孫耀威立即走到張繼聰身邊耀武揚威。笑到仆街。要講好笑仲有另一單，就係傳說中之TONICK扮GUNS N' ROSES，出現三個Axel Rose，知唔知點解？因為佢地諗住其他人會扮Slash，就自己扮Axel Rose，點知到場先發現，原來大家想法一樣（此段純粹搞笑，呵呵）。不過今年歌星賀台慶有一段必定要睇：因為主題係向當年經典致敬，其中一節主角就是樂隊。好耐未試過睇電視仲要睇無線睇得咁感動。

溫拿鍾鎮濤、BLUE JEANS蘇德華、太極鄧建明、BEYOND黃貫中，四人同台共jam，直是世紀盛事也。唔好理玩得好唔好。黃貫中彈番solo喎。有蘇德華台風再現喎。唔睇無線，邊度幾時有得睇？而且唔止四位大師，今晚後面隊band同樣個個勁到黐線，雖然冇得出鏡。香港幕後工作者之哀也。

「作為亞視支持者。我冇幾可會多謝無線。今次係難得一次。」

有樣野一定要講：第一首歌唱《LOVE》。我好清楚聽到，有條友唔係唱VE，係唱CK！邊個FU？同最後蘇德華鄧建明黃貫中三個輪流彈solo，唯獨彈木結他的鍾鎮濤冇份玩，鏡頭影住佢黯然回首遠去。知唔知點解？唔係因為佢得枝木結他唔夠人地電結他鬥。唔係因為佢solo唔掂唔夠人地jam。當時佢諗緊：

「超！大家都收無線咁多錢，咁辛苦做乜彈多個音又唔係有bonus？鬥餐飽啦你班傻仔！」

睇極唔厭，如果拉埋彭建新出黎同另外三個彈啡就一流。無線，請再接再厲。

個市實在太淡。皆旺108成為皆旺今晚救世主。先有六期《DMC》在各大玩具舖傳閱，成為全層是日解悶良品。再黎謝安琪場live，當演唱會DVD琴日買到後，全皆旺瘋狂熱播，唔止108，今日一開舖先俾隔籬肥仔拎去播一次，佢播完，108再播多次，全晚皆旺完全聽唔到metal，只聽到謝安琪，播到附近玩具舖都走埋黎襯熱鬧，吹過水先知原來謝安琪真係好多fans、好多人鍾意。今次BEYOND tribute，講唱確唔及以前架喇，初出《K sus2》時，有幸睇到一次佢唱新世紀，仲勁過唱CD架，然後《The First Day》要到最後一首先盡晒失準，聽歌聽live對我黎講已等同於聽謝安琪。只係生完仔出番黎確差好遠，幫《粉碎翡翠歌星賀台慶》唱開場簡直係佢職業生涯污點之一，今場live頭四份一未捉到路時都幾難頂，但講襟睇、講娛樂性，確比玩遊戲的新世紀同unplugged的《The First Day》高，加上情意結嘛，一首鋼琴版《海闊天空》已殺晒了。

「如果TRHK入謝安琪的話，相信今個月賣佢ｄ碟，一定會賣得多過OPETH同CHILDREN OF BODOM。」

而當在一間metal舖頭，可以播謝安琪的時間多過播metal時，你就知香港metal咩事。

經過一晚連播兩次謝安琪演唱會DVD的盛況，旺角皆旺商場今晚終於嘈怨巴閉番了，上到黎，終於聽得到metal喇。但這只是個掩飾。＊＊＊資訊審查＊＊＊阿興（＊＊＊資訊審查＊＊＊），帶左佢部珍藏harddisc上黎，有咩珍藏？睇我地七刀同學特登拎埋屋企部160G harddisc上黎「與大家交流紀錄片」就知。所以你話唔開大聲ｄ播metal點得？邊度遮得晒ｄ聲？

玩extreme metalｄ人，口味都extreme過人。＊＊＊資訊審查＊＊＊興哥仔＊＊＊資訊審查＊＊＊相當成熟。近來佢＊＊＊資訊審查＊＊＊，就＊＊＊資訊審查＊＊＊好野佢，真係＊＊＊資訊審查＊＊＊，可惜＊＊＊資訊審查＊＊＊，全部十幾廿激未能一野＊＊＊資訊審查＊＊＊，睇黎興哥仔要＊＊＊資訊審查＊＊＊。

