話咁快，2007年已到最後一個月了。亦係公司旅行的日子。
「今年想去邊度？」
「我想唔去．．．」
劉Sir太懶了，要行要出汗千祈唔好搵佢。當然冇講到出口咁衰仔啦。不過，最後表決，都係唔使去。因為大陸同胞的帶契：大陸政府硬性規定一至五六點後加班費x1.5、星期六日唔准返工返者人工雙計，再加大量保障金服務金同保險，香港人的所謂工作福利晨早落後人幾條青山道咁遠，亦因為而家大陸唔使／唔准星期六返工，香港公司亦因此受惠，唔係返五日，變長短週嗟老細點會咁好死丫，冇野做都屈你返公司使盡你啦，
「香港人，仲以為自己高級過『大陸哩』？醒覺吧，自己一早做緊傻仔都唔知。」
轉左長短週，自然個個唔想去旅行，老細梗係唔會話返工時間去一定係放工去，而家星期六放假喎大陸仲叫我去？暴動都似。全場一致通過，今年唔去旅行。就算真係去，都唔關我事，我有免旅行金牌：
「搞錯！你好揀唔揀，揀星期六晏晝先黎？」
之前有個同事走左，佢手頭上最大兩個客交俾我跟，唔知點解ｄ大客永遠鍾意星期六日先黎。即係你黎傾生意一回事，平時黎到傾一大輪阻住放工，已經係天理不容；禮拜日或者紅假黎，叫做可以補假，免卻千刀萬剮；星期六晏晝返工一向冇得補，揀禮拜六晏晝先黎，就真係粗口問候都唔夠。為左條友，朝早專登執足成朝辦房，搞一大輪已經差唔多放工。不過四點先到，仲有排捱。點算？
「梗係落街食飯啦唔通繼續留係公司做野咩！」
大把時間，周圍行，走上舖頭睇睇新到批貨，
「叉多。」
再走過信和探探107．．．頭馬煲姐（記得去冬購節幫襯107呀！），然後行番去太子食第尾。
「唔食且豐？」
「且豐已死！有背景你就明！」
冇錯，而家且豐，已經唔再係且豐。第尾且豐午飯價錢唔係差好遠，不過講質素完全冇得比，且豐話晒同晚餐一樣俾成塊扒你鋸喎，lunch唯一衰係冇雪糕食，第尾真係由頭好食到尾架由起盤個湯到正餐到埋尾餐飲雪糕全部一Ｘ流，冇左個雪糕好唔開心架，不過少杯雪糕價錢平一半，你揀邊樣先？？？
「野食確係無能敵，只係午市班侍應，服務態度真係差到仆。」
一面食一面聽歌一面睇書，埋單先兩點幾，仲可以兜多陣太子。近來同事度撻左隻餅黎食超正，不過度度都唔見有，佢買果間批發又唔係成日返貨，有時間自己出黎尋尋寶。雖然零食舖越開越多，可惜在冇幾多間唔係賣日本零食，冇辦法香港人始終崇日，而果隻餅係菲律賓出品，自然唔知邊度搵，入埋士多辦館都唔見有，仍需努力。不過搵到幾間賣朱古力薯片蝦條零碎野好平，食完餅過黎補給番轉都好喎。
「似乎第時出街除左行玩具舖，仲要行埋零食舖先開心返歸。」（CD舖？已經唔行了，做果行厭果行）

三點鐘返到公司，野做晒個會準備晒，有乜搞？
「梗係訓啦。支力呀大佬冇訓晏覺。」
訓．．．訓．．．．訓．．．．．．訓極，都唔見人。人地黎搵你開會傾生意，自己一分鐘都唔遲得，但個客永遠奉旨例遲，就係如此不公平。只遲半個鐘，算俾面架喇，當初等極冇影又冇電話，以為五點先肯黎添呀。話晒係公司其中一個大客，係認真ｄ架喇（「認真」＝「勉為其難地落少少力做野」）。好在個客都識做，平時呢ｄ會冇兩個幾鐘唔會完，今次一個鐘條友就走人，叫做五點九走得唔使六點啦 － 雖然冇咩分別，幾點走，都係冇得補假補水。
「見完得唔得先？」
「唔理大客定係細客，會落單就係好客、先係好客。」

收工，即上舖頭，因為：

既然見完個大客，大喎，冇理由唔俾足心機做好佢卦？就等我放假都返黎公司做埋ｄ野佢先，噉先對得住個客、對得住老細！
「挑！扮晒野！襯星期日返黎呃假咋卦！」
「．．．其一啦！真係要做野的！」
個客選左好多貨，寫番個會議紀念有排整，梗係今日返公司搞掂佢先，禮拜一至五用黎吞pop架嘛！仲要今日返公司一個人都冇玩晒喎咁開心！每次禮拜日需要返公司加班，我同會計靚女都會好有默契夾定一齊返，通常都係講到大家點早點早，跟住大家一齊鬼死咁遲起身，然後我返到公司佢仲未返到，結果梗係我打住卡等佢返買埋早餐上黎啦 － 今日就勁ｄ返到黎已經食得lunch。
「食邊間呀？禮拜日我地食開果個茶餐廳冇餐叫，貴喎！」
「食拿渣麵囉！」
我最鍾意食拿渣麵，襯我。本身阿姐都唔多想送，
「禮拜日已經唔夠人用！嗌得兩碗咁少仲要我送埋上黎俾你地？」
簡直係求契哥噉求，最後阿姐先肯接我地張單。唔知係咪因為噉而唔妥我地。送到上黎，大家食得好開心，點知食得幾啖仔：
「嘩！！烏蠅！！！！」
會計靚女即席狂嘔。我？狂笑。
「初時以為係豆豉！點知睇真ｄ，有翼架，原來係烏蠅黎！嘔！！」
「哈哈哈哈哈哈∼」
「唔制！我冇事你有事！你快ｄ過去自首睇睇隻烏蠅陪我一齊嘔！」
「我先冇咁蠢！」
佢嘔完，我照食完全冇問題，冇辦法，劉Sir比那渣麵更那渣，區區一隻烏蠅嚇佢唔到，請各位包容。成朝就係噉樣，返到公司玩玩寫寫聽聽歌就到食飯時間，食埋個飯，都仲係接近咩都冇做過。跟住連有劉Sir咁頹的經理都返埋，
「經理，大陸禮拜日返工計雙工喎！我地呢？」
「咪玩啦！唔係近來多野做，我都唔會禮拜日返啦！貪得意咩！」
經理都噉講，我更加冇心情做野，訓覺算啦。訓醒就夠鐘熄機打卡去舖。經理問：
「喂！返黎就係訓覺同開公數食車仔麵，其實你返黎做乜？」
「冇，貪得意嗟！」

