超眼訓的一天。返到香港，好多野仍未適應番，思緒仍然太亂。

今日係跟番展覽前之工作，由開機百幾封email到最後只剩十幾封全部緊要野跟晒覆晒，五點半放得工，而家之思緒仲可以咁早做晒野唔使OT，自己都感到有點慶幸。

夜晚幾開心丫，有大老細煲姐請食飯。如果因為溝唔到女就有人請食飯，都唔錯喎，失敗多幾次都抵。
「想知劉Sir的故事？請佢食多幾餐又請得夠貴，咪講多ｄ你聽囉。」

今日係跟番展覽中之工作，紀錄番遇到之客人、紀錄番大家討論之內容。又係做晒仲可以上多成個鐘網等放工。每次展覽之後跟住個禮拜總會做到趴係度，今次反而唔知點解奇蹟地乜都一早清晒。亦即係更多時間係度唔知做乜，繼續諗好多野。亂。

耐唔耐都有人投稿。Ｎ年前有死肥仔個friend死瘦仔。今日，有Rock爺的一夕人話。
所以有番說話我成日講：
「『潮』、『威』、『型』果班，永遠會同劉Sir＆TRHK保持距離。」
而家TRHK賣果ｄ，真係可以話係連聽metal果班都唔會聽果ｄ。都唔知咩黎，身邊又冇人聽，買左返黎又冇人識，買黎做乜？好多人入到黎見到冇DREAM THEATER／TRIVIUM／陰陽座之後立即爆粗走人然後周圍同人講「呢隊band都未仲話自己係賣metal」，完全唔難明白。要顯得自己「識metal」，冇乜方法簡單得過踩住TRHK上，亞洲出名、全港最pro果間metal label都唔夠你識得多野喎！仲唔夠型？
劉Sir同TRHK最失敗之處，係態度，真係做音樂，而唔係去搵錢。睇錢份上低聲下氣咪好囉，有時使乜咁有態度？態度又唔可以當大家食！

又係散心的一天，因為今日上大陸，仲要連走兩檯。展覽之後突然好多客要見，朝早要走到上廣州唔知邊頭同個客開會，十點鐘開，要七點鐘香港開車，兩個鐘之後去到工廠再轉車，行多個幾鐘先至去得到。大公司就係大公司，去到當然係先等番幾個字先俾你入去啦，入到房，一張長檯十幾個人坐晒係度圍住你，檯尾仲有班鬼佬，班鬼佬至係幕後大老細，果十幾個人只係把關。跟住問幾大輪野之後，一句
「都係太貴，傾唔埋，你地走啦。」
就玩完。所以我唔鍾意入大公司做。太恃勢凌人，同做到仆街。
見完，搭番車返工廠，食埋飯十二點九，訓醒兩點幾，同工廠ｄ同事吹吹水就走人。
「唔係要走兩檯咩？」
本身係，但後來晏晝個客放左飛機，食完飯訓完晏覺就走得人，不過都要多謝個客，平時有得上工廠當然無任歡迎當渡隻咋嘛，呢排反而多謝佢今個禮拜唔黎，噉先有得早ｄ返香港多番時間做野。
回港第四日，今日係最舒服一日，搭老細車來回香港似搭飛機，乜都唔使做坐係度訓覺同諗野就得。美國返到黎香港之後，我未有一日、一晚好訓過，直至呢個朝早同晏晝。

好奇蹟地，再可以清得晒所有野準時六點放工，仲半個鐘唔使返到屋企。難得可以有晚禮拜三晚（如果唔係個客唔使見今晚都冇得抖），返到屋企就撻係梳化睇電視。難得今晚撞到有正片睇。先黎"Freddy vs. Jason"，即係猛鬼街對《黑色星期五》個面具殺人狂，劇情意料之內地簡單架啦，兩隻怪物走出黎殺人作惡，死剩種令到佢地碰面之後自相殘殺，然後爆機，劇情奇廢套戲亦冇任何意義，賣點只係女同埋血，會睇因為a)劉Sir係個爛片迷，越爛越鍾意睇　b)劉Sir最鍾意睇唔使用腦ｄ戲，例如李連杰全線，同"Freddy vs. Jason"呢ｄ一咪斬同殺之膚淺電影，襯佢　c)難得星期三晚，真係好得閒　d)主要係因為呢套戲個導演，係香港導演于仁泰，所以捧捧場。真係唔多好意思，部份香港導演之荷里活作品都屬於呢類即食戲，好似《死神來了》，所以，我鍾意睇！睇完"Freddy vs. Jason"，搞到我更想搵番齋睇個劇情係Jason去到未來打到上太空都知夠晒無聊爛到爆的"Jason X"！完左立即到《來電險事》，都好多年前上、有點兒扮cult片果套"Phone Booth"，劇情好簡單，講有條友去電話亭打電話，跟住神秘人打電話去電話亭，佢接左，神秘人威脅佢，之後越搞越大仲死埋人差佬都黎埋，全套戲就係圍繞住呢個「打電話的傻佬」同電話亭發展。睇過咁多戲，呢套都算簡單，全套戲99%時間都係同一條街同一個電話亭同一班友，賣點亦係以一個主角困係電話亭再加幾個角色，完成神秘人之全個「遊戲」，靠賣編劇，同埋全套戲係《24》式全實時進行。感覺好似另一套密室懸疑劇、《恐懼鬥室》系列，不過少好多血，同多超多粗口 － 《來電險事》係我睇過最真情流露地三句唔埋一個粗口之商業電影。只係冇想像中咁大驚喜。尤其是睇到最後，你會發現個神秘人，原來係食飽飯冇屎屙，得閒得滯搵條友黎玩命之無聊人乙個，只係呢個無聊人神化左少少。此乃敗筆。

睇完戲，做左陣野寫左少少，就訓。呢排都冇咩野睇，因為真係好支力，日頭忙，夜晚冇心情。五月，我都會抖抖。六月再算。

今日早餐，係琴日果餐食剩之KFC薯蓉。

今日lunch，係Magnum雪條乙條。本來都唔想食，點知全公司最大粒兩個十二點未夠已經唔見人，立即冇mood做野（其實從來冇過），唯有食條雪條啦。

下午茶好豐富，係

呢張貨單個名，應晒，亦中晒。

食完下午茶整多個甜品。要去廁所食。

晚餐，就勁喇！

人好少，不過好玩加爆笑到仆街。用過TRHK隊，你就會知道，
「劉Sir唔係廢！劉Sir不知幾堅！係你班友仔唔信遮！」

今日宵夜，係《蜘蛛俠3》。同第二集好似隔左好多年，第三集都算係一路等緊，冇幾多漫畫／動畫改編做電影結果係入得眼，請睇睇《幽靈車神》，唯獨《蜘蛛俠》係《X-Men》以外勁鍾意之一個改編電影系列，因為唔只係動作電影同特技電影咁簡單，劇情亦完全冇忽略到，甚至劇情同角色先至係故事焦點。第一集係講蜘蛛俠點登場，第二集再發展埋幾個角色之關係，黎到第三集，幾個大角色已經定晒型，所以某程度上都預左唔會有咩大驚喜，好多劇情都預左會點發生，亦因為已經有咁多個角色要講仲有新角色，舊角色關係亦已經咁複雜，今集文戲好多，前面大半亦去得好慢，慢到後來之重頭戲正邪對決都帶唔起氣氛，實在太多野想講同交代，同有ｄ時太求祈，好似沙人變做沙人個經過係好夾硬地做個局令到佢變，最後主角對頭話改邪歸正就改邪歸正，睇落去其實好冇癮。好在未睇套戲前見會有咁多人出現，已經唔係太大期望，就轉變心態當睇特技動作片算，一個以前睇《蜘蛛俠》覺得唔應該用之心態。沙人自然係賣點，但一開始對Venom更大興趣，只係一切顯得太浮誇而冇左以前果種迫力，特技可以好大陣仗，但睇晒三集，反而第二集同八爪魚博士一對一更好睇同最好睇。最好睇仍然係第二集打八爪魚博士，全集只得一個奸角整體角色亦少，但正因為噉，文筆先可以更集中。今次正係又要解構太多角色關係，又太睇重排場，兩頭唔到岸，睇完係相當失望。
另外，有問題。Venom條利去左邊？佢就係因為條利先正喎！同埋，蜘蛛俠出場，一定要有美國旗。同一定要有好多美國人圍觀。

通常有新貨到左都會講下有咩心水，上次咁靜，好明顯就係因為知道一個禮拜連續兩批咁多，留埋一次講好過啦。呢個禮拜好多亞洲野到左，例如唔少泰國band，泰國唔知點解好鍾意death野，就連玩power metal好似RANCOROUS都要撈ｄdeath野入去，而且佢地玩death真係玩得唔差好似NAILCOMMER，另外有（可能係）而家日本最出名black metal band凶音，或者TYRANT會出名過佢地卦，日本仔玩音樂有個特點，就係係佢係扮／抄歐洲同美國野，但扮／抄完之後又可以加番自己獨有之玩法落去，所以會有好似J-Rock呢類日本獨有之音樂出現，而日本仔玩metal就更加係metal到黐線，例如四月水貨果隊grind thrash TERROR SQUAD，玩grind玩thrash玩到去post rock你估唔估到？所以呢隊凶音又係走唔甩，係學MAYHEM學到好足，但聽落又有好多過癮野唔同你聽過果ｄ喎，就算冇聽開black metal野，佢地ｄ音樂都唔算太難啃。MAYHEM新碟"Ordo Ad Chao"毫無疑問係呢排最重要（雖然而家香港地人人都只係搵DIMMU BORGIR新碟而唔係MAYHEM新碟，又係一個可以研究出好多「新世代思維」的課題） ，舊歌佬回歸同「MAYHEM新碟」已經夠令人去聽去買，只係"Chimera"你都唔鍾意的話，新碟立即放棄都冇問題，因為去得更激，更加「工業」、變到好似SHINING、XASTHUR、伯利恆一類（曾經潮過一排）之suicidal black，亦即係「唔係(True Norwegian) Black Metal」，冇幾多人搵、冇幾多人會鍾意。但同"Chimera"一樣我越聽越鍾意喎，冇計啦劉Sir唔似得好多人咁識聽black metal嘛，所以你問我有邊隻black野好聽？
「DIABOLICAL MASQUERADE同SOLEFALD囉！唔係black metal嘛！」
講真，幾日前水貨ｄ維京野同black野唔差架。其他野的話，DEFLESHED "Royal Straight Flesh"同GOD AMONG INSECTS "World Wide Death"冇得走，前者怒快鼓佬加超勁結他爽到爆，後者聽多左我鍾意佢地仲多過另一隊BLOODBATH，「芬蘭BLOODBATH」CHAOSBREED一樣玩ｄ野完全係DEATH果期八幾年加九幾年初death metal，鍾意超技術death metal GOROD加YATTERING全線同ODIOUS MORTEM＆PSYOPUS唔使諗，要怪雞野GREEN CARNATION加IN THE WOODS全線啦仲有隻ATROX（Ｎ年前冷爺個網我有寫過碟評架），仲有EMPEROR歌佬同佢老婆隻PECCATUM "Lost in Reveries"同我極度鍾意的工業野RED HARVEST，要gothic PENUMBRA啦上網搵試聽就會知咩料點交響法，仲有一大堆old-school老餅野特別係SKANNER，未計上幾張單，單係今個禮拜呢水，已經恐怖地收得皮。而且你見我提極都係提大路出名果ｄ咋喎，都仲未講underground果ｄ喎。所以要聽的話，metal真係點聽都聽唔晒。