「你咁多AV，邊度睇得晒呀？」
「平時我睇住AV練結他架！」

聞所未聞。奇人就是奇人。從AV中鍛鍊結他技術同獲得音樂靈感，我今世人都係第一次聽到。難怪＊＊＊資訊審查＊＊＊！今晚其他客人都相當興奮，有作為一個阿叔卻是全香港聽最多black metal的梁生，即係我地細路仔唔識世界，睇AV仲要有格仔咁cheap，仲睇鬼畜無雙一敵百咁「碎料」，又難怪梁生睇唔起我地！梁生搵次真係要帶我地班細既出去見識見識呀！仲有令TRHK多左好多《Underworld》同《音樂一週》的史丹朋友。

「今晚最興奮都係你啦！睇到俾左錢買左碟都唔記得拎碟走！」

冇錯。所謂的香港極端金屬專門店，越來越唔金屬了。

「因為金融海嘯，此日段記已遭政治審查。」

「因為做展覽實在太好玩了。有deep-v姐姐送禮物俾你，又可以瘋狂換禮物當返工，仲要連外國metal band member都撞到，呢ｄ生活唔係成日有架大佬！」

展前展後兩個禮拜日都返左公司，展覽後又多野跟，經過連日來努力，全部野已經清晒加交晒波俾工廠，等佢地做完野落黎我先有得跟，中間空檔就琴日禮拜三射番日波先。近來每逢放假，無聊活動係入屋企壇碟山碟海尋寶，搵搵舊碟同好耐冇聽過ｄ碟出黎重溫，導火線係Malmsteen，因為新碟大驚喜（非音樂，佢創作同技術都幾難再有突破了，驚喜於感覺），就襯今個假期摷番佢ｄ舊碟出黎回味再回味了，《The Seventh Sign》還是無敵，雖然大家都話過左頭三隻碟就冇野好聽，我仍然鍾意佢九幾中打後，亦即《The Seventh Sign》起掃到九幾尾之全部，因為自己都知道玩pop玩夠了，就玩番hard rock一點heavy metal一點，呢幾隻係最恆最爆的了，《The Seventh Sign》Mike Terrana打鼓喎，《Facing the Animal》仲要係Cozy Powell遺作喎，仲唔夠咩？噉樣摷一摷，又聽番好多隻碟想寫寫了。黎緊2008年回顧大把野寫。我怕寫到2010年都寫唔晒。

「我知好多人想我講番呢單野。唔急啦有ｄ野，都唔志在一時，而且越要寫，越多野寫。場show之後，短時日內發生左好多事，令我開始認同黑夜前輩『玩完』之意了。但咁多野排緊隊，分分鐘到場show一週年先見光。」

至於TRHK，繼續成為大家的AV交易所（嘻嘻）。除左有常客（我指AV方面）的七刀同學，好遺憾「睇AV練結他」的大老細興哥仔是日冇到。

「邊個興哥仔，而家變到唔太方便講了，一切資料已遭資訊審查。點解？阿興哥仔覺得『劉Sir咁乞人憎，覺得俾人知道玩／聽(extreme )metal但群劉Sir好樣衰』卦，呵呵∼」

近日樓下管理員成日打電話上黎，梗係唔係公事啦，而家噉市勢仲有幾多「公事」可做？而係通風報訊。BenQ總代理個倉正正在我公司附近，管理員有日經過見到開倉，上到去發現大量平貨，立即打電話「有急事」搵我老細：

「廿二寸LCD芒千三，廿四寸都係千七咋！三十七寸plasma連內置高清，先賣四千七！」
「抵買喎！仲有咩好野呀？」
「噉就唔知喇！頭先我一次過買晒佢地舖面果ｄ，而家吉晒！」

雖然只係陳列品，用到就得啦最緊要平嘛而家個時勢！老闆老闆娘聽完電話立即衝落去，叫人地入倉摷多部電視出黎俾佢地。我地雜卒仔梗係冇得返工時間去掃貨啦，唯有呢幾日放工過去睇睇。大芒大電視興趣唔大，keyboard mouse電腦袋又冇乜意思，唯一可取係手指，四十蚊兩激七十蚊四激喎，就算自己唔用，執完加多二十蚊放番出去都有人要，大舉入貨可樂而不為呢？見到如斯境況，大家風聲鶴淚：