「又黎？」
「正嘛水貨真係！」
貨單名，希望你識，阿冷哥實知。其實呢批貨唔係一批貨，係兩批貨黎：上星期到左一水，今個禮拜再黎，時間＆精神關係先一次過出貨單 － 入一次貨執一次貨整一次貨單你估咁容易咩。歷史性地返左band tee，不過OPETH同EMPEROR，仲有冇人會要會理？希望最後唔係又係我自己買番填數，買碟已經夠多。碟更加唔使講，接近全部kill me。WITHIN TEMPTATION返到難得之"The Dance"，係仲玩真正gothic metal、仲有男死腔果陣，只係唔知會唔會有人搵，因為佢地後來之發展，係其中一個gothic metal「沒落」象徵同「里程碑」，但有趣地WT和gothic metal整體係「沒落」之後先商業原因先多人識，只弔詭在「沒落」果種先會有人受，真正果種反而好多「聽gothic metal」人士唔鍾意 － 冇女性，已經少左60%人聽。我鍾意就得啦，相信WT個名都引到人卦，況且呢隻碟真係正。經典果堆好似IMMORTAL、IMMOLATION、ENTOMBED、SEAR BLISS、LIMBONIC ART、WINDIR、GOREROTTED、WITCHFINDER GENERAL，我諗唔需要多講或解釋，搵metal果班應該知道係咩黎同知點解要搵同值得聽之原因 －
「我諗。」
其他唔出名但我鍾意，有SpiRitual，電子版ORPHANED LAND，一聽就知道係德國band佢地玩電子確係有一手同別有味道。HARDINGROCK、Ihsahn同佢老婆繼STAR OF ASH同PECCATUM又一新搞作，PECCATUM冇時間話唔玩，轉頭又整HARDINGROCK，其實同PECCATUM好似不過古典變folk，唔知佢兩公婆諗乜。ENSIFERUM新碟返左，個人覺得好過上隻，有人買卦，未潮完的話，亦即同TURASIS一樣；EPHEL DUATH隻remix等左好耐，我好鍾意唔知做乜春的free jazz/avantgarde jazz，「新碟」係將上隻碟remix一次，唔好remix到正常左就得我只容許佢地比以前更笨柒。兩隊瑞典all star deathGOD AMONG INSECTS同IN BATTLE係我鍾意果種，但驚喜係SCARPOINT，一隊唔pop的metalcore，技術唔高歌亦簡單玩法較feel，亦即我鍾意果種metalcore，而聽開出名metalcore band聽完會話好廢好悶果種，我膚淺嘛。GALLHAMMER冇野講，日本HELLHAMMER仲要係全女班，玩得勁癲勁過癮班日本妹又，最抵死出完live先出碟，我極鍾意HELLHAMMER加CELTIC FROST所以實支持，DARKTHRONE新碟"F.O.A.D."亦同一道理，個名全寫係咩就唔太方便講喇其實唔難估丫劉Sir成日爆，有首歌叫"Canadian Metal"笑爆，原來有得解的上Metal Archives講晒，真真正正係tribute加拿大metal，只係
「點解"F.O.A.D."『原唱』的VOIVOD冇tribute到？」
好開心原來DARKTHRONE同我一樣係Canadian metal fans，所以我決定下次夾band要cover呢首歌！上隻碟"The Cult is Alive"碟名歌名加班友舉動已經笑死，新碟再下一城，歌詞你睇"Canadian Metal"已經知根本唔關black metal事，變番八十年代真正metal歌詞，音樂完全回到過去做到足老祖宗CELTIC FROST，連唱都要扮到90%（可惜唔係100%，過左頭幾首唱已經black番唔再CELTIC FROST了），即係個個講DARKTHRONE都係Hunger Hunger Hunger，我反而繼"Soulside Journey"之後冇幾多隻鍾意，直到最新兩隻，一來又係HELLHAMMER&CELTIC FROST情意結，二來
「就係貪佢夠on9吹咩！」
而家DARKTHRONE俾我感覺，係過左海成左仙（佢地語言係「成左撒旦」or「成左維京」），black metal玩夠錢賺夠，而家係享受做明星樂趣，既然成左名又上埋神檯，就玩野：
「就睇而家班白痴仔係咪因為我地係DARKTHRONE，就大佬玩乜佢地聽乜！」（希望你睇得出呢句係BEYOND tribute）
上隻碟已經完全無聊，照咁多人聽咁多人話好聽；新呢隻更戇居 － 歌詞方面，音樂我覺得反而「正經」左只係歌詞實在柒得離奇 － 一樣個個話買個個話正。因為音樂？因為DARKTHRONE。我睇到佢兩條友面上燦爛笑容。因為我都係白痴仔，加見過好多白痴仔。
「今水貨真係正到黐線。」
所以，終於有人出現了今日，仲要同批貨一樣咁on9，幾個月黎首次全世界蒲頭，當連市長伉儷同107都現身，就知道又係TRHK怒玩怒食的一天。好在，生意都唔錯仲係月來新高。但要日日咁好先唔使死（住）。

「即日起，我正式同仙果園割席。」
晚飯叫仙果園，見今日咁好生意，叫左個下午茶食碗麵加杯珍珠奶茶再整多個多士。先，奇慢送上黎；再，送到上黎之後，個下午茶當正餐計計多左成十蚊，小一大輪先收番下午茶價。跟住戲肉：個外賣仔一走，成杯奶茶倒Ｑ晒，成身成櫃成地都係。好在時值全皆旺進入無人島時期，唔係俾人笑到仆街。又好野喎，平時好叉多紙巾，今日搵到一包咁大把，危急關頭管理處電話永遠打唔通一定搵唔到阿姐拎地拖上黎幫拖，窮途末路之際，救星出現了：
「好在我上黎皆旺搵龜仙人公仔！唔係你都唔知點死！」
漢 的出現，除左帶黎多一包紙巾，仲自告奮勇落街買水買布上黎救急，終於抹乾抹淨搞掂。
「換著係TRHK是但一個？有邊個唔係指住笑唔幫拖請自首！」
晏晝食車仔麵有烏蠅，夜晚又舖面倒瀉奶茶，近來冇乜食運。已夠令我對仙果園印象大副傾負面。
「從今以後，我唔會再食仙果園！」
「如果有人請呢？好有骨氣的劉Sir？」
「．．．有人請就冇計啦！我咪屈就一下自己囉！」

返到屋企，冇野做開電視，亂咁轉台，轉左去平時唔多睇的美高梅頻道，又會俾我撞到正野：

識呢套戲，因為又一份對電影的熱愛，不過主要原因，係METALLICA。

襯應景又順便，問埋：

求soundtrack一隻

Wild Arms Complete Tracks

Wild Arms係一隻PS1 RPG，屬於PS1好早期遊戲，世界觀結合西部同科幻，主角一行人四出找尋古文明聖器Arms（類槍神兵），因為係PS1第一代RPG畫面預左比唔上好多game，不過單論隻game絕對可以稱得上經典，少見RPG會揀西部做背景，亦好多mini-game同系統變化，唔係因為同期出FF7（Wild Arms早過FF7出），隻game唔會咁少人識，即係當連唔多玩RPG的我都會玩就知幾大吸引力。係我承認會玩，空想西部之世界觀絕對比RPG本身吸引，不過更大原因係soundtrack。叫做西部RPG配樂自然同樣牛仔feel，本身我已經迷牛仔野country野，所以好多人話FF系列音樂點勁，唔好意思從頭到尾FF除左陸行鳥主題曲（夠玩野）同"Eyes on Me"（王菲唱）引到我注意完全冇興趣，我反而想搵番Wild Arms隻soundtrack，單為片頭首歌已經抵晒，本身唔識吹口哨，因為intro首歌吹口哨吹到癲（出神入化我甚至懷疑過係咪真係人吹），搞到自己立即無聊研究成日吹吹吹吹吹吹。最近一個reissue版係上年孖碟版亦即上面果隻，可惜隻game知名度唔夠，要搵，真係唔邊度搵。
「賣台版賣sampleｄ檔口會唔會有？大家去行街睇CD時，麻煩幫幫手睇睇見唔見有呢隻Wild Arms soundtrack全集"Wild Arms Complete Tracks"。隻game配樂實在出色，實在懷念。」

「繼珍珠奶茶，我連可樂都唔再飲。」
無端端成杯珍珠奶茶倒到周圍都係，已經灰爆。點知倒開有條路，事隔一日，又倒多罐可樂。好在已經有豐富收拾殘局經驗。
「頂你個肺。以後唔飲可樂！」

