今年生日相當特別，經過五年日夜兩份工一星期做足七日生涯，終於半踏出香港metal界。上年同前年甚至再之前都舖頭過生日真正寓工作於娛樂，難得今次歷史性能夠隨心所欲，向來冇乜節目氣氛的我都出去玩左幾晚。

「認真投身本地metal界工作，付出與回報常成極大反比，自由是一份奢侈品。」

冇特別約定，生日幾日前紅燈山丘中聚會突然而來，就係咁巧合。今餐地點係尖沙咀請進洞，英文名Please Enter Cave，係一間玩山洞穴居人feel的主題餐廳。（記得劉Sir講ｄ野從來唔好信）

其實係食韓燒。有錢人家果然唔同ｄ，校花又會搭上搭識著間野個老細，作為號召人請進洞順理成章啦。我食野一向寒酸，韓燒的話東大門百四蚊已經係極限，所以要食飯旺角甚至更舊的大角咀長沙灣同自己地頭九龍城已經夠晒，自己一個就算出尖沙咀，最盡只會食Murder King（．．．），不過確是物有所值單牛仔骨一味已經夠晒食個唔停，加埋呃到ｄ免費野食，夾埋同食東大門差唔多唔算太貴，最緊要小二們的服務態度拍得住皆旺斜對面以奇寸揚名之極端魚蛋粉，最後玩到要拎餐具要茶要水自己出手咁自助。

食完飯仲有happy hour。通常唱K之類，行下行下去左諾士佛臺，到今晚先知原來九龍都有蘭桂坊。習慣深居淺出，除左睇show唔太鍾意人多嘈雜地方，加上唔煙唔酒使費又大，咁多年黎冇乜邊次正式落過吧，大隊中得我一個唔屬於酒吧文化同唔飲酒，十分樣衰。

今晚開左三樣酒，左邊果枝唔關我事，各位同學係噉飲連開幾枝，右面就係大佬枝Corona。中間杯紅色野歸我。落到酒吧，啤酒姐姐行埋黎問你飲乜野酒，同佢講「俾杯橙汁我唔該」會瘀到喊，唯有不斷地睇餐牌，睇得好辛苦由頭到尾睇幾次都搵唔到有乜野我飲得到，兩個字先揀到野飲，但到頭來，都唔係酒，而係：

薑+蘋果+檸檬+提子四種果汁大雜匯而成的偽酒Pac Man，唔好問我我都唔知點解食鬼會係紅色，為左試下乜野係apple jiuce至特登整番杯咋！冇計始終唔識飲酒＆唔明酒有乜好飲，又冇維他奶同阿華田（．．．），最後飲果汁算。結果係．．．酸到爆。受罪噉款先飲得晒。我都係唔適合落酒吧。

「作為CORONER忠實fans，或者我應該叫枝Corona。」

唔慣落酒吧區之餘其實唔多慣出街出得太夜，不過聚會唔係成日有又多人出黎玩玩無妨，只係下次揀第二朝唔使早起身ｄ日子黎搞唔該，全場得我一個星期六朝早要返工，玩左成晚搞到第二朝遲左大到。聚會人數好似一次比一次多，有冇可能一次成功約到晒全部人出黎？要叫得齊十幾個人難度太高，同又要諗去邊度食乜有咩搞。

「今年係文曲星戰隊十週年，一不齊人，二最後冇玩cosplay慶祝，是兩個美中不足。」

落吧玩到夜，返工遲左幾個字到（不過平時都唔係好得好多），本身星期六返工已經冇心情做野，之前一晚噉玩法更加支力，渾渾噩噩過左半日，放工就開心了，呢個禮拜六日已經有晒節目：