同埋點解好多碟出左咁耐，要到而家先講下玩成點，例如MAYHEM新碟？一來多野做＆sound card壞左冇乜時間聽野，二來係聽一隻碟我會花好多時間去聽真，好似見字前MAYHEM新碟聽左最少五次。而最大原因，可能好多人覺得好神奇，雖然劉Sir身為TRHK掌櫃、被metal包圍舖頭ｄmetal跌落黎夠責死佢，但好多野尤其是新野，都係要等到ｄ貨到左先有sample聽，甚至自己買左先有得聽，錢嘛大佬細公司係冇大公司咁多著數咁易經營架喇。所以做專家都有個好處，就係連做唱片舖、唱片公司都冇之福利：碟都未出甚至未做好已經有得聽（晒），上網乜都有啦，係睇你做唔做遮。例如DREAM THEATER新碟，出碟前幾個月上各大forum已經有唔少朋友demo版、前製作版、後製作版、promo版乜版都聽晒，再權威地話你知「年度之作，出左必買」，噉出左之後呢ｄ朋友係咪真係會買我唔知啦，我只見過好多講相同說話但過多幾個月正式出碟果時已經「聽到悶」、「聽到唔聽，唔買啦」之例子，同埋有以下呢個故事，一個發生於TRHK的真人真事（主角當然唔會係連點樣download mp3都唔識的劉Sir啦）：
「知道DREAM THEATER會出新碟，起初上網見佢地話四月中出，出果幾日上網見有人講，我諗住出左，就出去出面搵，點知搵左幾日去左幾間唱片舖都搵唔到。跟住再上網睇番，先知道原來隻碟延期六月先出，而家ｄ人係download晒黎聽，而唔係買左隻碟。當堂覺得自己笨實，又要出去搵、又要俾錢買、而家仲要想買都買唔到又冇得聽，但其他個個人都已經聽晒，點解我會咁戇居唔去download而走去買碟？」
所以Rock爺同某CD店東之對話，好應，完全道出晒而家做唱片之困境，特別係真係有心做音樂果班面對緊之難題：賣二手、賣pop都搞到噉，更何況係充滿專家的metal？而難做，係年代唔同左，但唔係潮流或者經營手法唔同左，而係本身聽果班實在冇左果一份「追」之精神：當你做慣賊、慣左不勞而獲、真係付出可能都冇而家噉完全唔付出得到咁多回報，就自然唔會改邪歸正，而唔需要真正付出本來需要之精神、時間同（特別係）金錢就可以成為「專家」，態度自然變得唔再重要、就此失去。好似有人可以有「你問我『有錢點解唔試多ｄ碟同band』，我話有錢不如試多ｄ囡囡好過啦」之說，就知道，慳番啖氣好過啦。

好好彩我星期三放工前已經趕好晒大半野，今日上工廠總算係享受而唔係負擔，更正係今日係晏晝見客，有好有唔好啦，好就當然係唔使五六點起身趕六七點早班老細車上工廠，施施然返到公司睇埋email先上車，唔使趕頭趕命。琴晚已經（專登）夜ｄ訓，都唔知點解此行可以咁精神差唔多冇訓過，所以返到去食完飯然後見客都幾難捱。我鍾意呢ｄ客，黎到就係「睇一睇你地咩料噉囉」，大家吹吹水兜個圈就「都OK丫你地夠鐘走喇下次再傾」，跟住就坐係度等車返香港。我搞掂我個客遮，仲有另一檯經理個客嘛，兩個客一齊兩點幾到，我搞掂左自己個經理果檯仲有排傾，冇野做唯有同工廠同事發發癲，今天的最大收穫係，發現工廠的同事，差唔多個個都拍得住我咁頹，一係坐係度望住部電腦，一係坐係度睇下書吹下水，一係走左去第二個部門搵其他人傾偈，做野？都有，但唔係我見到的時間or老細係度時做囉呵呵。就連廠長在場都照係噉玩，雖然香港班同事對住呢條友日日返工好似玩噉已經對慣左兩位老細都睇化晒扮睇唔到算，工廠同事今日先真正見識得到呢個傳說中的劉Sir原來真係好頹。同，唔明白點解如此頹友仲生存到，公司仲未炒佢。
同埋，這是真的。呢年唔知咩事工廠好多女同事生仔，而生完仔通常都會唔做留係屋企睇住個仔。今次同107的信和一肆伍一樣，走左一個之後，請左個新女仔返黎，嘩，一流，你諗得出的所有野 i.e. 外貌、身材、人品 幾乎諗得到都係冇幾多香港女仔及得上咁一流，仲要係咁多「一流」全部集中於一個女仔身上喎，身世身家同學歷呢ｄ就無謂比啦始終大陸出身，但相信你見到一個女仔可以有咁多一流時都唔會介意呢ｄ野。而家香港女仔，真係同大陸女仔差好遠距離。
「咁正，唔諗諗佢？」
差唔多全部相熟的工廠同事都「鼓勵」我噉做。諗得過架。

等經理傾掂數，由三十幾度大太陽等到打風咁大風大雨等到雨都停埋太陽都出番黎，係差未等到見到月光，四點九終於開到車喇，俾預期中早左三個字。可能因為見客果時隊左罐咖啡，跟住等經理果時又叫靚女整多罐俾我，連隊兩罐上到車反而訓唔到覺全程眼光光，加上咁遲先開車有排都返唔到香港，路上聽INSOMNIUM全線，貪夠長嘛三隻碟夾埋兩個半鐘。一隊我非常鍾意之melodic death － 請各位專家糾正我如果佢地唔算係melodic death － 但唔知點解出到第三隻碟都紅唔起，可能因為唔係CHILDREN OF BODOM啦，現實的確係噉，雖然melodic death由第一日到今日都係香港最受歡迎metal類別，但咁多年好多正band都因為CHILDREN OF BODOM而冇人理，例如KALMAH、MORS PRINCIPIUM EST，同INSOMNIUM。只係INSOMNIUM三隻碟一路落去，其實都可以話已經超越左melodic death而發明左一種新metal，第一隻碟超AMORPHIS甚至有ｄ似OPETH "Orchid"（有ｄ遮），第二隻碟「最OPETH」，第三隻碟起初聽覺得太恆，因為頭兩隻碟太靚，但聽多左原來呢隻碟ｄ歌好有料到，只係點有料到未能置評，因為聽果時已經／終於訓著左。因為近來好有興致寫INSOMNIUM同SCAR SYMMETRY，所以你每次見到劉Sir，90%機會佢都係聽緊其中一隊。至於幾時寫完有野睇？．．．慢慢等啦，我連謝安琪同王菀之都未寫完！相信SCAR SYMMETRY今年隻新碟出埋，我都未開始動筆！

最後七點四上到舖頭，算好早架喇我起初預塞車加大陸落雨分分鐘八點先到架。近來出現番都一排冇出現過之場面：無聊人走上黎食飯同吹水。美國返黎之後，好多野好似好唔正常。例如今晚：呢個情景而家見番，反而唔多習慣。
仲有太多事忙。

準時一點我就走，冇計，太多野做，我決定選擇逃避。平時呢ｄ無聊時間，通常係通街走、睇玩具、行住街聽歌、掃街搵野食、落新之城唱錢或者順便打幾舖機，總之唔係睇CD，無聊至兩三點先走上舖頭，今日好彩，本身另有計劃（要玩劉Sir隨時都有好多計劃），上新世紀買完戲飛走番落黎兩點準時開舖，一開冇幾耐，就遇到完全冇諗過會出現之人：
「Ｂ哥！」
你都算好彩喇Ｂ哥，如果今日走左去打機或者周街逛三點先走上黎，你都咪使旨意見到我得門釘你摸。離開左舊「公司」（補習社都算「公司」卦）有成兩年，跟住大家斷斷續續夾左幾鑊，搞騷時借機拍野搵搵佢笨，大家大半年冇見過面，突然間噉樣兩點幾現身劉Sir主場，反而殺到劉Sir措手不及。噉耐冇見亦噉耐冇玩，加上大家所處之環境唔同晒，面對新工作、新人事、新挑戰同未知之前景，幾個鐘好多野傾。每一個選擇，都影響緊將來之全部。今年剩番之半年，等我努力碌舊錢出黎先。08年，再諗。
「我仲有幾年剩，唔搏呢舖，唔值。」
人事幾翻新。

