遊戲機同年代一樣不斷進步，廿年間已經由8-bit紅白機，去到而家我都唔知點計算之PS3、360，只係點先進點立體，最愛仍然係八幾尾九幾，3DO、PS同Saturn呢批次世代機仍然未出現、3D立體仲係粗糙實驗期、超任稱霸全球之時，因為當其時之遊戲冇而家咁天馬行空影像凌厲，但更重視遊戲性，久經歲月仍然玩極唔厭，相反好多次世代game煲一陣已經冇晒興趣，靚一回事襟唔襟玩又係一回事，我亦從來唔鍾意立體CG而永遠追隨逐粒pixel逐格動畫砌之舊世代。借問超任最正game？機僮遙指歪勾巾：

男主角叫Clint（明顯向殿堂級西部片演員Clint Eastwood致敬），女主角叫Annie（源自傳奇西部女神槍手Annie Oakley），二人單挑萬千歹徒、機械人、汽車飛機、太空船組成之高科技西部犯罪集團，再加上點點諧趣，成就一隻過去與未來錯配之幽默"Weird West"動作game。劇情簡介：

上面就係片頭。故事講乜？唔知。假如我有餅帶，睇過說明書相信會明白。但我由第一日玩超任起，只見過磁碟機，未見過有人玩帶；有，亦唔相信十幾年後之今日仲會搵得番。所以，唔好意思，對於故事只有作最普遍最基本假設：某個頭目帶埋佢班靚入侵某個市鎮，男女主角挺身而出拯救百姓於水深火熱，伸張正義方法當然係大家最喜歡的以暴易暴啦。夠晒簡單。
「又唔係RPG，打行街game射擊game，有邊隻你有留意過劇情講乜？」

類型係第三身立體射擊動作（真長），1994出品，雖然推出時已經過左呢類遊戲之熱潮（假如有的話，好似未成為主流過），但各方面比任何一隻更好，只衰在街機冇出同出得太遲。操作方法簡單：十字掣同按鍵控制角色2.5D場景中平面移動及作戰。遊戲預設連射，hold實射擊掣主角會企定不停開槍，十字掣控制準星瞄準，非攻擊時角色可以左右走動，而準星會往十字掣同方向移動，方便超過一個畫面闊之場景中搜尋現畫面外敵人及寶物同迴避。其他操作有空中再跳掣之二段跳，同連射時跳掣之閃身，攻擊亦唔係只得開槍而視乎情況有唔同變化。Wild Guns就係出色在易上手得黎動作非常豐富。

全部所需資料集中畫面最下。主角靚樣旁邊上面掃起，首先係分數，跟住條長條用作儲氣，再下面講剩幾多條命同幾多粒大彈。命最多寫9但查實冇上限，總之你拎到幾多up就有幾多up，個9字只係9up。大彈就有限，一粒紫色珠一個最多可以帶五個。中間係時間，倒數到零就到打大佬，畫面全部卒仔死晒等大佬同你單挑。除左自然倒數，每殺一隻敵人會扣時間，普通卒仔一隻一秒，少量高級敵人一隻扣兩秒。

要爆機，首先要識保命。敵人往往大批大批出現子彈橫飛，任何攻擊一野就可以打死你扣一條命，最簡單方法梗係左右走或者跳避開啦，仲有兩大特色：加入兩段跳可以半空改變方向，而連射時按跳掣，角色會向十字掣方向碌地沙閃身。跳起凌空時角色唔係無敵，除非敵人係用大範圍攻擊或者爆彈系武器，空中中彈機會微乎其微，而兩段跳第二段空中任何時間都可以使出之餘仲可以選擇跳向相反方向，唔小心跳入火坑都唔使擔心，又可以延長滯空時間擾亂鎖定射擊。閃身會急速向左或右一個翻身碌三份一畫面左右，碌地沙過程完全無敵所以經常用到，只係收式時有一小段硬直時間，後期敵人攻勢密集時簡短硬直已經可以好致命，而另一缺點係使出之後係唔可以暫停或改變方向。另外同同類遊戲一樣，普通子彈可以中途截擊，而Wild Guns鼓勵玩家落力射子彈唔好避彈，因為射子彈可以儲氣儲滿主角會level暴升同埋有助儲分，又係神來一著。真係太多敵人太多彈頂唔順的話，仲有絕招大彈，一出全畫面爆晒殺敵加無敵完美之攻守兼備，但彈數非常有限。

而想知道幾時需要防守或迴避，可以留意畫面上提示。有任何危機出現，角色頭頂會出現"Look out!"泡泡，代表有子彈或敵人埋緊身。埋身敵人可以用近身攻擊打走或者死避等佢自己走人。遠攻方面，一般子彈（射得低果種）飛行時會有準星顯示目標點，因為通常開槍係以你當時所在位置為目標，見到準星時移離就可以，但部份敵人同大佬子彈速度較快，又或會大範圍掃射，普通移動未必避得切，就要靠跳同閃身。但炸彈、榴彈同機關炮之類唔會有準星攻擊速度亦高，就要一眼關七同靠經驗留意各敵人動靜隨時作出反應。真係唔夠抽一個大彈即時解圍。其實仲有一個「隱藏」防衛法。講到繩圈時會提到。

男女主角標準裝備係來福槍一枝，攻擊力普通、射擊速度中等、無彈數限制，理所當然係最常用武器。部份敵人死後會跌寶物，當中包括以下幾款武器升級：

機關槍

霰彈槍

榴彈炮

唔知乜野槍

炸彈

大彈

除左炸彈要親身上前執起，所有寶物射中或者炸彈炸中就拎到，槍械類一排彈有五十發，但每拎新槍用取消本身所用，拎同類槍彈數亦係從頭計起唔可以累積。爆彈類每拎一次只得一發，但殺傷力同範圍較一般槍械為大。

	一下掣會射成行彈，一行足夠做低一隻卒仔或者狂掃幾隻，極度抵用因為彈匣五十實際等於幾百發，加上密度及攻擊力高，儲分同掃場一流。提多提，有中槍pose之卒仔同大佬（如第一關第二排大佬），中彈擺緊pose時係無敵，連射只會浪費彈藥，應該一行彈一行彈噉掃，可以假定對佢地一行於等兩槍。
	霰彈槍衰射擊頻率低，同每粒獨立流彈攻擊力比來福槍更弱，但利用大範圍同複數彈頭，適合破壞景物、打集結一齊之卒仔、對一次射大堆彈敵人時封位。打間場大佬霰彈槍極有效。
	榴彈炮係加強版霰彈槍，上彈慢過霰彈範圍亦較細，但攻擊力高同爆炸會維持一段時間持續破壞，打大佬最有用，間場大佬十幾發已經死。
	P即係pokguy。射中random有機會拎到呢枝P槍，亦只有random先會俾P槍你，準繩多左個交叉變成零攻擊力，射唔到人執唔到寶物只射得低子彈，唯有不斷開槍盡快射晒排廢彈。驚中招就唔好貪心放棄射random，尤其烽頭火勢之時，因為random中P槍成數都幾高。
	當射低夠多敵人子彈，儲滿氣主角就會癲狂，除左無敵之外來福槍變成火神炮，榴彈代替子彈急速無限射，只要一儲滿氣爆火神炮等於贏硬，勁到大佬級包括最後大佬都捱唔過你一行氣。點樣保留到打大佬時先爆氣又係一種技巧。
	部份敵人會掟炸彈，落地後爆炸前可以用射掣執起再掟番去敵人度。執炸彈時有短暫硬直，拎起後倒數會停止幾時掟都可以，正常執完再一下射掣就會掟，想保留到適當時機先用，執時唔好放掣，起身就會繼續開槍，鬆掣再按先會掟。因為爆炸攻擊力加範圍大，加上咁鬼好玩，單追炸彈同掟炸彈已經令好多人愛上Wild Guns。
	最重要當然係大彈，窮途末路救命或者屈大佬用。一出全畫面連環大爆炸幾秒鐘，自己無敵、卒仔必死、大佬重傷，另最前景所有物件炸爛晒，但彈數有限需適時使用。經驗話你知，你寧願齋用槍玩都唔會用大彈，因為射人先最有癮。我差唔多未用過，除左用黎搶分搶寶物。

