「．．．最好看的電視節目就是廣告．．．」
安泰人壽
「讓座給讓座的人」
如果真的要讓座給讓座的人的話，會有兩個情況發生：
新快樂芬蘭浴
「今晚阿Sir請捶骨。」「身快落 粉難肉」
「好！新快樂 新快樂 芬蘭浴 好！」
千禧最正廣告之一。出埋聯合國代表叫你幫襯，死未？
城市桑拿
「邊度係城市呀？」「呢度咪城市囉！」
「我花和尚銅皮鐵骨 全靠成日黎城市桑拿捶骨！」
想健身記住去城市桑拿，捶到你銅皮鐵骨仲快過做GYM。
寶力湖桑拿
「設備完善至∼稱∼心∼∼∼」
知唔知點解寶力湖剩係得旺角一間？因為請完VRF之後冇晒錢開分行。
珍珍薯圈
「讓珍珍薯圈陪伴你渡過觀樂的時光吧！當你的味蕾穿越珍珍薯圈的圈圈中，體驗著真正的煙肉味，傾訴著驚雷似的鬆脆聲音時，感受你
生命的震顫吧！跳躍吧，伴隨著令人興奮的珍珍薯圈！」
就是因為看到這一段說話，令我不吃珍珍薯圈不可。快點去買一包，和我一同感受生命的震顫吧！
清潔香港
「垃圾蟲再次肆虐香港 請提高警覺 杜絕垃圾蟲」
知唔知呢個廣告正係邊？唔係班客串拋垃圾之路人甲乙丙丁，唔係隻特撮版垃圾蟲，係垃圾蟲個英文名唔係Trashy Bug而係Lap Sap Chung。
金象米（好姨版）
好姨去街市一段，知唔知點解去到賣魚佬度就完？因為好姨比條魚整濕之後係咁狂小個賣魚佬，內容過份粗俗所以出唔到街。
潘婷唔知乜野水
「．．．ｄ頭髮呢，好似自己識飲水咁．．．」
如果頭髮曉飲水的話，應該會膨漲先係喎．．．
好易通BH001
「想英文講得好 點可以冇好易通BH001！」
BH001真係好勁，個鬼佬施恪先生用完之後講ｄ英文同我講ｄ中文一模一樣。
Bio-Kill殺蟲水
「敗我Ｑ兮錐彎報既煞衝髓∼∼∼」
咁都可以叫做廣告歌，真係無話可說。
Neutrogena
「．．．我個皮膚科醫生介紹我用 Neutrogena．．．」
用Neutrogena係身份象徵，因為一定要識得皮膚科醫生先至有得用。
金妹牌火腿、香腸
「有名有姓 品質保證」
點解隻豬明知自己會俾人拎黎整火腿同香腸都可以好開心咁同人講呢個事實？敬業樂業？
唐安麒美顏瘦身專門店
「二零零一年度香港小姐指定纖體中心 成功為多位參選港姐瘦身成功」
「二零零一年度香港小姐冠軍 十九號楊思琦 全身共減３４．７５吋」
「成功為多位參選港姐瘦身成功」 呢句完全係「首尾呼應」，可圈可點．．．
「全身共減３４．７５吋」 嘩，點減？差唔多斬晒成對腳先減到咁多喎．．．
MaxFactor Lipfinity 不脫色唇膏
「不脫色唇膏」，賣點係點抹都唔漏色。即係一搽左就呢世都甩唔到，咁恐怖你敢唔敢用？
地鐵（陳文媛版）
話個內幕消息俾你知：其實呢個廣告最開頭唔係為地鐵而拍。間廣告公司拍左前半後半就唔拍住，等知道公開競投開價最高之公司先至定後半點拍：如果係港燈男女主角相遇地點就係某街燈下，係九巴就會係巴士站，水務局就係水塘，郵政署就係郵筒．．．最後地鐵出價最高，所以男女主角最後就係地鐵上相遇。
呢個真係內幕黎架！唔信？你去問下其他人，假如你問十個十個都唔知，咪即係呢個真係內幕囉．．．
Mobil油站
「點解我地會知？因為我地都JAR車囉！」
由細細個開始我的志願已經係去美孚石油做一個小小打雜。但係當我窮盡一生精力拎到「打雜（永遠榮譽）博士學位」之後去搵工，佢地唔肯請我。點解我入唔到？因為我唔識JAR車囉！
香港：活動之都
「呢度ｄ人呀，冇時得閒既！」
連官方都噉講，唔怪知得大家做香港人做得咁慘啦！
"This is a place a hundred times bigger than it's own in the map."
請拎張世界地圖出黎。搵到香港未？跟住再拎住支筆，係香港個位置點上一百下。你見到個粒大少少之點，就係"The place a hundred times bigger than it's own in the map"喇。就係就係咁細小咁少野咋。連官方都話香港就係得咁多咁大，唔怪知得香港一直都咁差再好唔番。
噉樣Sell香港法，唔止係「賣」，直到係「出賣」。
麥記（細路偷阿伯雞翼版）
呢個廣告有一個好大漏洞。想表達係麥記雞翼好好食個細路都要襯個阿伯訓覺時偷晒佢ｄ雞翼。問題係如果真係咁好食點解個阿伯對住咁大盒麥記雞翼都訓得著？
麥記（寧靜版）
版本甲：繁忙之街上外好多人好很嘈，寧靜之麥記內有個男人悠閒地邊吹口哨邊嘆早餐。
版本乙：繁忙之街上外好多人好很嘈，寧靜之麥記內有個女人悠閒地邊吟詩邊嘆早餐。
？？？覺唔覺得好神奇？？？真係食左廿幾年都冇乜見過有麥記可以好似呢間咁靜又冇人到可以俾你包場。
好多時你會發現現實中麥記內同麥記外之情況同廣告入邊係剛剛調番轉。
麥記
「笑容免費供應 Smiles are Free」
呢句出現係所有麥記之價錢牌上。唔怪得麥記ｄ員工成日都口黑面黑啦。