今日直坐到十點半先閃，對比平時晨早閃左去，好明顯今晚有野搞啦。我份人鍾意追好頭好尾，係鍾意一樣野開左個頭就自然會收埋個尾，《魔盜王》睇左頭兩集，而家到第三集上，冇得走啦自然呢幾條一定要跌。對呢個系列興趣唔算好大，衰一樣野：
「迪士尼。」
唔好意思，我對迪士尼之印象就係益智，毫無疑問頭兩集娛樂性豐富，就係益智左少少，例如斬極殺極，畫面一滴血都見唔到。頭兩集都係玩花式動作同迪士尼樂園式場面＆笑料，今次到最後一集，面對好多「最後一集」面對之相同問題：太多角色關係同劇情要交代，全套戲成一百七十分鐘，亦即係文戲會好多／太多而大家／我想睇的打戲會少。有發哥份亦係吸引到我捧場因素之一，但發哥的存在就係可以令女主角合理地上位，難怪海報入面都只可以企最邊，因為佢只係一個大配角，噉就呃左我入場了。至於套戲好唔好睇？噉又係幾好睇，只係太多戲劇性地不合理之處，雖然話睇戲唔好駁戲，但駁戲樂趣無窮唔講大家都知。近來睇好多戲都有唔少犯駁位，好似《蜘蛛俠3》，沙人跌左落部份子分解機入面，成個人散晒變做舊沙，反而佢條頸鍊會冇事冇分解到。《魔盜王3》（又係3）一樣有呢ｄ荒謬位，發生過好多次，個人跌左落水，但一上到船全身乾晒一滴水都冇；最後兩條船衝到入旋渦入面互射，平時ｄ船幾炮就散晒，呢度兩架野對射個幾兩個字都冇事，入到旋渦中心仲可以兩幫人打足半個鐘架船都未爛未沉，打完仲安全無事地走得番出黎完好無缺，最後東印度條船被狂炸，個奸角可以好劇情所需地突然唔識郁任人炸自己條船，然後身邊全部人死晒條船都散埋，仍然可以施施然慢動作一步一步行到最後　仲樣衰過已經懶型得都好樣衰的《Matrix》。係我知迪士尼出品老少咸宜都唔使假到噉丫嘛？
《魔盜王》冇令對航海史同海盜有更深認識，只明白到原來英文早在幾百年前已經係世界通用語言，同幾百年前華人／亞洲人英文水平原來高過而家咁叉多。

《廿八日後》都算係當年商業電影中一套cult野，雖然人人睇完都怒讚，當年只覺得係套唯美版"Dawn of the Dead"，果時又未開始迷電影同音樂，結果錯過。唔經唔覺第二集都上埋，重溫之前Project: Underworld & Project: Saw，今晚先《廿八日後》DVD再直落戲院《廿八週後》。

橫睇掂睇，點睇你都覺得係套普通喪屍片：一個病人醫院入面訓醒，醒左之後發現全倫敦一個人都冇，只得死屍同喪屍，跟住走走走走走，同埋走走走走走走走走走走，中途加ｄ殺殺殺殺殺殺同血血血血血。就係咁簡單，戲入面只需要用五分鐘已經可以交代晒所有背景，其餘百幾分鐘就係走＆殺＆血，喪屍片特色。何解可以做到咁「cult」？咪就係好藝術的包裝。賣點自然係劇照都睇到之無人倫敦，超現實景加極靚post-rock配樂，未知劇情點發展、未到喪屍出沒，齋睇景聽歌已經殺死人。好多時喪屍片發展落去只會越黎越無聊，好似預設喪屍傳染速度一定勁快，普通人掂一掂到唔死都會變喪屍所以玩晒，《廿八日後》好在冇變到其他噉就係死殺爛殺係噉死人噴血，見血場面其實唔係好多亦唔詳細，劇情重點去左人性而唔係喪屍食人／人殺喪屍，噉樣將重心放係另一邊、大多喪屍片忽略之一邊，格調立即唔同晒，當然仲有奪命配樂，賣點唔使講都知道係GODSPEED，假使套戲係而家先上畫，就算唔知講乜我都會立即買飛入去，因為GODSPEED就係我最鍾意post-rock band（我份人比較膚淺，係我知有好多選擇仲有好多post-rock band，但情有獨鍾我最鍾意仍然係屬於入門樂隊的佢地，除左因為音樂獨一無二，仲因為 － 唔好意思同metal一樣理由 －佢地來自加拿大，仲要（又係）魁北克，劉Sir走唔甩的了），套戲用左佢地第一隻碟"F#A#"一首歌，用得好盡果隻，其他選曲都係post-rock、ambient同歐洲流行曲，如果係其他導演拍喪屍片，唔係（懶）恐怖的弦樂同交響（爛片必備元素，亦係我鍾意睇爛片之原因，噉先夠cult嘛），就係爆到九彩的rock & metal野（當今有邊套唔係？），美國同歐洲文化唔同就係唔同，唔睇只聽都係一種享受。諗番起，原來我曾經有一隻《廿八日後》電影原聲大碟Ｂ哥特別版，但已經唔知去左邊度矣，灰。睇晒全套到最後先醒起自己電視睇過一次，應該係中途插入加斷斷續續咁睇所以印象唔深，DVD係uncut版，見到uncut個字諗住會好暴力，但見血鏡頭唔覺有好多，似乎只係多番ｄ粗口同「有野睇」之鏡頭，「uncut片段」實則好少，始終係「藝術」片嘛，有幾靚緊要過有幾核突。隻DVD咩feature都冇好失望，因為當初出碟果時報紙有提過DVD版有另一個結局，今隻DVD摷勻都唔夠有咩特別野睇，會唔會其實而家全班人相安全事俾人救到個結局就係「特別版」，而本來版本係全部死Ｑ晒仲要死得好慘？另外睇DVD有樣好，就係有得睇唔同字幕，透過國語字幕同粵語字幕，見識到香港同中台地方文化之不同。國語版同粵語版兩種字幕，雖然大家都係中文，分別原來係好大的：
國語版：「他媽的！那麼多喪屍！」　粵語版：「你老母丫！咁撚多喪屍！」
國語版：「這次麻煩了！」　粵語版：「今次大鳩鑊！」
國語版：「下地獄吧！」　粵語版：「去死啦仆街！」
國語版：「幹／操！」　粵語版：「屌你老母食屎啦你老味陷家產仲唔撚死？」
I love Hong Kong次文化。

八點開場，中間有客到停左陣，都踩到過十點先玩完，跟住埋埋數頹多陣就過百老匯再續。
「點解唔去新世紀睇！」
首先，問問有留意《廿八》系列的朋友：
「《廿八週後》上左畫幾耐？」
我冇特別去留意，都知道唔係上左好耐，而《廿八》系列之名，相信都唔係細丫點都有大戲院上卦？有係有，但打去新世紀問問，只得八點幾一場，係百老匯先有番場十點八趕得切睇睇，亦因為趕得切呢個週末先會咁喪連睇兩晚戲。可恨，有ｄ後悔，因為中過咁多次招都未識死，居然仲敢去百老匯睇：《廿八週後》上左冇耐又咁大套戲（可能係我一個覺得「大」），即係未大到《蜘蛛俠》同《魔盜王》咁大我都預左，只係唔使細到想搵間戲院播多場都冇、播都要去到百老匯頂樓巨人院線影院咁折墮卦？堂堂《廿八》系列上左半個月都冇！仲灰過睇鹹片喎搞到！呢套「大」片今晚十點八場係百老匯頂樓五號院播，睇戲睇咁耐今勻都可謂最經典一次，全院八十個位都冇，一開播兩三個廣告就入戲片頭都冇得睇（灰片頭起碼值番半張飛架！），個場ｄ位又平成日俾前面ｄ人成日擋住，加上香港人例遲習慣，開場未夠兩三個字都唔使諗住睇得安樂。更慘在聲差都差，芒細又色弱好似睇EGA畫面，唔知係咪套戲本身已經係呢種色；音響仲衰，喇叭超爆低音，一起配樂除左「嗚嗚嗚」之外乜都聽唔到，冇配樂仲死，播片機攪菲林聲聽足全場。廿幾歲仔都未曾有過如此不愉快睇戲經驗，就當買個教訓見識下。講完戲院講番戲，琴日《魔盜王》買飛時睇左預告片，已經嚇左一跳：
「點解《廿八日後》會變左《生化危機》？」
預告片已經完全兩隻feel知道大劑，入埋戲院先知更大鑊，係咪導演同編劇都換晒？同上一集比，可以話完全係兩回事。《週》故事係喪屍疫症爆發五十六（？）日之後（爆發廿八日後主角醒番，走左幾日難昏迷之後再過廿八日第二次醒番），再過廿八個星期英國喪屍餓死晒，「英國難民」「回流」，但原來喪屍死晒病源未死，跟住點發展唔使講大家都知，除左背景五分鐘已經講得晒，呢類片開始左之後跟住會點又係五分鐘之內估到晒。上集一個角色都冇剩，就算冇睇過上集都可以當成係新一集睇，基本上上集濃縮成五至十分鐘講點解倫敦會冇晒人，亦就係今集正式開始之後三個字所講，好容易就將今集同上集獨立開，然後，自己拍一套"Bio Hazard"。係呀就係咁灰，假使你冇睇過上集直接睇今集，會覺得冇乜野甚至係幾好之一套，因為論製作同劇本同類電影當中《廿八週後》屬中上同較另類，爛船都有三斤釘嘛，只係你係睇完上集再慕名而黎，就好似劉Sir條傻仔，笑同小一齊黎，「唔忠於原著」嘛，雖然我鍾意睇唔使用腦一味死殺爛殺之膚淺電影，但黎得睇《廿八》，我就係諗住睇戲而唔係睇血嘛，keep住用post-rock同ambient做配樂唔代表就係藝術架。可能就係上集太少血唔夠「喪」，今集超多流血加殺人場面，但係太玩Doom式視點加手提機式朦郁鬆，我唔係想睇《喪屍習作》喎但係！當然唔少得重點：美軍怒炸英國，只係你諗住噉樣炸法一炸乜都死晒，點知唔係，炸完之後喪屍一樣係咁多，除左好睇都唔知炸黎做乜。今集劇情更加多夾硬位，上集唯一唔合理只係ｄ人係噉死，但主角話走就走仲要係走就走到冇喪屍之地方，為保主角之命劇情所需得可以，今集呢ｄ位多左好多，好似主角（又或者「重要角色甲」，呢套戲其實都冇乜主角可言）出入軍事重地都似入無人之境咁簡單，而所有重要角色，就算俾喪屍圍剿或槍林彈雨之下一樣唔驚唔慌慢慢行仍然可以安然無恙，同埋喪屍片必備元素：即係呢種電影都拍左幾十年啦，點解套套都係，ｄ政府ｄ軍人諗野都係咁戇居？例牌非常之戒備唔深嚴，睇「主角」點樣好簡單就入到研究所變完喪屍之後更簡單就出番去外面唔見左人就知；跟全喪屍出現，套套都係，肯定係將全部平民、冇事果班人全部困晒去一間密室，一間唔使講都知道實會出現喪屍之密室，然後一隻喪屍變成幾百隻；軍隊話就話對喪屍災難再出現有所「防範」，但「防範」極都仲係只用人海戰術同普通槍彈，對住幾百隻野都只係一槍槍啡完全唔用重武裝，手榴彈或者火槍都冇個．．．如此類推的「標準」喪屍片佈局比比皆是，即係俾喪屍咬一咬掂一掂半分鐘就會變埋喪屍呢條定律我都算數（雖然都好夾硬，但係已成不可推翻之「行規」），但當一套期望咁高之「藝術喪屍片」都流於呢種咁行貨的俗套，我只有話我真係好灰囉。另一個必有之情節，就係呢種喪屍病毒總係有ｄ仆街一唔覺意帶（番）入黎，搞到世界末日、「冇事」之後，實會有其中一個死剩種係繼續帶住病毒帶到去下一集，而呢ｄ死剩通常就係一開頭搞出成壇野果個仆街。兩集差唔多長都係兩個鐘左右，但《週》絕對難捱過《日》，睇戲環境同套戲都係。

