尤特龍



「既有正義之斯比頓星Cybertron Primus
自有邪惡之尤特龍Unicron。」


G1即最初代變形金剛盛事,就係由屋企電視機升level到入戲院,拍得成電影可見有幾多fans、有幾多細路中招。電影版創舉有配合變形金剛形象同八十年代靈魂之超hard rock/metal soundtrack(有LION玩metal版主題曲《Transformers》!)、比電視版黑暗邪惡得多首次有人死 - 係呀電視播左幾十集都冇死過人架出奇地,要入屋嘛對象係細路同討好家長,形象梗係健康架喇 - 仲造就史上首隻最大型變形金剛出現:吞噬其他星球維生之巨大星體尤特龍。傳說佢早於遠古之前已經存在,當柯柏文同麥加登地球一戰同歸於盡,向斯比頓星進發之尤特龍將麥加登復活成甲威龍以消滅博派。柯柏文傳位予(廢柴)馬格斯,最後博狂兩派聯手保衛斯比頓星,火棒戰勝甲威龍,進化成新一代博派領袖洛迪文再摧毀尤特龍。

「咦?斯比頓星呢?唔係有佢同尤特龍對抗咩?」
「自有分曉。」

套戲 - 係動畫電影唔係2007年Michael Bay加史匹堡套真人版 - 1986年上畫,不過玩具版要到差唔多二十年後2003年由日本出,相隔咁耐理由唔難明白。雖然十分喜歡變形金剛,細個冇機會擁有過,06年執左人生第一隻、一執就執最大製作之斯比頓星作為慶典。下一年再有來自107之厚禮,集齊變形金剛宇宙至正至邪,特擇斯比頓星開光一週年為尤特龍開封,以茲紀念。


「事先聲明,你會睇到好多無知的一廂情願批評/評論。因為我old-school。」



配合尤特龍氣勢,個盒都巨型過人,差唔多尺半高比斯比頓星更大。邪惡萬歲。
此尤特龍所屬動畫係Transformers Armada,乃所謂「尤特龍三部曲」第一部。



盒頂有尤特龍玉照,不過照顧小朋友變左打爆星球而唔係食星球,顛覆原著,冇癮。
仲有「附送Mini-Con Dead End」,亦即左手個小星球。



個盒右邊俾你睇隻尤特龍好多機關玩。發光閃燈彈弓裝置自然唔少得,仲同Mini-Con有唔少互動。
最重要係有漫畫送!預左唔會好睇,但免費野小便宜冇理由唔貪丫!



Armada中一大角色係Mini-Con,好多大角色會送埋Mini-Con,而尤特龍特色就係可作展示平台用。
當然大前提係你要集得齊先。亦即係$$$$$$$$$$$$$。



左邊係尤特龍簡介,同上面格局相似,但細節意義相差甚遠:
1986電影版帶出博狂兩派新領袖同邪惡星體尤特龍,加過渡至電視新一季,具開創性同歷史性;
玩具版之Armada世代,(只)係尤特龍從宇宙深處出現,博狂兩派放下成見共抗大敵。行貨。
詳細講乜?唔知,美國唔做由日本接手之後,動畫版已經完全冇興趣。因為謬之千里。
仲有另外三隻玉照...冇興趣。一入左日國手,變形金剛立即被東映化。
東映動畫睇冇問題,機設則從來唔多鍾意。機體我較好粗線條同機械化,亦即美國色彩。



一拉出黎,勁大陣仗。縱橫交錯之各式膠料困獸。



前面放尤特龍,畫冊說明書放後面。
「唔難拆卦?」
斯比頓星玩拆盒四條友拆兩個字,有過經驗相信尤特龍唔難應付。點知。



以上就係破封之大邪神封印。唔計彩盒本身,
包括有大量膠紙、六個吸塑、三個紙卡、三條橡筋、十六條膠條同廿六條粗幼不一紮帶。
冇工具單徒手加唔爆盒去拆,拆左我九個字,單除紮帶已經夠手軟。
相差三年,但斯比頓星包裝較細之餘更堅固同易拆,可見技術上之進步。



尤特龍、行星破壞神,終於現身。上圖係按照盒面同官方相擺設。Armada,完全唔同電影。
睇落矮左,或者話少左一半,中間黃色部份本為赤道位置而非底部,同冇咁巨型冇咁多尖刺。
唔知係為美觀還是其他原因,本身銀白色之外殼,玩具變成透明紫色,
效果唔差,只係搞到過於美觀唔夠壓迫感。



忠於原著有衛星環圍繞,相信設計時其中一個難題就係佢,做到出黎除左裝飾仲有實際用途。
星環上下各有十二個突出點供放置Mini-Con,加埋星體前端同兩邊,一共可放二十七隻。
論星球型態,正面睇尤特龍確係幾無敵,但一由側面睇,就穿崩。



