當之前柒次話飯罪柒次都係劉局，我唔係唯一一個以為今晚又係循例收皮，點知會爆冷咁齊人，人數幾乎係柒嘅兩倍。好多謝各位出到嚟土瓜灣食咁就我呀，我已經係今日屋企對住部腦做嘢做到七點九至換衫，食完返屋企立即又繼續開工，如果唔係食行一個字路就到嘅一品，我今晚對住嘅會係營多而唔係咁多位朋友，更加唔會食到好飽咁開心。

唱K就等主角KC飛之前五月頭先啦。下一次唔會又係我一去到，樓上立即火燭幾架消防車警車衝埋嚟咁黑啩。

其實過嚟aPM返工之前，我從來未食過Pie & Tart，因為舊時「五六蚊大大個麵包，叫我十蚊食個撻？唔係啩？」估唔到而家係日日都Pie & Tart度日，繼KFC之後又一間食到唔想食。

初時仲有時間落街食飯，lunch會走去出外食飯堂食茶記；跟住開始忙，慳時間，落樓一出電梯轉幾個彎嘅KFC算；再跟住已經係朝九晚九噉做返到屋企仲要繼續做，就朝早落車買定晒，一個餐由朝食到尾。揀Pie & Tart貪佢買完唔怕擺到凍幾時食都得，通常都係買四個撻，早餐lunch各食一兩個，（唔）好彩的話下午茶可能仲有一個食，亦試過四個撻食到食晚飯都仲有得食。其實衰唔晒，的確幾好食貴得有點道理，而且而家食佢反而係食得最平，四十零蚊四個撻食到最少兩餐，而家觀塘求祈一間茶記，隨便食個碟頭飯已經差唔多呢個價啦。

我諗直到個project下星期中正式交第一期貨之後，我先可以返工嘅日子晏晝正正經經食餐晏晝飯，而經過日日返工都係食批食撻的半個月，離開aPM之後，呢世人應該都唔會再幫襯Pie & Tart，雖然真係幾好食。

因為落親場嘅日子都係食撻，食足兩個星期，個客話我而家食到成個撻樣噉。好在我唔係食撚。

WhatsApp仍然唔使我俾年費。係咪我真係少message到佢都覺得我太毒，毒到錢都唔敢同我收。

早排先話今年又唔收我年費，今朝瞓醒，發現Whatsapp多咗版打電話，以為人人都有好平常，返到公司問先知好似係逐水放，全間office得我一個抽到做第一水，其他同事要我打Whatsapp電話俾佢，接一次個打電話功能先會出現，然後自己再打俾人，個app叫update之後至可以正式用。

但唔明，點解全公司人人都咁多電話，Whatsapp唯獨是俾我呢條連唔裝小熊來電部電話都可以全日唔響嘅毒撚試呢個新功能？

其實今晚有機會第三次上電視做訪問。我諗寫咗14年blog最大成就，係好多人比我自己更認真對待我寫嘅嘢，今時今日心態其實同十幾年Geocities、Xanga時代開始寫時一樣，只當一種日記式生活紀錄，乜狗屎垃圾大事小事諗到就寫低寫完就算轉頭就唔記得，反而成日有人會睇完我寫嘅嘢搵上門撩偈傾甚至邀請做訪問，講metal講音樂自然大把，其他講文化藝術、講電影、講社會、講住屋、講生活乜都有，好似星期三愚人節亞視冇得續牌居然唔係笑話，消息傳出之後冇耐就收到message，星期六晚《新聞透視》會講亞視，因為兩年前一個講亞視嘅post有記者睇過仲會記得，就素未謀面都send message嚟問有冇興趣接受訪問。

呢種事唔係第一次發生，甚至發生過我都唔記得幾多次，你問點解又唔見有乜劉Sir有份嘅報紙雜誌或者電視訪問嘅？可能因為每一次我都會收到問題之後，先寫晒成份稿 － 有時甚至影埋相 － 俾對方過目，相信班編輯同記者冇預過一個受訪者會咁黐線，只做一個出鏡半個字唔夠嘅路人甲都會玩到咁大，所以往往冇晒下文。但既然寫咗，同今次見到最後個project真係出咗街，就在這播完一刻，喺度同大家分享愚人節收到嘅四條問題同當時回應，為今集《新聞透視》補充一個八十年代長大嘅亞視迷嘅角度。

