二月二十九日是個很特別的日子，除左四年一度，因為要做點特別的事而早兩個鐘收工，最後一站係尖沙咀。當時五六點仲好早，返屋企食飯有點浪費這個可能是世界末日前最後一個二月廿九，醒起

「咦，今日星期三喎！」

星期三有乜特別？咪就係博物館免費入場囉！尖沙咀咁多館行，一場出到黎冇理由唔拎拎著數，加上剛去完歐洲勾起左舖探險癮同行館癮，就去左唔知幾多年未入過的科學館玩了。

首先，時光倒流兩個幾鐘。正正差唔多我收工時，四點左右旺角道有人開槍打劫，我落到樓時差佬已經封左大半條馬路，仲有成隊人陀晒槍著戴晒頭盔避彈衣包圍棟大廈，搞到本身已經趕時間，都要我兜大個圈先去到地鐵站。

你睇幾大班花生友，唔係有野做要趕路，我都會好似佢地睇到完場先走人呀。（好在冇，因為最後發現單case原來流料有人虛報，唔知點收科拉唔拉到玩電話條友呢？同乜原來999咁兒戲有一個人打去講乜都會立即信晒，唔使接多幾個報案電話核實或派人落去查證先？）

初頭諗住行藝術館同太空館，但正正係由果邊行過黎，走返轉頭好似好戇居。身為香港人歷史博物館咁多年都未入過，點知六點就收而我去到已經五點十一。就只餘科學館一家。

我承認唔係星期三免費同冇其他選擇，都冇咁大動機入場。想去太空館甚至藝術館都多過科學館，因為今時今日同當年今日基本上冇乜唔同，咁多年黎冇大翻新過，對上一次黎科學館仲讀緊師範，都有幾多故仔講。

大半座科學館都係十年如一日，集中做專題展區的地下較好，起碼間唔中會換換新野先，好似今期講職業安全。雖然我始終覺得，科學館搞到勞工處or職安局噉，好怪。

主展區入口，吹到脹晒，中文叫你留意雜物「從天而降」，英文居然係

「What's up, pal?」

玩食字都唔好玩得鬼咁爛啦大佬。仲要意思根本完全拉唔埋，加睇完英文覺得原來俾高空擲物掟Ｑ死係好開心好好玩的一回事。

講高空工作要戴安全帶個區，有個玻璃窗黑媽媽，你一行埋去，立即播出尖叫聲同打燈照住個好似吊頸噉款的裝修工人公仔搖黎搖去，嘩頂你真係嚇Ｑ死呀。仲有八個月先到萬聖節喎。

未俾個吊頸公仔嚇死的話，仲有個機械公仔講座，見到個神經教授用恐懼鬥室個公仔的語調同動作同你講解職業安全，邊個設計架個職安展區真係嚇親細路呀。

為左令大家對噪音有進一步認識，特設兩間模擬噪音室，挑戰大家聽覺容忍極限。我使乜入去挑戰呀。

「嘈？上過皆旺108未呀嘈！」

雖然個職業安全區唔講以為自己去左敵視你or海洋公園行鬼屋，起碼帶契有新電子遊戲玩。諗番起以前去機舖玩《ＸＸGo》模擬game的歲月。

記得以前同區係玩機械人行迷官同遙控車，而家係遙控工程車玩砌樓，過癮得多，雖然更懷念機械人行迷官，但而家好似全個機械人主題區冇左了。

最好玩應該係單輪泥頭車模擬器，見人示範好難玩郁下就會反車or出事。有個鬼仔遊客玩，玩左一輪都唔知做乜春，最後仲唔知點樣瓜鬼左冇癮，反而企部機側邊個實Ｑ嬸嬸仲緊張過個鬼仔。我諗佢其實好恨玩，但礙於公職身份只可以人地玩果陣黐埋去講波式旁述。