敵人並唔係只識得離幾十碼遠開槍，少數會走到同你同線打埋身，同樣一招斃命。除左不斷迴避等一段時間後佢自行撤退（相信冇乜人會噉做），亦可以近身反擊。方法好簡單。當敵人接近時，唔係開緊槍的話，角色會擺出起手式，全身紅藍閃動：

跟住就係鬥快時間，睇你打先定敵人打先。擺好陣勢全身閃緊時一下射掣，就會槍柄一野怒扳落條友度：

即時贈你一千分，加送超痛快感覺！其實只要留意敵人行動，好少機會會埋身中招，因為你怒扳距離比大多數敵人遠（大佬級另計），而且一起招即時無敵雙方一齊出招你都贏硬，就算敵人行到同你重疊嗌晒"Look out!"先黎，多數仲趕得切。亦要小心連射中停火打埋身，因為你連射時鬆開個掣之後，假如連打得太密，系統會假定你仍然連射，你越係心急搞到連打得越密，結果停唔到手就俾人埋身打死，又或者變左轉繩圈冤枉死，所以最好完全鬆開掣，到敵人埋到身你都轉埋pose再打，就保險得多，最緊要心平氣和千祈唔好燥。怒扳同炸彈一樣純粹為令隻game更具娛樂性。但如果你係玩score attack，最唔希望就係打埋身，請睇落去。

　　　　　　

相信係同類遊戲中最特別「武器」，繩圈本身並無攻擊力，加上其特質算防具更適當。要用繩圈好容易，因為連射特性攻擊時慣性唔會放掣，但改為一下一下連打射掣，到第四下就會停止開槍而拎個繩圈出黎轉，繼續連打可以用十字掣瞄準，停止連打就會拋繩圈，拋出至繩圈擊中或消失前角色同準星會處於無敵硬直。因為轉繩圈時中門大開，掟繩圈前需要半秒左右起手就算即轉即拋都唔太適合急用，又掟出到到達準星位需約半秒，其間角色加準星唔郁得掟唔中就大件事，雖然無敵但此一剎要好熟練先能夠作為轉危為機之一著，但絕對值得花時間熟習，因為非常實用：被拋中敵人會變藍色，有大約三秒時間郁唔到任你魚肉，對大佬尤其實際 － 當然唔係個個大佬都會受繩圈影響，但全隻game九成五以上敵人都可以用繩圈捉住怒射，點難練都要練。除左要習慣幾時將連射轉成一下一下連打，仲要學識先讀，特別對移動目標時，因為唔同子彈接近即時命中需要半秒左右飛行，而拋出後改變唔到軌跡，好在繩圈似榴彈炮有「爆風」，唔一定要中到正先捉得住捕捉範圍仲要幾大，可以一個繩圈捉幾隻。另外時間較得準，打大佬可以一個接一個繩圈等佢想郁都冇得郁，招都唔多出已經死，尤其雙打時一個狂射一個狂掟繩圈大佬完全係被屈機。

另一個必定要識用繩圈之原因，係唔止可以捉停人，繩圈本身仲防彈，可以截擊所有經過之子彈，加上繩圈本身面積大，槍林彈雨時亂拋一個出去，你同準星之間全部彈一次過清晒，兼幫你儲埋氣！有時對住大佬亂射唔識避冇乎，識用繩圈的話，你唔會怕大佬射得多彈，只會嫌佢射得唔夠多彈！

少數敵人 － 多數係大佬級 － 識得拋繩圈，攔截不能兼飛行速度高，加上中左立即郁唔到，緊接而黎唔係成班敵人圍攻就係大佬亂槍掃射，比子彈更需要留意。因為射唔低同冇準星提示，加上有爆風範圍比所見為大，怕的話一見有人射繩圈立即跳起或者閃身。假如咁唔好彩中左，係噉見掣亂打可以快少少甩身，快半秒至一秒左右，戰局當中如此短時間好寶貴架喇。

大多數敵人子彈都可以截擊到，而可截擊子彈屬性為定時，預定一段時間後到達目標點，會就兩者間距離自動調節番速度，企得遠時飛得快，近射可以睇到速度明顯減慢。至於上級敵人同大佬通常會有自己一種複彈射擊，因為定時屬性調整，子彈會按特定軌跡或形狀掃射，唔會突然有幾粒快過其他，美觀之餘亦提示線索閃避。避彈時要謹記有「時差」，以免太早或太遲閃，或者踩波車。

唔知係bug還是特登，又或者主角神力，自己攻擊判定係用準星計而唔係用子彈計，即係開槍後準星包圍之所有目標一律會視作被擊中，即係唔止炸彈同榴彈，任何一種槍包括最基本之來福槍，只要你瞄得好，一粒子彈可以射幾隻敵人。此特性拋繩圈時尤其有用，謹記敵人走到群埋一堆時先射同拋繩圈最有效。

又有條問題，可能有人好奇：
「假如我係爆氣打死大佬過關，下關點計？」
過關後，下關一開始行氣會剩過關時餘氣除二。所以臨到每關第三排總大佬前個間場大佬爆氣就好唔抵。

只求盡情破壞對分數唔多在乎的朋友，可以直接跳過今回。要得分最直接自然係殺人，破壞場面一樣有分加，但加最多梗係執寶物。加分寶物有四種：

錢袋：500分

灰寶石：1,000分

藍寶石：1,500分

紅寶石：5,000分

部份背景物件打爛會有寶物，但主要來源始終係敵人。會出寶物敵人不離幾種：中等級至高等級、或只出現短時間一閃即逝、或群體出現之低等級敵人。前者靠火力、次者靠記位、最後者因為成班人四隻或更多隻隻有寶物跟身，用普通槍往往打唔晒，必要時用大彈就一定執得齊。四種加分寶物中最常見係錢袋同藍寶石，紅寶石一粒加勁多分但極度罕有，有機會執千祈唔好錯過。

卒仔方面，埋身卒怒扳一隻一千分，部分間場大佬都只得呢個分數，所以有卒仔埋身千祈唔好俾佢走甩。開槍的話每粒子彈打中加十分，多數卒仔做低都係得幾百分，但用game設定之倍數加分系統，儲下儲下就可以去到好高：由開始連射起計，假使企定原位唔放掣不停射，射到第三隻卒起分數乘二，跟住每多一隻乘數再加一倍，最高去到乘五，換言之一次無斷續連射中，殺到第七隻卒打後可以達到可能之最高得分，甚至間場大佬都可以乘五，不過要做到較難，因為只要連射中斷，例如鬆開射掣或者閃身，就會打回到變一倍重新計過，問題係好多因素會打斷連射：假使你要避彈、拎到特別槍唔想浪費彈藥、有埋身卒迫近，就一定要停。較特別係掟繩圈掟中都有十分加。繩圈本身冇攻擊力，盡可能用繩圈固定敵人之後先至射死佢就可以拎更多分，得閒得滯打大佬時可以無限掟繩圈儲分。