1. 何時開始看亞視的節目？

細細個已經開始睇

2. 為何喜歡追看亞視劇集？

覺得亞視動畫、劇集同綜藝節目各方面，無論外購還是自製，題材都比較獨特、比較另類，尺度亦較大。好多亞視最受歡迎時期拍嘅劇集，而家冇一個免費台會拍或者敢拍，將套劇交俾佢哋，亞視以外其他台亦未必敢原版重播。

3. 對亞視的印象和感情是怎樣？

細個睇亞視已經覺得，一啲客觀環境因素，會令人只會覺得亞視係一個二線台。以前屋企部電視只得四個台，無線明珠排一、三，亞視國際排二、四，換言之開電視一定係先睇到無線中英文台，之後至到亞視，冇咗無線好多時一開電視已經係睇緊佢嘅優勢。而且亞視畫質比無線差，色彩唔及人繽紛，以前影響可能唔算好大，但到高清時代其他台不斷追求高畫質，亞視畫面仍然係暗啞蒼白。亞視成日俾人話好重大陸味，畫質跟唔上時代係其中一個原因。

不過連串缺點反而令亞視節目更可觀，因為當仲可以同人競爭時，技術上有缺憾，就會用節目內容同質素彌補；唔係大台，好處係輸得起。點解歲月留聲台會比亞視主台更受歡迎？因為八九十年代亞視劇就係創新代表，正因冇人哋咁大包袱，至可以拍其他台唔敢試嘅題材同尺度。只可惜問題係贏嘅時候少、輸嘅時候多，好似你創新完，另一個台照辦煮碗，然後用一開電視機就係睇佢嘅慣性收視優勢大石責死蟹，口啤你贏，最後實質經濟收益又未必歸你，噉樣打持久戰，又邊有可能支持到呢？

而家睇返都幾無奈，當年亞視冇因為自己唔夠人大就自暴自棄，仍然腳踏實地努力創新落力做，正正係體現獅子山下精神，到頭來成果就俾財雄勢大嘅財團搶走，其實喺香港電視事件好多年之前，亞視已經證明證明咗全香港人睇，獅子山下精神喺而家嘅香港根本唔work。

4. 現在政府不續牌，會不捨得嗎？感覺如何？

其實我對亞視感情好深，唔止因為好多令人印象深刻嘅節目，仲有對我啟蒙最大嘅英文老師，係以前每晚十一點同凌晨兩點喺國際台見面嘅David Letterman；而且工作關係，我曾經上過兩次亞視節目，都係難得體驗。

我唔係唯一一個戥亞視唔抵嘅人，只不過當一個本地台會選擇唔拍本地劇而只播外購劇，包裝到自己似一個大陸電視台多過香港電視台，然後轉去國際台再見唔到David Letterman，而家對亞視嘅感覺就同好多人一樣，只覺可有可無，亦無特別感觸。

反而會關心歲月留聲台之後會點？我心態仍然好舊派，就算而家上網睇好方便，始終鍾意每星期某幾晚夠鐘就開電視追劇，歲月留聲台正正俾我重拾呢份情趣，甚至試過為睇一套劇而特登早起身。對於我哋呢種對而家新電視劇完全冇興趣，只求劇集有質素有新意嘅人嚟講，如果歲月留聲台因為亞視執笠而停播，第時開電視轉中文台，真係唔知仲有乜嘢劇可以睇。

其實有點遺憾，因為亞視上過兩次，都好想試一次上上無線，噉就由細睇到大兩個電視台都上過晒了。或者下次唔好寫到咁長嚇親人啦，大佬銷藥員成集《新聞透視》講嘅夾埋都冇上面咁多呀，哈。

呢樣都算其中一樣我最冇預過會落個客度見到嘅嘢。下面仲有個Metallica patch。

食咗咁多年自助餐，我都係第一次見會棟個牌出嚟提你，自助餐啲嘢食其實唔可以攞走。就當我在外地旅遊。

記得《天與地》播嗰陣，好多人屌套劇成日玩畫面冇對白，都唔知幾時開始港產劇變成廣播劇。睇返廿年前《大時代》，今集開始冇耐已經可以連續兩個字一句對白都冇，但冇人會問

「點解冇得唔睇畫面齋聽我都『睇』得明套劇架？」

最後唱歌雖然少少難聽，但好有意境，同以前啲劇有樣好，片尾可以拖到好長播足大半首歌至完，唔似而家字幕勁飛最緊要快啲播完入廣告。難怪而家無記劇存在價值只餘俾人屌，因為根本好多好基本嘅質素都達唔到。