小學第一次黎科學館已經見到的神奇電槳波，事隔廿年，而家仲見到。

又係小學見到而家都冇變的飛機。所以畢左業之後再冇黎過科學館，當小學到中學讀到大學黎咁多次都冇大改變，就唔會預而家再入黎會有咩大突破啦。

一樓主題係交通、資訊同飲食，其實架鄭和方舟曉唔曉郁的。

唔係班細路成日霸機，我都好想試玩VR賽車，去機舖玩賽車game一局都五六蚊啦，而家唔使錢入場無限任玩喎。

這是「豬的妙用」，但唔知點解展品位置係交通區一帶。覺得科學館一樓相當失敗，交通同飲食兩個完全無關主題，除左展品少仲要迫埋同一個位置，即係左邊講緊汽車發展右邊叫你均衡飲食唔知做乜，兩樣野加埋又細一分鐘行得晒，好心擺左咁多年就執執佢啦。

較有睇頭係神奇瀑布，唔知咩原理，可以令到水珠一粒粒沿直線飄向天，十分神奇，企定定花左好長時間去研究。我地黎科學館，就係想睇呢種得意展品呀。

另一頭係資訊科技區，有間細影廠俾你扮做新聞報導。即係我唔似人地有囡囡當model做主播，入去都冇野好玩啦。

再上二樓，唔同晒。曾幾何時二樓係餐廳，而家變左兒童樂園，以前其他區的遊戲，有部份集中搬晒黎呢層。唯一冇變係能量穿梭機依然一覽無遺。

火車軌幾好玩，要將一個啞鈴形的車轆，沿住路軌轆到終點，未見過有人成功，基本上第一個彎位必定會出軌，所以我冇玩，型住係搵笨的。

練輕功機細個玩過，以前百二磅都贏唔到，而家二百磅更加唔使玩啦。

拍得住地下安全區咁恐怖，有三個木頭公仔，用投影機將CG人面投射落三個頭上面，扮晒真人開講座，不過公仔本身已經怪相，CG同投射技術所限投影效果亦非常唔自然，結果好似見到鬼片入面會郁會講野的紙紮公仔。我估講珍惜能源、保護環境之類，實際上完全唔知，望見此情此景日光日白都立即走啦，你仲聽得入耳咩？

去迪士尼就見識要玩機動遊戲閒閒地排隊排番一頭半個鐘，科學館都有野要輪候一個小時估唔到。

難怪要排咁耐隊，相信是科學館最吸引展品／遊戲，俾你坐入架一比一汽車模型入面virtual reality遊車河。

車外掛左個LCD螢幕，直播路面情況，Need for Speed噉款。不過興趣不大，因為講交通安全，所以來來去去都係叫你唔好超速＆唔好犯規，喂玩車game唔快唔炒唔撞邊好玩架。

因為玩成點全世界都睇到，一唔覺意撞到車毀人亡人人都知。所以笑完人之後梗閃啦，唔怕俾人打，都驚自己玩時俾人笑番轉頭啦。

諗番上幾次黎科學館，已經係讀緊師範果時，year 4睇Billy Sheehan clinic，year 2幫教授做研究助理黎搞活動，果陣劉Sir一個人攬五份part-time，仲要得一份自己搵另外四份全部人地搵上門，其中一份幫手搞個跨校大function做埋MC就係教授點名提拔，相當威水，不過俱往矣。再對上係year 1暑假，就係今次想講的故事，featuring這個神奇的浮波。

話說劉Sir個老豆都係劉Sir，佢間學校暑假請人做助理幫學生補習同教暑期班，就搵左劉Sir Jr.。初開工幾日學生仲返緊學，有日要幫手帶隊去科學館，相信好多學校同樣有臨暑假幾日帶學生去科學館攝時間的主意，去到除左我地仲有最少另外三間學校十足聯校大旅行一樣。人地學校班細路不知幾乖，係我帶班學生超唔生性，講野粗俗又當住我面爆晒粗，好在我都係受人錢財頂一個月嗟佢地又就放暑假側側膊算啦。當時大隊上到二樓，有個學生廿米外見到個浮波，立即衝前再跳起凌空一手將個波搶到手，好型，不過立即俾企部機前面個實Ｑ狂小。自不然要勞煩帶隊的劉Sir出面擺平。