極度眼訓。近來日頭夜晚都多野做，一日廿四個鐘除左訓覺果陣完全冇精神。老細都知我辛苦。返到公司，兩個老細已經執緊野，準備起程返工廠。
「我地走架喇，上足去成日架喇！咪作反呀你班友！」
「老細！橫掂你地今日都係一早返大陸返成日，點解唔索性直接返，係要返黎公司先？搞到我冇得叫人幫我打卡咁賤格！」
兩老一走，全公司立即玩轉。會計靚女即時鼠入會議室訓覺。
「好在今日佢兩個唔係公司，我今日眼訓到個人根本冇靈魂，佢地唔走我都唔知點算！」
「本身我就有靈魂，不過返到黎，就冇喇！」
象徵式完成幾樣需要即日搞掂之急務，就上網同聽歌寫碟評了，算檢點架喇我，其他同事要幾癲有幾癲。玩玩下都玩到悶，公司今日出糧，冇野做走左落銀行睇睇條數。因為公司係工商出糧而我戶口係恆生，個個月出糧之後都要我手頭去工商機拎晒ｄ錢出黎，再走番去恆生機入左佢。而家中銀機裝修左靚過以前冇咁殘（中資機構ｄ野永遠充滿大陸色彩霉霉爛爛），破天荒地有得插耳筒。
「提款機都有得插耳筒？」
真係咁大個仔都未見過。反正無聊，隊左自己個耳筒入去。聽到ｄ乜？全真人發聲語音指示。係冇的。都係平時的篤篤篤篤篤篤篤掣聲。我見過最無謂的配套，果真中資。
「唔插又係篤篤篤插左又係篤篤篤，又唔係多ｄ咩特別聲或者指引，俾個位我玩耳筒做乜？等我覺得自己玩緊ICQ？」
無聊，都玩左兩個字，後面排隊個阿叔以為我玩野。入完數，周圍行掃掃街，遺憾地公司附近唯一一間唱片舖即係新九龍賣好多舊版間懷古檔執左，香港地賣唱片都係做唔住架喇。返到公司夠鐘食飯，食完訓到兩點幾起身，入pantry繼續食。
「有冇咁多野食呀？」
「頭先掃街唔係野呀？況且lunch時其他同事食唔晒自然會留俾我食，pantry仲有甜品同生果，好忙！」
食完又上網聽歌寫野，噉就一天。正。上月底有個同事走左，老細最後請番個新人，位新同事今日第二日返工。已經遇到如此景況了。我驚我地（「係你一個嗟！」）嚇到佢唔敢繼續留係度做。

好耐未試過似番做生意，係去廁所都冇時間忍足幾個鐘果隻。除左幾位本地客，今日仲有兩個VIP。第一個入到黎，自己搞掂，三個字唔使走人。全程以超西方口音英語交談，以為係新加坡或者ABC。走時傾開，
"I come from China."
佢唔自首，完全唔會估到佢係大陸人，佢口英文已經勁過同純正過90%香港人，包括我。
「我地香港人，都係快手收自己皮算啦。」
跟住果個，就真係新加坡人。八點未夠黎到，玩左兩個幾鐘先走。
「因為太多苦惱。」
兩個半鐘一路兜圈一路拎碟，拎下拎下，拎左超大棟出黎，為左今晚上黎仲專登清左自己個電腦袋裝碟。
「今次算少架喇！我最癲果次，試過一次買七十六隻碟！果次自己發癲，入到CD舖見碟就拎，拎左幾十隻出黎，個老細見到覺得唔對路以為我係癲佬入去玩野，自己拎番晒ｄ碟上個架，我見到立即問佢"WTF are you doing man?"本來我揀碟時佢當我冇到問又唔應，一知我買咁多碟，立即當正我係大老細！」
呢樣我完全明白，佢今晚買一次，等同於而家TRHK一個禮拜總和 － 應該話仲多過而家一個平常禮拜七日加埋 － 俾我我直頭當佢神噉拜添啦真係大家都Merry Christmas。而家上到TRHK掃碟會一個月或者使到四位數，只得番我一個，同埋外國客。冇計，香港地聽metal果班本身已經唔係消費果班（「唔係消費」＝「有錢都消落其他費先」），同埋
「TRHK乜都冇。」
有趣在，兩個非香港客，一晚幾乎清晒全部「冇」之死貨。佢兩個都係專攻old-school野，特別thrash同death。thrash野一向有入開，前排（年幾前）入多左，因為多人問、因為「有人講」。初時入，好多人話要，入到返黎，「好多人」唔見晒，講時好大聲好多野講，當真係要俾錢要付出時，香港人總有無數理由。所以兩年來積埋之thrash野、death野，「好多人」冇要冇理過，反而兩個外地人一人一棟，差唔多一日冇晒，所謂係因為香港人想要而入之好多band好多碟，結果變成養兵千日，或者話全靠佢兩個先救番。
「或者因為佢地係問一隻碟『係咪thrash係咪old-school』，係就已經買得，而唔係問『係咪邊隊band、邊隻碟、邊個版』。」
又或者係佢地兩個先唔識聽metal啦。身在香港，我相信呢個先係正確答案。

LiveHouse每年年尾必定會搞番場metal show賀聖誕。
「鬼叫班主二寶樂係metal友咩！」
所以你見LiveHouse從來冇hardcore show、冇hardcore「明星」出過，雖然佢都聽hardcore，只不過香港band壇就係多問題、同音樂完全無關的（無聊）問題，冇計。六隊band玩乜，條拎有晒試聽我亦寫左大概，幾隊band style都同而家香港聽野大取向一致，相信好多人會好enjoy呢場騷。重點推介自然係THORN SLAUGHTER，玩deathcore，聽過一首demo已經勁想睇，因為首歌pro到爆，係你會覺得唔係本地band玩港人玩果隻。其他就睇你鍾唔鍾意，因為style都幾雜，好有興趣睇DARK FRINGE，睇live唱成點。
年幾幾年前，LiveHouse年度metal show真係metal show，接近全部metal band冇乜邊隊玩core野。而家，係想搵隊唔撈punk唔撈emo唔撈core都難，好似今場「真正metal」只得DARK FRINGE一隊，好多band就算個底係正正經經heavy metal、thrash metal，唱都要hardcore式嗌同嘔，又或者中間攝一兩野breakdown，冇計，香港聽眾就係咁有「時代觸覺」，好簡單的道理：假使你玩IRON MAIDEN，玩到同IRON MAIDEN一模一樣連IRON MAIDEN都話你勁，係冇用的，因為台下聽果班香港人唔會聽唔會理唔會鍾意；但如果你玩同一首IRON MAIDEN，歌佬唔係唱而用core聲，台下立即萬人空巷。
「在香港，hardcore永遠才是皇道。metal友請默哀。」
而家，你玩ｄ野唔加ｄcore落去，都唔好話自己係玩metal，「為勢所迫」，有時覺得好反智。睇而家上黎搵death野的朋友，好地地death metal唔得，而要好專業地「我搵deathcore」就知，一定要deathcore冇core唔可以。所以點解TRHK「乜都冇」。