喪屍片係死唔斷氣之片種，因為喪屍之出現同傳播係點講都得出極都有得出，只要你想拍，拍多幾十幾百集都仲得，而《週》超求祈的埋尾已經講左俾你知，係鐵定會有下一集：《廿八月後》，會係論到法國俾喪屍攻陷。然後會點發展？或者係：《廿八年後》，全球死晒，未來世界由喪屍統治，講碩果僅存之人類點樣存亡；《廿八世紀後》，會係biohazard版《未來戰士》or《猿人襲地球》。

去到最後階段，呢幾日繼續超忙。想知劉Sir點樣真係認真做野、點樣忙法，睇睇我今朝個早餐就知。

TRHK＆劉Sir，真係好得閒。睇今晚幾條無聊人走上黎鋤七再現就知。地獄黑仔王風采依然未退，當我有三條弟時，果舖鋤七；有三條七時，果舖鋤弟。仲有Ant哥一舖天糊全盤全場只出得一隻牌，都未夠Rock爺一隻牌都未出過已經唔知咩事地輸左咁on9，天糊就係天糊出到牌已經慶幸喇。玩呢一局十足十睇緊《勝者為王》（大家一齊去信要求亞視重播）。好在我最後一舖都贏得漂亮，特別係last card個pose，噢冇相機冇得拍低俾大家睇劉Sir英姿添。下次囉，或者下次搞番個鋤七版聚俾大家一齊上黎發下癲，同睇睇劉Sir點「英」法囉。
都唔使等下次啦，而家TRHK基本上晚晚都係「版聚」啦。就係得閒成噉。

一起身已經知瀨野：
「我病左！」
掙扎過唔返工算，但實在太多野要跟，死都要死返去 － 當頹到爆日日唔做野的劉Sir都會講如此說話，世界真係變左了。病一回事，朝早繼續超勤力做晒野，此乃計劃之一部份；食完lunch訓醒覺就可以立即落去睇醫生了，睇準時間我係第一個睇，一落去等陣就有唔使排隊，噉就可以早ｄ搞掂留番ｄ時間掃街食野加買野食，行多幾個圈先上番公司，我地呢ｄ病都病得享受過人。
「噉玩法，老細唔小你？」
一上返公司，立即「病」：
「頭先好多人呀，等左我好耐！唔得喇我好辛苦頂唔順喇要訓陣先．．．」
懶一回事，需要的時間我都交足戲架。
會計靚女都知我無聊，搵左隻game俾我玩：
「我部手提電話有得download《一擲千金》！」
「有冇Kawaii先？」
反正都係無聊，就坐定定玩番舖。《一擲千金》英文名原來係《刁我撈刁》，個名改得幾好喎，雖然無線搵許冠文做到cheap晒完全唔想睇，呢個電話版因為個名挽回不少分數。
「贏左幾多？」
叫得做地獄黑仔王，唔使講你都估到有幾「多」啦。開頭都好順利，開晒中間銀碼ｄ箱，直至去到最後，尾三同尾二兩round分別開左十萬同廿五萬兩個箱，last一round得番自己個箱同埋$750兩個。
「換唔換？刁唔刁？」
「打死都唔換！刁！」
攬住自己個箱唔放。打開，係一蚊。
「笑咩呀！你估只贏一蚊咁易呀？」

搏足幾日，總算做晒大部份野，只係食左藥個人好浮，一路打字隻手好似氫汽球噉一路向上飄（．．．），飄住黎趕工好辛苦先捱到食lunch，食完藥訓過覺立即好精神，半個晏晝就將全部手尾清晒，今日起我終於終於回復自由身，返工又可以得閒無事上網睇野同寫野了。手頭上好多碟評都未完，又聽緊幾隊諗緊點寫，黎緊相信又會好「忙」，忙太多野寫，呵呵。
「近來心血來潮，真係好想坐定定慢慢寫碟評呀！」

今日星期三唔使開舖，自然有節目啦，隔左唔係好耐遮，今晚又俾人拉左去食飯，去美國前先同會計同同事食完一餐，返到黎唔夠半個月又黎，
「你都冇買手信！請食餐小肥羊當手信都要啦！」
又係小肥羊，食過兩次今次識野喇，唔揀旺角果間而去尖咀，因為有得任食唔係逐碟計，大佬小肥羊食碟羊都貴到飛起，唔係任食又黎三個人八九舊水架喇！尖咀同旺角兩間，環境同食都係尖咀呢間好，雖然話係任食但係羊肉同飲野都係要收錢，黎到結果肥羊冇食過只係瘋狂肥牛，肥牛唔使錢嘛！野食一樣唔係多款、湯底一樣勁辣勁重香草味完全唔係一般打邊爐之沙嗲湯底比得上，但食物夠新鮮又好食，雖然肥牛唔係招牌菜但單肥牛一味已經贏晒好多酒樓打邊爐，係衰冇任飲同甜品冇選擇囉，旺角果間齋叫甜品食都夠你食一餐（所以旺角果間開支實高，食甜品已經夠食你二三百）。荃灣仲有一間小肥羊，但係唔需要試啦，遠嘛，同埋尖咀小肥羊已經夠殺。
原來噉就年半，我係呢間公司捱左，亦即係回歸TRHK同樣時間，不過我噉樣捱法、日頭夜晚走兩頭做兩份工返到屋企再追，都仲得閒過出面唔少人，唔會係我做野有效率夠快手卦？？？（呵呵）只係工字不出頭，點歎點做，而家都係要做老細先搵到食，尤其係做到可以上大陸果隻。諗頭可以有好多，點樣做、點樣做到先，先係難題。

我鍾意我公司樓下個醫生，除左咁多年我公司都係睇佢大家睇到熟晒好玩之外，仲有佢ｄ藥真係好勁，琴晚食完藥先上床訓，今朝一起身，已經不知甚麼時日，工都唔使返。故是日大休一天。

．．．休極其實都係冇得休架啦，夜晚一樣要上皆旺睇舖。近來唔知咩事，差唔多每日最少有兩三個冇見一排或者好少見之客仔出現。當然有更多種種原因而不知所蹤甚至已放棄metal之朋友，唔知去左邊。見番咁多人同傾過，有一條問題，好多聽metal的朋友都面對緊：「聽metal，你會堅持幾耐？」
大部份人完全冇諗過，亦唔會思考呢條問題，就我所見客觀黎睇，可以捱多過兩年，已經好勁，我見過太多唔使半年已經「聽晒」、「聽厭」之例子，不過而家上網搵料搵歌比以前容易咁多，相信大多數人「聽metal」之時間會加長 － 當然，呢種聽同真正果種聽，係兩回事啦。三十歲以上仲會聽metal都冇幾多個啦，而去到四十歲以上仲會聽metal，我真係諗唔到幾多個喎，只諗到Soni同鴨寮街阿Paul兩個（阿Paul應該過左四十卦？）。最值得提係，全港最堅持支持metal同最rock得起，只有呢兩條老坑。相信冇人會估到，更加冇人會相信。
同樣，唔使問我。我可以好堅定噉話俾你聽，可見之將來，我都唔會放棄metal，或者「聽厭metal」。對我黎講，我聽metal只係剛剛先開始。（抵我聽咁多年都做唔到專家囉所以，呵呵）

