩大單野，尤其在我已退休身份而言。大陸返到香港，上番公司做陣野，就收到稀客Rock爺電話：
「喂！TRHK俾人爆格喎！」
「咁過癮？」
過癮之處有二。一在本來我今日都諗住上TRHK一趟，夜晚新世紀睇七點三場《Kick Ass》嘛，加上有野要搵而家TRHK老闆娘（呵呵）阿Oli姐嗲嗲，一定會經皆旺架喇放工之後，點知好日唔上，我一話上果日就發生咁大單野，事實證明近劉Sir者黑呀大家小心ｄ － 但你亦可以話，而家隻腳仲未行得兼剛剛返完大陸，唔係皆旺出事令我上去，可能放工後我會選擇返屋企而非《Kick Ass》。另一過癮，都唔使我畫出腸啦：
「唔係卦？爆格你揀TRHK黎爆？你班賊傻架？」
就我綜合各方意見，成個故事大概係噉：琴晚十點幾收舖，直到十一點拉閘，看更同隔籬玩具舖都在場，斷估唔會係之前一晚出事；第二朝十一點開門，商場開冇耐看更巡場，就發現俾人爆左鎖，跟住管理處call人黎，人齊後報警套指模睇番閉路電視，擾攘一輪好日唔出現的Rock爺又會蒲頭，就call我，我放工就仆上黎了 － 癱左隻腳再由大角咀飛出旺角，「仆」是一個很合適的形容，雖則仆得點快都係趕唔到七點三場《Kick Ass》唯有睇九點半場。有乜損失？回回帶重溫Oli姐姐晏晝同差佬落口供時：
「老闆娘，你點算左間舖唔見左乜野未？」
「等我睇睇先．．．貨冇唔見到．．．之前果晚剛剛入左數，唔見左幾舊水現金．．．仲有一部電腦，不過舊到去鴨寮街收買佬見到都講粗口趕你走果隻，都唔算咩大損失。同埋要俾多幾舊水整番個鎖囉。」
「即係夾埋先冇左千零蚊左右？我做左廿幾年差佬，做親爆竊案單單都幾叉野，你地幫我破左最低紀錄。你等我一陣，我要call番總部．．．總台，我可唔可以告佢地浪費警力呀？」
我就灰ｄ，部機入面ｄ野野村病村同無人島物語未backup添．．．冇事冇事大家乜都聽唔到。不過老實講，都唔預會追得番架喇，你諗下，短短一開商場果段短時間，有閉路電視睇實、有保安巡場都爆得到，同唔拎貨只偷錢同電腦明顯專業作案，旺角區又咁雜，人地係玩pro就算俾你影到佢個樣又點丫捉鬼到咩。同埋，老實講，坐皆旺咁多年，我一早對皆旺物管失望至絕望，冬天開恆冷氣夏季完全冇風你行過呢ｄ商場未？見微知著呀。你諗下，一開商場保安就行第一更必，樓下另一個坐管理處，有閉路電視睇實、有保安巡場都爆得到，你話班實Ｑ成朝做緊乜？噉佢地失職，係咪可以追究呢？當然呢ｄ野發生左佢地唔會揹鑊架啦，一早有過前科，七年前皆旺試過爆水管，仲要係正TRHK隔籬電梯口爆成層樓浸晒，話有保險會賠結果咪又係不了了之？所以爆格好似好大單野，一來冇乜真正大損失（ｄ四仔．．．無謂再提），二來一早睇化皆旺，到頭來又係成班友食外賣發癲玩怒吹水吹到全層小，又係玩成晚接近冇人入過黎，一如以往冇改變過。是晚蒲頭仲有Rock爺同76兄，吹吹水，發覺元兇可能就在眼前。Rock爺今日睇準時間打俾我講我知皆旺發生呢單野，並非常熟悉同類爆竊案手法，76兄則對整件案件過程瞭如指掌，口稱虛構案件重溫實則身歷其境先可以咁得咁詳盡咁仔細。
「《繩之於法》講過，犯案者通常作案之後都會返回現場，甚至事後自行舉報案件及談論內容以營造自己清白形象。咦，中晒喎！」
見行事方式，同只拎最易拎同所謂最值錢野而唔係任何碟或貨，相信唔係熟人所為 － 我唔敢講一定，世事乜都有可能。先講番另一個TRHK的失竊故事，我唔記得以前有冇講過喇。發生於同上面提到爆水管差唔多時期早少少啦，果時Soni仲有平日晏晝或星期六日得閒時落黎睇舖，有次執緊野因為背住門口睇唔到有人入左黎，佢起身擰轉頭，睇見條友拎住大大棟碟，仲要抵死到企係度等電梯完全唔擔心俾人發現，唔捉佢都唔得啦大佬。當你作為老細，有個賊擺明入你間舖頭偷野，捉到你問佢野佢唔出聲唔應，你會點做？報警？我絕對敢講香港冇第二間舖頭第二個老細會做同一樣野。
「拿！而家我俾廿蚊你，你落去樓下麥當奴食個飯，諗下自己點解黎緊應該做ｄ乜！」
去人地地方偷野，唔使上差館，唔使俾人打，仲有錢收。問你死未。所以我話全香港唔會有第二個地方會發生同一件事。問題係香港人香港地文化完全是另一回事。我可以話你知，其實呢類大小失竊事件，以前唔係冇發生過，就係因為好多人懂得利用／濫用呢一點：
「你好人丫嘛？你信我丫嘛？噉我仲唔襯你對我冇機心冇戒心時偷呃拐騙做到足咩！」