另外場景接近所有野可以打爛，交通工具、窗口、招牌、石頭、花草樹木甚至牆身同岩洞壁每寸，總之你覺得可以射爛或者留到彈窿之地方，幾微細都好得閒無事就射佢一射，分數唔係多照係計你一槍十分，但積少成多加有時會撞到寶物，另通常最前景之物件先可以用大彈炸爛，其他都要自己開槍。初幾關最好玩，因為差唔多見到都射得爛開親槍都有分加，到後來或者敵人多左勁左怕你自顧不閒，好多場景馬虎得只有好少地方可以破壞，令人失望。亦因為好多時要應付敵人同搶寶物，最理想拆場時間係大佬出黎，打大佬冇限時間，可以打爛晒背景先搞掂佢，可以同時同無限掟繩圈配合，就可以捉停大佬兼加分，自己再慢慢周圍亂射。

每關打完總大佬就到計分時間，除左每關賞金，仲會計你過關時最後一條命全關內一共執到幾多item一件500分，想過關時再高分，就要盡量唔好走漏寶物同唔好死，特別第一關卡遜城同第三關彈藥庫。

至於分數最大用途，除左滿足虛榮，仲有填命。每十萬分一個1up。因為後來好難玩話死就死，死左雖然無限continue，但狀態回到最初即係零分三條命三個大彈兼由大關第一排重頭打起，而後來三條命絕對唔夠過一關大關，及早儲分買命係有需要。

遊戲有三個難度設定：easy、normal、hard，除左會影響敵人攻勢激烈程度，補給數量亦會有所不同，easy同normal打大佬時每隔一段時間會有槍拎，但hard對大佬唔會出現任何補給，只有靠自己枝來福槍。

原作廠牌Natsume之日本版同歐洲發行商Titus之外國版亦有所不同。通常同一隻game由日本出口到外國，因為海外玩家要求同市場性質，往往會調節得比原來困難，再修改系統削弱玩家能力同優勢。Wild Guns調番轉，出口之後速度減慢大約一半，即係日版速度係歐版1.5倍，玩完日版立即覺得歐版好慢好易玩。

因為唔識日文，以下攻略以歐版hard所起。

講左幾千萬字，終於正式入隻game開始玩。但玩之前仲有一樣野要做，要認定你身份：
「你係邊個？」

每個角色有四色選擇，選角時ABXY揀色start掣揀人，非常特別之設計，雙打時又可以大家選相同角色。通常用女主角Annie黑衫版。一來男主角Clint太樣衰。二來black lady靚之餘老黎得多，唔知點解，用Annie就係手風順過Clint。

第一關分為三排，頭兩排打卒仔同間場大佬，逢第三排對總大佬。
第一個大關係卡遜城，位置近西岸邊緣之美國城市。

第一排自然係屬於熱身，亦係唯一一排由99秒起倒數，俾足時間你練習同拆場，非常好玩。
卒仔屬嘍囉級，來福槍兩槍搞得掂。肥佬會跌寶物，出沒地點係兩個窗口，同屋前拖車出兩隻。

過廿秒左右會出現刀客，等佢埋身時一野窩落去就得，但要小心顧住射其他卒忽視刀客存在。

左手邊架履帶貨車間中出現個肥佬射你，個肥佬射唔死，一打要成架貨車炸爆。
爆左有粒藍寶石，另左上角部閉部電視射得爛，打爆個屋頂有個大彈食。

每過三十秒左右會格林蟹，等佢打開心口瞄住心口狂射，一次過截晒全部彈加儲氣。
用霰彈槍準星最好擺後少少，因為射得唔夠密要用範圍彌補，瞄得太前上彈空檔有機會俾彈穿過。
打爆隻蟹，記得順手執埋跌出黎粒寶石。

最後十幾秒，卒仔大晒冷。慳功夫，放個大彈搞掂，唔使驚應付唔黎，更唔需要擔心有漏網之魚．．．

因為四個肥佬都有野食。前排拖車右邊果個，多數會出大彈，但唔好彩大彈會變錢袋。
如果出大彈時仲未射爛左邊屋閉路電視位個屋頂，出完記得立即走過去，
因為大彈會炸爛個屋頂，唔快手去執，過一陣佢就會自動消失。
唔放大彈，會繼續好似頭先大班大班卒出現，因為時間無多，行到出黎已經夠時間打大佬唔抵，
所以建議放大彈，炸晒班卒時間會扣到七七八八，執完寶物大佬差唔多時候出黎。

第一個大佬係牛仔機械人，弱點係身。攻擊方法有三種。第一種係跳起，落地之後瞄住你射四粒彈，
只要不斷橫行或者跳起就避得開，更容易方法係睇見佢跳起立即走到對角，
之後瞄準大家中間狂射就可以截晒四粒。唔射而掟繩圈自然更好，擋完彈仲捉埋佢黎射。

另一種射法係原地雙手各向前射兩次三叉彈。二段跳好易避開，閃身要留意唔好碌左去另一粒彈度，
最易其實係等佢射時企近側邊，之後對住較近果隻手槍口狂射，佢一開槍就全部彈射晒。

當見到佢突然打橫遞起隻手就要留意，一秒後另一隻手會對前面三份一畫面右向左橫掃機槍，
快得黎截擊不能，所以一見佢遞手立即迴避，最容易係向相反方向閃身，
睇落似中彈但閃身無敵所以唔會有事。最危險只有企緊牆角時。保險就梗係向牆角飛身啦。
仲有個挑戰性反擊法：就係一見佢遞手就轉繩圈，掃到埋身就掟，無敵避彈加捉番佢轉頭。
除左第三招之外唔算難打，最直接不斷拋繩圈捉停佢狂射，一鬆立即又拋過就可以屈死。

掃完街入酒吧飲番杯。點知好多人阻Ｑ住晒。嬲嬲地一開波放粒大彈．．．

立即炸晒前面三張圓檯，如果唔係吧檯前碌黎碌去班牛仔會用幾張圓檯做掩護。

冇晒檯就易打得多。吧檯前四隻會碌出黎，碌地時無敵一定要等佢地跪定先打到。
平時唔會有野食，但出齊四隻果次四隻都會有寶物，立即每隻兩發快手做低晒唔好走漏。
怕的話可以再放大彈，或者唔一開始放留到四隻一齊先放，第一輪四隻通常有一隻出大彈。

吧檯後面會出肥佬，有時一個有時兩個最多四個，總之係肥佬就有野食。
佢地唔會射你只識掟炸彈，但有時拎碌炸彈出黎笑一陣就縮番入去檯底。炸彈今關好有用．．．

到三十秒左右兩邊各跌一隻櫥窗著衫公仔，當你行近就會左右不停亂掃。
雖然佢地唔識郁，但同其他卒仔夾埋，兩個著衫公仔嚴重影響行動範圍，
加上血多炸彈／榴彈都要五發用槍有排射，所以要靠肥佬供應炸彈。

第一關第二個大佬係西裝友。只得一招：企定瞄準，之後對住你射一粒高速子彈，
子彈屬性係定時，大約三份一秒射到你企緊個位，所以同佢隔得越遠，粒彈（睇落）會快好多，
企近佢望落會飛得慢，但係其實同樣好快殺到，唔好被誤導。
因為速度快，單用左右走避較難，走遲半步已經射中，用跳同閃身較好。

