右邊謝安琪，唔使介紹啦，識劉Sir都知佢係香港五金業界謝安琪絕對忠心狂迷會永遠榮譽會長。左邊係潘辰，來自上海，我最鍾意中國歌手，賣點係磁性聲線。今日先知道原來兩個都係同一日3/13生日，這就是緣份，就等我一次過祝晒兩位最愛女歌手生日快樂啦。
生日願望係，兩位都要快快出新碟，同埋開香港演唱會呀。
剛剛《全美一叮》有個十歲墨西哥小朋友高唱Frank Sinatra經典金曲《New York, New York》。不俗，但每次聽到這首歌，我都只會聯想到這個無人能敵的重唱版本。
為甚麼很多人都說，加拿大的Devin Townsend是個能將任何石點成金的重金屬界神級人馬？這就是證據。
Just took a glance at TV, saw a Mexican ten-year-old sang the Frank Sinatra classic "New York, New York". He's good, however whenever I hear this song, this unbeatable cover version immediately springs to mind.
You need proof that the Canadian prodigy Devin Townsend is truly Metal God in the Flesh? This is it.
瑞典的Arch Enemy能成為最出色melodic death metal樂隊，除擁有無比出色的結他手，女主音Angela Gossow是毋用置疑的另一重大因素。十多年前她以其澎湃的聲線和狂野台風，顛覆了女性在重金屬的定位，並定下了普世對Arch Enemy的形象，怎料出乎全部人意料，就在推出新專輯前夕，樂隊宣佈女主音之位換了加拿大metalcore樂隊The Agonist的Alissa White-Gluz，最新MV已經由這新女主音出演了。
其實更想知道，十幾年後的Arch Enemy找回一個男歌手來唱，光景會是如何。只是礙於marketing，就算是男唱還是女唱根本無大分別的extreme metal樂隊，女歌手走了，新歌手都很難不找女性，尤其是像他們這麼知名的樂隊。
還在默默等待德國傳奇級technical death metal樂隊Necrophagist十年也還未推出的新作嗎？專營tech-death的名廠牌Unique Leader了解你的愁緒，特意推介新晉樂隊Alterbeast給Necrophagist的fans們，登場作《Immortal》根本就與活在這個年代的Necrophagist會寫出的一模一樣。
可惜專輯欠了首bonus track，應該cover世嘉經典動作遊戲獸王記Altered Beast的主題曲。
Still waiting for the next release from the German technical death metal legends Necrophagist, even it has been a decade already? Introducing Alterbeast, the new star from world-famous tech-death specialist label Unique Label. Their debut "Immortal" sounds nothing indifferent from what Necrophagist would write now in this modern era.
If they need a bonus track for this or next album, the inevitable choice is a deathmetallization of the theme song of Sega classic arcade game Altered Beast.
2008．帝皇黑椒漢堡：《劉Sir個網七週年誌慶之黑椒漢堡s》
http://lau-sir.com/mcpeppers/mcpeppers.html
