實在太忙，好耐冇新野睇。全賴上個月正式決定搞HIBRIA，仲要正正trhKMk.IV之前一晚先收到得話搞K都冇得唱，日日節目豐富，加遇著四月日頭份工做埋展覽忙上加忙，前日Sarah Brightman都冇時間睇。有上Facebook的朋友或者已醒水留意到，被外國喻為NILE + ORPHANED LAND之新加坡印度裔ethnic death "vedic metal"樂隊RUDRA，四月出新碟，七月會到香港，帶齊民族音樂架生過黎玩咁開心。仲有幾單洽談中，真係傾得實的話，唔辭左日頭份工都唔多掂。因為．．．

有冇睇第33期《re:spect》呀？記得睇50&51頁，講黎緊Tomahawk Metal Fest II HIBRIA黎香港，miss左唔緊要，click呢度仲齊加有video睇。第52頁就緊要啦！上半版，有劉Sir所撰謝安琪新碟《Yelling》碟評，同樣地miss左唔緊要，劉Sir地頭齊晒悉隨尊便。評分一欄其實我本身唔知寫乜好（寫碟評最難寫分數），求祈亂撩，完稿後唔記得左改，結果出左街，自己睇番都唔知寫乜，呵呵。因篇幅所限，同為保政治正確（得罪大老細唱片公司＆歌手，仲使搵食？），《紙談》版當然有所刪減，之前EVOCATION《Take Your Soul》已經試過，雖是indie。又冇話點樣唔滿意或唔開心，始終人地都要搵食，不過我始終相信一樣野做錯、做得唔好，只有最直接講出黎，大家先能夠改善、進步。可惜香港文化正好相反，無論點樣你只可以讚好，唱反調就是罪人，我做左咁多年indie，呢樣野最清楚不過，甚至見到理應脫離商業之indie界，比賺錢至上之主流更敏感，難怪香港音樂經過多年仍難有進步。所以要刪要改我都冇所謂。自己地頭點玩都得，人地要搵食的。香港地，骨氣唔可以當飯食架。

今次會寫pop碟評，皆因情況特別e.g.謝安琪大fans劉Sir手痕，黎緊應該冇乜機會再見到（或者到李卓庭或關心妍或MR.出新碟時？），全因寫metal都寫到冇時間：劉Sir將成為《紙談音樂》固定客席編輯。TRHK話過搞網，又講過搞雜誌，全部成唔到事，除左錢之外，老實講，香港地寫metal，有幾多人會／識寫？又寫出黎有幾多人睇？就連自己地頭都唔多寫metal。到而家多左《紙談音樂》呢個平台，每期幫手寫寫，以前度到好多題目，而家真係有機會寫時，反而寫唔出諗唔到寫乜好，下星期頭截稿，得番兩日時間，我仍然一隻字都未寫，大鑊。而家變左走三頭。黎緊，真係會忙到喊。

「在座的你如果有興趣，都可以試試寫寫metal投稿架。」

太多野做之餘，近半個月皆旺意想不到發生左好多事，唔太直接同我有關，都搞到心緒不靈。心力交瘁，睇戲算啦。

今日要講，可以好長，因為日頭走左去擺展覽，見聞甚多。短，亦冇問題。

「事實證明，劉Sir不在的時候，生意永遠比佢在時好。」

所以劉Sir放一放假，對各方面可能只會有利而難有害，呵呵。

展覽會一擺四日，既市道不太好，公司人手叫足夠，今日可以留守公司唔使過會展。撞正北京同一個星期又有展覽，老細飛左去北京，今日會場方面由老闆娘做主，全公司得番五個人，不過除左朝早玩左個幾鐘MSN，清晒大部份野後，個人冇乜郁過，即使冇乜野做，做一日展覽，精神體力透支好大架，今日正好抖番休養。見近來幾單野都圍繞住舖頭把鎖同匙，今日講番單舊聞交差算。

話說我仲讀緊書，即係TRHK只係我同時間五份part-time其中一份的時代（係要提住呢樣野，因為我是「搏」世代的），有日放學上皆旺開舖，插條鎖匙落去，扭左大半個字都扭唔開。