仲有下回。當時二樓仲有間餐廳，搶完浮波班學生老屈阿Sir請食野，十幾蚊碟薯條冇所謂啦，落茄汁時有個學生一拳打落個樽，剛剛好射晒落我條褲到一褲都係，班細路見到，立即爭食薯條完全唔幫拖，最後成日個人都散發濃烈的茄汁味，仲要自己一條薯條都冇得食。

最後落埋地庫，最想睇能量穿梭機，由細到大黎過咁多次科學館，撞得到佢開機夾埋都唔知有冇三次。但每日能量穿梭機表演時間係三五七點三場，偏偏我六點幾入場又等唔到七點，可能要等我下次再禮拜三唔返工or早放先有機會。

以物理同生物為主的地庫大部份展品可以落手玩，好似有大量（其實幾低Ｂ的）解謎遊戲的腦筋挑戰站，成為遊客同家長們攝時間休息的好地方。鬼叫而家餐廳執左咩，其他地方邊搵到咁多位坐又有得玩呀。睇見成間館夾埋都唔知有冇三百人的人流，又好難唔體諒點解間餐廳會執笠。

腦筋挑戰站側邊個鏡子迷官非常受歡迎，除左大仲有好多唔同效果鏡像，兼有晒詳細解說講解燈光反射現象，我覺得而家成間科學館最成功做得最好就係個迷官。除左寓學習於娛樂，另一大實際用途係成為港女們的自拍天堂。

「話時話，原來好多囡囡鍾意黎科學館玩，口桀口桀∼」

黎到生物館，老老實實，班管理層係咪諗住攬住個館過世？幾時先肯加多少少新野？

最搶眼梗係咁大隻骷髏恐龍（雖然跟實物比其實好細）

This is epic，但希望可以有更多恐龍骨模型睇，唔使大，同而家差唔多大細再加多幾款已經好好。

雖則十年如一日，其實地庫幾有趣味，因為是科學白痴所以而家都唔多明玩盲點玩幻象的點解會中招。但黎過幾次總叫儲左經驗值升左level，大個左醒水左，好似旋轉隧道會干擾你視覺令你行唔到直線一路行一路仆街，而家知乜事夾硬迫自己行直線就屈番機轉頭了。

全層最受小朋友歡迎一定係拉鋸畫沙。原意是倒沙落鐵盤，再用枝弓拉鐵盤邊，利用音頻震動畫出唔同圖案，但對班靚仔黎講，點樣拉到最嘈最多人小你先係真正玩法。所以每次幾十尺遠聽到超刺耳高音，然後班實Ｑ立即飛奔過去聲音源頭，你就知咩事。

我諗濕地公園介紹算較新展品，可惜得幾隻公仔大堆字一條片有點流，睇完都唔會覺得濕地公園好值得去或好想去。歐洲之旅博物館同公園未行夠，濕地公園遠左少少，但同樣小學畢業之後未去過的香港公園觀鳥園＆動植物公園可以諗諗。吹雞搞番個「小朋友齊打雀」活動先。

雖然地方唔算細，但展品擺放疏落實際上好少，半個幾鐘已經行左兩個圈。個半月前去倫敦，冇去當地科學園，但聽同事講係有個導遊帶團，帶大家行沿途仔細講解，過程非常生動有趣又多互動，佢個女本身唔多鍾意理科，遊完都覺得好好玩同記到好多科學知識入腦。香港博物館正正欠缺此類導賞同互動，同無多少實質教學成份，由細到大都覺得只係俾家長同學校安置班細路一日半日的主題遊樂場。身為本地人對住咁多年都唔收貨，我諗遊客一場黎到反而似入左個室內公園，點止覺得悶直頭大失所望，簡直影響香港「國際之都」形象呀。

從對待博物館之態度同各館發展，可直接睇到香港政府對藝術、文化及科學之心態有幾正面有幾積極。我諗只得一間博物館佢地真係會肯俾大錢落心機去搞：金融博物館。