08劉Sir誕Hardcore大食會
（行動代號：Circle Eat）
主辦單位：EEG
（Extremetal Entertainment Group 極柒金屬聯盟）
Circle Pit，即圍圈跳舞，
是Hardcore演唱會一種信念形體化運動，
參與者於圈內疾走，喻作社會的轉變。
（King Ly Chee，港台節目《聽不到的樂與怒》）
我們都是Hardcore的。話說有一次睇完hardcore show pit完有點肚餓，大家走左去打邊爐，十幾人霸一圍，Circle Eat圍圈食野就在這一天誕生了。這是一種飲食物流化運動，參與者沿檯傳住黎食＆以湯底作為中心圍住黎食，喻作食物無窮無盡食極唔完，從中欣賞本港飲食業者的成就、尊重他們為廣大市民所作貢獻，以顯示我們都是愛香港的Hong Kong Hardcore。
「劉Sir，你唔係聽metal咩，幾時轉左聽Hardcore？」
「你咪理！我話我係Hardcore就係！」
半年前打邊爐之外，對上一次真係一班人出黎玩，已經數到成年前冷誕K。人稱二寶樂之長沙灣市長，有見成班契弟咁耐冇乜聯誼活動，又出街食食得多未試過自己整野食，為了各位市民福祉，決心復興Circle Eat，並法定新一屆Circle Eat大典為10/8劉Sir誕官方指定慶祝活動。以下係市長誓師之詞：
第二屆Circle Eat，就定在劉Sir生日10/8，在皆旺108 TRHK舉行。不過正日未到Circle未Eat，先收禮物。
來自紅燈山丘中也哥的生日禮物。幾年前自資搞左個tee brand ofFREAKso。四年前漫畫節擺檔賣衫我都有去幫手嗌架。結果當然係衰左，因為在香港做乜都好，第一件事，必先要有朵，不過我成日覺得佢應該重出江湖玩custom concept tee。上面件絕版存貨，美國漫畫反英雄式反思。
「但我最想要，都係發人深省之『Break It』。」
差唔多成個月前已經來到的另一件tee。
「阿哥仔唔記得你叫咩名添，只記得你好有文化。」
作為文化工作者，收藏品都有文化有歷史過人。首先黎一件tee，多謝晒我個衣櫃冇幾多件衫唔係黑色，整件藍色返工見客都方便ｄ。
仲有大大個package，唔係禮物，係珍藏分享，其實到左手好耐，不過懶同留番應節，生日而家先拎出黎。有《灣仔之虎》soundtrack，劉以達+韋啟良，香港ambient遺珠。特別在碟上面搵唔到歌名。想知有咩歌，上黎問劉Sir啦。
「佢非常樂意對住你大大聲兜口兜面讀ｄ歌名出黎。」
另外有香港最早期underground band zine地下世界音樂月刊頭三期。出版年份係90年。當時我連metal點串都未識。更加一點都不hardcore。邊似得而家hardcore到Circle Eat咁hardcore。
第三期封面四大天王，打頭陣係相傳香港史上第一隊／唯一一隊作品（錄音帶）能夠出口外國之本地gothic/post-punk band MARTYR，同一期出埋FIELDS OF THE NEPHILIM絕對有意。Stevie Ray冇寫錯，唔係Steve Vai，係Texas Blues傳奇SRV。讀完本野，可以metal、gothic連blues都講埋，包容性幾高？所以執左囉，咁唔大路。
內文仲有寫到90年10月13日高山Mad Screaming，演出單位包括ANODIZE阿龍大，如無錯，當時阿龍大應該仲係Soni時期，而Soni即係「香港SEPULTURA」AZYLUM位Soni，亦即搞TRHK/TMHK位Soni。不過，俱往矣。相信各單位當事人都唔想提起。