2011．黑椒珍堡：《從新黑椒漢堡看麥當奴與香港經濟之衰落》
http://lau-sir.com/one_week_one_photo/2011_week42.html
2012．珍寶黑椒漢堡：《真．黑椒漢堡大戰2012》
http://lau-sir.com/one_week_one_photo/2012_week45.html
說來慚愧，作為黑椒漢堡忠實fans，每年只得半個月有得食，所以每次到此神聖兩星期都會異常虔誠，買一個普通版加一個特別版合體自製帝皇版已成年度傳統，不過咁大件事上年居然遺忘，因為有更具挑戰性的咖哩漢堡挑機。今年黑椒漢堡居然一反常態，唔係年中年底跟住將軍漢堡出，而會排年頭失驚無神檔期，今次終於唔會忽略冇唔記得喇，隔一年再次延續邊食黑椒漢堡邊睇香港經濟的年度活動。
我都冇諗過會噉講：麥記真係良心企業。以前細個成日食麥記因為平，當茶記十尾廿頭一個碟頭飯，麥記一個餐可以平多幾蚊，而當年的幾蚊購買力唔細，對零用錢唔係多的小朋友黎講吸引力非常大，想儲錢買野食買野玩，就係靠每餐麥記慳埋幾蚊儲落去買架喇。跟住唔使講啦，大個之後麥記反而由窮人食府變成有錢人先食得起，食個餐唔飽肚仲要貴過食茶記客飯傻的嗎，好在百屌成材大家最拮据時候肯出平包平餐，好多時出街唔捨得使錢就係靠佢，尤其而家出尖沙咀返工四五十蚊食餐飯閒閒地，更加體會到五蚊蘋果批九蚊包同廿一蚊餐係幾咁珍貴。
而故事主角黑椒漢堡，隔一年之後，居然食到感動流淚，唔單止保持水準，今年所謂珍寶版終於唔再只俾多塊扒你就算，而真係加多一層有三塊包四塊扒，如此盛況好耐未見過，更顯珍寶版著數得多，因為普通版幾年前縮到只得一塊扒之後就再冇加返，而2014珍寶版加多六蚊就有多一塊包三塊扒你喎，抵食幾多呀大佬。亦因為今年俾足料，冇返三層都配唔上呢個稱號之帝皇版終於再度君臨天下，可惜夾埋只得五塊扒，比2008年初代少一塊，但係份量依然比2012多一倍，價錢先至$38.6只貴多六毫子，同上年三扒珍寶版咖哩漢堡一樣。簡直係反通漲價錢。
今年個黑椒漢堡，居然食到我有點童年時感覺，會覺得真係好食得黎抵食、食完慳左幾蚊好開心。假如麥記肯將黑椒漢堡列入常規餐牌再整埋做$9包 － 單扒普通版都好丫 － 就可以取代亞視成為香港良心了。
Laibach場show超乎想像地好睇，不過層次咁高，我只講講合乎我層次的膚淺野算啦。而家好多人e.g.林夕都話王菀之係現今香港樂壇新希望甚至最後希望，佢寫得出或出得到《天堂有路》同《留白》，但又寫唔寫得到／敢唔敢出一首《中華》呢？不求做得到達明一派似褒實貶果份玩味，可以唔流於表面又唔娘唔擦鞋已經好足夠。
當討厭政治、受制政治、妥協政治，自然好多野唔會創作得到。
一位（點睇都係metal友黎的）仁兄以"Ten Second Songs"名義重唱了Katy Perry的《Dark Horse》，過癮在一首歌之中模仿了二十個不同的歌手／樂隊，有Pantera、Metallica和Slipknot這些金屬樂隊而且扮得神似，連Type O Negative的吸血殭屍唱法都試了十分意外，重演Tech N9ne的speed rap也很不錯。無論本身喜歡那種音樂類型都該一看，保證能博得一笑。
Not totally metal, yet very metal. The "Ten Second Songs" dude, suspiciously a metalhead, covered Katy Perry's "Dark Horse" in 20 different styles. In the mix are as-close-as-you-can-get imitations of your favourite metal bands like Iron Maiden, Pantera, Metallica, Slipknot and the totally unexpected Type O Negative. That Tech N9ne play is awesome as hell also. Just experience this hilarious experiment.