「死！乜野事？把鎖壞左？」

好在搞左個幾字，扭斷條鎖匙之前，終於開到度門。驚收舖時又係噉，特登開開閂閂幾次，試到自己都驚，因為見到條匙彎左少少。立即衝落樓下七仔側邊檔鎖匙佬。師傅上到黎，試一試望兩望，

跟住師傅拎左枝WD40出黎，對住個鎖幾噴，插條鎖匙入去試試，順晒。果陣還是白痴仔一個唔識反抗，乖乖地俾錢師傅，一分鐘唔夠（噴WD40之前果part唔計啦）師傅就賺左百二蚊了。自此，舖頭長期擺放一枝WD40。曾經考慮過輟學拜師學做鎖匠。童年陰影，對一個人的成長，影響很大。

雖然第33期《紙談音樂》開始，劉Sir常駐講metal地盤《Kowloon Metal City》已經開張，始終上期主要講HIBRIA黎緊5月23場演唱會，內容基本上同你上網睇到唔差太遠，所以自己都冇乜特別理過 － 當然，HIBRIA後面果版謝安琪《Yelling》至係全本書最重要啦！作為一個獨立編編輯，今期對我黎講先係個正式開始，始終真係開專欄寫metal，梗想盡量寫番metal文化同音樂，而唔好太多商業掛鉤，但當然TRHK之關係好難達到完全編輯自主，正如有隊band黎開show，點都要講番果種音樂果隊band架啦。只有盡量做到靠近音樂，就好似今期。

「所以，意料之內，下期1/5/09你會見到IE。雖然本身我唔係諗住寫佢地。」

上星期期辛苦左成個禮拜展覽，天氣時凍時熱病病地，前幾日必理痛當糖食，加上某ｄ原因，今日請左病假留家休養。因為慣左聽一隊band總會一黎就播全線，好珍惜可以聽歌聽成日的日子，每每請假（即係射波啦）都會搵番最少出左五六七隻碟ｄband第一隻聽到最新一隻，今日輪到出左新碟的U2。唔新架喇，二月底出左，我隔差唔多成個月先買，近來正式聽真。U2我由二千年《All That You Can't Leave Behind》開始追，會留意因為《Tomb Raider》用《Elevation》做主題曲，再睇左《Beautiful Day》個MV，發現原來隊band來自愛爾蘭有ｄ驚奇（你知啦，細個成日以為世界上中國之外只得美國英國同日本三個國家嘛），覺得好特別買左隻碟，屬於我最初期買之CD，繼Moby《Play》（我成世人第一隻碟），《All That You Can't Leave Behind》係另一隻碟我最期早CD，更令我開始聽rock/metal。買下買下，U2成為我其中一隊 － 如果唔係第一隊 － 追晒全線所有碟之樂隊，連新碟已經十二隻喇，全線聽晒近十個半鐘。唔請假聽點得丫你話？

因為當時剛開始聽音樂，買碟自然邊隻最新同最出名就係果隻，加上果陣初學者總鍾意技術野同恆野，U2剛出道較為post-punk，起初未識欣賞《Boy》(1980)，跟住《October》(1981)迷多少少，都要浸耐左先領略得到，不過主要認識，始終集中於FEAR FACTORY cover過《Boy》第一首《I Will Follow》，好在即使自己唔多聽post-punk，都明白到一樣：U2一開始已經有好易認得出之自己風格。音樂同歌詞真正「開始U2」係《War》(1983)，一首《Sunday Bloody Sunday》已經無敵，都未係我心頭好，搵埋Brian Eno隻《The Unforgettable Fire》(1984) 先係自己鍾意之U2之始。見到Brian Eno預左會好飄同ambient，令好多人如我愛上U2之結他手The Edge今隻碟得道，玩chord玩effect出神入化，可惜在後半堆歌感覺唔多完整似未寫好，或者因為前半太強，如《Pride (in the Name of Love)》？冇緊要，養精蓄銳三年，《The Joshua Tree》(1987)一隻殺晒，寫歌、填詞、彈唱、錄音多方面都好接近完美，全隻碟大半歌已達經典級數冇邊首歌唔掂，這就是真正的殿堂級作品，八十年代最重要專輯必定入選，聽左咁多年，次次開隻碟仍然覺得好感動，一隻rock／外國流行音樂迷不能不收藏之重要經典。除聽歌最緊要睇歌詞，U2從來多野講同多政治訊息，你睇SEPULTURA同QUEENSRYCHE都會選擇cover佢地最具政治性首《Bullet The Blue Sky》就知，隊band對後世之影響唔止音樂咁簡單。係有樣野唔明：身為愛爾蘭樂隊，《The Joshua Tree》其中一個成名因素卻係靠向美國取經，加country加blues之餘歌詞講埋美國，好似有點．．．？