佢屬於有中彈pose之敵人。每中四槍（機槍＝兩排，榴彈＝兩發）就會躝地，
躝果陣無敵點射都冇用，唯有等佢起身繼續射。

有時你耐唔打佢，佢會企定定梳頭串你。如果你見到佢做呢個動作，代表你都幾失敗。
本身佢體力唔係高，加上得一招亦冇卒仔幫拖，用兩個方法好易打贏佢，
一係拋繩圈，擋到佢粒快彈，捉到仲可以射十幾廿槍，一解就會躝地，等佢起身再拋繩圈；
另一個方法仲簡單，就係企定定追住佢狂射，佢接近完全冇反擊能力，就算有時開到槍反擊，
一路瞄實佢黎射應該可以截到粒彈。如果你唔貪清晒全個場，有機會全排第七隻敵人開始，
直到最尾包括大佬，全部分數乘五。全隻game冇幾可呢種機會，所以今排十分爽。

去完酒吧飲番杯，再走上屋頂．．．大佬出現！睇見你就知道點解要玩Wild Guns！
有牛仔、有西部、有動作、有槍戰、仲有巨型機械人！
「喂！唔夠？你仲想要乜？」

非常自護feel之巨大機械人，弱點係頭。常用攻擊係右手機關炮，似牛仔機械人大口徑子彈橫掃，
不過係強化版有兩段掃射，第二段可以改變方向陰避彈中的你，用二段跳避開較安全。

射一陣佢會「坐低」，跟住頸位三對炮管發射．．．

三對榴彈分三次從天而降，落點以你當時位置而定。只要左右走或跳就避到。
建議用二段跳，用行通常行行下自己都唔知行去邊好，閃身又會硬直有潛在危險。

攻擊就係咁千篇一律，加上每次只會用其中一種，完全唔難應付，
最容易打法睇番第一幅圖就知：只要不斷對住個頭拋繩圈就得。
因為攻擊唔密動作遲鈍，計準步幅同移動軌跡好易用繩圈屈死。個人紀錄係死前只出過一招。
唔難打，但好好玩。第一關已經盡顯Wild Guns魅力。

第一關之後，黎緊四關可以自由選擇先後次序。
本攻略會「順序」打落去。

首先到死陰幽谷。只係第二關，但同第一關相比難度已經提高唔少。

果然荒蕪。想拆場，只得中間岩石、右邊峭壁、最左兩棵仙人掌。
常見敵人有名乎其實著草牛仔，笠住堆草好快地走出黎射完好快地走佬，等佢企定射三槍就得。
另外有遁地人，由地底鑽出黎射你，一槍死但次次都係一班噉出。

過十秒左右會出現繩圈機，射繩圈前會打開中間露出紅色核心，一見紅就係時候避開。
雖然本身冇殺傷力，但夾埋其他攻勢時就危險，加上體力高，係一大滋擾。

通常繩圈機出現，隔一陣會有飛天牛仔，但唔好急住射低佢。
除左開槍，有時佢會掟炸彈．．．

掟番佢個炸彈去繩圈機到，可以快手炸爛佢，用槍射有排射。
繩圈機會出沒地圖左同右兩邊，覺得難應付，可以選擇走到最左或者最右，
因為走到角落頭可以拉畫面，匿去側邊可以拉到第二輪有一部會打唔到你，唔使咁麻煩。
最慘係，全排除左飛天牛仔，得繩圈機會出寶物，迫住要打．．．

第一排大佬係機械Mark哥，可以話係機動版牛仔機械人。
學足發哥玩雙槍，一係向你連射四彈，應對方法同打牛仔機械人一樣，
不過彈速要快好多，所以一見佢企定唔郁就小心，代表瞄準緊你。立即轉繩圈啦。

有時會一面走一面地氈式掃射，又係盡得發哥手槍當機槍、連射幾十發唔使上彈換匣之精髓。
因為又快又密想截好難，當然可以用繩圈搏，但最安全係有幾遠走幾遠。

除左開槍，較少出係掟三個炸彈。企定唔走開，最多可以執到兩個。
但執到第二個好立即走開，唔係第三個炸彈好快會爆，一貪心好易冇命。
雖然招式強勁，但體力唔高，用機槍或者霰彈槍追住射最快埋佢單。

然後進入死陰幽谷。對初心者黎講，到今排可能會停滯不前。
最普遍敵人係碌地牛仔，同第一關一樣，要等碌到出黎先打到，加上中槍會擺pose，拖延唔少時間。
水面會潛出榴彈兵，一槍死好簡單，但有必要先解決，一來榴彈速度快，
二來全關只得榴彈兵會跌寶物。要小心佢地潛出水時自己遮住睇唔到。總之留意水面。

會出現幾次的機械飛蟲，向左下右下射兩叉彈換言之企佢正下係最安全，
但每次出現係四五隻幾種陣勢出避彈冇想像中咁易，入場後好短時間會飛走，
好在體力低兩槍一隻，唔想走漏分數要快手同記熟佢地陣型。

大佬同樣係機械飛蟲，但進攻方式特殊，本身只會拋繩圈，係靠複製分身射你。
規律係周圍飛，每秒生一架分身，每生四架分身個身會閃白色，閃一秒向你射繩圈，周而復始。
提多提，一開始睇時間向畫面中間掟繩圈，立即捉到。　

分身同之前卒仔唔同，唔係一射完立即高速飛走，而係慢慢離開沿途係噉射兩叉彈，
分身出得快好快就會被包圍，群埋加上大佬繩圈就變得難打。想屈，都唔係冇計：
屈form係玩自閉，匿去牆角企定怒射，想過關射大佬，想儲分射分身，
分身抵玩架中兩槍加射死夾埋二百二，仲可以玩倍數加分，不過唔加得多因為大佬放繩圈時實要走。
一見繩圈立即飛埋牆角用無敵避開繩圈，大佬體力唔算高，集中火力好快就過到關。
當然繩圈會好實用，大佬停頓即暫時唔會出現分身，分身移動慢又好易一次過捉幾隻，
你夠搏的話，仲可以用自己拋繩圈時短暫無敵避開大佬個繩圈反掟番佢。

越過死陰幽谷，荒原上等待的是最終試煉。
冇錯。真係好大陣仗。第二關大佬就係部巨型戰車。

弱點只有炮台中央炮口，但要進攻，先要避開每次六粒從天而降榴彈．．．

．．．同埋橫掃全畫面之主攻擊巨型火柱。迫力十足，但要避開有方法。
火柱分兩段，上段火柱掃半空，只要唔跳起就冇問題企定唔使避。

下段掃地下，理論上要跳起避，但要睇得準跳高避危險性幾高，
最安全梗係用無敵之閃身，撲埋個火度睇落似中招，但係會穿過火柱起番身安然無恙。
至於幾時上幾時下要火柱掃緊埋黎先睇到，冇信心分得清就係唔係都閃身啦。

最難亦最陰濕，係將兩招夾埋：火柱掃到一半停係中間，再射兩粒榴彈炸你。
第一陰係火柱會停低，太早閃身好易碌左落火柱度，如果係燒下段起身時就會燒死。
第二陰自然係榴彈，咁唔好彩困左係角落頭，上段火柱都話可以立即走番出去，
係下段火柱的話，閃身唔夠距離跳火柱亦危險，非常有限之空間避過兩粒榴彈唔係易事，
唯有睇準榴彈落點走避同盡量滯空，不過跳避要小心榴彈爆風都會有殺傷力，而跳係冇無敵時間。