第二期專題係嘉士伯流行音樂節，此節屬當年盛事年年大搞，DSC都憑過《武術組曲》同《Apache》拎過獎架。雖稱「流行」，表演單位你唔覺同流行拉得上幾大關係，即係上台玩METALLICA都算你「流行」你話幾激先？而家ｄ所謂好激好爆音樂節？真係流行。我諗五月天同張震嶽對現代音樂節黎講，已是最接近二十年前嘉士伯年代的「流行」了，雖則仍差幾條街。
除左講音樂，亦特別在講文化，好似有篇散文叫《吸煙者特區》，一睇就知講乜，同唔會同音樂有關係啦。可見班友真係有心做文化，正常雜誌會唔會搵到呢ｄ野、講呢ｄ題目？同期PRONG出是最好的也是最壞的《Beg to Differ》，有佢地訪問，唔知係咪真係搵到隊band訪問？以當時要靠書信電話之通訊限制，唔係譯而真係訪問到隊band都算難得。講完PRONG，訪問最後有講香港band壇，當然唔係正面，想知內容就要拉番去第一期．．．
第一期見到MR. BIG個名，諗住佢地係主角？唔好意思。成本第一期，你可以乜都唔理，只睇一篇訪問已經夠晒：
上面條拎已有一本地資深metal友老前輩scan左上網，至於果位老前輩咩來頭講黎都冇乜意思啦，現代後生仔只會當老餅冇到，雖然好多後生仔初聽metal都係睇佢個網偷師出道，當中冇邊個會鳴謝番前輩之貢獻。而此V-TURBO訪問，相信係第一篇香港band壇現象真實記錄。到今日睇仍未覺過時、有錯。先至灰。因為這代表音樂同技術比以前勁，但香港band之風氣、態度根本經過近二十年都冇進步過。甚至更差。
「V-TURBO講的。同劉Sir講的。」
此訪問都可謂前無古人後無來者，有幾多本地音樂媒體夠薑發文唱衰香港音樂／本地音樂人／香港band？仲要第一期已經咁激？其後再以V-TURBO搞起之明愛演唱會作中心，寫出《百份百純本地創作 vs Copy Cats》，講番夾band是否做cover band已足夠、就夠心滿意足，係咪應該自行創作，而非「識得彈《Master of Puppets》」就沾沾自喜覺得自己好型好勁？同樣，你睇完篇專題文章，再睇睇而家一大班後生仔香港band，呢期興乜野就大家一齊聽／玩果樣野i.e. metalcore/emo，下期轉興第二樣野又齊齊轉，會發覺筆者相當有遠見。或，香港相當悲哀。
睇晒三期，醒起廣告接近零，差唔多睇親都係正文。而想搵佢地賣廣告，每平方吋$35。當連讀者來函仲係成版原稿字用鋼筆寫影印登出黎（知唔知乜野係鋼筆？），你話當年整本雜誌幾花人力物力，而低微銷量加上微薄廣告費，足夠維持幾耐？加上佢地真係地下，只有忠於地下先會有果句講果句、會唔止唱好仲會講埋缺點弊處全面評論，正如V-TURBO訪問，我相信其他任何一份雜章雜誌做的話，記者做完編輯組都唔敢出街囉。即係第一期已經得罪晒全香港所有樂隊，以做樂隊音樂同地下音樂為主的話，又難怪唔捱得耐好快摺，最大果班客仔、主要市場都唔妥你，仲邊有人幫襯你，俾錢你經營？
「咦，好似講緊TRHK喎？呵呵呵。」
所以而家香港band界相當發達，科技進步要搵歌要錄音一部電腦乜都得，比以前更多band、樂隊更易出碟，景象歌舞昇平，但內裡底蘊，睇完V-TURBO專訪你已經睇出晒。但你要睇番廿年前ｄ文章至發現得到，而唔係而家身邊人話你聽，因為敢講果班一早死晒，未死都睇化晒潛晒水，就如將V-TURBO訪問放上網保存位老前輩。
「所以，相信TRHK收檔之日亦不遠。多謝劉Sir直話直說。」
．．．唔好意思，職業病又發作，每每講到音樂就扯到好遠，今次應該係講劉Sir生日同Circle Eat至係。冇辦法啦，大家都知劉Sir在TRHK工作，日頭返完工六點再上皆旺TRHK，一個禮拜返足七日，晨早metal上腦。生日又算係咩日子丫，一樣要睇舖，今年生日遇著禮拜日，Circle Eat自然搬上皆旺進行，紅日想點玩玩幾耐都得，最重要係
「TRHK係唔係都冇生意架啦！有乜所謂？」