九展耐唔耐就搞玩具節，不過近兩年多野做，對上去已經係兩年前聖誕同暑假。因為冇乜時間玩，成年冇去行玩具節，我連兩年前買落ｄ野都未開．．．今次破戒除左生日前夕冇乜野玩，仲有107去擺檔，有得呃參展商證一連兩日免費入場，入黎睇有冇平貨執順便睇下野玩玩。準時一點放工出發，呢個時間至入九展就梗要做埋外賣仔啦，都唔知咩事成座德福塞滿晒人，去KFC買個雞餐用左差唔多半個鐘時間，到車站等穿梭巴士先死，離遠望埋去只見到人見唔到牆，去九展架穿梭巴士條龍兜左幾個圈，龍尾排到去隔籬大廈入面直頭搵唔到，大廈外面已經有過百人排隊，點爭？想折衷的士都唔掂，的士條隊排左三十幾個人。如此盛況十幾年黎第一次見。需知呢日係全年最熱其中一日，大廈地下巴士站焗埋焗埋四十度都有，當堂灰爆分分鐘我一個人坐低食晒桶雞都未上到車。好在呢個時候，救星七刀同學準時出現。九展去得多，不過從未試過亦唔識由德福行過去，好在有佢及時出現帶路，唔係我都唔知道點算。三十四五度抽住桶雞行差唔多半個鐘，好在未中暑，去到九展門口先勁，幾百人排隊，入到去同樣萬人空巷。後來先知原因有二。原來同玩具節同期今明兩日，毅進黎左九展開招生會，報紙話齋今日星期六，半日已經有萬二人黎左，遲黎者要排六個鐘隊，咁熱日子先黎噉樣搞法，真是苦了各位學生家長，最慘如此慘情景況年年暑假都見到，更灰就算俾你排到隊入到去報到名，除左每年交五六萬學費，係咪真係有用？

「信和二手檔名句『毅進貴學廢，剪翅難高飛』，聽過未？」

另一多人原來今日大堂有活動，唔知咩節目只知幾樣野：1) 親子活動黎　2) 台上有兩個靚姐姐帶住幾位小朋友比賽煮野似　3) 其中一個靚女係龔嘉欣。就要企定睇睇了。無線益廢，已經冇多少理由去睇or支持，Katy是難得之一，得閒無事都會開電視睇無記兒童節目同《東張西望》撞撞佢，好可惜去到九展個活動已經差唔多完，立即上樓問107借部大相機落去都趕唔切，唔係可以俾大家睇睇而家的「親子節目」有幾親子。我知天時熱吊帶背心短褲，不過兩位靚女正面睇，好似只著條住圍裙其他乜衫都冇著，要同小朋友整野食自不然有更多摀低身動作。而家連本是應酬老豆老母的細路整野食環節都搞到《美女廚房》噉，仲有Katy姐姐陪住，新一代小朋友真是幸福呀∼

呢個就係今次玩具節107個檔口，細細個都間拆開成兩檔，除左107散貨，仲有伙人夾份一齊租賣公仔相架，即係好似掛背囊同電話繩果種公仔四寸大左右，即場同你影張相，print出黎再用一個十分暴力的方法吹脹張相整到你個樣變成立體半球形（十分death metal次次睇我都覺得好high），再攝入個公仔頭入面，原價$120，會場價買一送一即係買一隻變一對，都幾受歡迎特別係老豆老母帶仔女黎買，不過我覺得好似落降頭ｄ巫毒公仔好鬼邪釘，本來諗住屈人地送隻俾我當生日禮物都算數。因為檔口位置揀正出口隔籬，全世界走果陣一定經過，先知原來好多客都有黎玩具節，連有對耐唔耐蒲頭幫襯開的日本人都見到。佔盡地利，冇人逃得過劉Sir法眼：

「咁多錢黎玩具節？有冇上TRHK買碟？29/8禮拜六場TMF4買左飛未？」

不過大家又何嘗放劉Sir在眼內？曾幾何時的TRHK掌櫃，如今「淪落」到玩具節賣玩具，一點都不metal。

「你都有今日喇！」

十分無奈，檔都唔睇，出左去行，又見到梁榮忠，玩具節實有佢份擺檔咁滯，繼兩年前完美GP03，睇黎佢仲有唔少存貨待售。大家錯過左今年唔緊要，相信黎緊仲有大把機會。不過作為一個演員，居然有咁多時間擺檔賣玩具，都幾唏噓。