Laibach場show兩個幾鐘長個場又聲好環境正，雖然投影機猛死Windows出blue screen of death就真係好industrial，同初頭諗住會好Test Dept.點知反而玩到跳晒舞十分開心，都係一場好睇抵睇到你唔信之精彩音樂會。要講／識講早已講晒，無謂繼續獻拙，再擦多擦主辦單位鞋就算啦。
其實Laibach黎香港唔止開一場音樂會咁簡單，而係一場革命，一場《新文化大革命》，除左表演仲有展覽有講座，亦唔係隨便租個場而係Vine Center搞場地音響落足本，已經同做到成個藝術節一樣冇分別，我向來睇完show唔會儲飛，今場例外，黑底熨金實在太靚，仲要有埋香港站獨家MCD，設計一流而且四首歌入面一首係英國國歌、一首係中國國歌、加多首unreleased track，計算得非常精心。另一靚係tee，雖然唔係Made in China（不過Made in Haiti），賣$220一件就有點奢侈，如果唔過兩舊水我會買多一件，話晒有幾隻淺色揀，基本上而家唔係黑色band tee已經一定買架喇，更何況香港站特別版款款設計同意念我都鍾意。
如此排場、如此製作水準、如此週邊商品質素，已經屬於明星級數，當然Laibach亦絕對夠資格稱為明星，不過我地睇得到唔係因為佢地好大好出名，而係三生有幸。聽音樂一班覺得勁覺得經典覺得唔可以錯過冇用，即使咁具藝術氣質同內涵，政府藝術節唔會請，因為唔係正統學院派；商家財團唔會請，因為唔夠大路，「Daft Punk，電音？Good！Laibach，工業噪音？No！」到頭來都只能夠indie地搞。自己搞過外國樂隊show，所以好明白主辦單位其實同燒錢冇咩分別，雖然Laibach呢場人數唔叫多 － 預售已經$690真係好大影響卦 － 場面同將近十年前意外地少人之 Nine Inch Nails香港演唱會相比都唔算好失禮，只係就當場入面幾百人都係真金白銀買飛入場、都有俾錢買tee買海報，其實亦唔幫得幾多，因為要請Laibach呢個級數加搞到咁大規模，就算賣晒飛全場爆滿再大家都肯俾多幾舊水買野支持，應該都回唔到本。更何況，你知香港地幾多大老細架啦：
「我鍾意音樂，我想睇演唱會，但你唔好要我為音樂同你一齊捱！要我七舊水睇唔撚係卦？四舊水都俾多你啦，仲要唔係（請在此填上任何潮band名）！」
所以而家香港獨立樂壇需要傻人，唔係間唔中有人傻傻地肯拎幾（十）萬出黎，好多樂隊你都唔使旨意有機會係香港睇到。如果問我將來香港傻人會越黎越多定越黎越少，我答你一定只會更多，其實好多呢類人倒錢落海時就未必係傻反而思路清晰知道自己做緊乜，不過仆心仆命蝕住錢搞show之餘仲要俾班老細呼天搶地「我想睇但點解你收得咁貴」、「我肯俾錢但點解你唔係請邊隊邊隊」，結果就俾人迫到變左真傻。
一個Nine Inch Nails的fans（好似係），寫了一首《This is a Trent Reznor Song》給Trent Reznor，投訴／讚賞了他們的歌曲如何地機械化，而且不止歌曲，就連MV都非常忠於NIN的捕捉了那一份神韻。不是最忠實的樂迷，怎能夠作出這樣登峰造極的致敬？
Here comes the ultimate tribute in history: a (maybe) Nine Inch Nails fan wrote a song, "This is a Trent Reznor Song", as a tribute to Trent Reznor and his bandmates, complimenting/complaining their mechanical way to write songs. Accompanying with an "official video", hilarity ensues. Only the ultimate fan can tell the band how hard they suck with such clarity, both sonically and visually.
