Sir遊記2011.7.23：書展探小明＞筲箕灣食高登炸雞＞蒲吧睇Kolor</a>

Sir遊記2011.7.23
書展探小明＞筲箕灣食高登炸雞＞蒲吧睇Kolor

劉Sir咁冇文化，又點會去行書展呀。動漫節就俾謝安琪昆過去一次，一次就夠之後發誓唔會再去。不過今屆書展你好彩，夜晚點都要過西灣河睇Kolor，一點鐘放工返屋企又唔係去睇戲又唔係出街坐又熱死，加上今次有書好買，就豪兩條半加一個晏晝俾你。成世人第一次去書展、成世人第一次咁有文化，當堂虛榮晒，呢廿五蚊使得值啦。立即要多謝Kolor啦。

七仔真識搵錢，市區分店負責做賣飛已經賺一大筆，都唔夠會場入口特登開個counter，重點是飛之外有野飲。前排仲打風落雨，偏偏書展呢幾日上番三十幾度，你唔係搭船由地鐵站果頭行過黎已經熱死，七仔個檔開正入場必經之路，大多數人行到黎實幫襯行完天橋未熱死喝死都會照買，因為入到場買同樣野飲，會係而家買三四倍價錢。靠書展七仔賺到笑啦。

以前未黎過，只睇報紙講到點樣多人點樣大，有鑑動漫節排成九個字先入到場諗住又要場外生煎，點知兩點半去到人唔多隊都唔使排直行直入，而且規模冇想像中咁大。仲好啦，快手行完去睇show唔使煩。

入到去第一件事直踩Hall 1D利源。純粹為左《香港band友樂與路》而黎，就係呢本書令我破戒入書展。張簽名poster正喎有冇得拎？

原價$80，會場價$64，連價錢都要革命色彩豐富過人果然夠rock。

買完《香港band友樂與路》，基本上已經走得。但一場黎到又俾左兩條半冇理由噉就玩完。Kolor仲有差唔多五個鐘先出場呢。就四圍走走攝時間。第一層作為重點展館自然最多野睇，呢檔上書局+小書局應該係最有港味同特色一檔了。

「其實到而家都唔知閃靈隻《賽德克．巴萊》同《賽德克．巴萊》套戲有冇／有咩關係？如果soundtrack就係閃靈隻碟就值得捧場呀。」

有檔賣香港街景模型，仲有唔同大細選擇，總有個尺寸合你心意。令我諗起強國版福特巨人，作為博派基地係變形金剛系列最巨型玩具，原版成兩尺高除左超大價錢亦超貴，想當年係各位小朋友夢寐以求的神級玩具，但因為玩具安全問題絕版多年未見復刻（做廠做行的朋友都會明白甚麼是drop test），而家要買得番炒到飛起的舊版，好在大陸一早山寨左，仲關心各位蝸居朋友需要，嫌兩尺太大有個一尺縮細版，都大過得仲有3/4尺袖珍版，死未。

Kubrick都有開檔，但太文藝了買唔落手。闢左個角落頭做Kubrick講台講社會講藝術，睇左個幾字，唯一得著係「貪得無厭」個「厭」原來讀「閹」。

你冇睇錯，間公司叫當代教育，但成個攤位同教育冇乜關係只賣寫真集。性教育卦。如果劉Sir一早遇到當代教育，就唔使淪落似如今退出教育界做條metal7head啦。

買完《香港band友樂與路》之後由一個角落頭走到另一個，因為最入個角是另一重點《是咁的，我是高登CEO》。老老豆豆林祖舜你好地地出書咪算，堆商品真係太膠買唔落手，特別副圓形啤牌．．．

特登上書展網頁print張coupon黎買架，本書唔太厚賣$60其實幾貴，而家五條半算啦，可惜見唔到林CEO真人。

．．．咦，張coupon唔係話買夠一舊水先有得用咩？係咪滯銷到噉先．．．

對正大門口有大大個Theresa，劉Sir都買過佢一隻碟的就係佢剛剛開始轉型Angelababy式日本公仔風果隻《My Dearest Theresa》（會買其實純粹玩野），好可惜撞唔到佢真人。唔知點解個廣告會明明sell佢本新書，會有個工作人員貼左幾度符上去遮住晒，度符仲要寫住「有鬼」先頂癮。

唔算好多人一樓個零鐘行完轉攻三樓，電梯口擺左幾部汽水機，凝冰汽水兩年前出已經覺得好on9估唔到而家仲玩，又吹佢唔脹十六蚊枝明搵笨照樣多人買，因為超熱同會場入面冇乜地方飲野食野＆有都貴到喊。話說有六部凝冰可樂機，兩部由一條女睇、兩部一條仔睇、最後兩部冇人睇，永遠只得囡囡睇果部有人幫襯加圍住晒咁多，另外兩組接近冇人理。人性也。

「嘩，好彩今日有黎咋！原來五點半有李加仁醫生出live呀！」

三樓主要做電子書、兒童書同宗教書，一入門口就見到

Let's Copy English Songs With Mr.