近排十分開心，公司成日冇人，全個禮拜差唔多冇一日公司兩個老細同時出現公司，今日亦係唔知第幾日佢兩個上晒大陸。灰在係近兩日奇多野做，好在努力工作，日日總可以有最少半日坐係度等自娛，係噉玩係噉食。
「咁開心，成日冇皇管？」
「其實冇皇管，都幾大件事。」
無端白事，兩個老細又點會上晒工廠，仲要係上去差唔多成個禮拜丫，唔使留係公司睇實劉Sir廢事佢作反咩！咪又係大陸單野，政府突然話全國人民受保障，做夠一年公司就要俾服務金，即係做夠十年果ｄ俾十年，人人突然多左勁大舊錢，亦即老細突然冇左勁大舊錢（閒閒地七八位數呀講緊！），你話幾大劑丫，你係做緊野都立即罷工唔做野，等老細俾晒筆錢你先再講啦！就係平息工潮，同埋同工廠班人傾掂條數，就日日唔見公司最大兩個了。正。不過正一回事，亦代表左，今舖公司可能真係做唔住。做廠生意已經難做，已經年年蝕錢，而家仲要無端端政府一句立即冇左幾百萬，你唔驚？希望仲係狼來了啦，因為個勢似執笠唔係冇可能。
「工都冇得做，噉咪好大劑？」
「係卦？今日唔好問我！忙！！」（忙＝上網、聽歌、食野、寫野．．．）

「好耐冇見。」
一到年底，立即多番一氣，或者係黎左批新貨沖喜，或者年尾大家消費意欲爭，又好多人想買定ｄ碟過節聽（睇前日隻新加坡鬼就知），首先超多鬼出現平均每日有一隻，唔少好耐冇見過的朋友蒲番頭，亦終於有新面孔。難得係撞番佢．．．
「呢，朝早四五點俾劉Sir搶左套架生去街邊唱BEYOND，唱到幾乎俾差佬趕果個呢！」
街頭演唱／唱住俾人趕幾年（係呀係幾年呀我第一次見佢係幾年前天星碼頭），而家自己屋企錄埋音出左碟添喇，再自己整首飾搞小本生意，搵唔到工都要變通的。
「突然好熱鬧。月底會點？然後，下年會點？」

「今日係大日子！」
「咩事咁大件事？」
「我星期六（終於）唔使返工！！！」
呢生人第一次短週，終於出現喇！（返小學ｄ長短週唔計啦頂你！！！）畢業之後第一份工返六日，不過日頭返完夜晚再返另一份仲有TRHK，分別唔大；第二份即係而家呢份頹工，五日半，叫做唔係六日囉，只係唔返工時間就係上皆旺，又即冇唔同過都係一星期做足七日。
「事實上劉Sir未畢業已經五份part time加TRHK，一星期踩足七日啦！買碟唔使錢咩！」（只得佢一個仲以為要．．．）
即係星期六要返工，返到公司都唔會做野架喇，咪又係發住癲加怒食等一點鬆人，咪又係短週！不過以前係名義上短週。今個禮拜開始，正式成為形式上短週，直頭唔使返公司蒲頭。
「第時短週禮拜六都可以歡樂早場，之前果晚黎多個開心夜場都得！正！」
噉第一個歡樂早場玩乜？唔多歡樂。隻狗當人黎計已經七老八十，前排先入過廠，而家眼又有事腦又有事關節又有事，襯住今日朝早唔使返工，帶隻野去睇睇個醫生先啦。做獸醫真係十分好搵，絕對好搵過人醫，想當年睇次醫生冇兩三百出唔到門口，而家成街醫生大家鬥平，我屋企果頭百二搞掂。但獸醫以前到而家都係貴，基本門診兩舊幾水，之後乜都要錢幫你掂一掂望一望簡單檢查步驟隨便一個收你幾十蚊，執劑藥十幾粒丸仔又三四舊水，最死動物呢家野唔係睇一次好得晒嘛實要覆診唔知幾多次，佢明拖住個病吊你屈錢你都吹佢唔脹，你係獸醫定佢係獸醫丫你鬼知咩，醫生叫你就要去架喇有乜計？再加要去到紅磡睇醫生，來回的士都五六條，甘到爆。
「鬼叫係我養佢咩。養寵物ｄ人就係噉架喇，對自己都冇咁好呀。」
可能隻野睇得多醫生，而家隻狗由最初行過診所門口都驚，變成一出到紅磡落的士立即衝左去唔知邊度，佢四圍走我梗係要跟埋一齊躝黎躝去架啦。經過上次見到好多國產變形金剛檔報紙檔，
「灰！最新款運動鞋變形金剛俾人買左添！」
睇完醫生之後再騎騎笑跑黎跑去，雖然間診所正正就係美國寶過幾步咁近，佢行得好開心，我唔係，帶住隻野，全部舖頭同機舖經過都得個望字。
「阿狗，即係我想話你聽，狗係唔入得美國寶架！」

唔使返工，照俾隻狗搞到晨早起身，睇過醫生返到屋企食埋個公仔麵，仲夠時間黎埋個歡樂早場（雖然已經係晏場）：

個天都知我今世人第一個短週好開心，同我一齊慶祝。首先今日勁多鬼出現，多鬼即係多metal水吹同有生意，人都唔少夾夾埋埋今日好過前幾個月唔少禮拜之總和。
「奇在咁多生意，多數客都係搵舊貨而唔係近兩水新貨ｄ野。其實新貨係咪真係咁重要，對聽metal的人黎講？」
夜晚都唔弱，有我地期待以久的

古有超女，今有超band。
「係冠軍band！！！！！」
司儀陳啟泰曰。亞視轉左老細越黎越強，北望神州，而家似足大陸搞埋好多大型比賽，連band比賽都有，直頭奇蹟。之前略有所聞，知道有個比賽中港台三地樂隊參加，不過聞左一聞已經話選左十二隊搞總決賽，每隊各玩一首原創歌同一首自選改編歌。開場先有夏韶聲，玩佢為個比賽所寫之主題曲
「Power！！！」
在場人士立即發晒癲。玩完，遭HELLOWEEN big fan Rock爺指住部電視怒小。
「搞Ｘ錯！唔係HELLOWEEN cover黎咩？？？？」
再有唔知邊個的女司儀彈琴陳啟泰唱"We are the Champion"（陳啟泰主持《百萬富翁》時出過碟仲guest過SOLER live架你唔知咩？），就開始大家期待的冠軍樂隊比賽了。中港台夾埋十二隊，唔知係咪刻意安排，排位越後，質素（普遍）越高。所以開頭幾隊冇乜特別印象，甚至冇印象。

第一隊band係內地代表，名唔記得左，只係作為開場，似炮灰多，係睇到你望住部電視
「．．．．．．」（滴汗中）

香港代表EMPTY TOMB，係咪之前鏗鏘集《聽不到的樂與怒》上過鏡？第一次睇佢地live．．．都幾失望。僅記得自己歌chrous不斷
「Shouting shouting shouting shouting shouting shouting．．．」
直到永遠，同玩劉德華《我恨我痴心》。鼓佬唔錯呀，夠爆，亦衰在爆，因為隊band本身ｄ歌係唔（夠）恆的，如非音樂所限，唔係冇機會拎最佳鼓手。

另一內地代表U&I，一班老野，歌佬仲要戴牛仔帽，娘到爆我鍾意！唔好意思我確係有少少年齡歧視，只係老野玩band確係有技術ｄ有味道ｄ，單intro已經知掂，好多後生仔技術高點強點快，不過成隊加埋明顯地唔齊，佢地一睇就知酒廊band玩得甚pro果隻，夾得齊和音又唱得好唱得正key，單呢樣佢地之前咁多隊（靚仔）band都冇隊做到啦。style係EAGLES，cover左"You Can't Get It Right"，實在太鍾意了，亦一睇就知贏唔到，落敗原因相當明顯：
「太老。」