「連總代理都開倉，BenQ唔會摺卦？」
「摺唔好咩！反正佢地一向冇乜好野！摺左有得掃平貨咪仲好！」

本來都想掃多ｄ，不過唔一次過拎晒出黎而逐日少少少少噉放貨，冇乜心情日日上個倉睇，掃左一轉四隻四激自己友接晒貨就算，都唔志在一時，黎緊肯定大把機會。好似一日內會計靚女整左兩單野黎，Chevignon同佐丹勞都搞員工優惠，響員工個朵買野就有五折。我地唔係員工關我地咩事？原來佢識人入面做，打聽到係班老細叫班靚周圍send自己ｄ職員資料俾人，等人人可以扮職員買野半價，變相用「員工優惠」黎開倉，不過「秘密外洩」就顯體面ｄ囉，高章呀呢招。收完email會計靚女再拎份報紙出黎，大量開倉廣告，唔係「今個月窮」，一向窮奢極侈的佢晚晚有節目。

「作為metal友咁多年都冇皮褸傍身，似乎係時候執番件了。」

所以我從來唔急買野，有耐性自然等到平貨，黎緊想執平野亦絕對唔使憂：我公司果層以前有五間公司，而家全層執晒得番我地，其他單位變晒倉，正正隔籬個倉擺汽水公仔麵，以前最鍾意過去掃維他朱古力奶，一底廿四包先七十五蚊抵到爛。但金融海嘯之後朱奶立即唔再返貨，因為朱奶價格一向比其他奶高，所以「同股市掛鉤」，每次個市一唔掂就唔入朱奶，尤其過左今水七十五蚊再返貨要八十五至九十蚊一底，豪唔起。因為公司飲開維他蒸餾水，今日會計靚女無聊順便查查價，而家維他乜都劈價，雖然「荳奶非奶」大家始終肴底，加上各位朋友已經窮到連維他奶都冇錢飲，一底朱奶肯開價開到七十四蚊仲平過隔籬倉一蚊。旋劈啦，使煩？而當香港人而家連維他奶都飲唔起．．．繼續食魚蛋啦各位。相信有排食。

「呂晶晶來了？」

亞視黎左，不過冇呂晶晶。而家禮拜日朝早八點半，亞視有個節目講音樂、講文化，叫《潮流文化》，攪屎棍就係亞視最metal果個張大導。佢一路幫左metal唔少，好似四年前六翼天使同KING ETERNAL LIVE，都係佢專登拉隊上黎TRHK同去蒲窩拍，大家《慧珊時尚坊》先有得睇metal gig有得見劉Sir咋！之後真係有人睇完打電話去亞視問metal野，再「轉解」過黎TRHK，雖然唔多但總係有。（果時有一晚，節目做緊時有個客走入黎TRHK，見到電視有個劉Sir舖頭又有個劉Sir，好鬼好笑）《潮流文化》其中一個主題目係crossover，有兩集講中樂同搖滾／重金屬，有張大導份就自然有劉Sir份啦！傾左個幾月，連今年Tomahawk Metal Fest都拍左（唉，仲未寫添！），冇幾耐之前臨門一腳亞視大節流，張大導唔知飛左去邊個部門，成日搵佢唔到。

「條友唔係接手新一輯《AV事務所》，扮唔聲唔聲唔益兄弟咁衰仔卦？」

好在佢走左之後，其他人繼續完埋個主題仲有得玩，不過原先張大導諗住個訪問上TRHK做，而家就上band房拍，順便訪問多隊band一開兩集。個幾禮拜前開始電話傾開，臨訪問幾日前定左七條題目，有三日時間準備答案，雖然個訪問只長兩個半字，你知劉Sir幾麻煩架啦，初頭諗住簡簡單單由淺入深，最後一定越寫越興起停唔到，結果七條題目寫左五版紙出黎，前日開始寫，琴日臨放工五點十一個半字先打好。不過寫咁多都冇乜用。寫到出黎，自己都記唔晒啦！咁多！

訪問地點係觀塘，因為之前仲有隊band，八點半先蒲頭都未達，不過實在冇野做，上舖頭無聊一番先搭巴士出先七點半，點知去到連band房仲未開，就落番樓下食個飯先。估唔到工廠大廈樓下間麥記會有露天茶座咁靚，條街勁闊但少人少車加大風，香港食麥當奴廿幾年最「高級」都算今次。