一番苦戰下，咁大部戰車終於擊毀。初心者或者覺得吃力，除左攻擊刁鑽，
另一難處係佢唔會射普通子彈，亦即係冇得靠爆氣屈佢，相當具挑戰性。

係時候鬆一鬆了，每過兩關，就會有一關獎分關你玩。

第一個獎分關係射紙板大盜，會有五個位置出現，
記得留意橙色，因為橙色打爆左之後仲會跌個錢袋出黎。
唔好妄想打得晒全部，去到後來出得多之餘出得快，單打冇可能0 miss。

第三關彈藥庫，恰如其名，有非常豐富補給，所以唔需要吝嗇彈藥。

一開始未有敵人出沒，立即把握時間炸爆正前面架叉車，會有大彈食！
跟住第一批出寶物卒仲有多個大彈你執，今排好玩之道，就係係唔係都放大彈！

除左肥佬會由左邊鑽探機同右邊屋企窗口，同中間木箱出現，
其他敵人由最左邊分兩條線步入，前線係藍衫人掟炸彈，同肥佬一樣打死跌寶物，後線係四個槍手，
但最大威脅係右角機槍台，勁多能源之餘間唔中黎一輪亂槍掃射。
通常機槍台起動果陣，同場會有同樣多血但有寶物之炸彈人同打死有野食肥佬，
所以一見以上三樣任一，唔使諗即放大彈，清晒卒出晒寶物、避機槍彈同炸彈、重創機槍台一彈三了！

間唔中前面兩線會總動員出擊，假如你有霰彈槍或者榴彈炮，只要瞄準畫面最左邊狂射，一出黎全部死晒。
不過我都係鍾意放大彈．．．

因為之前幾關冇乜幾可需要放大彈已經儲埋唔少，今關又有最少兩個補充，後面多卒又好多卒有野食，
放大彈好過自己打啦，反正大彈都用唔晒最多又只得五個！以上係我打法，想「正常」地玩唔係唔得，
要先留意機槍台，每次起動一定會出個藍衫炸彈人，唔好急執炸彈住，先對準機槍台射封槍口位，
射晒先執炸彈仲趕得切，易打又可以儲氣，不過會因為集中火力於機槍台而走漏好多寶物（藍衫人、肥佬），
所以計落狂放大彈點都有著數！真係架，全隻game所有大彈，就係用黎俾你呢排發洩！

Wild Guns班作者衰一樣野，就係懶，全部間場大佬頭兩關出晒，之後咁多關不斷循環再用。
好似今排大佬又係機械Mark哥，如果之前班肥佬度拎到霰彈槍或者榴彈炮，分分鐘十秒內搞掂。
唔夠快，就會出刀客幫拖。好事黎，因為刀客一隻成千分等於一隻間場大佬分數，
反正打大佬唔限時，係想儲分，一面掟繩圈一面等刀客出黎，一千分一隻仲要無限出有幾可呀？

入到軍械所，守備立即深嚴得多。駐場實Ｑ盾佬兩個人一組，舉盾左一步右一步噉行，行五步就會射你，
亦只有襯佢地拎開盾開槍時先打到佢地，一槍死但機會亦只此一個，射完就會舉盾撒退。
間中仲有刀客埋身，問題不大。

再有小型坦克巡場，每行一段仔路向前射粒爆彈，麻煩在分上下半身，打爆炮台車身會高速逃走，
不過唔可以俾佢走，因為車身先有野食，但真係走佬得走得好鬼快。仲有個方法，就係用繩圈，
捉實黎射會一次過射爆成部唔使分兩次，就一定唔會走甩，就到位等兩部走埋一齊捉就更一流。

頭半分鐘得盾佬同坦克，全部同一條線出，齋用左右掣都夠，直到戰機出現之前。
戰機會定係一個位置，每隔一陣向你頭頂高速移位，移兩次就會橫掃，掃果時封晒位空中都打到。
更慘佢地多血，盡量同佢地保持距離，埋身射你立即向彈幕方向閃身穿過，一路噉樣拉鋸。
真係打唔晒或者太多野要應付，等佢地射兩次之後自己消失啦。

最慘係今關大佬，雖然只係唔多勁的西裝友，但加埋兩隻戰機就勁麻煩，要面對多方面高速突擊。

盡量等人機重疊時飛繩圈。如果俾佢地分散包圍你，都幾係野。
最好捉住戰機然後射到大佬躝地，佢起身前狂射戰機，不斷重覆，乃最易打法。

去到彈藥庫最深處，意想不到的大佬出現：異形機械飛船。
大大個紫色玻璃球自然係目標，你射佢時玻璃球會對住你狂射子彈還拖，
量多好在彈速慢準繩度較低，即係大佬開火時間＝瘋狂繩圈時間。
另外間中左或者右邊門會有牛仔走出黎射你，純粹滋擾威脅性唔大。

見到玻璃球兩邊閃藍燈要小心，閃完燈位會向前射繩圈，
雖然只係直射但出招快所以難避，加上本身子彈多，中左繩圈好大機會死，一定要留意。

打爆左外殼露出核心，先至係真正開始。核心會向天射幾輪光束．．．

之後無數光彈從天而降，亦係全隻game難關之一。光彈數量多差唔多覆蓋全範圍，
降落速度好慢，但離地面半個畫面左右會加速，落地變大再維持一段時間先消失，
多的話變得成地地雷，非常容易叉錯腳。

雖然爆到氣超快同超易打死，爆殼爆唔切，單靠耐唔耐出現之牛仔有排先儲夠，
冇火神炮就要靠繩圈，因為捉到佢除左部機唔會郁，光彈亦會暫停出現，可以較輕鬆搞掂大佬。

第四關金礦，雖然排第四，反而係四關中難度偏低之一。

首先出現的敵人由遙遠山坡滑下，落到洞口頂射你一槍就會向左或右散水。
係我知佢地係好遙遠，但得幾毫米咁高，似乎細得不合比例喎？
難唔止難在細粒難瞄準，而係子彈速度快，個個都係神槍手。一定要襯未滑到落洞頂射低佢地。

有時兩個肥佬坐卡車出黎掟炸彈，快手掃低佢地，因為有野食。

通常你忙於應付山坡班袖珍神槍手，會有卡車神不知鬼不覺去到你面前，
跟住入面肥佬彈出黎鋤你，企中間最難發現，因為卡車好易俾自己遮住，出左黎都唔知。
雖然固定會係三條車軌出現，只要唔行近就冇事，但一隻一千分，冇理由放過卦？

大約過半分鐘，全關最好玩就係呢度：山坡會一次過出五個神槍手，
立即執起之前肥佬留低個炸彈，瞄準中間掟過去，一下炸死晒五隻！

間唔中有飛空艇，因為左右樓房遮住出黎時未必發現到亦冇咁易射中，
去到中間時，艇底槍口向左右路軌兩叉彈猛掃，一係對準槍口封位，一係用繩圈整停佢。
只要唔俾佢去到中間或者唔俾佢郁／開槍，就唔會係問題，而佢飛得慢，通常夠時間。