唔覺唔覺，就／又一個月，劉Sir個論壇，亦開壇一週月紀念。好多人有疑問，係度答答：
「做乜開論壇？」
個domain係度，反正一年都係要俾咁多錢，間公司又有免費forum code提供，107催多幾催，咪搞番個。
「開壇諗住做乜？」
其實真係冇乜諗過做乜。107話「好玩！」又好似幾好玩，咪開個壇作作法。
「諗住搞大佢？」
搞得大就當然好啦。不過老實講，我都冇諗過會搞得大，劉Sir何德何能丫都只係普通白痴仔一個遮，叫做係一個識聽少少metal的白痴仔，又唔係咩文化icon，我真係冇乜信心可以簡簡單單就令到劉Sir個論壇變到好似其他膠論壇，例如教父高登，咁強。不過大有大搞細有細搞，搞唔大，有個地方俾各位朋友聚腳發下癲吹下水玩下野識多ｄ硬膠朋友，都幾好玩丫。
「噉好唔好玩？」
幾好玩啦。見各位朋友都玩得幾開心丫。不過我本身就唔多鍾意玩forum，得閒無事睇睇冇所謂，不過上去玩同人講野，真係冇乜大動機，加上五月起真係好忙，日頭做完夜晚收埋舖返到屋企仲有好多野搞（各位以為經營一間公司、label好易的朋友，我驚知道事實係點之後你會冇晒聲出），你冇幾可見劉Sir會講野，甚至連自己個forum劉Sir都可以幾日都唔睇一次，好正常，特別係忙到飛起的而家。
「噉你覺得個forum搞成點？」
當然再多人ｄ同玩到再癲ｄ會更好。坦白，最初我係真係想搞一個正正經經的論壇，俾各位路人傾傾音樂、生活、思想同無聊野，但第一晚開始，已經變左一個癲狂地帶。例如劉Sir成為被各位神化／佛化／玩殘的對象（相信好多人上劉Sir個論壇都係為左噉遮呵呵），同埋 柒 呢個字已經被合法化。已經失控了。所以你見劉Sir都冇乜盡過版主的責任，呵呵。
「會唔會開多幾版？」
好多人都話應該開番個音樂版／metal版，有諗過，不過現階段實在唔係太想開：我呢份人一係唔做，一做就做到好勁，如果俾我搞一個音樂forum、metal論壇，我最少都會以前金果種專業論壇為目標，真係個個人都係討論音樂，而唔係扮專家、玩填字遊戲、捉人字蚤串人然後罵戰 － 好遺憾，呢ｄ事香港forum見得太多，而前金見都未見過有呢幾回事發生（劉Sir過去「搞事」果排出現果ｄ唔計啦呵呵）。真係按照我所想噉搞法，我驚到時，真係會變成只得圍內幾個人討論之「metal forum」囉．．．又或者好似好多本地forum噉，開左之後唔理由佢自生自滅，但相信跟住好快就會淪為「另一個香港音樂forum」，而此正正係我唔想之結果。
「劉Sir唔係劉Sir個論壇度講metal，會唔會柒左？？？」
絕對會。但冇計。不過講唔講都係咁柒架啦。

睇番樓上西遊記唔該。

好耐未試過開舖時覺得TRHK似一間舖頭，亦突然間好有興致聽番ｄ恆野，所以今日怒播black同death metal，狂炸。或者因為Project 2wenty-8ight聽番GYBE勾起左舖癮，黎到舖頭狂播都係加拿大metal野，SYL、INTO ETERNITY、CRYPTOPSY、KATAKLYSM、同埋個人心頭好NEURAXIS，不能盡錄啦當然有咁多而且冇時間聽晒咁多啦。聽metal好多人會揀芬蘭或者瑞典呢ｄ歐洲野，更多人會無意識地揀美國（你唔覺咩？近廿年黎壟斷主流metal市場果班都係美國出黎？由八十年代起，到nu-metal，到metalcore？甚至到而家emo？），但對加拿大我係情有獨鍾，我最愛thrash metal band就係加拿大國寶VOIVOD（我唔係專家，都唔敢講佢地係唔係thrash喇），當然仲有Devin Townsend，加拿大band就係特別在有一種科幻味、工廠味．同加拿大band先有之技術同氣氛，講創作力同技巧都勁過好多歐洲同美國band，但好可惜加拿大band從來得唔到歐美兩地樂隊，前衛得滯，同地理問題：事實的確係，你唔係美國出身，勁到曉飛都唔會可以好似一ｄband e.g. METALLICA噉成到名，只可以留守underground，然後因為生活所限e.g.日頭打工、賺錢養家，靠貼錢貼時間維持隊band，最後消失得無影無蹤，跟住變成一個cult e.g. OBLIVION。除左音樂，仲因為佢地果份前瞻性同堅持，更唔抵得咁勁都冇人識冇人理，所以我從來好支持加拿大band；真係架，又係同捷克一樣，只要係呢個國家出品，衰極都好過唔少其他國家樂隊。唯有怪自己係加拿大／捷克出身啦。
所以咁多樂隊反美，係有原因的（呵呵呵）。

今晚難得地捱到十一點半後先走，有經驗都知道好難，皆旺十一點就閂冷氣（話十一點，但其實十點打後已經感覺唔到任何「冷」），而家日日都三十幾度（五月咋喎，過多兩三個月點算），齋坐係度都夠熱到你想旋收檔算，但堅持落去，因為要睇明珠九三零《刀槍不入一僧侶》。梗係因為發哥啦！套戲係漫畫改編，講西藏喇嘛世代守護一卷有無窮法力之蓋世經文，發哥飾演之無名僧侶打贏上一屆護法正式接手，當佢成為新一代護法時納粹就入黎間間寺度大屠殺搶經文（原來發哥同劉Sir一樣都係黑仔王），跟住發哥一走就走左六十年，六十年後比人追殺到去美國，撞到一個睇港產片學功夫的鬼仔亦即係主角，跟住再撞埋唔知點解識講西藏文＆唔知點解仲好打過主角＆幾乎有周潤發咁好打的鬼妹女主角，大家柴娃娃個幾鐘噉就唔覺意殺晒班德軍，主角加女主角就梗係順理成章成為發哥傳人。原著漫畫係點冇睇過唔知，不過電影版睇左頭四份三已經講得俾你知，典型荷里活改編動作片，亦即係唔掂。其實頭四份三我覺得好有紋有路架，起碼你會覺得真係有料到最後可以做到高潮疊起散場之後好滿足地返屋企果隻，一直到三位主角齊人去打德軍，立即收皮。所謂德軍總部，全部德軍一個炸彈死晒，成間總部死剩兩個大佬；一個大佬唔使兩分鐘簡單一輪就瓜柴；另一個本身話吸收左經文力量變得天下無敵，差少少就做低晒各位主角，點知個鬼仔突然間標童發癲幾招搞掂個大佬再一腳踢佢落樓撞電線電Ｑ死。所以套戲連廣告兩個幾鐘，頭個半鐘確係睇得好投入，但最後九個字，Ｏ晒咀指住個電視。都係果樣囉，唔用腦睇，都OK的，但都唔夠其他唔使用腦戲例如李連杰系列，用腦睇的話，反應咪好似我噉。不過對我黎講都幾有樂趣，例如好有電子遊戲feel，好似ｄCG真係好CG假得好明顯，人同景好明顯夾唔埋，就好似當年打真人快打噉，而我好鍾意真人快打喎！跟住話納粹德軍搶超自然信物，直頭係暗殺希特拉啦，而暗殺希特拉又係由486時代起陪伴我一齊成長之心愛電腦game喎！所以虎頭蛇尾同太多無聊位，例如西藏人明明識西藏話但平喇嘛間傾偈都要講英文，跟住德軍攻西藏寺時德軍又係用英文同西藏喇嘛講數，再發展落去原來個個喇嘛都能操流利英文，而真係會講西藏話只有周潤發同鬼妹女主角其餘全個地球都係講英文，係好戇居亦好失望，但又一套港產片tribute加帶番唔少當年打機之快樂回憶俾我，同埋發哥份上，唔小狗套戲。仲有個原因，如果係睇英文版一定照小，但今次係睇明珠九三零，靠呢樣野救番：翻譯。譯字幕果班水準真係超高。呢套戲本身可能因為要禪，所以耐唔耐都會有ｄ金句彈出黎，翻譯果班人又譯得好正喎好中好應，加上唔止發哥之禪ｄ鬼佬又間唔中整幾句「西方禪語」，好鬼過癮。全靠無線救番套戲。

好多新碟今批貨有。VITAL REMAINS個個都問，新碟點？ｄ歌一樣咁長但melodic左勁多而冇之前咁恆，鍾意上隻碟果ｄsolo今隻肯定更加鍾意，你話唔夠恆我話「old-school death左」，反而而家呢種恆我覺得襟聽得多，一味死爆好快爆到麻木悶同厭。NAGLFAR新碟，你鍾意上隻、鍾意DIMMU BORGIR，都可以諗諗。FINNTROLL新果隻激正！好似冇以前咁玩野收斂左，但收埋收埋反而仲好聽，同樣係咁快爆晒出黎開心得滯就快聽悶。DT新碟（唔好意思講緊DARK TRANQUILLITY唔係DREAM THEATER），得架喇你鍾意melodic death鍾意瑞典野鍾意DARK TRANQUILLITY直接磅水得架喇，初步印象正過上隻碟"Character"（"Character"衰後半），而而家已經冇幾多隊band仲會玩真正之哥登堡／melodic death，更加值得支持。今批貨少，但正野好多，噉樣返貨先死人呀（但相比下一次過返超大批地下野仲死，因為通常試試下發現九成都想買）。
至於個人心水，BORKNAGAR呢隊「progressive black」我一直好想追番，由death metal玩到變「gothic rock」之SENTENCED都係，都唔夠DARK TRANQUILLITY，melodic death之中 － DARKANE呢類thrash death唔計啦只計「正宗」之哥登堡／瑞典melodic death － 以前唔係話點樣極大興趣想追番晒呢隊，但想就一路好想，因為玩哥登堡玩得最好最「似樣」亦玩得最似我鍾意果種就係佢地，當你睇見另一隊哥登堡教父IN FLAMES同後起SOILWORK而家搞成咩貓樣，而DARK TRANQUILLITY上隻"Character"已經殺晒佢地新碟"Fiction"仲要再癲，唔似某ｄ人（好明顯講緊IN FLAMES）見美國有錢賺就變到KORN噉款走去搵錢，自己創左哥登堡之聲出黎就十幾年堅持自己創立之門派、貫徹自己宗旨，加上音樂真係好得想寫佢地好耐，對音樂之欣賞同出於尊敬，今次真係好大機會去執番晒DT全線同花時間去聽真寫好佢地 － 對劉Sir黎講，聽metal並唔係聽metal咁簡單架，而係真係投入同尊重呢門文化架。IN THIS MOMENT係曾經潮過一排之一隻，賣點係女人唱emocore，就出碟果期勁多人問，MySpace聽到之sample麻麻幾普通，但隻碟到左成隻聽晒，其他歌反而屬中上，同類band黎講唔算好top果隻，係唔多聽呢類野的我鍾意囉。對好多人黎講，IN THIS MOMENT的重點係emocore同女歌手，對我黎講重點係簽佢地果間係Century Media，可見而家metal真係好難做，同emo系同core系（grindcore唔計唔好意思）已經成為大潮流了、你唔玩唔聽就代表你out左了。而全批貨最最最精彩果隻，肯定係呢隻：
AXAMENTA "Ever-Arch-I-Tech-Ture"
劉Sir唔係專家唔識分類，連聽三次之後，我只識得叫佢progressive extreme metal。全隻碟分成三個樂章、每個樂章有三至五首歌、大部份歌都係四五分鐘長同連埋、全隻碟超長，會聽到symphonic black、melodic death、thrash death、交響樂同melodic metal，極有瑞典progressive death，就連PAIN OF SALVATION歌手Daniel Gildenlow都有guest唱，一首歌由佢全清聲唱音樂底直頭同PoS一模一樣，係好長好難一次過啃晒，今日都樂此不疲地不斷連聽，就係因為咁好聽，同埋帶到俾我好大驚喜，呢隻碟肯定有排聽。想搵progressive野 － 雖然而家劉Sir／TRHK眼中所謂之「progressive野」對好多人黎講一ｄ都唔progressive，今日已經有兩個個案引證 － 而呢隻都「唔progressive」的話，去執番隻DT新碟吧（今次係DREAM THEATER），起碼而家出去唔會同24/5果位「主角」一樣遭遇先。

