都好耐未試過一日開餐開得咁豐富。
似乎今日同芝士真係好有緣，起身返到公司，已經食芝士食到黐線。

「你醒醒定定同我食左佢！」
一返到公司，即時收到會計靚女威嚇。原來整左劉Sir最鍾意食的餐肉三文治。
劉Sir的早餐一向係靚女包辦，我都大半年未試過返工時自己俾錢食早餐。
「食咪食！有幾激呀？」
一開：

「使唔使咁多呀？？？？？？」
麵包＞芝士＞三塊餐肉＞芝士＞麵包，未食齋望都已經滯。
「我自己果塊都係得兩塊餐肉咋！見係你果舊特登加多塊落去俾你！」
嘩。正。一Ｘ流。

早餐已經食到飽飽，嘩塊三文治真係正到爆。點知晏晝仲精彩。

我自己叫果個，係左下個焗粟米芝士火腿雞絲意粉。右下係卡邦尼芝士汁雞扒飯。
「點解盒飯咁得意？」
盒飯其實唔係我係會計靚女叫，但佢ｄ飯即係我ｄ飯啦！各位女同事叫親飯，
往往有60%歸我，假使唔係全盒俾晒我的話（劉Sir的職責就係幫各位女同事減肥），
噉靚女自己食飯都要個盒裝，所以六四分盒，盒飯分身家噉分法，噉咪大家都有盒食飯囉。
至於上面個豬扒擔擔麵，唔係我係經理食，見有位擺埋黎裝飾遮，
雖然到開飯果時，塊豬扒都係有一半俾劉Sir勒索左去（如此事態發展冇人感到意外，經理又點？）。
食緊時其他同事再呈上之貢品就篇幅所限未能盡錄。劉Sir一餐lunch，都唔係好多遮。

lunch趙完晏覺訓飽，訓醒起身第一件事除左去廁所（吞pop），就梗係繼續摷野食啦。
是日唯二冇芝士就係兩劑甜品。

窩氏雪糕從來唔鍾意，冇口感又唔夠味，但前排落超市見有新雪糕又減價做promote執左盒試試。
買之前冇諗過咩黎，只見係朱古力個樣又幾過癮加上新出就試試，但食過返尋味，
一盒六條每條三粒，脆皮朱古力包朱古力雪糕仲要超濃味，都只係十八蚊左右，抵！
最重要係容易食嘛，乜都唔使搞掟入口就得，完全係連食野趙多啖都懶的劉Sir首選！
窩氏終於有出品似番ｄ樣！（不過當一變番正價廿幾三十蚊盒就會扮晒野唔買了）

自不然唔少得我的最愛雪夾糕，一包十件裝要賤賣到$9.9真係灰到爆，但灰完之後越食越開心，
超好食得黎而家仲要平成噉喎！一唔覺意噉又搞掂左一包！

「又黎？」
冇錯。今日冇芝士入口硬係唔聚財。再多個焗粟米芝士火腿雞絲意粉。
「點解有咁多？」
多謝各位女同事啦。叫就好多人叫，但叫到返黎「不如兩／三個人分一盒食啦」，
分下分下，食完飯之後就會出現多若干盒飯／意粉剩左出黎。
亦即係劉Sir每天的午餐、下午茶、晚餐甚至宵夜都會不缺。例如噉樣：

你的反應已經係
「．．．．．．」
這是真的。今日真係多意粉到，食到夜晚開舖都係食芝士焗意。
但老實講，噉樣一兜意粉，其實真係得好少食唔飽人（「人」＝「劉Sir」），
你如果一次過俾半打我要我一次過食晒，我自信絕對可以。
這是真的。

「今日食得開唔開心？」
開心到喊添啦，真係由朝食到晚餐餐都勁好食，每一餐都回味無窮。
好食，都未止。更正係，今日多好野食成噉直頭食自助餐噉食，
全部都係會計靚女＆公司包晒，我食就食足全日錢一蚊都唔使俾，呵呵。

不過，未完。

「仲有？！？！？！？！？！？」
係呀，就係多到食完一日，第二日仲可以食多餐，lunch微波爐叮叮就食得。
同場加送會計靚女贊助之雞蛋兩隻，名堂叫捉屍雞蛋，點捉法唔知係細隻同好食過一般雞蛋噉囉。
又係正到仆的一餐。不過，未完。盒芝士焗意粉係琴日剩餘物資。噉「今日個lunch」呢？

今日餐牌有焗肉醬意粉，走唔甩。但今日晏晝食緊琴日個意粉，是日午餐變左是日晚餐。
當然，一盒意粉咁大把，又邊度夠？

「咁快就食完？仲有一盒？」
冇。第一盒我都未食，立即開埋女同事貢獻的第二盒，因為．．．

我覺得兩盒一齊食，會食得滿足ｄ。
「到底劉Sir一餐可以食幾多盒意粉？」
「你俾幾多盒佢，佢咪食幾多盒囉！」