未到大食會，lunch已經食餐死。話說我老豆係超級pizza迷，禮拜六日如果屋企多人，飯都廢事煮大家叫pizza搞掂（難怪劉Sir咁肥）。我全家都鍾意食Pizza Box多過Pizza Hut，初時幫襯佢地仲算細間，當時做優惠做到黐線，本身已經平仲要玩到買一送一，最激可以一舊水食兩個大批抵過打邊爐。後來做大左，有一段時間唔肯送野，仲要加價加到貴過Pizza Hut。噉我點解唔直接幫襯Pizza Hut？佢地自己都知衰，吊高黎賣左一輪之後開始減番價，雖然都唔係平，但一個批加$38送多個，都叫做唔太貴啦？
「又唔係我俾錢！有乜所謂！」
香辣多寶＋啖啖肉超薄大批 承惠$196
鍾意食Pizza Box，因為冇Pizza Hut咁濃味，最重要得佢地有勁薄批底超脆勁好食，但搵笨在超薄批明明用少左料反而貴八蚊，薄批轉厚批都唔使加錢，點解轉再薄ｄ反而要加？鬼叫好食咩吹佢唔脹。同鍾意佢唔係一個餅分八件，而係切到勁多個細正方形，易拎易食之餘又覺得好抵食。上面係全Pizza Box最好食兩隻味，香辣多寶雖然ｄ送唔太鍾意，撈埋椒同洋蔥但我從來唔鍾意食爽口野，只志在個批超辣。啖啖肉更加唔使講，無肉不歡的劉Sir最愛。最抵死係老豆嗌完之後自己出左街，變左兩個批我包晒，多到拎上舖頭繼續食。正。好肥。
「但兩個大批，其實唔算好多，我試過一個人食晒兩個之後，仲未覺有一半飽，食多個仲得。」
叫得做世紀黑仔王，年年生日唔累人唔安樂。上年生日正日撞正八號風球。今年仲大鑊，皆旺行出ｄ亞皆老街十字路口五級大火。立即肴底，因為今次勞煩到長沙灣市長親身落廚，而家彌敦道封左成段，開唔返點樣由市長官邸運ｄ野食過黎？
「這是市長的職責。作為本日榮譽市民的我只負責等食野。你唔好送唔到黎俾我食添呀，唔係你個市長實俾我彈劾到落台呀！」
沙包瘋 a.k.a. KC本來帶定部皮幾野相機出黎，諗住去影菜街promo girl上黎送俾劉Sir打飛機做生日禮物，點知一場大火封街，囡囡唔見晒，好冇癮唯有上黎TRHK睇劉Sir打機了。鑑於平日已經冇生意，今日封埋街更加人影冇隻，乜game都打晒。打黎打去都係死人打字。原來大家都係死人屋系列fans，而家玩唔係玩打字，而係玩RPG，全部對白背晒做話劇噉做。全隻game最鍾意果句都係
Go Kuarl!
Gu Gu Gu Wooo~~~
仲有沙包瘋帶黎之超cult暴力行街game Night Slashers，都算係2D行街game黃昏期遺珠大作，敵人清一色喪屍，普通卒仔都可以有幾款死樣，爆頭得爛肚得碎到成劈肉醬得成條屍斬開幾截又得，當年噉都出到街上得街機都咪話唔cult。就連陳年舊作AVP都拎番出黎玩，仍然係我唯一一隻可以一蚊爆機之行街game，中學打到而家都係打佢，冇計啦玩其他行街game隻隻都係俾電腦怒炒，得呢隻我有得屈佢地機一蚊打爆機，仲唔煲死佢咩！當可以無聊到玩ong單人打雙打左手對右手，你就知道今日幾多客了。
雖然初召集話七點鐘開始，按照慣例永遠冇可能準時，就算出面晏晝已經解封交通回復正常，大家總會有事幹唔遲番個幾鐘頭唔安樂，最後遲左成個鐘先開始加食住等，都叫比預期中理想了。
是日兩大影相佬之一沙包瘋。大家有相睇都係多得佢。
「不過大家唔會原諒你唔帶埋趙碩之寫真上黎！
係咪因為黐住晒揭唔開先？係就放過你啦！」
多謝市長剝削長沙灣居民血汗錢成就Circle Eat的hardcore food一大堆
一早黎到等運到的各位。
因為長期未夠多人，坐極未有得食。唯有食住零食先。
Cowboy From Hell
等極唔齊人，為免市民暴動，市長決定提早開始Circle Eat。
會場Hardcore食品包括開party唔可以冇的菠蘿腸仔同冷麵兩盤！
（話說劉Sir order係煙肉腸仔，但市長話好難整，結果煙肉變成冷麵的伴碟）
「在此特別鳴謝長沙灣市長二寶樂致力於香港推廣Hardcore，