然後係黃貫中表演時間。
「個個玩個台都冇野，黃貫中一出個台立即火燭噉，明大細超啦而家！」
唱《踩界》，算係全晚較band較rock的一首了，只係，
「唱唔到．．．」
然後玩幾pop下的東西。即係你睇「好rock」的黃貫中都係玩pop，就知道而家香港／大中華地區有幾rock有幾band了。最抵死係睇完黃貫中到廣告，轉過隔籬明珠台《American's Got Talent》，剛剛撞正兩條女玩Avril式彈唱，同大中華比贏晒，觀眾都唔同反應啦已經，致勝之道係兩條女玩pop rock就係pop rock，唔係唔pop唔rock的兩不像，pop就pop盡佢啦唔該係band show就唔該band爆佢啦！好彩果兩條女係表演嘉賓，如果（只）係參賽者的話，我地真係收得皮了。（不過同集有條十二歲靚仔吹口琴「速吹」到Malmsteen level。睇完發現香港已經收左皮。）

再黎另一內地樂隊奇幻之旅，非常J-rock feel，亦即好．．．潮童。首歌就係《奇幻之旅》。感想：
「．．．好奇幻呀。．．．」
不過跟住玩cover歌改編《吻別》，變成好簡單的rock版，但玩得唔錯喎表現好過自己首歌。只係，都唔多頂得順歌佬。同唔知點解要玩得咁「visual」。

存活勢力，勁LMF的一隊，歌佬rap，chrous鼓佬唱清聲，結他佬用Zack Wylde。都唔係重點。我最鍾意係佢地開場時，要講明自己出騷有四大原則。
「我地METALLORD出騷一樣有四大原則！就係冇錢唔出！冇女唔出！同埋．．．我都唔Ｑ記得！你知我地份人不嬲冇乜原則架啦！」

跟住另一隊香港band戳馬，傳說中之「nu-metal版DSC」，有係名聽得多但從未睇過。
「嘩，乜個歌佬化到自己成個張保仔噉款？仲要古裝片囚衣當台服咁型？」
全晚第一隊真係metalcore由頭嗌到尾，有番ｄ睇頭似番真正band show喇！仲要cover《血染的風采》！正！！！
「但，點解唔係《滿江紅》？？」

鬥地主上報紙睇過佢地，記得因為有條女，同埋隊野冇鼓冇結他。
「冇結他都算band？」
「有女就大晒架啦！吹咩！」
在場的Rock爺話歌妹似蔡依林，樣就唔知啦我冇乜理過，台風同音樂確係同流合污，pop唔係罪何況佢地玩得好，另外兩條仔一個係keyboard一個係個DJ兼MC，個DJ/MC rap同和音勁正，自己歌係中樂R&B，其實表演到水準到創作佢地三個屬於幾pro下的水平，算唔算係band係夾band定玩pop我唔理，我只知好聽。如果佢地最後贏到，就真係笑爆咀了。

楓嵐，隊band全部人超punk款乜都set到恆晒果隻，點知歌佬一入鏡．．．
「哦。點解歌佬唔同其他member一齊癲，個look咁正常？」
你鍾意咪叫emo rock，唱一輪，再嗌一野，再唱，就係近年成功方程式，唔係我好鍾意果類野，不過玩得幾好係事實。只係自己歌玩完玩cover，選《十年》，即係陳奕迅《明年今日》國語版，平平無奇同原來冇咩分別。
「好普通咋喎！」
曰。一聽到投訴，即變screamo，歌佬到最後chrous怒嗌嗌到玩完。冇錯，當今emo/core世代夾band，其中一個成功之道就係記得要嗌，最少都要攝一個嗌位首歌先叫做「完整」，請參考楓嵐兩首參賽作品。
「佢地出live，都幾似我地唱Ｋ喎！大中華金牌卡拉OK大賽幾時開始報名？」

跟住就堅喇！
「有請20088！」
20088，係咪之前去漫畫節果隊大陸靚仔band？平均年齡七歲 － 冇錯係七歲，
「芬蘭隊細路melodic death MIRROR OF MADNESS都九歲，都唔夠佢地後生！」
至於band名，點解？
「四位七歲小朋友未出世已經俾老母播住METALLICA胎教，自出娘胎已經開始夾METALLICA，四歲玩晒成隻"Ride the Lightning"，五歲玩晒成隻"Master of Puppets"，六歲連"...and Justice for All"都玩埋！為報答METALLICA養育之恩，特登改左20088呢個band名，因為2008年METALLICA出新碟，而8代表佢地第八隻碟！」
以上100%錄自當晚司儀所講，唔信者自己上YouTube搵片。噉班小朋友玩乜歌？
「作為METALLICA超級fans，其實佢地想玩"Master of Puppets"參賽，不過首歌成八分幾鐘長收到廣告客戶投訴，四位小朋友只好折衷改玩BEYOND《不再猶豫》！」
同樣台詞就係噉冇呃你仲係唔信問問陳啟泰。有聽《不再猶豫》都知首歌賣點係非常melodic速度都幾快的solo。即係個小朋友仲矮過枝結他，但成個intro一模一樣地彈晒出黎，個鼓妹坐鼓後面睇都睇唔到佢但打得Ｑ勁仲要邊打邊唱，四條靚仔／妹口廣東話完全唔正，但玩得勁齊加噉年紀玩到仲要玩得咁好，喂你仲想點先？
「有ｄ香港band都夾唔到咁好呀！」
solo簡化，十六分變八分，相信會遭到唔少專家恥笑，只係七歲咋喎咁多神童咩世界上，同埋佢彈得唔快，但勁清勁好聽，粒粒清加行雲流水果隻，即係見過好多講野大大聲的香港band友，大佢十年甚至廿年，都唔知彈唔彈到咁齊咁清囉。
「而家大陸ｄ人好恐怖呀！」
簡直睇到毛管戙，太黐線了這班小學生。從可靠渠道得知，20088玩緊《不再猶豫》之際，黃貫中於後台掩面飲泣，而身為評判之黃家強亦呆坐評判席上，驚訝曰：
「點解條靚仔手bass仲勁過我？」
其他band表演，多數俾亞視cut到一首歌得番分幾鐘，但難得冇cut到呢班小朋友，玩晒成首《不再猶豫》先入廣告。只係我更想知道佢地有冇原創歌，有又玩成點。睇完四位小朋友台上演出，立即覺得自己好柒、香港好柒。呢part我睇到喊。笑到喊。真係太有娛樂性，喊住睇。

再到另一香港代表AMS，歌佬有點古巨基feel。玩乜？拎首古巨基，chrous變黃貫中搖滾就知。台風要好激跳晒fing晒chock晒。OK喎。

跟住台灣教練樂團，funk funk地。有冇睇過一套cult戲，有Michael Angelo做魔鬼，講主角賣左靈魂俾魔鬼做rock star？入面主角隊band個歌佬，係粉紅衫緊身褲非常老土健美操look，個裝束我見過最柒最樣衰係見一鑊想打一鑊果隻。而教練個歌佬．．．唔好意思，令我諗番起果套cult片個角色．．．
「好glam。」