至於大佬，非常失望，只得牛仔機械人一隻，兼冇卒支援。
「慳水慳力到你班designer丫！」

礦場入面敵人相當地多，典型的碌地牛仔四隻一次，埋身有刀佬，仲有雜技阿叔。
阿叔踩住卡車高速橫過，有時一個有時兩個，經過你時掟炸彈，當然你唔理佢佢好快會消失，
不過一定要理，一來係全關少有寶物來源，二來罕有會出最高分紅寶石，唔係好多地方搵到，
難打但值得去打。因為郁得快加上血多三槍先死，要先讀，方法係一見到佢出現，
將準星放正佢條路中間，行到就黎貼邊時並排橫行掃就得。子彈飛行需要時間，
太早郁準星會快得滯射唔中，太慢又追唔切，假如準星對準佢中心即係失敗左。
飛繩圈可以捉停阿叔連架車，但同時面對咁多人，好難花到時間轉繩圈同對準。

仲有久別重逢的著衫公仔。冇錯又係你唔行近佢佢就唔會理你，圖中可見活動空間相當大。不過．．．

今次中間會加多部。出左左右兩部時唔快打爆佢地的話，三部出齊會被全面封位，
差唔多企邊個位都會俾人射，迫你跳黎跳去避開，好在此時唔會有好多時間剩。

大佬原來一直遠在天邊。就係畫面正中部鑽礦機。本身冇攻擊力，但有無限再生之吊臂炮台。

吊臂炮台得兩種射法，離你近時向前射三叉彈，隔得遠會對住你連射三粒快彈，
正常打法當然係去角位集中一隻，但反而應該版圍攻，因為三叉彈絕對易應付過快彈。
炮台行動慢唔難捉路血又少，一隻一千分，想儲分不妨殺到咁上下先打鑽礦機核心。
正在一次射三粒彈，行近佢迫佢射三叉彈時對住炮口一野擋晒三粒，好快儲得滿氣．．．

跟住火神炮怒掃話咁快搞掂。大大佬唔需要特別爆氣去打，可以炸多幾個炮台加分，咁上下先做低大佬。

礦洞最深，正，又係巨型機械兵器。今次係機界巨蟹。弱點係正中額頭塊綠水晶。

一開始亦係最常用之攻擊，學真蟹嘔白泡，不過佢係嘔繩圈。
目標係前方三叉位左中右狂嘔，因為爆風位基本上全範圍中晒，
要避只有企到左或者右角，或者佢掟時你又掟，捉到佢會暫停唔嘔一陣。

假如唔好彩中左繩圈，立即快手搖甩佢，因為跟住大佬會駁招，
一係額頭射三叉燈，一係落爪插你。呢種情況通常避唔開，所以千祈唔好中繩圈。
當然，你企到角位繩圈射唔到你時，佢一樣會用呢兩招打你啦。

射得咁上下，隻野會遮住封面係噉落爪，唔係野野直落有時會斜插陰你避錯位，睇準就得。
因為落爪唔多導向較隨機，有時企定一個位唔郁都唔會有事。係衰落緊爪時打唔到佢。

打過一段時間或者大佬開始少血，就會出絕招彈幕。一見到佢頭頂蓋昇起，小心。
首先向前射幾野霰彈，之後兩排彈左至右右至左交叉高速掃射，最難避就係呢招。
勇的話索性唔避用繩圈，盡量企近角位，唔好太角唔係未掟已經射到黎，
對準綠水晶一飛，成行彈食晒加郁唔到。唔夠信心就睇位兩段跳同閃身避啦。不過，其實仲難。
而且一次咁多彈，用得繩圈儲氣容乜易。玩左咁耐，飛繩圈功夫點都略有所成，可以一搏喇卦？

巨蟹設計好成功，幾招夾埋其實幾霸道，只可惜Wild Guns主角有無敵繩圈，
唔係佢有擋面落爪一招，難免落得同第一關自護MS同樣下場，被連環繩圈屈死。
死，講到好似全部大佬大而無當，越大隻越廢。

又過左兩關，又到獎分關時間喇！同上關非常唔同．．．

第二個獎金關場景係礦場，亦即係如果係「順序」揀關，就符合番清完礦場再打呢個獎分關。
主要射石頭，石頭跌落兩層路軌再跌落深淵，當然落谷底前要射爆。
細石頭三槍爆一舊二百分，大石頭三槍爆生多舊細石頭出黎，即係等於兩舊石。

另外會跌木桶，一槍爆會出錢袋，錢袋五百點都抵過石頭一舊二百啦。但係好麻煩。
通常出現木桶時，會同時出現肥佬卡車，好似雜技阿叔高速打橫穿過，射得佢地好易錯過木桶。
唔好諗住射死佢地班肥佬係不死，但你更想佢地不死因為一槍一百分，追住佢射得夠多分分鐘成千分都得。
至於打法，頭先打雜技阿叔已經練習過，唔使再多提啦？又係準星邊拍住一齊橫行。
去到最後幾秒，兩條路軌會一齊連出兩架卡車加送木桶，冇信心追到佢地就射木桶算啦，話晒穩袋五百。
「掟繩圈捉住架咪得囉！」
「如果獎金關有得俾你掟繩圈，你覺得繩圈狂迷劉Sir會唔會唔掟？」

跟住到最後一關，裝甲列車。全隻game最特別今關，幾個細排係串埋一齊唔會轉場，同埋只得兩個大佬。

一開始未到裝甲列車出場，你只係搭另一班車追車。起初敵人只係碎料：
飛翼人掟炸彈，飛得慢一槍死有時炸彈都唔掟真係唔知出黎做乜，
同唔知點解西部會出現的越野車，有野食記得打，瞄準車頂炮口啦。

會遇到兩架炮台列車，由右邊出黎，分車頭同車卡，車卡射彈。
有任何特殊槍（當然唔計Pgun），佢出黎時對準畫面邊狂射，未開炮已經爆，
有榴彈炮易打勁多，不過得來福槍就好難，要避幾次彈同用繩圈。
第一架得兩卡，問題唔大．．．

第二架成四卡，得來福槍的話一係大彈算啦，唔係有排煩。
唔係就直接打爆車頭，成列車炸晒，仲有紅寶石，車身唔緊要車頭一定唔走得。

叫得西部又點少得正宗騎馬牛仔丫，不過超時空地騎機械馬，仲衰過越野車．．．

捱過頭六十秒，就追到火車。尾卡最多野玩，車頂有榴彈炮，
前方大炮台先係主力，噴煙之後會射一大堆亂彈，雖然繩圈無效，但用繩圈銷彈好方便。
另外有興致＆有時間，車底堆燃料筒同車身排氣口射得爛。火車係全關唯一可以破壞加分場景。

空中同樣有飛翼人掟炸彈，用黎回敬炮台啦。打左半分鐘左右，有個魚網衫牛仔出現。問你死未？
佢會由右邊跳入黎，沿住車身爬到車尾個平台。個樣確係難頂，但唔好當佢係雜卒。
你會發現佢射極唔死，唔係唔死，不過超多血幾乎等於一隻大佬，用槍有排射，一定要用掟炸彈同繩圈。

因為血多加上炮台干擾，有機會俾佢成功去到目的地，跟住佢就會玩呼拉圈，即係繩圈。
仲未打爆個炮台就要快手喇，亂彈加繩圈夾埋可以好大件事。
真係頂唔順，又有方法：唔係事必要你放大彈，一係你等夠鐘過關，就乜都唔使理。