場中間大片空地，主辦單位搞左個簽名區。驟眼睇相信冇人知道一人三鬼來頭為何，不過兩日黎主辦單位為佢地搞左唔少節目，俾大家認識（或最少知道）一下佢地。

圖中左邊位叫Mark Ryan，幫變形金剛電影版大黃蜂同Jetfire配音，佢唔講我都唔知道原來大黃蜂兩套戲夾埋得一句正式對白咁大把都要搵人配音咁神奇，最應景每次佢出場時場館都會播LINKIN PARK贈慶一番。中間位係星戰設計師，而右手邊係邦女郎，我講得出名的邦女郎我只識楊紫瓊一個，加埋你睇佢都知唔會係近幾年占士邦電影女主角，主持話佢演出果套係1989年《Licence to Kill》，即係．．．唔識。

同場仲有位日本女聲優，向來唔追日本野更加唔迷聲優，聽完主持介紹都唔知咩料，不過相信唔係多人識果種，佢自己有個攤位賣碟，除左間有人搵佢影相同吹水，唔覺有多少人幫襯。即場表演唱左幾句．．．其實本來有興趣買佢隻碟。

這才是是日重點。大會重點宣傳的嘉賓栗原瞳小姐，一連兩日派mouse pad俾大家再開簽名會。當然我又講唔到你聽佢有幾勁，聽107講，原來佢拍過唔少特攝片。專做妖怪皇后做魔女果ｄ。當堂

「．．．．．．」

本來話五點上台講野加開簽名會，但遲左差唔多成個鐘先出場。勁多人圍觀，想行近個台好難，跟住主持同佢做個簡短訪問，的確夠晒簡單，佢中文問條簡單問題，日文回答細聲到差唔多聽唔到，跟住主持就話「頭先佢話呢噉噉噉噉噉噉」，幾條問題就玩完。相當求祈。冇相干啦，正所謂醉翁之意．．．

都係志在埋身握個手影張相簽個名嗟。唔少fans捧場架睇黎十分出名，仲有免費mouse pad派俾大家人頭湧湧架。不過會場賤在一樣野：初時乜禮物乜活動全部免費，但後來見多人，立即吊高黎賣「簽一次名一舊水」。我諗就算fans都唔會個個肯啦下嘩，一百蚊個簽名？

其實會場今次嘉賓安排錯誤多多。headliner的栗原瞳有理由，其他一人三鬼真係唔知點解請佢地黎。老實講，99%香港人從來只關注日本流行文化同台前，請美國人黎仲要請唔出名之幕後，試問有幾多人會理？正如星球大戰香港多人鍾意，但大家只為睇戲買公仔，邊個會關心畫公仔果個？變形金剛當紅，但搵個配音員黎，都只有最忠實fans先會關心。三人中唯一台前邦女郎直頭唔夾，就算話《License to Kill》二十週年所以搞個巡迴簽名會（卦，我估咋），冇人識都算，呢度係玩具節唔係電影節，而且入得場都係後生根本脫節，佢擺檔咁耐我未見過有人搵過佢。當然三個人照樣開價一百蚊一張簽名相／簽名原畫都係趕客原因，對斤斤計較又名氣行先的香港人黎講太貴重，唔知佢地兩日夾埋賺到幾多？都係坐足成日冇野做的Mark Ryan相信是最多人（或有人？）幫襯的了。

最灰節目表話三位外國朋友會有訪問時段，點知請佢地上台講幾句野再負責抽獎就落左台，Mark Ryan之前搞左個Jetfire tribute比賽，原定玩具節宣佈比賽結果，最後當然冇左回事，連訪問都冇，個比賽根本唔關香港＆香港人事，自己返美國搞掂佢啦。主持仲話佢地三個專誠由美國飛黎香港，見帶埋幾個細路，可能係一家大細黎旅行？唔知主辦單位有冇俾戲金佢地，不過會安排佢地出席呢個活動，可見根本唔明白本地文化，你睇三位外國朋友訪問時段被犧牲，除左根本冇人會理，仲因為要讓路俾石森章太郎討論會就知。