「呢度真係工廠區？市區麥記都冇咁正啦頂你！」

食完八點鐘上番去，已經訪問緊，隊band原來係ECCENTRIC，video睇過真人先第一次見，更加估唔到第一次睇佢地live係呢個情況睇到。ECCENTRIC訪問時同導演傾傾自己部份，佢手上勁大疊「網上搵番黎的重金屬資料」，除左中文維基百科，另一份一睇就認得出，又係冷爺爛屍金屬網最多人睇果篇金屬分屍。冷爺此篇經典，應該係香港被引用最多之金屬文獻，只不過篇文寫於七八年前，連爛屍金屬網都收了皮年幾的今天，香港人仲用緊同一篇野而搵唔到新文獻，顯當今香港金屬文化發展之不繼也 － 中文維基百科非「真正metal友」所寫，只係維基管理員翻譯英文維基而成，問題係「研究」同「聽」兩者認知可以相當唔同，所以對分類當中部份解釋及舉例，「聽開」一班未必全部讚成。

「所以就算係劉Sir同你講『甚麼是metal』，你都唔好信，佢一樣可以講錯野昆你，而且機會幾大。」

一直到九點九，劉Sir訪問部份正式開始了。呂晶晶，是沒有的，不過有今屆08亞姐冠軍張嘉瑩訪問劉Sir，上次Tomahawk Metal Fest便裝出巡未算搶鏡，今晚做節目而裝扮一番，真係好靚架！（講起，場show，我會寫架喇，唉）至於全個訪問，雖然只得七條問題只拍兩個半字內容，九點九起做完都差唔多十一點，冇計每一條都有太多資料，有時多到自己都記唔晒／唔知講到去邊，搞到係噉NG，有時講得興奮得滯，差少少講到係噉fing頭架真係，不過相信導演會剪晒出街果陣冇得睇，得番好正經果ｄ部份。

「做完今次訪問，立即覺得自己中文好差，聽說讀寫都係。有點感慨『少壯不努力』矣。」

琴晚做完訪問，今晚返到舖頭仲有野搞，要幫手揀MV出街，噉梗係我做啦你唔係諗住亞視經劉Sir講兩講立即知道乜野係metal識得自己上網搵歌搵片丫嘛？最後一條問「中國傳統音樂與重金屬之異同」，可能是全集焦點所在了，至於劉Sir點玩點答？記得收睇禮拜日朝早八點半《潮流文化》。不過唔係今個星期日。今集預計十二月頭出街。有確實時間一定會再通知大家。只不過要睇，有點難度，要我禮拜日朝早八點幾起身，仲難過叫我做多次訪問全部一take過唔NG。

琴晚燒野食，十分好玩，幾年未燒過野食喇，玩到勁夜今日成兩點幾先起身，十分支力，是日要抖一抖先。今日睇番，早前場show阻左一阻，好多野仲未寫：今次燒野食之前，仲有場show，再連再早Circle K都未。但唔覺唔覺，今年聖誕節都就到喇。要努力了。因為仲有自己計劃已久的重頭戲：2008年回顧。

「這，已從最唔想寫之一單，變成非常想寫。一個月甚至一個禮拜，可以發生好多好多事。」

「有ｄ野會有人覺得唔需要咁認真。只係你好似我坐TRHK、每日每次睇到好多唔同野，都幾難，好似今日，又有啟示了。有時就算想唔認真，都會有好多人好多事迫你認真。」

今天晚上，有二寶樂市長上黎重溫生日會片段。不是上星期六的Circle Q，雖然當日係順道補祝市長，結果大家好似冇左件事。我當然繼續扮冇事啦，唔好旨意我會送禮物呀頂你！所謂生日會片段，係一年前仍在LiveHouse搞騷的佢，濫用職權整一場騷俾自己出以「慶祝生日」的生日秀，隻DVD收到好耐，只係劉Sir懶（太懶），唔係今日市長專誠拎到上黎，我都唔會睇。結論係，好睇，不過市長，你真係好多廢話。好在果晚我冇去到。

「阿市長，提多次你，假如你係想借ｄ倚再勾起我回憶想補送禮物俾你，你都係算Ｑ數吧！」

其實整左上網好耐架喇Rock爺已經，不過阿歐陽份人較懶（．．．），襯住亞視壇野黎緊，今日又冇乜特別野好講，就出黎攝攝位。

「主持，快手出埋part 2唔該。」

24/11/2008 18:15旺角道

一名九十歲的老翁在下午五時許，在旺角道一大廈高層單位住所墮下，倒臥在大廈一樓簷篷上。警方與消防員接報到場，證實他已死亡。警方尋獲死者家人證實死者身份，調查後懷疑老翁久病厭世。

（《星島日報》，二零零八年十一月二十四日）

近來公司高層間流行話題係監獄風雲。鑑於大家對祖國認識及印象，大陸任何事都可以發生，好多野已經見怪不怪，但驚奇係過左咁多個十年，到今時今日仲能夠間唔中有新的估佢唔到事件出現，有時睇報紙講大陸發生乜事仲精彩過你睇戲、電視電影編劇都未必諗得出，中國人創意及勇氣確是可嘉。