Dovey場show，我想說的是，只不過遲半個字入場嗟，使唔使多人到一入門口已經行步路都難，爆到可以直接企台邊睇背脊咁灰，黎聽歌咩我黎為目及女架咋，點解要噉對我？Dovey我細細個已經聽到呢個名，佢地有幾多年我就知道幾多年，但到十年後佢地出碟先第一次見佢地真人，有點相逢恨晚的感覺，台灣有Doris，原來香港都有bass女神，口烏口牙∼
或者女仔諗野唔同，我鍾意今場唔係開場band甲＞開場band乙＞主角出場＞玩完感觸幾句＞有緣再會，而好似大演唱會嘉賓中間至出場再同headliner玩玩crossover，更能突出全晚係一場紀念樂隊出碟之盛事而非單純雜錦gig。不過老實我覺得演出方面有點遜色，若以一隊夾左十年出過無數show之rock band計，Dovey台風同技術仍有待進步空間，鐵樹蘭狀態亦有點失準，全場最穩定反而係同樣第一次睇之AMS。不過Dovey歌妹就真係好好好勁。
其實反而冇諗過真係會咁感觸有成半個鐘喊晒口講感受，又可能女仔唔同啦較感性嘛，如果換著係一班麻甩佬同我講半個鐘耶穌，我肯肯定一巴巴車埋去「屌那星搞show出碟咪搞show出碟囉使唔使咁Ｑ婆媽呀頂你個肺」，不過呢場唔會啦你講多個鐘我都唔會介意，鬼叫靚女大晒咩，咪講左囉我買飛入場目及女嗟黎聽歌咩。
至於隻碟，或者因為今場live唔算玩得好好，返屋企聽碟先聽得出真章，作曲編曲器樂錄音都相當成熟，比絕大部份聽過之同類型獨立樂隊甚至主流歌手更好，所以更加感慨，一隊band創作表演有如此質素，居然都可以要捱十年至叫做有一番成就，有冇搞錯？不過有兩個問題：一係好歌唔少（我覺得後半隻碟先至真正反映到樂隊音樂性格），但缺少好特別好突出曲目，畢竟歌路本身已有一定局限。最與別不同自然係《花影重來》，作為放全碟最後首「隱藏曲目」（其實點解隻碟會完全唔提呢首主題曲存在咁故弄玄虛呢），創作概念同感覺明顯同其他歌唔同indie氣息亦最重，只份氣氛建立得非常出色，點知唱到最後一句突然急停，就令高潮變成反高潮，因為到呢一刻首歌感覺係只完結一章而唔係整體完結，跟住再接一段post-rock式純演奏outro作為全曲同全碟結尾更適合，而家唱完就冇，只覺浪費左個編曲，聽落好似仲係首demo未寫好一樣。（會唔會正因為噉所以名都冇出呢）
而第二個問題呢．．．當你以為逆流好鬼靚果個digipak已經叫做惡搞，點知一pak還有一pak煩膠，《花影重來》音樂是正的，只係個包裝實在一頭霧水，會拍埋片教你點樣開盒已經知道有幾誇張啦，拎隻碟出黎已經整到個盒爛爛地，點知收返埋果野先至係真正挑戰，最弊成個盒卡紙黎size又大過CD盒少少放都唔知點放好，真係開一次就（受）夠。呢隻碟你可以話係一件收藏品多過一張唱片。我同意聽與視覺俱存係獨立藝術精神一部份，只係而家買indie band CD幾乎已經搵唔到仲會用CD盒之唱片通通變晒digipak，而且好少正正經經必定花臣多多，樂隊對唱片包裝追求，已經開始出現當年Twins時代主流唱片公司追求華多於實份心態。希望各位樂隊仁兄高抬貴手，出碟簡簡單單就算唔好搞到個包裝好似玩扭計骰噉啦，我聽歌架咋。
是日重點唔係我點樣接到call六點鐘起身同大班學生哥加成班帶住大袋細袋去旺角搭火車上羅湖的阿婆搶頭班巴士出去美孚個客個倉趕正式開倉之前去到做system check跟住俾人祝我愚人節快樂。而係前幾日報紙講有條友將自己架貨車改成結婚花車，估唔到今日會係個倉見到，而且佢結完婚之後仲繼續開住架花車開工畫都唔鬼拆。老實，真係（柒到）唔識欣賞。
如果係垃圾佬將架垃圾車變做花車再開住架紅噹蕩垃圾車四圍收垃圾，先至係霸氣。
唔知編劇同導演係咪睇美漫睇上腦，呢兩集《我和殭屍有個約會》玩時光倒流六十年，講六十年前後兩個時空點樣互相影響、今日牽一髮點樣動昨日全身，拍到出黎真係好美漫feel，不過劇力非常之強緊張刺激有自己一套，打戲好Matrix但係套劇要早Matrix一年出街，仲肯落本買首張學友做插曲，呢幾年睇港產劇《天與地》大結局之外，就只得今晚《我和殭屍有個約會》第23集會覺得好震撼睇電視好似睇緊戲，真係值得十二點半重播睇多一次。播到三分二已經咁有迫力，更加期待黎緊兩個禮拜結局篇可以有幾精彩。