餘下位女聲優市場反應冇咁差，一來囡囡二來日本三來後生，總間中有人上前兜搭，而且三隻鬼賣相佢賣碟，起碼平人地（「鬼地」？）廿蚊又有得聽實際過張相，即使我唔識佢，開頭都打算買隻碟當支持，始終一場黎到點都要買番件紀念品嘛，但後來都係打消念頭，原因睇番上面啦。相信佢都係當順便黎香港旅行架喇，唔知成個攤位夾埋會場投資左幾多？不過老老實實，你用同一舊錢請多個多ｄ人識的日本妹黎，就算唔表演齋上台吹吹水玩少少遊戲俾大家影下相，觀眾反應絕對好過而家一人三鬼夾埋無限倍。都係日本妹好。

「講開囡囡，107，又話今次玩節具有夏之盛放？聽到你噉講我先至黎今次玩具節咋！被玩添！」

雖講經濟點差，入黎大半人都捨得使錢，豪起上黎一次使幾千唔覺咩一回事，但後勁不繼最後幾個鐘冇乜人（well，基本上全日我乜野都冇做過齋行齋玩），輕輕鬆鬆到八點收工，全日第一次要用腦：

「夜晚食乜好？？」

九龍灣呢頭我只識食麥記同雞記（．．．），最後大家搭順風車出九龍城食大婆牛肉麵。幫襯過一次已經愛上，麵掂得黎我喜愛的雞軟骨十分不錯，衰一樣野：貴。唔係近我屋企肯定成日走過黎食。

「跟住，就一日了。退休的生活，真係好頹。」

放假的日子，就係不停地打機上網睇電視睇戲，生日是個更大的藉口玩過唔停，返到屋企打機打通宵咁滯（講你聽我打緊乜野我驚嚇親你），搞到起身出發已經兩點幾，作為一個失職的外賣仔，去到會場變左食自己。本來打算食麥記，不知何解地多人，反而KFC冇乜人排隊，基於一串光陰一串金道理，結果被迫／又係食雞記（．．．）。其實咁晏先出黎得三四個鐘，加埋今日冇龔嘉欣變左Purple姐姐（前面加個Deep我就會有興趣），又熱喎，留係屋企打多日機好過，但我一心希望最後一日多ｄ節目特登出黎。今年玩具節最求祈就係兩日都搵同一堆嘉賓做同一堆節目，即係琴日睇過的一人三鬼加栗原瞳幾點鐘上台做乜今日由頭到尾翻炒一次，我見節目表講兩日都有訪問時段，以為琴日因為要講石森章太郎，所以冇時間訪問兩個鬼佬啦？第二日都係冇的。都唔知叫佢地專誠美國飛黎香港做乜，招呼又唔好又冇機會俾人地做環節，我特登出黎想睇星戰設計師同變形金剛配音員訪問咋。搞到對今年玩具節非常失望。

而且無奈空手而回。呢類活動向來是各大商賈散死貨時機，前兩次執到唔少開心貨，廿蚊隻自護仍然津津樂道（雖然到而家仲未開黎玩．．．），照計兩年前即近十年最好市時已經咁平，家陣經濟差各位老細仲唔同大家並抗海嘯？係唔會的，反而仲吊高過兩年前，根本唔係死貨價只是正價，加埋冇乜檔擺真正好野出黎，唔係唔想買野，真係買唔落手，本身正正隔籬果檔有新一輯變形金剛卡通隻暴龍鋼鎖賣$90，全場唯一一隻我覺得真係抵玩，不過去貨勁快跟住見好賣仲加價，最後一日更加見唔到走左寶，以為會有人放出黎的死亡星變黑武士版變形金剛同電影版建造派居然搵極唔見，搞掂今年生日可以慳番唔使買生日禮物俾自己。

琴日冇乜野做，今日啦屎照計更得閒，反而黎到已經做個冇停手地好生意一路有客，到四點幾開始要錢唔要貨廿蚊大清貨，再跟住十蚊件益街坊，全個攤位長期被十幾個人圍住未停過手交錢交貨，頂仲忙過我日頭返工。