獨立音樂、搖滾、重金屬其中一份精神係講求信（唔係一話rock一話metal就乜都係反的），但你睇番香港band壇經常是非比音樂更得人注意，而聽音樂追音樂一班絕大部份人實際上為乜去聽音樂亦人所共知，既然如此，你都唔使旨意或預期香港信同支持，等你唔為意甚至為意時拎盡你著數搵盡你笨。我咪成日講其實香港根本不存在獨立文化，原因之一，好多人想投入獨立音樂卻似住半山唔肯付出唔肯蝕底，到頭來人心之商業陰暗面仍是主導。如真有獨立文化思想，此類個案根本唔會發生，而非如現在比你想像中要多。得多。呢個亦可能退左休之外，今次TRHK俾人爆格，我唔再覺得點樣大件事，唯一驚奇可能係
「咦，隔左好多年，終於再出現一次唔關音樂界人士事案例。」
真諷刺。要講有好多故仔講，好耐之前有講過，好多野都有計劃，《2008 Retrophrenia》後半從音樂進入文化部份，會將咁多年黎TRHK所見所聞一次過全部回顧。當連而家好多碟、好多戲同好多show都冇時間寫時，只有希望有朝一日可以如所願寫到呢個地步。雖則果陣，可能已經一早離開左本地獨立／metal文化。
「喂！好耐未有新野睇喎！」
係呀。好忙．．．地打機。前排怒煲Diablo，自從上年開始玩番，玩足成年都未完，因為根本唔會玩得完。好大劑。幾經辛苦擺低唔玩，身痕上網摷flash game，仲大劑：
呢幾日其實寫緊show同碟，本身前日有野睇。即係如果我搵唔到呢隻Robokill的話。玩下你就明點解咁大鑊，係我玩過製作及系統最專業、已超越flash平台之flash game。呢個網上版只有得玩mission 1頭四關，想玩落去唔係冇可能的，祖國咁強大．．．
「而我，已經爆左呢隻打緊第二集了。死未。與其繼續日日問點解冇野睇，同我一齊打Robokill好過啦。」
好忙地Robokill中，都要玩少陣寫寫先。近來非常忙，雖然前排會展出show唔使殘廢的我去，跟開幾個客夠煩死我，又多客揀呢個時候上見面開會，不過今日個客夠特別。話說鳳凰衛視某日見到我公司個網，就send email黎約上去電視台開會。香港地除非有線或者屋企／大廈／屋村有裝衛星天線，唔係都唔使旨意睇到鳳凰衛視，咁多年黎冇睇過幾多次，只知大陸好大，官方資料係「繼官方新聞網後全國第二大」。我都唔多明搞新聞仲要咁大個台點解會搵著我地。不過聽落幾過癮，有得去點解唔去？
地址係大埔工業村，所以今日好懷念，條路正正同我以前返教院一模一樣，只不過當時四年去到分叉路都係直行上山，今日第一次轉彎入工業村。好鬼大。唔止成條工業村，去到鳳凰衛視電視台（而家好似全部電視台都搬晒入黎大埔？過少少就係亞視了，無記錯無記都係），外面睇唔太覺可能因為只見到一面望唔晒佔地幾多，入到去先誇。大堂唔算大，不過樓底勁高同勁豪華，有個拍得住各大消費區商場擺戶外的巨型電視（當然係播住鳳記新聞，無記咩唔通），威水到reception的姐姐仔們每人有個布幕擋太陽十分過癮。跟住經理落黎帶上樓，未講公事，先做嚮導帶大家遊電視台先。以前紅磡開台，因為租貴到大台都頂唔順，大埔又大地方得多，就買左塊地成個台搬過黎（呢個可能係咁多電視台選擇進駐大埔工業村原因？），未去過其他電視台唔知，不過作為非以本地為主要市場之全國性大台加新建成，應該係最摩登一家，睇人地咁多間廠、幕後做野，仲有得新聞報導期間中距離一睹女主播芳容（這才是全程重點），加有個十足華爾街交易所的資訊中心，就連員工休息室都係開揚cafe設計師型檯凳裝修加茶水部，落地玻璃推門一出就係大花園。最吹脹係去到經理地頭，一間圓形辦公室，外圍間房中間係個三百六十度酒吧式茶水吧，去到第一件事「飲杯即磨咖啡先啦！」似入餐廳飲杯茶多過返緊工。我未試過去香港任何一個地方、一家公司會有呢種國際性、外國feel。請恕小弟大鄉里出城。而會搵著我公司，因為新台開張黎緊會開放俾旅行團之類參觀，精品部正開發新類型產品，就上黎大家傾傾了。但正經野話咁快就傾完。似乎之前電視台一朝遊仲花時間。本來可以更多的。
「其實仲有好多地方未行架！不過見你行動不便，又唔係度度有電梯，就廢事帶你去啦！」
頂。灰。早知唔拐杖篤篤扮冇野黎啦。噉就遊少左半個電視台了。而家仲未完全裝修好，等遲ｄ正式開台有得入去遊覽時再搏慒先，一定要行多次呀。
「老細，呢個客我一定會好落力去跟，我諗每個禮拜都要過黎大埔一次緊密跟進先得，騎騎∼」
「豪華最新早場無敵組合。邊個有興趣今個十點半直落十二點半兩場Ip Man + Iron Man，一個歡樂早場睇晒兩個greatest men？」
（灰在我都未睇港產Iron Man，《未來警察》咁快就要讓佬俾「荷里活《未來警察》」了）