食美國水食上癮，而且上到天咁高，把握時機拍紀錄片《Rattle and Hum》(1988) ，即係電影化之《The Joshua Tree》製作特輯，將live及新歌集成soundtrack。完全投入美國加送大量明星guest，相信太出名緣故有點走火入魔，音樂有好有唔好但偏後者佔多，睇埋套戲（曾幾何時是HMV長期減價貨品之一），只有話佢地做明星做到傻左。要留意兩首：《All I Want is You》，因為近番上兩隻碟冇其餘歌咁「pop」（即係成為天皇巨星導致失常），同有點industrial rock之《God Part II》，後來U2寫主打歌常用到相同重bass同funk編曲法。其餘歌質素頗為參差。似乎隊band都知衰，又停左三年，《Achtung Baby》(1991)不再美國回到歐洲，聽時諗番起《The Unforgettable Fire》，不過加新元素好似少少電子，各方面特別唱更進一步，同明顯受當時grunge/alternative等九十年代風氣影響氣氛更加沉，最出名係《One》，不過重點在於歌詞，講聽我膚淺都係鍾意METALLICA首《One》多ｄ（．．．）。嚴格黎講，我會話《Achtung Baby》至係U2最佳作，更甚於《The Joshua Tree》，見《Rattle and Hum》大衰後死過返生，既舊風格加新元素大家鍾意，《Zooropa》(1993)落重當時流行之電子，開波首主題曲頭半話係PORTISHEAD呃到人，成日俾人sample個intro的《Numb》等於後《OK Computer》RADIOHEAD，《Lemon》聽落有點JAMIROQUAI，後半碟歌較低調，《The Wanderer》搵Johnny Cash唱估佢唔到。《Zooropa》延續《Achtung Baby》不過再加電子而成功融合，未係最好主因後半太沉，但冒險得宜得到唔少印象分。討論從rock轉型電子，人人只識講RADIOHEAD，點解冇人提提U2？《Rattle and Hum》去《Achtung Baby》／《Zooropa》比《OK Computer》去《Kid A》／《Amnesiac》早幾年架。可能搞到隊band都唔開心，不知何解中間空白左四年，新碟《Pop》玩野到爆，未至於完全放棄band sound，但睇見派台歌叫《Discotheque》都知出事，隊band最電就係呢隻碟，自不然俾人鬧到九彩，但事實上係咪真係咁差？其實超電的唔係好多，多數歌撈電子程度屬可接受，可惜寫歌作詞兩樣確冇之前咁多火花，隻碟仲要係U2全線最長之一，聽慣rock的U2迷絕對難啃，咪俾個碟名呃到呀，其實佢地最唔pop就係《Pop》，仲要越後越離pop遙遠。是否《Rattle and Hum》病症又發作，一上到高位身痕想玩野，就寫番隻《Pop》黎諷刺流行音樂呢？係的話，班友都好夠薑，玩到咁大。加電子冇問題某幾首如《Mofo》同《Miami》甚至寫得好（不過最愛始終是集中最後三分一堆低調野），死因在曲詞水準同《Achtung Baby》、《Zooropa》差得遠嘛，鑑於太長同質素，我受到隻碟，都絕少拎出黎重溫，今日正是時候。