如果而家無線都肯咁認真去寫劇本去製作去投資，我都肯轉返去翡翠台捧場，可惜頭先放工買飯食時坐低睇左而家無記八點半果套，兩個字入面就係睇一條仔同一條女點樣互send Whatsapp，柒到連食緊飯班師奶都屌佢地老母做乜鳩，就知道一日王維基開唔到台，想開電視睇港劇又唔使半個字就熄得機，只得返歲月留聲台一個選擇。
去阿信屋買薯片食，送左張電影節coupon，四月中之前去睇戲有九折。今晚用黎睇《美國隊長2》3D版．．．就笨柒啦。識睇一定係星期日朝早去豪華睇$15歡樂早場時用。
本來打算下星期二先睇《美國隊長2》，點知晨早要落土瓜灣個場開工，就順便行埋出紅磡寶石睇十二點場。或者因為第一集唔多掂所以冇期望，同埋old-school派的寶石戲院3D版都只收$50仲借埋眼鏡間院又大（只係同一樣係old-school的豪華相同音響唔多掂），睇完雖然覺得只叫好過第一集少少，夾埋叫收貨啦，同應該叫Avengers + Iron Man 1&3之外Marvel自家電影入面最好一套架喇。
或者Marvel擺到明只谷Iron Man同Black Widow兩個，明明美國隊長先至係主角，電影入面搞到茄喱啡都不如，自己套戲拍到成套特攝片劇場版噉，Avengers入面少左佢你都唔會點樣覺，冇睇漫畫更唔會知原來佢至係Avengers大佬，鬼叫又唔係女又冇超能力咩。第一集冇入戲院睇亦好彩冇，如果第二集trailer唔係咁勁應該都係等電視播or搭飛機時睇算，今集似乎終於捉到美國隊長應該走咩路線，唔係特攝動作片，而講返一個聽命於政府之非超能人點樣面對政治現實。本來二戰時代人物穿越六十年點樣融入現代個主題拍拍下冇左回事都算，今集想拍正傳Earth 616式正氣英雄黎到Ultimate一切式務實為先時代，其實撞正斯諾登事件拍特務組織監控世界故事襯到絕，好可惜拍唔出應有之警世，到頭來變返典型大場面動作片，劇本依然薄弱、橋依然係為扭而扭、Helicarrier同Avengers入面一樣只負責俾人炸、S.H.I.E.L.D.明明有最高科技最多人才點知仲廢過新版占士邦入面個MI6、搞到S.H.I.E.L.D.咁廢你叫fans們情何以堪呢。
另一個大問題係副題叫The Winter Soldier，但其實成套戲都唔多關Winter Soldier事，絕對唔係稱得上能擔當副題之重點。而且原著Winter Solder出場舖排係一絕，即係未睇過第一集同漫畫都未必估唔到佢真正身份，只係漫畫入面係除左隊長自己人人都知但冇人敢講，到揭曉真正身份一刻先帶得出果份震撼，不過電影版邊得閒同你搞咁多野呀，結果公開身份一段變返cliche到爆完全冇劇力。套戲索性叫做Captain America: Fall of S.H.I.E.L.D.或者Captain America & Black Widow仲好啦。
好係作為動作片打得好左好多。第一集美國隊長俾人打多過打人動作又唔靚，飛盾絕招差唔多唔用仲要飛出去唔識彈黎彈去，點睇都似條雜卒多過超級士兵，加埋CG好鬼流搞到勁重特攝feel唔夠荷里活大片格調，今集睇完起碼會諗「導演終於記得俾錢請武指喇喎。」Nick Fury飛車中伏、美國隊長電梯入面一個打十個同公路打戰機好精彩（雖然我唔明公路上面架戰機一直向後飛，佢個盾飛得咁慢點樣可以快到追得上架機．．．），不過美國隊長依然係最雞果個仍然係任何一個大角色都好打過佢，Winter Soldier同Black Widow打得好勁連Falcon得飛黎飛去都拍得好睇，隊長呢你記得最多都係佢點樣俾人打，成日都中伏都俾人打到，超級士兵喎．．．
我只有話，純粹想簡簡單單睇一套大製作動作片，《美國隊長2》睇得過，大場面真係拍得好，底線係好過第一集，只係有要求又怕中伏的話，或者學我去睇兩次都仲平過去其他地方睇一次的寶石睇算啦。入場前後睇左幾次《X-Men: Days of Future Pass》trailer，更深刻感受到，呢一套先係真正美漫迷今年最想睇之重頭戲。而《Days of Future Pass》之後一定會到更灰更激之《Age of Apocalypse》。開始為Marvel黎緊MCU Phase 3擔心，或者要開始考慮拍Black Widow solo了，哈