叫得星球,自然預期係球體,雖然本身已經被裁左一半,抵死在後半「嘗試」補完成全球。
變形同合體機械人最大挑戰,往往係要收埋對腳,廠方決定係...唔收。



所以一轉後面,球體中間變成大大件機件。更似太空船。
不過最大關鍵,係到底似同電影版會唔會差太遠?對比一下:



電影入面見尤特龍,十次有九次係「正面」,另外一次都係正面,不過鏡頭側少少囉。
玩具因為物理限制唔可能做到好似電影中之「向前」效果,所以只有從上面望落去。
特色係中間血盤大口,「嘴角」位沿表面橫生尖刺,外圍再加一個大圓周黃色圓環。
聽落都知差得遠,特別個口好卡通,下半呢...甭提。
衛星環變左白色,另因玩具性質所限縮細左,但整體已經相當不俗,一睇就知係尤特龍先。
只係,孩之寶&Armada,催毀了我心目中的尤特龍。我要電影版!



因為個環頂住唔可以「平放」,拆左個環得唔得?雖然底部有平面,但唔係直角向前,
真係噉放法,前面反而會向上斜,更加唔知點。而且冇左個環,比俯視角度睇,更怪。



為令星球可以放穩,下半球改成平底。反轉睇睇,個底都好靚喎,係見得人果隻。
斯比頓星有所謂「Battle Station Mode」戰艦型態,尤特龍冇,不如自製一個:








Unicron Annihilation Station Mode

將尤特龍星上下倒轉,環顧四面,根本同一部戰艦無異。
全靠對角可以轉,轉成打平向前,就可以成個星球倒轉唔會頂住。
相比斯比頓星個Battle Station,呢個自製Annihilation Station好似正得多喎。
我甚至鍾意呢個Annihilation Station多過Armada星球樣。你話死唔死。



尤特龍個跟班Mini-Con Dead End,同佢一樣係變星球,雖則似浮游炮多。
外型可觀,只係因為體型細同變形機關之累,好易令部件移位維持唔到球狀。



變形第一步,所有星球一樣,全球拉平。有點似星球大戰的地面武器。



下面成足,下半成手。成托炮天王。



Dead End特別在而用到好多球形關節,手腳部件可作多向轉動,人形造型好靚。大奸角就係大奸角。
雖然Armada只得尤特龍,但玩過下其他Mini-Con,Dead End外觀同可動性絕對係最佳一隻,
其餘有部份簡直係樣衰到不堪入目,夾硬為整到人形而整,係超乎常理的慘不忍睹。



左手就係枝炮,絕對係全攻型機械人。衰在做唔到炮頂目鏡放頭前面扮瞄準。
「突然覺得佢好有Rockman大佬feel。」



上半可以水平三百六十度轉,玩GERWALK扮自走炮台都得。
「立即由Rockman變成前線任務。」
雖然叫Mini-Con,其他係變車變飛機,佢變小行星,照常理仲大隻過其他所有正常變形金剛喎。
點mini法?尤特龍派佢打都贏晒啦!使自己出手?



變機械人只係bonus,主要任務係做尤特龍月球,衛星環作運行軌道,二十四個定點任擇其一佈置。
不過做得尤特龍頭馬自然地位超然,唔需要同其他Mini-Con一樣紆尊降貴...



星球頂有個獨家皇位留俾佢坐。將Dead End裝上,就可以啟動防衛模式。



其實Dead End唔止月球同機械人咁簡單,可以變身成炮台,此比例計,一炮可以炸爆一個中型行星。
為可以靈活轉動,裝上後唔會固定,但反效果係郁動大時有機會跌出黎。



為增加可玩性,後部仲有彈弓機關,斯比頓星玩Planet Key,Armada系列梗係用Mini-Con。
星球後半有發射器,可以一次入三粒彈,同Dead End推動開關發射,
特點係可以用推力度控制一次發射單發或三發,而且彈力強勁,細路仔向但幾好玩。



同遲三年出之宿敵斯比頓星相比,開發技術差一段距離,個樣更加同「正版」差得遠。
星球變成「胸像」,中段黃色地段太粗大太顯眼,但用衛星環營造到圓形假象同能夠平放,總算合格。
如果以此為標準,繼續完成至成完整星體,真係會相當巨大。只可惜冇乜可能。電影版太老了。



兩者表面紋路勁細致同有紋理,但斯比頓星毫無疑問可觀同精細得多,好多建築物同城市修飾。
講火力,尤特龍得「末路炮」同唔顯眼之飛彈六發,個卡通口向上完全欠缺威脅性,係有大尖刺靠嚇,
斯比頓星向前兩門巨型主炮,下半仲有兩對向後,全方位防備,殺晒。