令各位非長沙灣市民都能夠學識Hardcore界奇技Circle Eat！
大家請鼓掌！香港Hardcore需要你！」
七刀同學：「點睇都唔似整得好食喎！」
市長：「你講多次？你試下講多次？？」
「食左佢！市長叫你食，你區區庶民斗膽唔食？」
「好唔好食？我市長手菜得唔得？」
「．．．」（七刀同學嘔吐中）
好在有Henry哥帶埋壽司打救大家！
「當然唔少得BlackWine啦！冇佢地點成事！」
興@THORN SLAUGHTER為左劉Sir生日，連band都唔夾。
「查實係走上黎黐餐，大家請勿誤會。」
生日禮物，有「晚晚靠佢地打飛機」的精選四仔DVD乙隻，總共四激。得唔得？
「五個鐘片，兩個字唔夠睇晒。兼即時銷毀隻DVD。
估唔到興哥仔食開豬扒同熟／老女咁extreme。果真精選。」
人稱社長之107年年生日送禮物都唔少野，上年大手筆送出尤特龍，
「今年細份左ｄ喎！定成疊外賣紙摺埋就當生日禮物呀？」
「禮物收完，就梗係要切蛋糕啦！」
個生日蛋糕牌子叫Cova，咩料我完全唔識，
「不過個logo十分維京！」
「在此要特別鳴謝整個Hardcore大食會最熱心參與者，
身份神秘的Joe姐，贈送生日蛋糕暨任Hardcore大食會司餐！」
夠鐘拆蛋糕喇！梗係要搵埋BlackWine一齊剪綵啦！
劉Sir最愛全脂極濃純朱古力蛋糕！食蛋糕最憎撈生果同立雜野！
重點，當然係蛋糕上一句！且聽Joe姐解話：
「訂蛋糕果時，我問個阿姐：『個柒字識唔識寫呀？」
佢答我『識！門字入面加個七丫嘛！』
我窒番佢『唔識中文就唔好懶醒啦！』」
BlackWine再次提醒大家一句：
「記得送生日禮物俾劉Sir！」
「祝劉Sir七歲生日快樂！」
「噉就七歲喇喎！生日有乜願望先？」
「祝大家年年有劉Sir今日咁柒啦！」
煲姐話劉Sir個頭實在柒到頂唔順了，襯住今日係佢一年一度大日子，
幫佢做個形象指導，梳番個米奇老鼠頭，夠cutie，等佢早日溝到女。
為答謝煲姐，劉Sir決定即席表演拉檯布娛賓。
「睇煲姐幾興奮幾期待！」
「多謝各位觀眾！
玩完，就要切蛋糕喇！」
「死！」
「死啦你個蛋糕！死啦你！」
（下刪三千字）
「brutal death metal刀法切蛋糕，禮成！」
「生日蛋糕碎上，你試過未？」
兩磅朱古力蛋糕，劉Sir獨攬一磅，過左今日又肥多幾斤！
Henry上黎仲帶埋傳說中之a7r gu7tar，就等市長同大家親自示範。
「著得PANTERA，就梗要彈番首《Fucking Hostile》啦！」
跟住到劉Sir出馬。玩咩歌先？
「我著MESHUGGAH，要彈《Destroy Erase Improve》咪好大鑊？
彈《小明坐火車》俾大家聽聽算啦！」
「唔夠喉整多首DRAGONFORCE！我係Herman Lau！」
老實講，枝a7r gu7tar果真夠柒，我玩黎玩去都唔知玩乜。
理論上枝柄放唔同位就可以出到唔同聲，但點放點郁，彈出黎都得一個音！
「Henry哥，你係咪俾人昆左呀？」
又估唔到我地御用攝影師沙包瘋部iPodｄ歌，要幾柒／舊有幾柒／舊！
立即整首《誓要入刀山》先！劉Sir即席起舞，各位朋友請迴避！
再有市長為大家演出《油脂》。夠晒尊特拉華達。我指身型。
「阿市長你都係收一收皮先唔該！」
都係等劉Sir表演！秋官《笑看風雲》！
「呢首歌當年我識跳三個唔同演唱會版本！」
市長唔夠抽，睇佢幾冇癮！
玩到黐晒線，唔覺唔覺已經十點幾，大家都玩飽食醉了。
未拆禮物，又點走得住呀？第一件事睇睇107疊外賣紙乜料先！
「果然係火箭基地！107我都知你唔會虧待我！」
這就是曾一度絕版之巨大變形金剛，博派火箭基地Omega Supreme！
難怪劉Sir收到咁大份禮物之後，開心到跳起！
