BATTERY!

「轉用充電池」標語創作比賽

試用不多於30字創作標語一則，向大眾推廣多用充電池
及減少使用用完即棄的電池，以響應政府減少廢物的措施，
為保護環境作出貢獻。

呢個就係今次標語創作比賽之題目。係劉Sir威脅「堂上作唔晒返屋企作夠廿句比我」下，我五年級班靚自然竭盡所能交足功課－我要果ｄ功課當然係無鬼聊果ｄ啦，作得咁好把鬼？

遺珠

轉用充電池，香港更happy！
要happy，原來就係咁簡單。

少用乾電池，多用充電池，掌門人都話你慳電過游泳池。
又關事？

環境污染了沒take two，靚衫換完可以再換。
一睇就知係女仔寫。仲有，舊電池去左邊？

充電池，充電池減少使用乾電池，環境更加美好。
冇錯，只要充電池減少用乾電池環境就會好架喇，所以大家可以繼續用多ｄ乾電池。

不要用即棄電池，地球就會很美。
同上，原來要令地球很美就係咁簡單。

多用充電池，環境好。
再同上，原來要環境好真係好簡單。

大家不用乾電池，可上轉用充電池，保護環境最重要。
．．．阿Sir上轉用濕電得唔得？

不要用那麼多的電池呵呵！
係呀好笑呀真係好好笑呀小朋友呵呵呵！

用完即棄，不環保。充電電池，好環保。環保環保好環保，yeah！
．．．

多用充電池，環保多支持。大眾用電池，一定要用充電池。
咁廣告feel，收左幾錢佣？你講！

電池垃圾電池垃圾人人家裏最多，我們應該減少用。
呢位小朋友屋企一定有好多「電池垃圾」，睇佢講一次唔夠要講夠兩次就知。

香港以有很多廢物，又有用完即棄的電池，我們應保護環境作出貢獻。
噉點貢獻先小朋友？

充電池，充電池，好過用完即棄電池。
小朋友，小朋友，好過小呢班小朋友。

香港已經有經多廢物，所以我應為不應用乾電池，應用充電池。
呢句好有權威口吻，相信一定係出自學者之手。所以我應為呢位小朋友應該寫一篇二萬字論文解釋呢一個論點，聽日交俾我。

優異獎

保護資源，轉用充電池。

轉用充電池，大眾一起出貢獻，保護環境最重要。

多用充電池，慳錢又環保，
人人都應用，地球更美好。

環寶知識你要識，少用即棄的電池，
多用充電池，少些廢物又省錢。

使用充電池，實用又實濟，減少廢物更可貴。

季軍

即棄電池增廢物及污染　充電池既慳錢又環保
就噉睇，係咪以為呢句出自一ｄ讀書好叻之學生？錯！寫呢句果個反而係全班最嘈最歪果個！
好！見你今次咁有文彩，下次罰抄書獎你成課調轉抄由尾抄返去頭！

亞軍

多用充電池，還境更美好。
．．．又係太正常，冇咩好講。好悶。

冠軍

多用乾電有毒氣，使用充電環境好。
一睇就知出自高人！冇錯！寫果個就係全班／全級最品學兼優果個！
咁猛料，如果我唔俾個冠軍佢實比人打！

頒完表獎，就當然要頒番ｄ裏獎。頒之前，真係好想問一句：
「其實你班友仔知唔知乜野係標語？」

裏亞軍
充電電池好經濟又環保可長期使用免即棄再造原料既節省減廢物填土
真超究極無敵嚴重非常十分極之好很犀利！好明顯，呢個只係呢位小朋友果篇洋洋廿萬字論文第一句之七十分之一！已經完全超越左標語呢個範疇，擺脫左標語創作呢個枷鎖！睇完之後真係極度自卑！小朋友請你另尋高就，阿Sir教唔起你！

裏冠軍
人人用充電池可減少污染。
其實，講咁多做乜？好似呢位同學噉，一矢中的咪幾好？不過比呢位同學拎裏冠軍，唔係因為佢寫得特別好，亦唔係因為佢寫得特別差，而係因為佢就係我愛徒，亦即係「教極唔識點極唔明堂唔會上書唔會讀波就猛打廢就怒頹」果個。冇錯，而家擺明偏心假公濟私，你吹乎？