最後跳猴，似乎全場最多fans，難怪壓軸出場。成隊band斯文學生look打晒呔出騷，造型台風音樂都十分日本，論演出確係贏左好多人。

十二隊玩晒，到最後一個表演嘉賓、評判黃家強出場。重點係KOLOR做backing band，黃貫中有汗，而家黃家強都有KOLOR。BEYOND聽得耐，佢solo真係未聽過，或者因為一向唔鍾意佢把聲。第一首《夢紅樓》玩中樂，
「得喎首歌同佢唱都係！」
點知過左第一段剛入正題（電結他同鼓出聲），即cut入唔好聽的《驚恐症》，仲要係玩足成首咁滯。
「$hit．．．．」
其實呢個係全晚通病。雖然叫樂隊大賽，電視台對band呢家野顧忌太多，怕嘈親屋企的小朋友俾家長投訴。唔嘈時例如清聲結他清唱，就好大聲，但一黎料，即係鼓手或者distortion一起，部電視立即自動細聲勁多，本來睇同聽落好激果ｄ位反而變到好靜，完全係反高潮聽＆睇到笑。對於香港觀眾，即使而家終於搞到一個band show、樂隊同rock上到電視係一個進步，主辦單位仍然太驟忌。
「明珠台《American's Got Talent》，rock同metal咪又係照焚！即係人地ｄpop rock歌都大聲過你呀！點解中文台唔得先？」

跟住到頒獎。最佳結他手係戳馬兩個，香港好野！bass係教練，玩funk又難怪會贏出。到最佳鼓手，頒獎嘉賓係夏韶聲。
陳啟泰：「咦？唔係最佳歌手喎，點解係你上黎？」
夏韶聲：「我彈結他同唱歌，但以前係打鼓出身架喎，你唔知咩？」
希望在座的你知道啦。得獎者係存活勢力，音樂底咁LMF，夠chok而贏卦，我冇乜留意。至於最後兩個獎，鬥地主掃晒，因為老屈。最佳keyboard，除左佢地本身玩得好，全場冇幾多隊band有keyboard，某程度上佢地係屈機．．．至於最佳歌手就肯定啦，得佢地一條女唱，講唱男聲同女聲相比女聲實有優勢，贏係預左。冇錯，樂隊大賽的最佳歌手獎項，就係由最唔band加唱得最流行果個贏左。
「即係，唔通俾由頭嗌到尾的戳馬咩．．．係我絕對認同佢地先似band sound唱歌，只係對於普羅大眾，你覺得佢會鍾意邊個先，靚女聲唱定張保仔怒嗌？現實也。」
唔知點解會有個香港人氣大獎，「band版古巨基」AMS贏。大陸同台灣冇人氣咩？跟住三甲公佈：季軍奇幻之旅（都算係全晚我最唔鍾意之一）、亞軍楓嵐、冠軍跳猴，三隊都係大陸band。難怪。大陸比賽梗係大陸band贏啦，台灣唔贏係政治正確的決定，香港屬於中國主要城市之一，豬肉獎都要分番個卦。明白了。只係，睇完成場，仍未參透參賽者係點選拔，特別頭幾隊水準真係離合格上台差一段距離，好坦白講，即係我地香港教會青年中心蒲窩Livehouse IMnet，有好多黎到都入到三甲。又叫得大中華區樂隊比賽，反而唔見真係玩band聽band人心中覺得冇可能冇佢地份之勁band。
「KLC呢？秋紅呢？」
一隊都冇。睇番清楚場騷個名：

一連幾日好忙。日頭做完，夜晚上到舖頭返到屋企仲要撥個輪過美國同班客開電話會議。真係麻叉煩。睇睇報紙，發現早知唔好咁搏。
「香港政府忠告市民：千祈唔好勤力工作、自力更生。」

「明日即是！香港難得之underground metal show！有demo極具水準之deathcore THORN SLAUGHTER，同本地罕見之女聲metal DARK FRINGE。$45有得睇六隊本地band，支持下啦香港metal友！」

希望你有去支持。我勁想去，不過要留守皆旺冇計。你地有香港band，我都有香港band：

唔知有幾多人鍾意，雖然sludge突然好潮（定潮完？），但佢地種玩法唔覺會有好多香港人會聽。我鍾意就得。感想，最後一段講晒：
「有三次因香港金屬出品雀躍不已。第一次是1994的AZYLUM "Are We Born To Suffer"。第二次是HYPONIC 2005年的"The Noise of Time"。MOLTEN LAVA DEATH MASSAGE "Eye of Ra"是第三次。」

要睇舖，收得舖黎都完騷，冇騷睇，有戲睇：

近來好靜，因為太懶。乜都趕好晒，年底外國放假，做晒野就係坐係度上網寫野等放工。正。今日叫做有番少少意義，有個客想上廠，自從股震之行，同大陸烽頭火勢，第一次上去。琴日老闆娘已經突發上左工廠同工廠班人傾數，係本來冇野一個電話之後即上果隻，一睇就知大鑊野。琴日放工前，收到好多同事祝福：
「近排睇報紙都知，大陸好多工廠因為新勞工法，全廠工人罷工，管理層俾員工禁錮，聽講我地工廠一早報左公安要求調派保安部隊駐廠喎！希望聽日你返到香港啦！」
老細都唔多想同我上。你知啦，次次我上實有大鑊野，即係自己架車爆呔算好少事架喇，邪到人地架車爆呔再反車封晒成條橋都試過啦，家陣大陸日日暴動，加埋我個八字上去剋一剋，入到廠分分鐘冇命出返去。驚架我，七點半上到老細車，一面坐一面震，不過唔係我震，係同我同車的老細驚到震，我只係受到牽連。
「睇黎此行會緊張刺激精彩萬分！」
點知．．．冇事。去到工廠見見個客帶佢遊花園之後佢走人我食飯乜事都冇發生。我仲諗住會俾幾百個工人圍住之後治安隊衝出然後有工廠無雙睇添。當堂冇癮。尤其食飯時，冇雞食。工廠大老細即時道歉：
「次次知道劉Sir大駕光臨，都叫阿姐買隻雞返黎斬，近來工廠咁多事，顧得班靚，唔記得左劉Sir你添！你知啦！平時我地煮飯都係食食魚食食豆腐就算架喇！係劉Sir上黎我地先有得食好ｄ咋！」
不過有樣野好唔正常，通常食完飯訓到兩點鐘正常晏晝返工時間，先落去執野開車走人，今日早左半個鐘一點半就俾老細踢醒叫急速上車走佬。或者兩老都驚同劉Sir多留一秒，亦即拎自己條命較飛多一秒，都係早走早著安全ｄ。
「我冇所謂呀，車上面訓飽晒，三點半返到公司，就有大把精神同時間慢慢上網！」

但近來清閒加上年尾，個人真係懶晒。想睇野？下年先搵我啦。

20/12/2007 THU

好書推介。一睇封面你就知點解我鍾意啦。香港音樂雜誌，死剩幾多本？只講音樂唔係潮流野順便提提音樂之真正音樂雜誌係指。我一本都搵唔到。突然出現一本，唔使錢免費任派，仲要唔係廣告雜誌五十幾頁全彩印但廣告冇幾多版，由幾個資深音樂編輯撰稿做專題，總之從頭到尾都係講音樂，同唔係死講外國或「唔知乜野」真正研討番本地音樂、好多香港雜誌唔會做之忠於本地。
「咁咪好pop？」
「pop唔係音樂咩？」
pop又好indie又好underground又好，屬於邊種、pop定唔pop、（pop得）有冇價值，係睇你咩角度去聽去睇，而幾個主編係從音樂人角度去睇本地音樂，最特別今期第三期專題係K歌。
「K歌，是正是邪？是聽是唱？」
主要探討，係編者話同中間「Facebook唱K聯盟」訪問，但或者K歌已成現代香港音樂文化象徵，其他所有文章，同「K歌」大主題直接又好間接又好，總會有意無意間談論到K歌，而共識自然係政治正確：
「K歌都唔係好似大家講到咁衰的。」
搵食嘛。不過編者話有幾段幾有感受，節一節錄：
「K歌興起，是因為『為喜歡音樂而聽歌』和『為在卡拉OK表演而聽歌』是完全兩種動機，所要求的音樂類型也完全不同。」
「萬物均存在因果關係：K歌的出現，全因港人生活質素；K歌的氾濫，全因供求關係；而K歌代表香港樂壇，乃港人聽音樂實在太被動，欠缺主動找尋自己喜愛音樂的動力形成的成果。」
「其實K歌絕不是壞事，從音樂中找到情感共鳴亦絕對是音樂主要功能之一，但任何東西太多、失去平衡都只會帶來負面影響。不少音樂人從言談中，都表示滿腔多元音樂熱誠，都受制於市場主導，市場需要K歌作為娛樂，音樂．．．彷彿仍未得到大眾重視。」
講中晒好多野。更中係，將幾個字眼更換，例如「K歌」換「（大路）metal」、「香港樂壇」換「本地metal主流」、「唱K／卡拉OK」換「講俾人聽我聽metal」，同講緊香港metal冇咩大分別。
「所以一早講過，香港metal早已K歌化。有時香港metal友，視野比佢地睇唔起的『聽中文歌人士』更狹窄。」