我地Joe姐除左生日蛋糕，仲送左個精美禮物盒俾劉Sir！
個盒咁靚，以為係好野啦，點知一打開．．．
「澳雪。」
超級零食套裝。好在，有劉Sir最愛童星點心麵。
雀巢朱古力手指 野外露出特別版
連鞋底都跳到甩埋，喪爆今晚！
未計個禮盒，Joe姐仲送足成袋零食。
黎緊個禮拜，屋企同公司唔憂冇野食。
玩到皆旺拉埋閘先玩完，今次Hardcore大食會非常成功。最開心果位梗係劉Sir，有得食又有得拎，呵呵呵。最唔開心果位，係市長。今餐四盤野材料費連運費，夾夾埋埋七舊幾水，仲未計走黎走去買送煮野洗野搬黎搬去麻叉煩幾晚喎。再灰ｄ，四盤野反應唔太好，結果市長變左煮定黎緊幾日飯。
「一早話整煙肉腸架啦。我一個人最少同你包銷三盤。」
想再笑大聲ｄ？散席後，兜兜皆旺樓下幾間餐廳，相同飯菜款式份量，整好晒送埋上門，價錢都唔使而家一半。同，坦白招供，真係分分鐘好食過而家喎。有煙肉腸同咖哩角先啦大佬。
「節目完左，又到今晚TRHK特約匯應通呃九你一蚊服務費時間！今場Circle Eat Hardcore大食會，由Trinity Music Hong Kong出品、劉Sir翻譯的香港progressive metal樂隊BlackWine最新大碟《影子》，一共在電視螢光幕中出現過多少次呢？心水清的朋友記得打劉Sir個手提電話講出正確答案，首169名得獎者TRHK購買BlackWine新碟《影子》，可獨享五九折或五七折尊貴優惠！」
夜晚返到屋企，未訓覺住。
完全唔似聽日要返工。今晚大家玩得咁開心，
「trhK確有再戰江湖之必要！Let's Circle K！」
多年黎生日，今年算最多應酬，七月尾到九月頭撞番好多人，順路經過上黎皆旺探探有，專登約出黎大家食餐飯（即係被劉Sir屈請食飯）又有，一個月入面見番舊同學舊朋友差唔多有以前一年咁多。好多飯局呀今個八月。令劉Sir肥上加肥。
13/8晚，有叻姐同Queenie請食飯，上瓊華食日本菜。自己叫左個肥牛煲當打邊爐，全晚最鍾意食果個係洋風薄餅連食兩個，一睇就知我唔太鍾意食日本野啦，不過兩位靚女喜歡，話晒佢地請，就梗係要就佢地，點睇都係佢兩個想出黎食飯多過為劉Sir。上次大家三個出黎食飯係上年五月飛美國之前。真叉耐。
「當然，好多原因的。」
20/8又有舊同事同會計靚女一齊走上銅鑼灣Ruby Tuesday。我自己食開實係cheap，次次試新野、食貴野都係會計靚女介紹，佢前排成班人上呢間怒食食到拎埋張會員證有半價優惠，先敢叫大家上黎再食試試。想知有幾上流？如上面叫左個炸薯皮前菜，再加一個粉、一個墨西哥燒餅、一個巨型牛骨，唔半價的話，差唔多千二。死未？好食的確好食，超好食。不過而家半價都每人近二百，一般情況下實在豪唔起。
「我發誓，唔係有人俾錢，我一定唔會再上黎，冇半價更加。」
八月底打個特大颱風，跟住一日星期六風平浪靜，夜晚八三三原定花園金閣晚宴，如期進行。
「我地耐唔耐就大家出黎食一餐，但知唔知有趣在乜？每逢八月，兩條友教書放暑假，自然會無意識約出黎打邊爐，跟住出到黎先大大聲『我八月十生日』，班友就冇藉口唔請了，呵呵∼」
值得一提係今晚飯局之前，有我地人稱謝美人之紅燈山丘中校花，同大老細張小姐（「多謝張小姐！」），上黎皆旺探望劉Sir。不過校花上到黎唔係話送禮物請野食。係叫劉Sir請番佢食野。此謂之人性。
「不過，見你跟住成個月後搞左壇打邊爐大家咁開心，就原諒你啦！」
本身27/8仲有得同班學生食，以前生日成班人可以玩到好癲架，佢地畢左業我又離左校之後冇乜機會大家一齊食飯，上次都要成年前了。八月又撞著多人生日，本身除左我仲同埋另一位同學一齊慶祝，點知佢病左開唔成飯，就冇計了。懷念有骨氣。
「今年生日，相當好玩。幾時再玩？我們要繼續發揚Circle精神。皆因 我們都是柒人！」