今日走晒旺角屋企果邊ｄ麥記，有一個好灰的發現。
「又俾麥記搵左笨！」

黎到六月，由五月中展覽之後跟到死，到五月尾開始每日有番兩三個鐘得閒，而家掙扎到「似番ｄ樣」，可以半日清晒所有野，好開心架喇唔使做餐死。今日搏命係噉清，食完飯踩多陣（一定）要做好晒今日所有野覆晒禮拜六日ｄemail，因為今日好多節目。兩三點一搞掂晒所有野，先處理晒ｄ私人事務，過左好耐我連稅都未報，襯而家咁「得閒」仲唔填好表寫好信報埋佢咩！三點半鐘仲有時間食碗麵，今日lunch自己叫左個公仔麵冇食到，因為仲有女同事的貢品（而家我lunch叫飯都唔係lunch食，而係叫定自己個下午茶或者晚餐），自己碗公仔麵就可以留番而家嘆世界加攝時間慢慢享受。食到四點鐘就夠鐘到重頭戲上演了！因為公司今日好多外勤工作唔夠人手，連劉Sir呢ｄ頹友都要出動幫手去銀行入票，呢兩個鐘真係捱得好耐，先等到呢一刻走出去玩！（你睇，呢條友真係邊忽似返工）天氣係好熱我都知道，不過落銀行有冷氣涼嘛！雖然已經成四點鐘，間銀行都可以多人到黐晒線，試想像一個大約有兩間TRHK咁大之空間，塞住六十幾人排隊。噉當然會好過TRHK，皆旺108開足五年五年都冇冷氣（「喂實Ｑ哥我交足管理費架喎！」），呢度話晒係銀行冷氣梗係扯到恆啦，雖然條龍係勁到排足九個字都差唔多冇郁過，我仲開心喎一來有冷氣涼二來可以慢慢聽歌，噉樣排住隊可以聽足成隻碟仲聽多好多野，好耐未試過咁留神咁認真去聽一隻碟（太忙喇呢排），反而有如此機會係今日噉樣去銀行排隊都幾意外。返到公司立即搵阿姐：
「阿姐，不如第時我同你調轉，我做你個位啦！」
今次光顧間銀行係中銀，銀行入面有部大電視不斷播住中銀新舊廣告。好多時間企係度睇，等佢重播一個年幾兩年前之舊廣告，當年令我好痴迷的廣告，原因好簡單：
「女。」
個廣告好短亦都好簡單，都係幾個model行黎行去叫你用中銀信用卡，但成日睇電視捕呢個廣告，因為其中一個model，唔止英文名一樣，就連美貌同氣質都好似 － 噉講靚做得model點都會靚ｄ／靚得多，只係客觀事實從來唔可以同主觀思維相提比較 － 更巧合係連「遇上」二人之時間都差唔多。亦同樣不幸，我同兩位佳人都係緣慳一面，只可以「非現實」地遇見同接觸。

銀行都可以咁旺五點幾仲有四五十人排緊隊，出糧卦或者，但搞掂一間，都仲有另一間要去。
「五點喇喎！銀行都收左啦！點去？」
「呢個世界有入票機嘛！」
走到去彌敦道匯豐，有糧出大家都高興，平時入票機人都冇個，今日十幾人排住隊等入數。完全冇問題丫我呢ｄ都係涼住冷氣聽歌遮仲開心，五點四排到五點八，終於到我喇！跟住走得。票都唔使入，因為人人入都冇事，就係排到我，部入票機就down左。
「唔好意思喇會計姐姐！搵著地獄黑仔王幫你入票係你不幸，聽日你自己出黎入順便曬曬太陽啦哈哈哈哈！順便對各位排我後面的朋友講句『唔好意思』！」
最衰撞出糧，唔係咁多人的話，出到黎彌敦道入完票，仲有時間落新之城打多舖機先走，而家搞到咁晏，立即飛返行到去已經五點十。老細十分疑惑：
「咦？原來你仲記得今日要返工架？不過咁遲，你返黎做乜？」
「我返黎放工！」

近期多番新貨到、多番ｄ大band新碟，亦都引番多ｄ人上黎，終於重拾番果一種「感覺」，似番間舖頭之感覺。又可能多番人氣帶旺，近來連無聊人無聊事都多左。
「係咪Trinity Records呀？」
「係呀！」
「我想問你地有得幫人訂碟架？」
「你想訂邊隻碟呢？」
「我想問你地會唔會有《魔盜王》隻soundtrack呀？」
「有！」
噉都有？
「你上黎同劉Sir講"Cauldron Black Ram"就得架喇！」（呵呵呵呵）
有個馬達加斯加progressive metal友南非走到黎TRHK搵野聽，中國人黎自己都係玩progressive metal，都未夠過癮。耐唔耐有ｄ靚妹走上黎搵gothic同doom野聽先好玩。最正都係有一pair，一個講英文的華人靚妹（呢個「靚」兩解都可以）帶住一個鬼仔新西蘭走黎香港旅行，順便上黎TRHK呢個「景點」「觀光購物」，個鬼仔想搵APOCALYPTICA，之後介紹佢聽HEVEIN，即掃，原因唔使講啦（希望真係唔使講啦，在這連APOCALYPTICA都已經冇人問、「潮完」的時候）。相信好多人都會覺得，係個華人靚妹帶個鬼仔男朋友上黎TRHK買metal碟，但實情係調番轉：係佢兩個都係聽metal，不過係個鬼仔陪佢女朋友上黎買碟，而呢位「超鍾意IN FLAMES」的靚妹一掃就係IN FLAMES全線。問問，原來新西蘭係一間metal store都冇，上網買又貴，所以黎到香港旅行，今站最開心。
坐係TRHK最開心，就係耐唔耐撞到呢ｄ奇人奇事，其他任何地方都唔會如此有趣味。但你睇過劉Sir分享咁多過癮見聞，冇幾多單唔係因為有鬼佬出現先發行，因香港人而起之「過癮野」（因「專家」而起果ｄ唔計啦）真係可能兩隻手唔使數晒，又普遍黎講香港女性係比香港男性更「過癮」。年代確實已經唔同，我地已經落伍了。就好似果對愛爾蘭情侶，男方對音樂之接納、女方因為鍾意而追之積極，呢種堅持同態度，香港地冇太多人身上仲會見到。

「今日我好死(1)_______，返到公司開(2)________睇睇(3)________，一睇，嘩！成個(4)________(5)________晒，因為(6)________都(7)_______！本身今日(8)________，點知(9)________，(10)________果樣(11)________，結果成個朝早係噉(12)________，食完飯又繼續(13)________，(14)________到放工先可以停，冇辦法呀真係(15)________做呀！今日先知道原來(16)________(17)________足全日好辛苦！」

以下係兩位考生的答案：
會計靚女：(1)忙　(2)會計個software　(3)條數　(4)software　(5)爆　(6)成盤數　(7)計錯晒　(8)乜都唔使做　(9)成盤數錯左　(10)琴日做晒　(11)今日要從頭做過　(12)計數　(13)計　(14)計　(15)好多數　(16)計數　(17)計
劉Sir：(1)得閒　(2)Outlook　(3)email　(4)Outlook　(5)空　(6)一封email　(7)冇　(8)有個客要見　(9)個客放左我飛機　(10)唯一要做　(11)都唔使做　(12)上網　(13)上　(14)上　(15)冇野　(16)上網　(17)上

今日禮拜三，每個禮拜最（唔）開心的一日（開心定唔開心就取決於果個禮拜舖頭多唔多on9仔同7人喇），plan左幾耐下今晚無聊三條友走左出去香港玩。
「冇錯又係三個月甘3月11果三條友果幾處地方！」
最憎黎灣仔就係因為目的地永遠係銅鑼灣同灣仔兩個站正中間，搭地鐵的話點都要行餐死先去到。第一站係好耐未去過之Rock Gallery，純為親眼目擊「DT新碟出左」遮（呵呵），得意在去到果時係播緊無線天氣報告，睇睇下，
「咦？乜而家連天氣報告都咁rock？」
突然間變左播隻progressive fusion野（PLANET X還是Alex Skolnick？），都未算過癮。到我地睇完，一走，就立即停機播番正常野。係見我地一個著OPETH一個著PINK FLOYD？定還是因為在場另一位「行家」？
再上188，灣仔已經少行，呢度就更少，以前上黎都係因為多二手舖同CD舖，但形勢已變。有迄立不倒之四仔檔，我幾年前第一次上黎到而家都係果幾檔，甚至有增加之趨勢，勁！game舖又多，一上樓梯已經有檔大電視播住C&C3，唉出左咁耐加買左咁耐自己都未有得玩，冇計真係太多野顧了，機都冇時間打，Starcraft又出2添！大劑真係！又以前未有留意，而家先知原來188都有咁多玩具舖，新野舊野都多款之餘仲有ｄ賣得好平添，加上唱片舖同二手舖雖然執下執下已經唔見好多，都仲有ｄ幾有睇頭，絕版野同舊野特別多，何韻詩第一隻碟四舊水唔該，灰在我真係好有興趣！雖然CD暫時唔係太大興致買（TRHK果箱都未執晒已經夠多了，MEGADETH&DT新碟有緣再算啦），反而電影DVD多野揀，睇中左Predator兩集DVD，第一集正架第二集就麻麻啦（再跟住AVP食晒屎就甭提了），我鍾意隻野而兩集DVD特別版加埋都唔過二百，好似好貴但正版係呢個價架啦你仲想點呢？或者真係會有日手痕執番，除左因為鍾意，仲因為寫緊一隻碟係「predator death metal」，自然更加癮起，只係要追的話，又小說又漫畫又係死人。而此行目的，的而且確係黎行唱片舖，就係Rock爺同大家分享左好耐果間，其中一個見證香港音樂同唱片業已步入夕陽之悲劇例子。但可能今日阿老闆大叔都知道我黎，日日都開舖，就係今晚劉Sir專誠上到黎，就唔開了。噢。劉Sir真邪。
九龍行得多，過到黎港島區兜個圈，先知道原來香港呢邊ｄ商戶同商場搵好多女睇檔，質素仲唔差添。九龍這邊要努力了。TRHK都應該請番個promotor？