至於後面,更加冇相比之必要啦。尤特龍只得半球,似宇宙船多過似星球,Armada版嘛...
「噉想搵電影尤特龍之fans,咪好唔滿意?」
「所以全盒摷晒,只見機械人樣,一幅星球型態彩圖都冇。」

咪就係驚整張彩圖你睇,再同玩具相比,立即興趣大減,星球樣實在兩回事。但將功補過。
「真係出到星球變形金剛喎大佬!作為第一隻,咁易咩!」



雖然Mini-Con屬於Armada,後出之斯比頓星一樣有顧及保存全條線之原整,玩具生意嘛大佬。
表面有七個突出點頂四前一側二,因為得Dead End一隻,搵佢客串住先。



「你條二五仔!!」
客串後,Dead End已遭尤特龍吞食天地侍候。隻玩具可以用對角控制開合食星球架。
只係對鋸齒形牙好「益智」,唔同原版八路牙,而且個口太細加封底連Mini-Con都食唔到,冇癮。



開始變形。第一步,打開蓋。係呀,前上半,其實只係兩塊「板塊」閤埋,內堣云禳C
衝星環之軸柱,亦只係就噉放係正前搭住就算。夾埋都幾簡單/馬虎。



然後要將衛星環前後兩軸拆成兩半。前軸無固定,但後半係嵌入對腳中間。
說明書冇提到,一路叫你變腳,變晒粒星先同你講要插番個環入兩隻腳中間,
好在對腳可以拉番開少少,唔使成個拆番開再變過,唔係的話就吹到脹晒。
美版變形金剛說明書就係噉,圖唔清楚又冇文字解釋,一到複雜位你就死。今次算符碌。



拉出星球後半成腳,同斯比頓星一樣。
「既然個Battle Station只係人同星中間之『GERWALK』,尤特龍得唔得?」
變法一樣,照計可以喎。我地試一試...



雖然前方有飛彈可以做艦頭,上半身都扮到艦橋,但唔多得。拆走衛星環同外殼板塊或者會好少少。



兩塊白色甲件就係腳掌,特別在兩趾合一:



尤特龍係邪惡象徵,腳都要用前後趾成鳥足狀扮魔鬼。但實際用途更大。
因為上半身重量不衡加部件多,為穩定重心,要借助此巨大腳掌。但成效冇想像中好。



中間黃色圓環部份係雙手拼埋,拉開已見機械人之形,再將兩手拉番上膊位即可。



手腕有空間收納兩拳,左手白色,右手特別在用透明物料製,配合到好多透明件之全身。



最後一步...個頭倒轉放左背後。睇落似俾人一腳踢甩左個頭。真灰。
頭頂膊頭四隻角都可以轉,肩角轉得純為玩(Annihilation Station哈哈哈),頭頂對角轉係為變形時收埋。



拉番正個頭,變形正式完成。未睇過Armada,唔知日版動畫入面尤特龍個樣係點,
但同電影版相比,叫做認到,但細節例如上半身,相差都幾遠下。
係我知呢隻係以動畫版作參考,唔係電影版。但一廂情願的我少少唔開心係有的。



星星多野玩,機械人一樣。外殼可以轉向前射彈,另兩腳有所謂「陷阱」可以收藏Mini-Con,
因為得Dead End,特向地球聯邦軍情商兩隻鐵球返黎示範。空間都幾大。
手下同武器存於足內,肉搏時可以攻人下半身,都可算為暗器之列,邪派式陰濕也。



放低腰位裙界,可以拉開透明襯紅之腹部開啟另一個「陷阱」。
不過唔係好大,兩隻鐵球只係剛剛好放得入閂得埋。



雙手係重點。四指有兩段關節,姆指特別地冇關節但可以水平扳向外。立即好玩得多。
「你想rock定metal?」
任君選擇。加上腕上尖剌,估唔到尤特龍原來咁black metal。



之前隻斯比頓星係「特別版」,加送尤特龍爆頭乙個。點解?話說電影中洛迪文於尤特龍體內引爆,
消滅軀體,頭部飄浮成為斯比頓星新月球,電視版新一季以此繼續發展。
電影中面色為白,同個口長期張開,唔似其他人面角色講野時口部會有郁動。
星球版接近,但個樣太慈祥,同個口開得唔夠大;爆頭版紋路靚但黑色好怪。可以兩者合一就perfect。
「喂,唔係應該關Armada事咩?又講電影?」「吹咩??」



肩甲用軟膠做,因為變形同擺姿勢時好易刮到同撞親。另外仲有得玩Mini-Con。
每邊有位可以裝一隻,個「迫位」有箭咀圖案同可以轉,似足細個玩停車場噉款。
「我鍾意!因為以前成日玩玩具車同停車場!或者我要追番Hot Wheels系列!」



背後重點係兩對翼。電影版衛星環會摺疊成魔鬼翼形狀,但冇兩塊殼掛住,非常唔慣...
官方本來構思係兩個殼個口向上擺做另一對翼,但太重唔可行。叫做對殼唔使分開放唔怕唔見囉。
另外仲有個機關,見唔見背脊後頸位對落仲有個開關?擺隻Dead End上去一推...