一眾老闆突然咁有興致講監獄，當然唔係因為想入去觀光啦。中國作為世界工廠，各方商家自然用盡每分資源生產賺盡外國人錢，有鑑中國之「特殊情況」，自然大把走法律罅甚至唔依法律手法，除左童工之外，原來監犯都係一股龐大勞動力，雖然唔點出奇已經用左好耐，但魔高一丈地越做越大，特別08年，年頭勞動法改例、年中工人告廠大工潮、年尾金融海嘯，執正黎做的工廠未死都頻死，聽老闆講，我地工廠果區間監獄調番轉，直頭將機械材料搬晒入去，設好晒部門，將成間監獄變成一間大廠房，跟住以每月定額同你計，例如一個月十萬承包一班工人任你點用點做，計番工時同其他開支好似補水、保險等，現今時勢絕對平過你自己養相同數目工人做同等份量工作。難怪家陣全區人人等執笠連上市公司都半死，反而監獄仲旺過真正工廠。吹脹。

最值得欽佩者，監獄並非只助推動增長國民GDP，仲真正協助社會發展。當架構直頭同真工廠一模一樣，除工人亦需管理層同技術人員，邊個做？梗係唔會獄卒啦，佢地只會等收錢，自然推ｄ犯去做，而犯得罪者總有有智慧人士，反而監獄入面要搵人才唔係難，而坐得監梗係冇野做架啦，就日日夜夜不斷操，短則幾年長則十年至以上，熟能生巧生手都變高手。因為人手充裕加上技工熟手，你我他人人做廠死，監獄調番轉逆市加價，仲要加左都阻止唔到大家搶期。我公司一向跟開規矩做絕少違法（係咪難得呢！），而家時勢所迫老細都要做埋一份，已經遲左有錢都搶唔到期。仲要唔止搶獄工生產期喎，有ｄ工人同主管級人員就黎放監，未正式「出山」已經大把工廠主動傾數，高薪邀請一出獄立即加入自己廠，因為佢地技能經驗思維比自己手下班更優勝。大陸坐完監，出番黎仲勁過以前，點止改過自身，直頭一條好漢。睇番香港？

「呢ｄ大陸監獄，比任何香港再培訓局更有效，亦比香港懲教署協助犯人再融入社會成功不知多少倍。」

雖然香港人成日話大陸點強權點腐敗，但有ｄ方面又未必係壞事，正如大陸人工作福利，一早已經修訂得比香港人更優厚，比我地保障更多，以及上面講到之「特殊情況」，正道香港唔會搵到。其實香港回歸中央管治，係好事黎？（突然覺得自己好愛國添，呵呵）

繼1115 Circle Q大成（得架喇我會寫架喇），雄心壯志的再度Circle K，因劉Sir關係成為一個劉局。冇辦法，仍然為之前亞視「中樂vs.金屬」個訪問忙緊，本身今晚放工會飛出大埔亞視廠房幫手整片，不過睇報紙都知啦，亞視裁員裁到黐晒線，非人生活加上冇人得閒招呼下，導演最後叫我都係唔好去。放工節目變成走勻旺角太子大角咀，搵速遞幫我將全部所需物料寄去亞視。

「唔制呀！冇得去亞視見呂晶晶！嗚嗚嗚∼」

至於各位朋友所關心，幾時有得在電視機一睹劉Sir尊容／柒頭，聽佢金屬亂講誤人子弟，同睇睇應屆亞姐冠軍張嘉瑩有幾靚女？（這才是重點，劉Sir有乜好睇？）

「劉Sir就中樂與重金屬之訪談，已定於12月7日禮拜日早上8:30《潮流文化》第九集出街。」

冇錯係禮拜日朝早八點半，相信當事人我自己都唔會起得到身，所以在此尋求各方才俊協助：

「有冇人識得（網上）錄影電視節目？能夠幫手錄低個節目再send番俾我？當然錄得夠高清，等我可以cap番幅同張嘉瑩合照就更一流啦，騎騎∼」

在12/11訪問當晚，除劉Sir外仲有本地J-Rock/metal樂隊ECCENTRIC受訪，如無改動的話，ECCENTRIC訪問將緊接一星期後12月14《潮流文化》第十集播出。想睇ECCENTRIC唔使等咁耐，家陣開電視留意一下，美心最新石頭鍋飯個廣告就有佢地喇！