內容方面，一路揭落去，由主流講到獨立，但主流果班都唔係非常大路果種，即係唔會你一見到會「超又係佢」果隻。大部份篇幅係做訪問，欣賞在有好多冇咁出名之歌手、獨立單位同幕後人員、創作人、專業人士，好似星盒子女主音，隊野晨早唔知去左邊（但好正呀），睇左先知佢有solo碟出，即係要捧場了。不過內容同排版有待改善，雖然訪問人士數目多，但每人只得三四條題目發言唔多，版面設計好多時冇標題甚至冇前言一入就到正文，未可以明確表達訪問背景同內容主旨，同唔知應該由邊部份開始入手，加上各人文短，第一版睇到尾似未完，但第二版變左另一個人，好迷失。好多indie band、獨立單位同活動都有講，亦有介紹新音樂產品，夠多元化但可以做到再深入會更好。
「係，我都知，免費野要做到高專業級數極難，廣告費維得幾多皮？」
想拎的朋友，每月一號或十五號可到幾間大專院校，同大型唱片舖如CD Warehouse同HMV免費索取（希望我冇記錯派發地點，呵呵），不過錯過左唔緊要，
「出版日跟住個星期六日，旺角同銅鑼灣街頭會有囡囡親手派俾你架！」
估唔到香港音樂雜誌做一本死一本仲有人繼續做，兼係做理論上唔多人留心之本地音樂，定位在（好）主流同（好）地下中間最難維持。更出奇已比以前睇過幾本專業，竟然唔使錢。或者香港地音樂刊物，只有免費方式先做得住。定還是要免費先引到香港人睇？

21/12/2007 FRI

終於俾我捱到最後一日。工廠繼續日日嘈交罷工搞工潮，睇老闆娘日日同工廠電話開戰就知有幾激烈（點解日日有戲睇，就係我前日上去乜事都冇？），換言之工廠唔會有幾多野做到落黎，外國文化十二月中已經開始大家聚會搞party，一早失晒蹤啦班友得鬼閒同你做野咩，禮拜頭已經當自己放緊聖誕假，只係形式上都要返公司坐坐迫於無奈。聽日係短週，星期一廿四一早請左假，過埋今日立即連放五日假，
「正呀！！！！！」
自己都不禁大嗌。各位同事同老細都慣了。根本無心工作，加上接近冇工作。我係噉上網，睇到幾乎冇野好睇。多年黎堅持唔肯玩MSN的會計靚女終於失守，一開個MSN立即不可收拾，玩到差少少工都唔記得放，即係平時五點八office已經唔見人的佢搭十仲坐係度冇離開個位，我都知有ｄ唔妥架喇。放工時，好開心：
「直掃到聖誕後大家都見我唔到，保證人人有merry christmas！」
所以要拆禮物。會計靚女一早準備晒全公司每人一份禮物，傳統上係拳擊日先拆。但我放完長假返到乜都過晒啦，襯今日開埋佢先放假。

「我放假喇！！！！」
撇除開舖唔計（讀緊書時TRHK已成生活一部份，尤其畢業後，特別而家），當年轉工中間一兩個禮拜唔使返工空檔都唔計，間中撞彩新年聖誕復活節亦唔計，畢業後幾近未試過連續放假放多過三日。或者係一星期開六日舖、逢禮拜六日紅假開足全日，加上成日放例假二三月已經差唔多玩晒全年年假（呵呵），想積埋假期一野過放實在艱難。但今年年尾好多機緣，令我有心整番個「長假」玩玩。
「係，其實日日晏晝三點都係要躝番上皆旺唔係點放假法，將就下啦已經係最可行之『長假』黎喇！」
首先，撞正大陸工潮如潮，政府一聲令下全世界勒令推行五日制，香港同胞終於得到國內朋友帶契，有得返五日半（都唔係五日，香港都係不如大陸架喇），個更表好彩廿二號短週，請廿四，就可以一野combo五日假。第二個原因，係107。
「22-26就係冬購節喇！記得去D19幫襯107！」（唔係D04！！）
107！唔係因為你需要免費勞工，我都唔會特登請埋星期一假幫你手！（「係咪呀？」）
「冬購節又關你事？」
「我係gofer！」
gofer是甚麼？小學作《我的志願》，就是gofer了。敬業樂業，雖然唔使返工，都一早起左身，但唔係自己醒，係老細一早已經打電話黎叫醒，開機做野。
「喂我今日唔係短週咩乜？？」
所以十點會展集合，過到去都遲左幾個字了。我一向鍾意黎會展擺攤位，因為做等於玩，
「正如上次十月黎展覽唔係搵生意，係呃紀念品，老細都頂我唔順！」
但論到真係入黎玩，今次先係第二次，第一次係足足三年前幫也哥擺地攤賣tee，但話係幫查實似入黎睇band show多（大哥丞yeah！F.I.R. yeah yeah！！）。今鑊冬購節諗住又會咁多野睇咁多野玩，點知乜叉都冇。諗住會有好多活動好多節目，但比預期中失色得多，一睇節目表，跳跳舞玩玩搖搖舞下獅就係，冇乜癮喎，想睇囡囡，只有做開幕嘉賓同問答遊戲的葉翠翠（好似係港姐？我都唔知）。
「107好似你ｄ囡囡仲吸引喎。」
同估唔到107個檔口可以擺到咁多野。
「喂，唔使成間信和搬過黎咁激卦？」
平日上都唔覺，原來107收埋咁多正野，勁多電影DVD特別版boxset、《死亡筆記》電影兩集加製作特輯加原聲大碟四碟boxset日版、日末李小龍tribute album送鞋印tee，
「喂收埋晒ｄ正野呀下你條友！早就應該拎出黎大家分享啦！」
執餐死先報得掂個檔口。可能今日仲有好多人要返工同未到聖誕，人流比預期中少，不過都夠做到冇咩時間去其他地方行，唯一出去係做外賣仔。會展本身ｄ野食勉強入得口（我飛機餐都可以話好食，就知我求祈啦），但玩壟斷其他外賣唔係咁易入到去，最得閒（＆最冇用）的我，自然係負責各位的膳食，拎住個大膠袋出去附近唯一食府大家樂執三盒飯，以大量玩具遮住掩護運送入會場。
「死，好似全日最好玩就係做外賣仔。」
不過晏晝要睇舖，兩點就要走。冇乜時間行埋另外兩個hall的美食節同電玩節，亦即重點。似乎黎緊幾日我唔會做野架喇107。