「灰！原來黎到要做野！喂107你仲未送生日禮物俾我喎點計先！就整部大力士黎當人工啦！」

過癮在呢種場合主要客路自然係十幾至廿幾男性，加一定引到唔少平時御宅到爆的青少年，可以見到有趣的電車男購物心態。其中一個個案係十蚊大清貨時，有條友行埋黎望左陣聽聽價錢，明顯睇中左幾樣野，不過唔一次過買晒而先買一件，仲要好趕噉拿拿臨俾錢之後拿拿臨拎貨袋都唔要走人，退後到幾米外一個角落執野同待機。等到有其他人埋黎買野，你冇時間精神特別留意佢時，拎定錢的佢 － 舊錢通常係剛剛好唔使找 － 立即高速衝過黎高速完成交錢交貨程序再高速撤離到離遠某位置，如是者重覆幾次，一宗可能只係三四件十蚊貨之簡單買賣都變到複雜晒，寧願多黎幾次花時間等機會，都唔想同其他人講多幾句野。港女絕對撐唔落，不過有時睇見而家香港後生一代男性可以咁婆媽，都不禁為香港前路感到黯然。

一連搏殺個幾鐘有點支力，出去行行街。全場最觸目梗係呢隻巨熊，成個人咁高。想買？擺低幾千蚊先唔該。最煩買左唔知點樣搬番屋企。嫌太大仲有細少少的，都有半個你咁大隻，千五至千八一隻。

「我都知得隻熊仔冇乜野睇架喇，搵同107夾份租攤位賣公仔相架個囡囡promotor做model，大家應該覺得好睇好多。」

始終玩具節只係散貨場，唔多算正式大型動漫活動，cosplay友少入得眼的更罕有，呢隻犬狼屬全場最正。兩日都有佢份四圍行必，最後一日五六點中間簽名區一人三鬼走晒之後（悶嘛大佬．．．真係搵鬼簽咩．．．），去左果度企定定站崗，引黎大批遊人合照同玩。可惜果期玩緊大傾銷走唔甩，臨走先出到去同佢玩．．．

影完相六點幾趕住走，因為今晚買左飛睇《義勇群英》。《變形金剛》一套彈起，任何ACG改編得到立即變身電影版賺番（好多）個錢，《義勇群英》本身已經戰爭片格，不過十幾年都唔拍，到而家大家接受改編電影先黎料，當然要用近未來世界觀同科技更新一下至唔會太兒戲，其實興趣唔算大，因為細個已經覺得套卡通太「益智」了，打仗可以打左幾十集不論正邪一個人都冇死過世界真和平，而導演講到明唔玩深度學足卡通簡簡單單由頭打到尾就拜拜，佢之前ｄ戲出名但唔算拍得好trailer又未算超強，不過既黎到九展可以試埋德福間戲院，有位之餘生日又是個理由，睇埋佢。

「套戲絕對忠於八十年代卡通片，即係拍到出黎相當白痴，不過，都好睇過《變形金剛2》。真灰。」

本住首個自由生日乜都玩精神，做左件十分無聊的事：從來冇文化的我懶藝術地走左去睇「高層次電影」《特務之王》。當然好睇啦我極度鍾意indie萬歲，同行順便執左好多野。玩具節掃唔到平貨，呢晚睇戲九點半場，中間三個半鐘由旺角行去尖沙咀，有見避世一輪metal＆非metal出左好多新碟、復刻，仲有幾套戲想搵DVD，沿途勁行碟舖旺油尖直掃執左大大棟，香港唱片減價區先多驚喜。退休之後冇乜寫過音樂同metal，黎緊慢慢拆碟，多多野寫。

每年生日都有會計靚女整芝士蛋糕當生日蛋糕，今年遲左四日，因為原來船務師奶生日只早我一日（過左咁多年先知，呵），頭半年已經放晒年假的佢見生日俾錢買假都要去韓假玩番個禮拜，為等埋佢一次過慶祝，吊左我幾日癮。佢ｄ芝士蛋糕我成日食，不過今次食落質地味道多同以前，唔同左整法喎。點整？

「清蒸。」

Oh yeah.當堂冇晒野講。估唔到而家fusion菜連芝士蛋糕都有份。定其實食緊馬拉糕？

「講起生日蛋糕，我仍然十分懷念上年Joe姐個超勁朱古力黑森林，食一舊已經滯晒，不過好味。」

噉樣間中出下街、食下野，再匿係屋企打機睇戲，放左個禮拜假，就係五年未試過的自在生日了。好平淡，但對我黎講已經「玩得好勁」。既音樂收左皮，個人都想收一收先。