前面心口透明裝甲立即大開,突出巨炮發射飛彈,攻擊力仲要好強添!最特別係粒飛彈...




似集束彈式之散彈設計,真係前所未見,有新意!(雖然成個裝置都係低B左少少...)



除左巨型、星球型態同機關重重,尤特龍仲有一個賣點。就係
「絕招!」



Shinning Finger!!!
(喂,尤特龍唔係應該出Darkness Finger至係咩?」
後腦位同手腕各裝兩粒紐電,推推掣就可以閃光,唔似斯比頓星得變形時至有,不過尤特龍冇聲出。
因為係閃燈加頻率唔同,要補捉兩個同時著燈如上,十分高難度。我玩左成個字先符碌影到。



講到玩,有少少不足。手腳關節足夠擺到好多姿勢,要佢打晒功夫都得。



「胡鬧也!」
對腳玩到人字馬做埋大戲仲可以。



睇落活動性高,問題係關節限定角度大。對腳一係唔開罰企款,一開就似上面,紮晒馬。
同我都唔知係上身重心定腳掌關節問題,隻野好鍾意學Michael Jackson玩moonwalk,
企定定睇落似冇問題,全身都會慢慢向後傾然後斜到跌。我隻野已經跌過不知多少次。
又勁喎!甚至跌過幾次落地,依然絲毫無損!甩件都係一裝搞掂,完全冇問題!堪讚!



「烈風正拳突!」
具可動性但要擺得靚同定確係有點兒難度。不過已經做得非常好。
三年後斯比頓星,活動或穩定已大副改善。尤特龍都可謂身先士卒。



「斯比頓星同尤特龍有乜關係?」
知你想問好耐。既然斯比頓星變得做機械人咁勁,點解電影入面唔出手打救子民?
美版動畫初代時斯比頓星只係一個機械星球,唔存在所謂創造神Primus。
到日版「尤特龍三部曲」:Armada、Energon、Cybertron,破壞神尤特龍作為中心,
單博狂聯手唔會夠抽,就整埋神祇Primus,以史比頓星為軀體化身變形金剛,同尤特龍分庭抗禮。
不過單睇玩具,高足成個頭,邪惡永遠比正義壯大。這是定律。



「咁矮想同我鬥?受死啦Primus!」



「邪惡才是皇道!!你仲唔加入狂派?」



玩完仲有貼紙同漫畫,貼紙係以前日版玩具常見贈品,見番感覺old-school。
至於本漫畫...幾版仔,無謂睇。內容咪同上面講過一樣。只為介紹尤特龍出場。冇野睇的。



本漫畫後半係product catalogue,睇晒成個Armada系列,完全唔like,
部部野造型同變形都唔多得,太日式卡通圓滑幼線條同人性化,真正有吸引力除左尤特龍,
只有Tidal Wave,三部戰艦合體成巨型戰艦再變巨大機械人之狂派大將。
「所以話,永遠都係做邪派好過正派。型嘛。」



作為星球變形金剛先行者、比斯比頓星早面世三年,加上係Armada版唔係電影版,可行性同外觀之真確度當然可以做得更好,相信後者更加,因為我唔會係唯一一個old-school fans,心中之尤特龍就係電影版個樣,同唔妥美國放手後之日版卡通系列,玩完會覺得同自己所想完全兩回事似被昆,尤其星球個樣,球都唔球,點星?不過以事論事,完成度好高同埋真係好玩,兩個型態都全身機關,就連隻Mini-Con都勁高質素,雖然擺姿勢冇斯比頓星咁穩,娛樂性卻更高,仲要更大隻。特別鍾意對腳,因為唔係球形,對腳得以保留到,唔似斯比頓星掀開塊蓋仔就叫做腳,雖然呢個做法會比而家更加穩。所以我仍然會對佢予以高度評價,稱為最佳變形金剛玩具之一,並不過份。

三年發展,星球變形金剛技術已相當成熟,睇斯比頓星可以做到咁高水準就知,只係有幾多星球可以噉玩法?第三彈,已經係crossover星球大戰玩死亡星變黑武士,人星型態皆預料中之更進一步。或者尤特龍破封一週年紀念,會係佢。