去完會展開舖，收舖返到屋企，繼續做野。自從公司電腦可以遙控，放假等於冇假，有時病假都俾老細call叫開機駁線返去做野呀陰公。就好似深夜有野叫你做，你唔想做一樣要做。
「噉都叫放假？？？灰！！」

Question of the Day。話說今日有個「睇落都知有問題」的朋友入左TRHK，漫無目的地行左幾個圈，然後好認真地問Rock爺：
「當全個世界都係魔鬼，得返你係人類既時候，你會點樣？」
當你係TRHK遇到一個不正常人士好認真地問你呢條問題，你會點？
「導演！《我是傳奇》續集開拍呢咩？」

「我又係放假。」
我又係返工。雖然日頭請左假，一樣一早起身，會展冬購節嘛大單野喎仲緊要過返工喎！上星期六黎已經冇乜人，今日更少，唔係紅日仲要返工嘛即係世界上有幾多個人似劉Sir咁懶為放假工都唔返丫。不過唔返工，唔代表唔使做。前排有幾箱野要寄去上海俾個客，香港寄三四箱大陸工廠又寄三四箱，寄左兩個禮拜都未到客人度，打個電話去問，香港幾箱大陸海關一扣就幾日你吹佢唔脹，工廠果批仲勁寄都未寄添。就係噉，十幾個電話工廠個客同公司打黎打去。我發覺我放假的日子，好似仲忙過仲多事過返公司做野的日子。
「今日公司咩境況？」
「工廠有『突發事件』，老闆同老闆娘兩個一早上左工廠！」
「搞錯！係我請假先唔係公司？係咪佢地專登陰我？」
當其他檔口一日比一日死，好似對面檔賣燒雞由一百蚊三隻做到一百蚊五隻、斜對面檔賣剪紙（？）抵玩到買一送一，107個檔口反而越黎越多正野。死，相信我自己都會中招！

「老細，我地咁勤力，係咪會有膳食津貼先？」
「有！俾張美食節入場券你，准你上去任食啦！」
果然係如其名的無良僱主。星期六冇時間黎睇，今日晏晝大把時間走晒幾個場。美食節大家入到黎，都係為一樣野：食。唔通係整信用卡同買「民間手藝」咩！（唔係講笑，真係有幾個美食節攤位賣呢ｄ野！）不過冇想像中咁多好野食。真係好野果ｄ一係收埋冇得食一係要俾錢，俾得你免費任試都係行貨野好似香腸魚蛋例湯果汁，最正果味，咪鑽石能量水囉（．．．）。有間串燒十蚊三串，篤左十蚊激好食，行過ｄ有檔賣西冷扒十蚊兜，多係多但扒同汁都唔多得，食完飽飽沿路再加少少牛丸魚蛋蝦片餅乾攝攝牙罅，同各式湯水健康飲品天然果汁潤潤喉。想黎美食節其中一個原因，係補完上次九龍城之旅，繼續搵果隻菲律賓餅乾。有個攤位係菲律賓人開，諗住冇死喇卦，點知班賓佬賓妹連隻餅個名都未聽過。
「隻餅唔係underground成噉卦？」
講到好野，有間國貨賣邊爐粉絲，同一般粉絲唔同似車仔麵隻粗麵，所以咬落彈牙好多，只係好食還好食，自己一個有幾何開爐打丫！
「契爺，定年尾搵日上你度打多次邊爐先正式收2007年皮呀？係就買番幾包邊爐粉絲贈興！」
真係俾錢買果間，只嘆有緣。幾年前某次行過大昌，門口阿姐有得試食一隻撈麵，奇正，試完又試試到阿姐都唔妥，最後都肯科水買番幾包返屋企，因為好食加易整關係兩日已經冇晒，再落大昌補貨，已不復見。事隔幾年，今次俾我見到，先歷史重演怒食，一袋五包兩袋十五蚊，抵到爛啦旋執啦！返到自己檔口，遭無良僱主恥笑：
「白痴仔！好景果邊個街市都有得買啦，仲要十蚊兩袋咋！」

之後再加Ｎ個電話繼續擺平埋寄失辦壇野，再去是次展覽重點：電玩節。從來電玩節一定多人，一來多新機多新game睇，二來貪試玩，三來執平貨平game，四來（重點也）咪就係多囡囡囉。今天電玩節，反而係三展中最差一個，唔知咩事人流勁少加冇大吸引力攤位，一早連任天堂同微軟都看淡唔參展，全個場就係得Sony PS系列撐場，撐得幾多呀PS3咁弱勢？展覽賣點係高清，但關我咩事？全個場五分鐘已經行晒加走得。如果你係想睇囡囡，唔多，好似幾間公司夾份請幾個返黎輪流用噉，想知質素如何？好簡單：
「avbuzz.com幫到你。」
對於女仔我接受力一向好高，但Sony自己坐舖面ｄ姐姐仔好似仲靚過請番黎ｄmodel。至於107至愛的高清寶寶，之前兩日有真人睇，就係今日我地黎game show先話唔黎，叫做有poster同月曆卡拎慰藉番下107噉囉。最過癮係連IVE都有入黎擺檔。
「莫非係教定班靚仔打機打到八條U都識得搵定後路？」

冇乜好行好睇，三點半就收皮走返過旺角，想過埋灣仔果頭摷摷碟嘛。跟住由灣仔搭地鐵過返旺角，你估幾耐？
「一個鐘。」
多人到黐線。等車都等左唔知幾多班。所以點解我咁唔鍾意過海。五點半六點上到皆旺，今日應該早ｄ開，叫做假期嘛都。不過，冇咩分別丫其實？
「睇騷囉！」
好似城中盛事喎場騷，差唔多個個都話去。但我懶。支力，加要返屋企搞搞條狗。
「我都係等戈竹尸的cliche review算。相信會俾場騷更具娛樂性。」

原來噉就聖誕。對於一向冇節日意識，加上一星期係唔係都返足七日，聖誕節只代表日唔使返工但晏晝一早要上黎開舖，即係更多野做更忙。聖誕禮物？咪就係一連幾日日日晨早起身，今日咩都唔理怒訓一起身已經係一點半。
「107今日我擺到明唔黎冬購節曠工！炒我丫笨！」
其實開黎冇乜意義，聽metal十個有九個靚仔，靚仔聖誕節就係出街玩，有幾多個人會寧願留番ｄ錢黎買碟都唔使錢去玩？
「有，劉Sir。可能係全香港最白痴的白痴仔。」
鬼叫音樂／metal一早已經唔屬於消費品咩，聖誕節ｄ人會出街買玩具、出街買衫買鞋、出街買鍊買首飾，買完之後先會醒番起，
「咦？冇晒錢剩，冇辦法啦又買唔到碟！」
音樂．．．彷彿仍未得到大眾重視。好耐冇乜掃過碟，近來執左唔少，希望我唔係今個聖誕節買最多碟之人。全日除左Henry，只得自由行同假期行街經過好奇入黎望望，就冇了。此乃開玩具之吉日。之前買落買落，好多隻野未拆，養兵千日就係用在今時。

「就係咁多。是日收皮。聖誕休息一天。」

聖誕回歸之後，益忙。一連幾日日日做到差唔多夠鐘先搞掂，就連今日星期六都難得多野做。好在臨走前做得晒今年所有野，公司各位同事同老闆亦下年再見。作為黎緊新年三日「長」假前夕，我都冇乜心情寫野了，抖抖好過。請。

另外，睇左AVP2。上作係廢的話，今集係Ｘ廢。
「不過講還講，錢照係噉俾佢呃架啦。按照傳統，我會入戲院睇多次。IMax會唔會有巨幕版or立體版？」
寫一定會寫。但睇埋／死埋第二次先。