有冇《It's My Tam》同《零時Great Heights》先。

估唔到宗教書多到爆，差唔多每個大宗教各有自己一個大區。好多都要佈置到唔知點噉以顯自己有思想有態度，有檔放左張病床，三面牆掛晒卡，但睇極都唔知賣乜。開頭以為好正經賣心靈雞湯之類，不過見到呢張卡，覺得玩野居多。

勁呀而家連耶教都玩figure，唔係講笑個摩西figure手工好靚仲有晒背景成套加埋好鬼epic，唔係耶撚都諗過買，話晒劉Sir聽開Holy Moses嘛。（．．．）

唔覺唔覺就五點半，立即飛黎睇李加仁醫生啦。《小明ＸＸＸ》系列聽左咁多年都未見過佢真人，今次咁難得有機會捧佢場點可以錯過！遲左少少黎，已經俾人霸晒位，李醫生真係好多fans。

個環節叫「名人說故事」，不過老老實實李醫生講故仔真係好鬼悶，你睇班細路聽到訓晒覺就知。同，你黎見李醫生，都係為左聽佢唱歌嗟！

不負眾望，講左一陣仔就開波啦！萬眾期待的《小明上廣州》！都不知幾多人圍觀歡呼！冇親臨現場，絕對感受唔到李醫生獻唱時台下的墟陷震撼！好在有劉Sir bootleg！

「頂你個肺甩到hi hi。所以我鍾意。唔甩邊度有癮？」

「佢講故仔時，台下除左小朋友同家長唔太多其他人，但一話唱歌立即幾十人衝埋台圍實晒，一唱完大家歡呼拍手過後立即幾十人一齊消失，場面實在太好笑。」

笑到你爆，原來安排係講一個故仔＞唱一首歌噉loop，但唱完《小明上廣州》之後問大家想唔想聽佢講故仔？全場包括所有細路都話「唔想。」李醫生立即樣衰到爆。又要夾硬講。此乃台下一位小朋友知道李醫生講故仔唔肯唱歌的反應。

冇人想聽佢講故仔，剛剛先唱完轉個頭又黎。《小明上廣州》唱左，如此神曲仲有咩歌可以超越？有，咪《小明上廣州》英文版囉，太過高深要睇住歌詞黎rap，當然又要甩到仆街啦。因為太過好笑拍到條片撻晒Ｑ斷開左三截冇bootleg睇唔好意思。

聽李醫生講《小明上廣州》仲有最少多一個版本。我諗佢單憑呢首歌加無限語言版改編版remix版，應該夠出一個666碟boxset稱霸香港樂壇。

本來節目長半個鐘六點完，但全場都話唔想聽佢講故仔（笑Ｘ死呀）又唱晒歌，結果早左十分鐘完，司儀上台送獎狀講野時，李加仁成日都要拉去講自己出左新書新碟有簽名會，司儀講第二日有咩名人黎講故事，佢又話佢唔黎但人地講故事個時段會有簽名會，抽水抽到司儀都冇眼睇。

「咪話佢傻，李醫生真係好鬼多fans。隻碟銷量分分鐘勁過而家班歌手、唱《小明》搵錢搵得仲多過做醫生呀。」

行左三個鐘，收穫除左能夠一睹李家仁醫生風采同觀眾對佢的熱情，仲有三本書。次文化堂話《頭條新聞》班底會黎，可惜到尾都無緣參見太后，走前只好買番本《小狗懶擦鞋》，其實本書一早想買但懶行書局，今次見到仲有折旋掃啦。

講左Ｎ次的《香港band友樂與路》，令我黎書展的一大原因，但簡略睇左頭廿幾版，感想是同預期中好唔同甚至有點失望。睇晒先一次過講。

林祖舜大作《是咁的，我是高登CEO》，雖然我識玩RSS之後先開始上高登即係上左一年左右而且睇多好少發言，始終高登是香港網絡歷史重要一部份，就當買黎增廣見聞認識自己地方文化，同埋分分鐘出左本書高登就俾老蕭收購左，林祖舜就唔係CEO本書要改名架喇，家陣買定第時仲唔有得炒？其實都冇預過內容會好好睇，不過見高登又俾英皇告又俾百份報屈，買本當支持幫拖找律師數啦。

唔太多免費野拎，係行行下有條友塞左舊野俾我，見佢拎住幾大個紙皮箱一個裝住幾百個，睇黎要派晒分分鐘企晒成個書展先掂。佢得一個人派開晒箱又唔得閒睇實，本來諗住過去撻多幾個，但望真原來係電話M2卡插電腦card reader，淨係插得M2仲要得USB 2.0，頂廢到噉唔怪得要拎黎書展派。如果係係兩激以上手指我多多都同你啃呀。