（between，講起X-Men，一定要睇片尾第一條「隱藏」片。Marvel Studios版Quicksilver同Scarlet Witch真係名乎其實地樣衰到冇朋友．．．）
呢兩集《我和殭屍有個約會》講李嘉誠撤資搞到全香港陷家剷人人冇工開，十幾年後今日重播時撞著現實中的李嘉誠都撤緊資，幾應景丫，證明我地就黎陷家剷架喇。
返九龍灣office時，就好似菜街寬頻仔加黃金砌機仔合體，專做擔擔抬抬粗重跑腿立雜野；過尖沙咀坐Sony時，就似返個專業（好似係）IT人，負責測試系統寫報告做文件。不過坐呢一邊一坐就真係由朝坐到尾，反而係附近幾個場出事令我做返老本行走黎走去送貨執漏時，先至叫有得出去走走抖一抖。
唔係落地鐵站見到燈箱話《紅Van》星期四上畫，可能本書會繼續擺到暑假至開黎睇。前晚臨訓開始，比想像中易睇同短，第一晚兩個半鐘睇左三份二，第二晚再個半鐘完上集，癮起立即電話上網追埋下集，睇到Episode 37四點幾先訓，今朝起身繼續追晒最後四章，返工一面做野一面睇（真仆街），前後七個鐘左右啦，終於俾我睇晒呢部新一代港產科幻神作。
必好多人認同，但我本身係港產科幻迷睇衛斯理原振俠畢華流大，所以對有香港特色之科幻小說特別有情意結，而《紅Van》單個名已經知道地道得冇得更地道，睇左頭五章我已經知道呢本一定係我最鍾意小說之一，文筆舖排同氣氛神得黎好有親切感。去到後半係有點失控，不過未至於好似好多人所講咁爛，或者同《Gantz》一樣，你連載時逐回追會覺得作者諗唔到點寫而死拖爛拖，但等出晒之後一氣呵成睇都係好緊張，白粉友呢個角色真係正到仆街，拍埋小巴司機唱雙簧簡直一撚流，感覺係香港版《Lost》：前設吸引、演譯精警、劇情緊湊、驚喜不斷、氣氛一流，不過掟左萬幾個彎掟到作者自己都lost晒開始唔知應該點繼續落去，個頭開得真係太大而且跟住一直加新伏線越玩越癲，好在最後都叫兜到同我都接受到，但差在手法，要特登寫成章畫外音直接開估仲要臨尾煞有介事加一句「以上就是謎底」，格調立即由JJ Abrams level急跌到王晶級數，要一次過解晒幾個謎，都可以有更好方法，唔一定要一篇文踢爆就算咁求祈卦。同最後係咪代表主角終於脫離紅Van殺局，但做咁多野香港都係復活唔到、主角一班都係輸左、日本仔仍然係贏家呢？
只有話唔係好似好多人所講咁差咁爛尾，雖然就真係仲有bug同劇情冇交代清楚，好似小學同學呢個角色實在加得好夾硬，阿信死而復生仲走返出去取代埋主角身份然後電話入面講到點樣勁仲話「有點唔對路」，跟住冇左件事好似完全冇發生過完全唔重要。臨尾全部敵人突然死晒，邊個人邊度開槍唔知，到頭來個系統有幾重要幾強勁表達唔到。不過我已經好滿足架喇，小說出到下集會買埋同刨多次，而套戲希望上畫正日就可以入場睇啦。（應該好難，果晚係今個星期最後一日坐Sony，照計好夜先放到工）
若要數最大最大果個bug，唔係日本仔居然可以當中國冇到直入香港搞三搞四，而係當大陸／港共政府要係香港整一個監控系統，點會俾你用外國名，而唔迫你改個娘到爆的大陸名／搵唔知邊個中國神話人物命名咁柒？
雖然本身都唔係點樣期待，《紅van》電影版仍然幾失望。林雪李燦森真係無敵絕配，Janice Man完全唔識做戲但好鬼正（一齊出道但紅果個反而係Angelababy唔係佢就幾灰，跟黎明丫拿抵死啦），有笑位度得好（寓意是好但講政治位實際上加得好夾硬），結局雨中小巴一段十分蒼涼，但就係咁多。
片頭拍得幾正但一入主題曲入得完全唔夾仲要剪到好鬼差首歌又唔掂已經出事，導得好差乜都狂飛步伐亂晒，trailer份氣氛同緊張完全搵唔到，《Space Oddity》由一絕變成一柒，特技可能而家ETV做得仲真仲好睇，茶餐廳公審更加係戇鳩地浪費時間。開頭好睇、林雪好笑、臨尾紅雨紅van果段感情好正，可惜中間強差人意，後段仲要編同演都越變越cult片格唔知做乜鳩，同埋，係，查實套戲係完全冇結尾，同《寒戰》一樣擺明得個局謎呢下集肯俾錢睇咪知囉，而如果你係睇過原著至入場會仲大鑊，成套故事同人物都改到仆街，唯一100%忠於原著只得小巴司機，林雪甚至做得更正，李燦森白粉佬都好笑不過仲差少少至夠原著個鬥。唔好再聽我鳩up，聽聽坐我後面兩個鬼佬點評：我同佢地一齊坐到最尾，字幕出時兩個鬼佬勁屌，屌套戲一時想做呢樣，一時又想做果樣，亂晒大龍，高不成低不就。如果唔拍到咁cult而肯正經拍，唔使由頭到尾都係結局咁滄桑，拍得出trailer隻feel已經夠晒。