因為此行目標大叔今日避走劉Sir，灣仔之旅比預期中早完，仲有時間酷熱天氣食住塵行埋去銅鑼灣。糖街自不然大興趣啦，只係今次夜得黎又唔係多時間，只行兩大目標HMV同玩具反斗城算。已經好耐冇留意唱片業動向（當我連「metal友必睇」果份「報紙」BBM都幾個月冇睇過，其他野更加唔會理），走上黎望望先知道有好多band出新碟 － 甚至係太多喇，當然啦而家metal(core)/emo咁紅，今年唔出等幾時？所以我決定放棄。除左幾隻碟。
「咩碟？」
Bjork新碟同椎名林琴新碟，仲有一百蚊三隻復刻王系列，以上係極大興趣但都引住手先；唯一特別想摷之metal野，唔係RUSH同Ozzy新碟（你當佢地係metal的話），唔係MEGADETH同DREAM THEATER新碟（唔好意思，真係未夠興致），而係TYPE O NEGATIVE新碟，雖然上隻已經唔同我所想要，新碟更多人唔妥，都要追架啦話晒我最愛band喎，而呢隊愛band出左碟幾個月我都仍然可以咁無動於衷，是啊劉Sir已經收左皮了。差唔多所有死剩之HMV都搬晒舖，中環果間未去過始終太難「順路」，銅鑼灣就絕對好行過尖咀，大同舒服ｄ，又好似「metalｄ」，但最精彩都係電影DVD，勁多半舊唔使減價貨仲要唔少係正野，例如心慌方（Project: Saw延伸出之Project: Cube仍未實行），仲有又係笑爆電視睇左四次仍然咁爆笑的"School of Rock"，每隻都只係$49，更多其他classic野同cult野想掃，搵次黎專掃DVD都值。真係架而家，玩玩具行街睇電視睇戲仲有心情過聽歌聽metal。劉Sir正處於休漁期。

噉出到黎銅鑼灣一定唔可以唔去玩具反斗城啦，又對正HMV對面更加唔可以唔行啦。先講講反斗城樓下果間玩具舖。果檔三個月前黎，係promote緊遙控直昇機，門口有條友係專責遙控架野周圍飛引人睇，今日上玩具反斗城時途經，條友一樣係度玩緊，但我地一行過就立即唔玩收番入舖。又係劉Sir累事，唔好意思大家。入到反斗城，變形金剛果然超多，雖然上星期五2/6全球同步發行，就連香港銅鑼灣反斗城都應節一齊六月二號晚零時零分開始發售，但我完全冇擔心過冇考慮過果晚過黎排隊通宵同其他人一齊癲，因為玩具反斗城次次入親貨都咁多實有我就唔信賣得實，亦唔相信香港而家仲會有幾多真正如此hardcore之變形金剛fans！今日先至黎到，果個所謂全球只有一千套兼只於香港發售之特別版boxset，七舊水一件tee加柯柏文變聲頭盔加兩張戲飛加個景品展示盒，其實諗得過因為有戲飛又有tee加埋已經值番一半，加上個變聲頭盔已經賣成四舊水了（食水真深），只係如果唔係送頭盔而係送部柯柏文俾我我就肯定買！係我都知好過癮，睇Rock爺同阿捷兩個玩得幾開心，戴住個頭盔用柯柏文把聲小九劉Sir確令圍觀眾市民心情愉快，最正當然係目擊Rock玩到個頭盔都爆埋一分為二，只係劉Sir玩，「超齡」嘛！同埋呢隻兌番零售價好似先三舊左右，呢度標四舊，搶左ｄ喎！係買都一買買個boxset！今次變形金剛電影宣傳加新系列玩具真係落本落到足晒，一出山就係十幾個系列幾十款玩具，齋電影機械人玩具一款都有幾個級數加唔同功能系統版本搶錢都爆，柯柏文我就噉數都數到最少四款囉，仲有ｄ電影冇出過之角色乘勢執一執個影「電影版化」又出番黎，又或者開一個完全無關之新系列又拎出黎賣，瘋狂掠水，例如一個系列係真實電子電器變機械人，電影版當然冇出過得玩具先有，其實變形前後睇落都樣衰完全係靚仔玩具feel，但出得黎加上變形金剛個名就實有人買架啦，有部我都真係有ｄ興趣架，鐳射鳥變藍芽MP3機睇落都過癮而且做得真係好靚（唔係變機械人嘛），遲ｄ我相信會執隻架，反正我預計呢個系列甚至全部電影玩具都係，年尾一定會減價散貨！又有個系列係「RPG版」柯柏文同星星叫，貨櫃車同戰機變枝槍，起初諗住好細但睇過實物先知原來好鬼大枝，變貨櫃車同戰機時又唔係差喎都可以當係件玩具玩玩，只係三舊水一隻就貴左ｄ，唔係買晒兩枝再加多個柯柏文變聲頭盔就可以玩佢所謂果個「變形金剛RPG」，跟住再同呢套裝備出騷夾變形金剛主題曲就真係型／柒到爆！只係見唔到最想睇之變形金剛毛公仔，有柯柏文同大黃蜂，毛公仔都可以機械人變車吹脹嘛？款多量多但價錢當然唔會平啦始終玩具反斗城，冇所謂都係黎過下眼癮同格個價遮順便睇睇其他玩具，新野冇乜蜘蛛俠就好多，前排上第三集嘛又係擺足成個架咁鬼死多，但電影玩具過左果期熱潮退左就冇人買，又多又貴又唔會好似HMV噉耐唔耐黎一劑超級減價大清貨，成日想知玩具反斗城點樣散貨法？至於每次黎到都一定要睇過先安樂果兩樣，機械手當然存貨充足，但廿四蚊一隻手就．．．最想搵之手榴彈搵極搵唔到，只得尖沙咀先有貨。即係搵次又要無聊過去尖咀開心下先。行玩具舖真係好開心架，唔買齋睇都好高興，童年夢想嘛細個冇機會而家大個發番個夢都好丫。
最可惜係早左成個月過美國，如果我而家先至過去肯定多變形金剛到爆，求祈搵間都最少多過銅鑼灣反斗城呢度幾倍，甚至有ｄ野賣得仲平過香港，美國就是如此幸福。香港好在就係我想搵果ｄ好彩好多都係香港賣得平過美國，呵呵。

行埋玩具反斗城都九點幾，臨散band前食埋個飯先。食乜？銅鑼灣真係冇咩好食，假使你好似劉Sir噉唔肯俾錢的話，結果係．．．KFC。好似好灰？噉又係。所以放棄，再諗過。最終定案係．．．麥記。更灰。冇辦法，灰一回事，但銅鑼灣地帶呢兩間算低消費架喇，你估度度都有大家食十五蚊大大碗咩！又臨搭巴士走人前先知道原來巴士站樓上有間尚書房，你叫劉Sir睇書睇咁多字仲難過叫佢去死，即係書係有好多但對大陸出產之DVD興趣更甚，好似《金剛2》同《盜墓迷城3》，外國都未上中國已經有，祖國真偉大！亦有好多都唔知咩黎但齋睇個盒已經知道係正野黎之不知名物體，好似《達文西病毒》，你覺得係咩片？最初我都覺得係見果期達文西紅就出黎呃下錢之「clone片」，點知完全係另一回事：點知咁簡單？同《達文西密碼》一樣係解謎劇情片，但個盒睇極都似鹹片居多，似套解謎劇情性重之色情片。真係笑到你仆，上黎齋笑都抵。或者又係搵次上黎掃番鑊。仍然熱切期待國產變形金剛漫畫中。

是晚仲收到一個電話，來自一位老婆婆。
「劉Sir fans果真遍佈老中青？？？」
非也。其實係打黎搵仔。契爺伉儷神州此行，一去已是個半月矣，本來話去到五月尾就會返黎，但而家六月頭影都冇隻電話冇個，甚至失埋蹤連人地阿媽都要打電話黎搵仔，可能真係原定計劃全部如願，行路上到新彊之後而家已經去到巴基斯坦矣。