睇真ｄ，除左樂隊想從搖滾轉投跳舞市場改變咁大，Brian Eno冇做producer或者都有影響。衰到貼地三年後，搵佢返黎幫手整《All That You Can't Leave Behind》(2000)，電子部份只留番少少drum-loop，鼓同結他再次成為主角，《Beautiful Day》一首廿幾年黎前所未有地rock，一首歌立即回魂，Brian Eno插手自然再現立體感同飄渺結他，全碟回歸八十年代時的U2，無論好多年前未正式投入音樂時，到而家聽左幾年metal返轉頭，依然從頭到尾回味無窮，而《Beautiful Day》一首帶俾我之震撼，可比JUDAS PRIEST《Painkiller》在metal方面所作，所以《All That You Can't Leave Behind》係我心目中最重要專輯之一，冇佢我未必會開始認真聽band。過癮在唔知點解Axel Rudi Pell會無端端cover《Beautiful Day》，兩者根本唔關事？一個速彈結他手cover黎夾硬攝段solo入去有乜意思？冇所謂，最少睇到U2同隻碟／首歌影響幾大，有幾多樂隊可以經過二十幾年，仲寫得出一首全部人一聽立即覺得係佢地最好最經典金曲，仲要係快歌唔係慢歌？難得死過兩次都返生，唔敢玩野喇改行慢工出細貨，等足四年先出《How to Dismantle an Atomic Bomb》(2004) ，繼續自己老本行加聽眾想要的搖滾，甚至再提昇結他地位，大幅放棄電子keyboard亦唔突出，舊迷實滿意啦？我反嫌保守得滯。見《Beautiful Day》掂，照用快歌《Vertigo》打頭陣，不過首歌唔多好聽又同後面完全唔夾，正餐過份復興'80，絕對夠rock不過少左好多令人一聽就知出自U2之特色，錄音太實唔夠空間感唔夠飄，除左某幾首試加弦樂效果全碟穩打穩紮唔敢亂試新野，水準點都有U2寫靚旋律靚編曲向來有一手，但怕又唔小心得罪聽眾之保險意識太過強烈，聽擺明放開之《All That You Can't Leave Behind》開心好多。

當開《No Line on the Horizon》(2009)有點感受番《ATYCLB》種放，就知道今隻碟唔會差得去邊，同必比上隻碟進步。用左近五年出碟，隊band話因為第一個監製Rick Rubin（即幫過包括METALLICA同SLAYER等無數metal band手位傳奇producer）合作成品不理想，唯有搵番Brian Eno從頭黎過而搞到咁遲，可能好事黎，有Rick Rubin份我梗開心啦，但1984年起歷史已見證Brian Eno+U2必定唔會出事，有番我想聽到種結他聲同錄音已經開心晒，《Moment of Surrender》後半mix到好PINK FLOYD！加復興'80唔似上隻碟只為玩rock滿足大家，而真係想重新捕捉當年U2份神髓如《The Unforgettable Fire》，一改收收埋埋但求過骨作風，自不然又向前邁進一步。悶得耐卦，又有點放過頭，完左頭四首歌，中間一連三首樂隊主理Brian Eno同其他製作人冇干預創作，似番91年打後風格加三首都好唔同，夾唔到隻碟'80路向，仲有一樣野：《I'll Go Crazy If I Don't Go Crazy Tonight》係我見過最柒歌名之一。餘下三分一有點似迷失左，想試又諗唔定試乜好，就乜都玩下。最緊要下隻碟繼續試呀。雖然安份守己寫歌已經搞得掂如上隻碟，我唔介意你地發發癲的。

十二隻碟，當中有個三隻碟為一組之周期性：1980-1983係摸索期，1984-1988係成型同冒起期，1991-1997係電音期，2000-2009係復古期。《No Line on the Horizon》聽得出樂隊又想搞搞新意思，按計算下隻碟應該會有新野聽。我會咁迷U2正因班老鬼仲肯試。1976開始，定型後至而家三十幾年，樂隊四人陣容從來冇變動過，而且第一隻碟已經可以一聽就認到係U2，跟住廿幾年係噉轉型，轉極都認得到係佢地，而且十二隻碟通通優秀（《Pop》除外，但其實冇大家所想／所鬧咁差的），有幾多隊band可以？四個成員各有所長，Bono把聲只此一家，The Edge結他同樣冇人似佢，不止限於英倫同post-rock，而自創好多音效同陣法，自八幾年黎影響住往後特別歐洲及英國無數人，即使U2ｄ歌冇任何高技術或超級solo，The Edge絕對係rock界最強結他手之一。bass同鼓同樣瓣瓣掂，歌路改變佢地照改演奏風格，聽過單頭三隻碟亦唔會話佢地冇技術，加上有份獨特節奏感，U2建立自己風格佢地都有功勞。最重要歌詞：U2向來熱心社區同國際福利運動，你見我討論一直冇離開過U2歌詞，全因佢地利用音樂向世界傳達自己所想，同對種種社會現象進行反思、批判，睇埋歌詞自會明白U2魅力所在；單聽，只享受到一半。

