想開開心心慶祝生日，梗要去最old-school的豪華戲院睇《低俗喜劇》啦。記得對上一套真心想睇、真係覺得好笑好睇的港產喜劇係邊套嘛？九十年代打後真係數唔到幾多，《化骨龍與千年蟲》之後（剛剛好九十年代最後一年出，個人心目中非無厘頭類本土喜劇代表作之一也），第一套《買兇拍人》，第二套《打擂台》，第三套就係《低俗喜劇》。

其實好反智，以前《人肉叉燒包》、《伊波拉病毒》劈死你班仆街陷街產做雞包仔再屌生豬肉果隻先算三級，三十年後今日的三級呢係你講一個屌字已經包容唔到，所以《低俗喜劇》諗得絕就係就呢一點反智玩到反轉，而且橋段對白度得一撚流唔止粗口咁簡單。而最反智係套戲其實好有深度、真係有意思表達到（雖然部份枝節可有可無，好似薜凱琪+楊千嬅條線除左教識大家「拿西」正寫之外完全冇意思），比好多一／二級片更有教育意義更有反思價值，但因為當今其實普通過普通的粗口而被列作三級，從中諷刺的不止於電影工業更有政府荒謬制度。實在笑到仆街，要立即摷返彭浩翔成名作《買兇拍人》隻DVD出黎重溫先得，仲有同場加映「挑擺明鹹片又要扮矜持」的《喜愛夜蒲2》同「拿一開波就幾對波冇遮冇掩飛埋黎呢ｄ先係戲嘛」的《一路向西》trailer，黎緊唔使歡樂早場都夠晒理由再黎幫襯豪華。不過，點解今晚冇Dada帶埋爆炸糖黎謝我票？搞到我今年生日好唔快樂囉。

仲有段非常過癮的小插曲。話說開場前去個廁所，有條友應該廁格爆緊石，有人打俾佢，一接電話已經「你邊撚個呀？」威到震。點知聽左冇耐已經霸氣盡失，「呀原來係豪哥！」立即非常客氣sa晒lum認契弟，「其實我一路想搵你架，不過我唔見左你電話呀！唔好意思呀真係唔好意思呀！」唔好意思左無數次，唔係驚佢衝出黎劈鳩我實大大聲笑出黎。唔講以為彭浩翔又開新戲黎左豪華男廁取景。

冇得唔多謝八三三各位朋友睇完戲之後請劉Sir食飯啦騎騎。重點不是海港正到喊的燒鵝、雞翼同煲仔飯，而係歐陽太贊助的Angry Bird蛋糕。大家識左十二年，終於肯送生日蛋糕呢咩。

事實是今餐有蛋糕，因為最想食果個其實係歐陽太自己。大家應該睇睇蛋糕登場時阿嫂比劉Sir興奮無限倍的反應。

今堂愚民教育教大家甚麼是「人類總要重複同樣的錯誤」。話說每年暑假尾聲總會襯開學前食餐飯，唔知點解日子往往揀劉Sir生日前後，而劉Sir除左黑仔另一出名係厚顏無恥，出到黎梗扮晒野「真係好喇你地知我生日咁有心請我食飯」。今年呢禮拜頭收到電話約食飯睇戲，就約星期五正日啦又居然咁順攤應承喎，以為大家終於認命知道避唔開呢一劫or真係咁有心想同我慶祝生日，原來又係唔記得我幾時生日自投羅網，中左咁多年伏都仲未學精。嗟好在。

「話時話，同個遲來的蛋糕一樣，呢張係我地八三三十二年黎第一張公開合照。」

這個生日的得著，是1) 憤怒鳥蛋糕真不錯。阿歐陽太反正你自己都想食，下次我要黑色唔該。 2) 返到屋企立即上Facebook隱藏自己生日日子先，然後每日起身第一件事睇定各位朋友幾時生日，前七後七唔聽電話唔蒲頭。