其實我從未完整睇過陳果任何一套戲，不過睇完《紅van》，反而興幸自己以前冇睇過。《紅van 2》應該會係我最後一套會睇的陳果戲。不過有一樣野又一定要抱不平。唔明套戲點解三級？你話姦屍的話，上次黎九展睇戲係《300: Rise of the Empire》，頭兩個字已經激過晒《紅van》全套兩個鐘啦，點解又唔使三級呢？
向來唔識飲咖啡，唯一會飲係Pokka罐裝，因為奶味重過咖啡味完全唔係咖啡，由細到大都好鍾意飲，Pokka就係咖啡界的汽水。大個左更加珍惜，因為四洲開始沒落，細個時都仲話電視睇到Pokka咖啡廣告，大個想飲罐裝好多地方只搵得到雀巢之類大牌子，但當OK一罐雀巢250ml可以賣到九個半，另一個選擇係俾多一兩蚊買日本同台灣牌子枝裝，就體會到便利店霸權壓迫有幾深。有一段時間七仔枝裝奶茶咖啡大劈價$7.5一枝，點知減得一個星期就完，好在俾我搵到屋企附近有間士多，買野食價錢普通但野飲非常平，Pokka咖啡350ml只賣$5罐，行過幾間舖七仔已經係雙倍價錢，老闆娘話所以附近做七仔做OK班人都私底下過黎入貨，梗係啦佢地自己問公司拎貨個價可能已經七八蚊。
可惜我知道呢間士多時已經係最後Ｎ天，之後會搬過紅磡，立即臨尾幾日落去掃兩箱返屋企慢慢飲 － 其實都唔慢，買到返屋企老豆老母立即醒水，我唔飲佢地都每人每日最少飲一罐，四十八罐其實捱唔到幾耐。所以好快又要補貨，但係當連土瓜灣都係執一間士多就多一間金舖找換店時，唔好叫我走到出紅磡抬幾十罐咖啡返屋企呀。想平平地飲罐咖啡嗟，點解都咁難？
金像獎結果塵埃落定，特以此Nevermore版《The Sound of Silence》，向時不他與的《激戰》致敬。
對耳筒無端端右邊冇聲，知唔知我幾驚，呢對Denon C360已經變成絕版架喇大佬，可能大家都收到風停左產所以街貨已經俾人掃晒，壞左拎去整亦只會直接換對上一級賣接近五舊水的C452俾你，搞到我有點後悔上次上雅蘭Denon寫字樓知道斷貨之後冇立即過對面馬路星際城市有幾多掃幾多，除左$280買返黎有得自動升級變相每對平二百蚊，仲有C360隻聲真係唔知邊度搵得返。
C452大隻好多，output勁聲底厚低音出，問題係我聽metal鍾意高音推盡，中音普通水平低音推高少少就可以，一來突出旋律、二來音牆平均、三來太偏中低音好易朦同拆，而300-400價位耳筒黎講，C360樂器定位同音色就最接近我要求。好可惜唔知點解耳筒廠硬係鍾意鬥低音，試左兩個月仍然未聽得慣C452全部樂器拆到好散再將鼓聲推到好出種音響效果，更大問題係而家十對耳筒九對都鍾意呢種重低音排位方式。
好在最後試到原來對耳筒冇事，只係條延長線壞左，即係用左十幾年耳筒，壞延長線我都係第一次遇到。噉就好喇，之前買落好多對次次都只係用耳筒，後備延長線我應該成櫃桶都係，不過呢對最後的C360壞埋就真係冇架喇，希望佢長命百歲啦，呢對都冇埋就唔知仲邊度搵得到合晒我合尺之metal耳筒。
（不過可能C360搞到停產正因用料太劣，以前一對起碼用一年／一過保養先壞醒到爆，近兩年都係用一對三四個月就打柴，我呢對新年開始用，應該都差唔多時候，似乎可以摷返八月就過期張保養單擺落袋跟身，隨時準備過雅蘭換多對C452架喇．．．）
若「Fleshgod Apocalypse太流行了！」就聽聽來自希臘的交響死金教父Septicflesh最新單曲《Order of Dracul》。新專輯似乎會很不錯。
If "Fleshgod Apocalypse is too POP!" sounds true to you, try out this new track "Order of Dracul" by the symphonic death metal godfathers Septicflesh. Promising, it sounds.