第二卡容易得多，除炮台排木箱後會跳牛仔出黎掟繩圈同間唔中開槍，唔難打。
牛仔體力唔高純以量取勝，打法係冇牛仔射炮台有牛仔射牛仔，炮台開槍繩圈銷彈，繼續。
玩分的話，除左車底車身，記得木箱都打得爛。一分鐘夠時間你打爆／打死晒所有野。

最後車頭係大佬，無限時，亦冇卒仔，只得你同佢。
車頂榴彈炮一定要快手搞掂，但「大佬」係最左邊個控制台。
見到佢閃藍色，要小心，代表會對地亂射繩圈，跳啦。

見到佢閃紅色，要開心，因為閃完會由右向左成行掃晒。
避就當然簡單啦一個閃身搞掂，因為係射地下，跳起凌空同樣冇問題。不過我寧願唔避．．．

成日講繩圈擋彈儲氣，終於有最佳場地示範。一閃紅，立即去到近右邊角落頭轉繩圈，
「拿！睇實左下角綠色行氣！」

「睇唔睇到？」
冇錯大佬一連十幾廿粒彈超速射埋黎，但繩圈一飛，一粒彈都見唔到全部食晒！
然後右下角，行氣立即多左成截！所以點解打大佬佢射得越勁你越開心，有繩圈根本無敵！

只要按以上方法打，打死大佬時行氣已經滿到七七八八，如果未儲到爆。
不過儲到就滿就好收手唔好射彈一定唔好爆氣，因為．．．

裝甲列車爆左，真正大佬火箭人先飛出黎。都算係最麻煩大佬。招式有好多種．．．

一定會開槍先啦。會「企」定遞起手，然後瞄準你連射四粒快彈。
識點做啦？一見佢舉手，仲唔立即轉繩圈？

有時由左衝去右，沿途掟三個炸彈。有炸彈梗開心，但有時大佬會發癲連掟三四鑊，
夾埋十幾個炸彈成街都係，執都執唔切避又難避，夾埋其他攻勢時更煩。

見到佢飛離畫面，睇實兩個角落頭，佢會空降其中一角，然後拔刀衝刺，速度快一定要避開。
假如撞得準佢落邊個角，可以襯佢未衝打走佢，不過一起步就停佢唔到，
就算你爆氣無敵，係唔會中招，不過動作太慢唔會打得中。

至於增援方面，每隔一段時間會有三隻機械馬牛仔出現，佢地同大佬一齊射你會同時出現好多彈。
雖然體力唔高要瞄準佢地射需花時間，有炸彈就最好啦，一野炸晒三隻。

因為招式多加勁，火箭人係最勁大佬，撞到佢發癲連掟幾鑊炸彈再招駁招加多幾件牛仔好易死，
都話Wild Guns班大佬越大隻越冇用架啦！所以點解打火車頭時唔好爆氣，儲氣到剛剛好就收手，
既然大佬咁難打，用火車頭儲氣，火箭人一開等佢射你時立即爆氣，就超易打一行氣收佢皮。

最後一戰，自然係叫Final Fight。有趣在歐版最後一關係Final Fight，日版叫Last Duel。
「Natsume，Capcom唔會因為咁小事告你卦？」

火車總站就係大佬基地，太空船一隻。真係夠晒過癮。而大佬係兩隻牛仔機械人。
一隻易打，加多隻，仲易。跟住攻略打，你會發覺今個大佬關可以一屈二，非常好玩。

一開始向左走到角，左邊隻自然會向右跳，右邊隻會向前射。
去到差唔多角時轉繩圈，不過唔好立即掟，要等好時機．．．

就係兩隻行埋一齊，向佢地重疊位置一飛．．．

立即兩隻企定定唔郁任你射。記得要忍，唔好咁急住掟，左邊隻落地後等右邊隻行埋黎先好掟。
捉唔到其中一隻，就立即再掟另一個，慢慢一隻一隻捉到兩隻行埋一齊。

只要搵到位兩隻黐埋時捉得住，就可以一槍打晒兩隻，整停佢地之後怒射．．．

搞掂。勁簡單。快手的話，半分鐘以內可以做低晒兩隻。就係咁好玩。

入到宇宙船，第一重關卡由機械人兵團駐守。
金礦見過之吊臂炮台，唔難應付，甚至幫你儲氣，同樣無限出。
死陰幽谷第一個大佬變左卒仔，來福槍四發或者任何特殊槍一槍死（霰彈槍睇中唔中得晒），
攻擊亦大幅削弱，通常一對噉出，企定牆前向前射四槍就走，跑過你時掟個炸彈，
不過有野食而且出得多，打佢地點都好過打吊臂炮台啦。
堂堂大佬搞成噉，變成負責俾野你食的大雜卒，真可憐。

第一關出現過的格林蟹，最後一關終於再蒲頭，係本排雞肋。
每次一隻，行到中間先開火，難處係佢條線左右兩邊有牆擋住，
兩面牆前面堆錢袋可以射爛，不過穿唔到過牆後，打佢只得行到畫面中間之短時間，佢又多血多彈，
有野食但要集中火力先射得爆，或者用繩圈唔俾佢走。射佢拎寶物定放佢走打其他卒自己揀。

西裝友再次搵你報仇。除左有牆掩護，仲有機械Mark哥每次兩隻幫拖。
因為Mark哥只會企牆前射，唔難睇位應付，不過變成冇野食唔好諗住齋打佢地唔打大佬。
西裝友一樣打法啦，有Mark哥幫手都唔係難幾多。今排卒仔勁，點知大佬出反而易咁多。

去到最後大門，見番人。因為兩邊牆擋住，碌地牛仔由以往一次四隻變得兩隻，易應付左。
另外有刀客，純粹獎分嗟。估唔到咁易打。

仲有小型坦克，全關唯一難。難在佢地係兩邊牆後行，但因為太矮俾牆遮住，起初打唔到佢，
但佢會牆後射榴彈打到你，有時企太近牆角唔留心，無端端飛個出黎炸死左都唔知咩事。
因為地利今關全部敵人集中晒中間位置，反而對你更有利，等全部人行晒中間時，
一個繩圈全部捉晒，唔怕走失又可以快手清場入下一轉卒。
就好似上面，一野過兩隻牛仔兩架坦克無一倖免。
如果想拎野食更加要用，因為坦克爆左炮台立即加速逃走，唔捉住佢，好快走到牆後追唔到。
掟繩圈時記得小心榴彈，因為冇準星好易為人忽略，最危急時飛繩圈瞬間無敵避彈啦。

大佬就係大門頂尊門神炮。佢出招全隻game最好玩。開槍，唔係直接射你．．．

係射你側邊，以你當時位置為中心，圍住個人周圍轉圈狂掃，換言之你唔郁，乜事都唔會有；
郁親，就死。特別你行緊時佢先射更易中。最好企定等佢開槍，射緊果陣先閃身或者唔郁。
當然打得大佬唔會咁筍．．．