其實隻碟剛出時，我有諗過好似謝安琪《Yelling》噉投稿去《re:spect》，不過未夠班又冇時間（成日有波射咩），最後都係算數，我又唔係專家，無謂獻醜啦。不過聽完U2睇睇，今年好似再冇邊幾隻碟／邊幾隊band夠俾我咁大動機＆心機用足成日去煲全線，謝安琪再出碟之前，或者要追番Devin Townsend，前年隻碟未買，今年唔知乜事「隱居」左的佢又話出新碟，要留意。話晒佢係我心中最偉大Metal Artist。

返工時無聊上網，先知阿叔今朝走左。劉Sir咁懶流滴汗都喊，梗對運動冇任何興趣，會令我睇波睇體育節目只得兩個人：伍晃榮，同林尚義。睇電視從來亞視優先，伍晃榮曾經係我會睇無線新聞之主因，佢走左之後我已絕少睇無線新聞。而家阿叔走埋，更加再冇必要睇無線 － 睇囡囡除外，騎騎。

「兩個都係全冇先兆就唔見左。人生無常。」

假如一個月前集《星期日檔案》講港男港女你覺得好唔掂的話（事實上的確係，唔止內容取樣，仲有製作質素），就要睇睇今集講Y世代。《星期日檔案》應該係噉樣。

從來唔多知乜野係X世代Y世代，只覺得係個商業陰謀俾各位商賈推銷潮物，讀書時就聽過同學講，佢睇過外國書，X世代由二戰後計起，我1981年算係X世代最後一／幾年，而按節目所取，本港Y世代年期屬1976-1990。自己係X定Y懶理，只知同節目中Y世代靚仔靚妹好唔同。按照節目中推理，X世代係Ｘ，Y世代係why，完全唔覺，調番轉至係：X世代至我地呢批八幾頭至中出世至「初期Y世代」反而問得最多why，唔明唔妥會提出疑問，因為當時生活艱苦，個個人都想搵錢脫貧，加上社會經濟動蕩多，一跌可以跌到好低好低永不超生，難免總要問清楚加經常反問。相反Y世代是而家十尾廿頭一班反而唔why，一有乜唔順眼？Ｘ左先算最緊要我冇問題乜都順我意，唯一why可能係「點解你地有咁多問題，搞到我咁唔妥你地？」唔使捱嘛，十個有七個係太子爺／女梗大晒啦，就算一舖清袋仲有老豆老母照，睇睇節目中個阿爸就知。我地果代如非家財萬貫，邊度會有呢ｄ阿爸？試下好似「搵到錢做到悶咪唔做囉」位小朋友噉樣生活、噉樣對住鏡頭對住老豆講，唔俾老豆老母打到斷手斷腳？唔使養家甚至屋企會／肯養埋，明知點玩都唔會死，自不然乜都唔怕，不過靚仔靚妹們從來只會用呢份福份加自由去過份抬高自己或完全失去自我，結果只識批評唔識批判，又冇主見只會跟大隊。老實講，唔係後生我好多年 － 如兩三年 － 之「新一代」待人處事思想已經可以劣得好離奇。好難諗而家睇報紙成日睇到小學已經追龍劈友衰十一的再新一代，過多幾年會點。所以我始終唔覺得亦唔想承認自己屬於Y世代。

「其實講多無謂，將《The Wrestler》再從頭到尾睇一次，立即明白晒。」

常言道X世代為搵錢、Y世代為理想，我日頭返工搵食，夜晚為（無意義的）理想燒錢，相信唔係X又唔係Y，我係on9世代，呵呵∼