經過得閒到爆的一日，今日終於要做番ｄ野了，不過整體黎講，已經好過半個月前甚至上個禮拜Ｎ倍喇。今日見無無聊聊要落銀行，會計靚女咁蹻又落街買野，lunch豪少少落去樓下食車仔麵。萬寧我呢世人第一次幫襯，都託阿靚女所賜，入黎等佢找數時見到櫃台promote緊嘉頓迷你威化餅五蚊三包，仲要係最好食果隻花生味，唔使諗啦旋掃十蚊先啦！威化餅幼稚園食到而家咁大個仔最鍾意都係食嘉頓，鍾意食朱古力、牛奶同花生味，而最鍾意邊隻已經講左啦，因為花生味係落足餡中間勁多花生醬，未食齋聞都已經勁濃花生味，而朱古力同牛奶都好食，但唔知點解唔係包包都好食特別朱古力，有時落勁多餡好夠味，但有時食落淡到好似齋威化餅冇癮，唯獨花生味質量控制得最好。只係威化餅呢家野細個食就多，大個左識自己搵野食就自然會有其他大把選擇（例如大家食呵呵），隔左幾多年冇食過我都唔記得，但今日再食，話就話係迷你版一條只得本來大版之四份一左右，但一部有成十條仲要三包先計你五蚊，真係食五蚊都飽飽地可以當食左餐tea！非常美味，亦有點後悔點解只掃十蚊咁少唔一野有幾多貨全部執晒佢！
噉落到黎當然唔係只得濕瓶啦，食飯先緊要嘛得果一個鐘！公司樓下有檔車仔麵勁好食又夠平，今次叫左個粗油雙麵底跟牛丸魚蛋豆卜豬紅餐肉咖哩汁，都只收我廿蚊雞咁大把！計錯數莫非？？？食左先算啦以劉Sir性格梗係呢ｄ野理黎盞自己煩惱齋就當係阿姐請劉Sir食啦！！！一面食麵一面吹水，近來公司真係越黎越有「娛樂性」，講賺錢就唔係賺得多架喇份工，係勝在夠頹、冇皇管（有時真係劉Sir自己就係皇架）、一班同事開心好玩又冇乜鬥爭、同多戲睇。只係將來始終要諗諗，今年最後六個月就知情況。過埋呢半年呢？
「過埋呢半年先算啦！」
同樣是劉Sir性格。但而家已開始盤算倒是真的。
食完仲有半個鐘，臨上返去訓覺前先去埋華潤萬家掃掃雪條先，華潤萬家永遠係劉Sir最愛超市，你知間野個英文名就明點解。此行收穫就真係豐富喇，除左見到以前未見過之新款雪糕，仲有我的最愛：
「雪夾糕！！！」
唔知點解，全公司都話好難食，得我一個覺得殊正輒食（welcome to最緊要正字！），可能市場反應真係一般啦，咁耐以黎都冇幾多次撞過有得賣，見都只係一大包雜錦雪條入面夾一兩個散裝而唔係噉樣一包十件裝賣，今日難得撞到真係冇得走，再加一個原因，怒掃：
「$9.9？？？？？？？？？？？？？」
一包十件裝原價$33.9，上次同事買係剛剛出推廣價$17.9，估唔到今時今日，要淪落到十蚊都仲有一毫子找亦即係一蚊一舊之景地，我最愛的雪夾糕！俾錢果時我都有ｄ唔敢相信，特登再問問收銀姐姐：
「阿姐，雪夾糕係咪真係九個九一包呀？」
「十蚊想買雪蛤膏？傻檸左乎？」
係我係好恨食又撞正平到仆街加有大把存貨，但都只掃左兩包咁大把，因為個雪櫃冇位遮有位你慌我唔盡掃晒佢？當然仲有一個原因：全公司都冇人同我爭食！買兩包都唔怕咁快趙晒！（但趙果個係劉Sir一個頂十個，睇怕要捱得耐都幾難！）
今日lunch同阿靚女噉樣落一落黎，君子之道，主要消費／全部消費當然係劉Sir負責啦。一個lunch已經可以話到俾你聽，拍拖真係可以使好多錢加好多時間，齋呢個lunch之消費，我節儉消費的一個禮拜都冇使咁多，唔係誇張係事實黎。Henry哥今日有一句：
「你都好開心／好幸福丫！」
各有各睇啦。有得必有失。你可能覺得我得比失多，但問番自己得多定失多，我都唔敢講。

近來真係超忙。收完舖返到屋企開電腦，超多野要跟勁多野要覆，一坐低可以直做到十一二點都未停到手，而家係已經係忙到忙緊九月ｄ野了，亦有可能好快就會有一壇大野彈出黎。所以你見劉Sir身為壇主都好耐冇蒲過頭，冇辦法實在太多野做，睇我已經將管理論壇之重任交晒俾107就知，日日做到冇停手呀。各位壇友，多多發言搞起個forum啦唔該。已經冇精神冇時間處理咁多事了。
所以C&C3都無期。我唔想玩咩？屋企部電腦播唔到歌，我唔想搞番掂佢咩？幾個月都搞番掂，就係因為手頭上太多事忙。只有等某個禮拜三一鑊過搞掂佢了。

都好耐未試過會有唔使上廠的日子咁早起身，有客要見嘛仲要係個大客，晨咁早要公司出車去人地公司接過黎，九點鐘就要返到公司開車。本來計劃係噉。實際上？八點鐘起左身，奇蹟黎。跟住都相安係事。一直到八點半，出門口行左陣突然間大雨，立即走返屋企拎把遮先，再落樓已經知道死硬，咁大雨唔好話塞車，有車都已經係好事，去到車站企係度淋雨，大半個字先有一班車經過仲要連續六七架都爆，上到車已經九點一，塞到去公司同平時返工時間冇分別，即係正式返工時間再加多Ｎ分鐘遲到。老細都已經懶理了。立即收集全公司所有遮再走番落樓下上車，因為人地公司係一班人噉黎，間公司坐落紅磡，由大角咀過去簡直係塞到離奇，所以我從來唔鍾意去紅磡，交通極之唔方便又少車直出，工業區路少路窄又多貨車，加埋今朝落雨直頭坐定定訓番陣都仲有大把時間剩。地址只有話「乜乜街乜乜大廈地下」，去到發現真係地下，係棟大廈果條街地下全層都係，地下完上面兩三層都係寫字樓，仲要唔止得一棟樓過左馬路對面棟樓情況一樣，拿呢ｄ先叫做大公司呀！今朝天氣唔係好，去到果陣本身已經停雨，等班客時幾滴幾滴噉越落越大，所以要拎定幾把遮黎俾班客同自己用。到個客出到黎果時，個天突然間好似三號風球咁橫風橫雨，當時又紅燈過唔到馬路，把遮幾乎俾風吹爛，企對面馬路有瓦遮頭的客人立即指住條傻仔怒爆笑（．．．）。
「要勞煩到劉Sir專誠黎接，個客都好大喎！」
冇錯！佢地自己搭的士過黎我地包番佢，都仲平過而家噉樣車錢油錢加煩少好多野，但就係要你開埋車過去接佢，大公司脾氣嘛。
「咁大間公司黎到，咪好多生意囉！」
又唔係喎。起初諗住好大班點知原來得三個人走上黎，又諗住會有好多野傾，點知上到公司凳都唔使坐野都唔使講，行左幾個圈望左幾眼，三個字唔使已經搞掂，只得一句：
「唔錯。」
就係噉？噉你班人上黎做乜？
「睇你公司囉。」
睇完呢？
「今個禮拜睇完你香港公司，下個禮拜睇你大陸工廠。」
哦。跟住再一個唔該又要開車送番佢地過去紅磡。真係多謝晒。大公司做野係唔同ｄ，乜都當晒係奉旨之餘，你講乜叉都唔Ｑ理佢講佢識果套先係皇道（甚有專家feel喎）。正！我鍾意！我最鍾意就係對住呢ｄ客，要我俾鬼死咁多時間去搵佢陪佢，但上到黎又唔係傾生意大家吹吹水望兩眼就算，事前唔使做之餘事後又冇野跟進，又有得笑！（搞到我都想做專家添呵呵呵呵！）繼上廠之外最嘆就係對住呢ｄ客！特別係呢ｄ反正冇野做不如搵ｄ野玩好過的日子！

朝早見客，名乎其實地「見」，晏晝勁得閒冇野做老細又唔係度，好愉快就過左一天了。夜晚除左一班白痴仔上黎無人島發癲（皆旺已經將近收皮了，唔止TRHK，係成座皆旺都係），當然又要聽下野。前排嘈左一輪，近排因為一隊band，摷番ｄ靜野同progressive野聽聽。首先係IN THIS MOMENT。各位專家唔好插住我都知佢地唔係progressive metal只係emocore之類遮，只不過隻碟真係越聽越過癮，亦越來越明白點解CM會簽佢地：雖然類型唔同，但音樂聽落勁似INTO ETERNITY新碟，有ｄ轉位同玩法真係同佢地新碟接近一樣，令我呢個INTO ETERNITY fans聽得好過癮。當然，INTO ETERNITY － 特別係新碟 － 又係唔係progressive metal，又有待他人／家解答了，而IN THIS MOMENT就佢地果種音樂而言亦唔係好top果隻，講唱其實個女主音唔算好得特別係口音，但夾埋起黎個感覺就係我鍾意，亦同MYPROOF一樣靠封面食糊，已有受害人聽晒兩隻之後一野過執晒兩隊band了，除左因為兩隊音樂都正，亦因為兩個封面都吸引。仲有今期主角AXAMENTA，就係因為佢地令我先放棄焚左一輪之death metal而聽番陣progressive，賣點自然係Daniel Gildenlow，會搵得到瑞典progressive metal icon幫手唱，未聽都諗到唔會野少啦。隊band唔係瑞典，但真係點聽都係瑞典band，作俾Danil唱果首根本就係PAIN OF SALVATION，都未止，買埋隻碟睇埋條歌詞 － 冇錯係一條 － 明白埋個設計、格局同理念，完全同PAIN OF SALVATION如出一轍，越聽越神奇，根本就係extreme metal版PoS。真係要買左隻碟「目擊」過先會知有幾神奇。但如此奇band，點解會咁不知名？又係地下之灰。
講起PAIN記，又有過癮故仔。話說前幾晚焚完AXAMENTA再開PAIN OF SALVATION重溫，播佢地其中一首最出名芭樂，果時剛剛有個外賣佬上黎皆旺一樓送外賣，送完之後企正TRHK門口聽歌，仲要聽晒成首先走。令我諗番起好耐之前有個保險妹去廁所時播AYREON又係播慢歌，個保險妹出黎問有冇果首歌個電話鈴聲（保險妹都已屬「俱往矣」之「TRHK集體回憶」一部份）。progressive metal雖然賣點係超複雜歌同超高技術，但好多prog-metal band之強項反而係玩feel同唔恆果ｄ歌，所以我鍾意PoS同QUEENSRYCHE，唔恆唔技術但極好feel之兩隊，呢ｄband先至更襟聽。只可惜，唔好意思，你冇solo、你唔係DREAM THEATER，點有氣氛都好點有概念都好點有深度都好，你唔係果樣野果隊band就唔會有人聽唔會有人理，請睇睇AXAMENTA。雖然佢地速度仲快技術仲高歌仲複雜solo仲勁歌詞仲深，但你唔係就唔係。