同行仲有最煩敵人戰機，大佬環型掃射加戰機全封位攻擊，加埋好易連死幾條命。
梗係玩繩圈啦。一係繩圈捉實戰機狂射，反正你企定的話大佬唔會射中你。但更好玩．．．

你都見大佬一次射幾多彈。點解唔索性搵佢黎儲氣？真係好易就爆到氣，跟住屈番大佬轉頭．．．

門神炮都唔係咩手腳，大門為你開。連過六關十八排加多兩個獎金關，係時候到達終點，同最後大佬對決。

第一關獎金關個字板公仔，原來就係最後大佬。但呢度當然唔係紙板咁少野。
最後大佬果然係最後大佬，夠晒難打。不過點大都有路捉。

首先一開波，唔使郁，轉繩圈啦。佢一起身實會向左走．．．

只要對住張檯左邊條綠色柱，等佢就到時飛繩圈，就可以佔先機。

卒仔方面，有．．．我都唔識講，紅番牛仔加忍者混合體卦。
每次兩隻行路出黎，行到張檯左右就停步舉槍射你兩發，再快速著草。
好在係行唔係碌，可以隨時射低佢地，不過出得幾密，唔好以佢地為首要目標。
另左右兩角會出炮台，向前射三叉彈主要封你位，會出寶物，hard打大佬唯佢有野食。

卒仔已經夠煩，大佬本身又好多勁招。一見佢急步走去你前面，小心。
舉起來福槍一秒後，前面三份一畫面高速全掃，似牛仔機械人招機槍，不過截得到，
見到佢係你面前舉槍，立即轉繩圈或者指住佢狂掃，繩圈梗係安全得多，
因為佢彈密，用來福槍同佢鬥掃未必掃得晒可能有彈走甩危險，加上一次咁多彈，繩圈就最正。
但可能知道呢招弱點，最少出係呢招，通常間唔中一兩下陰你，或者夾埋卒仔一齊射，
所以一見到佢想開槍，唔好走，今排好少可可以一次過咁多彈你儲氣架。

最常見招式，係爆彈，即係強化版炸彈，仲要有兩種。
起手式一樣，就係舉槍擎天。一見呢個姿勢，你要睇準．．．

如果向天開炮時射到跪低．．．

爆彈落佢正前，掂地爆炸水平燒晒佢前面半個畫面，爆風仲會維持一段時間。
二段跳絕對比閃身好，除左滯空耐可以等爆風消散，閃身起身時可能會中餘波。

假如開炮之後仲企定定．．．

個爆彈調番轉，佢正前落地之後，唔係打橫而係打直向上燒，
火柱會維持兩秒左右，基本上直線封晒位，跳起接近實中。
縱橫爆彈就係最後大佬終極絕招，亂戰間使出睇唔到係用邊招，好易走錯位死。

佢仲會打埋身，當唔夠打時會突然走左唔見人，掟低三個炸彈後走去你條線，
同你一樣會槍柄怒扳，分別在佢出招快範圍大，真係要同佢鬥快。
另一陰係炸彈。人之常情，見到有炸彈，梗係會快手上前執，執左之後你會發現，
大劑，一定要掟走炸彈先可以拎番枝槍出黎打走大佬。
又或者襯你執炸彈時走埋黎，執完一瞬間硬直，又炸彈係手打佢唔到，一起身就死。
好一野心理戰。千祈唔好貪心。

敵方攻勢一浪接一浪，大佬招式又多又強，最好梗係爆氣啦。
雖然大佬招槍最多彈，但少出，唯有靠卒仔同炮台，特別後者，
除左有野食，炮台另一重要性係連續幾野三叉彈，一見炮台開蓋，立即瞄準佢狂射啦。

都講過，只要你爆到氣，就算係最後大佬，一行氣已經絕對足夠收佢皮，
唯有一麻煩係佢俾你射得多會走過黎打埋身，走多幾次，就未必夠氣做低佢。

加上大佬多血而整體少彈，如果之前門口爆左氣，今關可能未儲夠已經打死左佢。
不過個人喜好，係上關爆氣。因為一開波就爆做低最後大佬冇乜樂趣，
我都係鍾意慢慢同佢磨，玩到臨尾先爆氣，先夠刺激夠戲劇性。

爆機先黎主角同大佬的一段對話。都係「老生常談」。
不過出奇地，原來隻game有「alternative ending」．．．

．．．就係噉。
「噉都叫alternative？」
「將就下啦！超任年代action game咁上下啦！」

套套卡通隻隻game都係，大佬一死，基地立即爆炸。
臨爆之前，一定走得切，睇我地主角一野飛身．．．

直搗黃龍勇破匪幫巢穴（即係太空船），世界再次太平了。

最後主角遙望夕陽，終。然後簽名時間。就係咁簡單。
「女主角爆左，男主角呢？結局又有咩唔同？」

兩個結局，睇落似一個連續落的對話。我鍾意。
"Darn it!"

跟住都係打爆太空船．．．

再慨嘆夕陽無限好。（又）終。
係好簡單好普通。你都係著重過程嗟。超任年代，你唔係預期佢俾成個CG動畫你做爆機卦？

爆完正傳，仲有野玩架。唔記得有個V.S. Mode咩？顧名思義唔係一關關打，係同另一個人對戰，冇人陪你玩，叫電腦同你對打都得，不過當然冇癮得多啦。對戰只得三關，頭兩關即係正關兩個獎金關，第一關打字板最後大佬，第二關礦洞打石頭同卡車，另外對戰獨有第三關：

就係河邊打烏蠅。似死陰幽谷種飛蟲，一群出每群有自己移動軌跡，但細隻／樣衰得多同唔識射彈。坦白講，對戰雙打肯定好玩到爆。不過自己一個對電腦的話，玩一次就夠，因為電腦打得實在太冇癮。我地玩Wild Guns － 或者話玩呢類射擊game － 梗係係唔係都瘋狂亂射有人冇人照射一大餐，但電腦相反係玩神槍手，完全唔郁甚至完全唔射，到有野出時先郁準星過去一槍，再停，再等下隻出現，再瞄準又一槍，再等。因為佢每次一槍而你周圍亂射，好易拎得高分過電腦，尤其最後一關打蟲，一次出咁多隻，雖然電腦神槍手捉晒路，但仲係堅持一槍一槍射，根本唔夠快打得多蟲，就算頭兩關輸晒，最後一關一定夠你回本有突。難度咁低電腦反應又咁慢，單打完全唔好玩。

「有人連vs打電腦都可以輸，請聯絡劉Sir領取獎品。」

大大話話係超任面世兩三年後之當紅年代出，仲要係該時期之動作／射擊高峰作，系統同遊戲性超越不少同類製作，加上一點幽默同新奇，Wild Guns理應可以成為舊世代電子遊戲經典之一。不過一直冇乜人理，冇辦法，始終超任主要市場係日本同周圍亞洲地區，香港亦太追求日本色彩，隻game完全唔日式，「新奇」對好多人而言另類過頭，加上RPG同戰略類方為家用機重點，動作同射擊「移植」性質較重一路感覺似附屬，所以由超任崛起到沒落，Wild Guns未被留意或重視過，結果變成一隻underground classic，本身"Weird West"世界觀已經夠晒 cult 啦。冇人理唔緊要、被世人遺忘唔緊要，好在我遇到呢隻game，同而家亦仲有機會玩到，就係贏在夠簡約，一個十字掣三個掣加個零鐘頭，玩極係噉次次一樣，但歷時十幾年仍然打極唔悶、爆過一百次仲想爆落去，反而去到廿一世紀隻隻game全個joypad幾十個掣用晒萬幾個function十幾個鐘先打爆，可能玩一次就唔會再玩，甚至玩都唔想玩，太煩喇，太花時間花精神喇。所以我寧願玩番超任、紅白機甚至玩flash game，都唔想玩次世代。

「old-school才是皇道。」

而家已經冇遊戲廠牌諗住或者想出呢種nbs官能game。因為唔記得左，電子遊戲係遊戲係娛樂，而唔係工作或者功課。或者老野比較固執。