今日070408，就係九展玩具日，亦係業內人士口中之「死貨散貨場」。
業內人士唔多睇好，起初興趣唔係不大冇乜諗過去，因為冇預過有我想搵果ｄ，
但7/4玩具展第一日有個鬼佬拎左隻建造派上黎，就係果度$180買返黎，
「油巧零多邊影金剛埋牙！」
得唔使講襯呢日最後一日旋去！身邊亦冇乜人有斬獲，但我反而掃得非常開心收穫豐富，
你知道劉Sir最鍾意就係執垃圾執死貨執二攤！
除左買野，原來玩具日仲有野睇唔係得個行字，都算係意外收穫。
就算唔係買野，入黎睇都抵！
你估到架啦。一望你就知道，劉Sir點會唔黎睇呢個櫃？
經典＆絕版變形金剛玩具大集合喎！
個櫃上層係G1角色大集合，好在「正傳」其實唔係好多隻我有興趣，唔係睇完呢個櫃肯定追到死，
真係要追只要右邊隻音波就夠。雖然已經有隻復刻版，但我仍然較喜歡呢個舊版設計。
下層就緊要喇！柯柏文麥加登甲威龍柯柏文全部無關，
而係我非常大興趣之龐龍，一個機械人可以拆開火箭基地加坦克軌道，
架車仲可以入電行路出聲，講基地個個鍾意大力士同福特巨人，
我反而鍾意呢隻Omega Supreme！
「唔買返隻玩下？」
有得買你覺得我會唔買咩？據官方資料顯示，呢隻野係未出過日版只有美版，
加埋呢種大型玩具產量唔會多，而家想買？
「$XXXX唔該！」
當然唔少得G1名場面之一：恐龍派大戰建造派！
建造派係五部機械人合體一隻大機械人，恐龍派調返轉一部機械人變身做隻巨型恐龍，
最起初博派未有合體機械人例如飛行派，就只有恐龍派可以同建造派匹敵，
兩幫人馬大戰係初代變形金剛經典時刻黎架！
只係個場景冇設計成兩幫人對恃變成得個擺字，有點兒浪費左咁多收藏品！
恐龍派得兩隻極小變形，好想買返套原裝，只係同龐龍一樣，而家仲點搵到呀？
「又$XXXX唔該！」
七十至現代著名超級機械人大集合，各位'80男性眼中天國之景！
最重要梗係超獸機神斷空我，鷹+象+虎+豹獸性組合，又係超級機械人經典之一！
仲記唔記得斷空炮同斷空光牙劍？記得？即係你同劉Sir一樣，out Ｑ左啦！
望望個超靚新版，再睇返最左手邊個初代斷空我，十幾廿年前隻玩具確係幾「old-school」。
「死開啦超力電磁俠咪阻Ｑ住晒啦！」
仲有我好愛之三一，套動畫唔係好鍾意無論劇情定畫，但部機實在鍾意，
除左新三一我覺得極樣衰之外，元祖三一同特別係真三一依舊地位非然，
所以見到呢個超靚復刻版本，非常動心。只係，都係呢個問題啦：
「一隻$2550，全套三隻承惠$6666！」
大佬，係想買呀，價錢對我黎講實在太高，兩三舊水買一隻玩具對我黎講好奢侈架喇！
但呢個係死貨場嘛，正我最鍾意死貨，其他人唔要唔識我當寶人棄我取，
好平就執到正野，執埋執埋四舊水有找就摷到四隻正野！
「哈哈哈哈哈哈！」
冇錯又係鋼鎖！呢隻新版鋼鎖雖然個樣同舊版接近完全唔同，
但精細同靈活得多而我亦更鍾意新個樣，因為比舊版「更暴龍」，
係有少少瑕疵亦唔忠於原著，我冇所謂夠靚同多野玩重要過舊唔舊版，
呢隻出面炒到過三百，兜勻全場等呢檔有得散賣唔使搭豬頭骨，
仲要呢個價位，又唔知點解我行足個幾鐘等人執左佢又冇人爭喎！
噉等極都冇人幫我分擔係要我接收，迫於無奈我執左佢先啦！
跟住過隔籬檔執左呢兩隻。過癮嘛？Iron Man同Venom都有變形金剛！
全個系列仲有蜘蛛俠、Thing、Hulk、Ghost Rider、美國隊長等等其他Marvel英雄，全部都變晒做變形金剛，
嚴格黎講唔算係只係本身個角色駕駛以自己做藍本之機械人，理得佢丫我當係變形金剛噉玩法！
係好過癮，問題係美國英雄香港唔算多fans，正傳又冇出過，又「唔係變形金剛」，有叉人理咩！
有！有幫人專清死貨的劉Sir！雖然呢個Marvel變形金剛系列都有幾間有，
係呢間可以兩隻價錢抵人地一隻，抵幫襯啦夾埋先一舊水！
雖然呢一舊水當中係蝕左十蚊雞，因為隻Venom只係四十，但個老細借ｄ倚唔找返果十蚊！
Iron Man同Venom隔籬仲有呢隻，
「有冇興趣？廿蚊賣埋俾你！」
減多十蚊（但頭先果單找少左十蚊計返即係冇減過），又好似幾過癮，平平地搏一舖都搏得過！
係我知道唔係變形金剛，不過而家只要變到形都會勾起我舖癮，況且呢隻蜘蛛俠真係有得玩，仲好似玩得幾過癮噉喎！
今次一掃就掃四隻，只係手頭上幾隻都未玩完，有多左隻六變獸，黎緊又兩架車黎緊，呢幾隻幾時開光？
「．．．希望聖誕之前啦！」
豪開的阿捷就唔同唔貴唔買，本來目標係絕版GP-03全武裝貨櫃，$1100算係抵玩價卦？
相信一定抵玩，因為行過圈返到黎，隻野已經唔見左，換左個梁榮忠戙係度。
阿捷：「部GP-03呢？」 梁榮忠：「賣左啦！你咁慢！」
本來諗住搵佢影相簽名，但買唔到部野，灰晒，冇晒心情了。
唯有執呢隻次選，黃金版青銅聖衣boxset，$350。
聖鬥士我一向冇玩因為興趣唔大，呢個boxset起初以為係好似黃金戰士果個噉，
入面一個靚底盤，開幾個窿俾你放聖衣，點知原來只係將舊版五件加多件人馬座塞晒入個箱度就算。
所以我唔鍾意聖鬥士。
「仲有咩正野？」
冇乜啦，抽獎抽極都唔到我地呢ｄ地獄黑仔王，而且獎品（只）係音波我都有啦，
「喂俾ｄ新意啦抽隻新版MP麥加登得唔得呀？」
只掃得四隻，其實未掃完架，好似Titanium Jetfire好有興趣，型得黎全金屬仲要勁大部仲要平過你所想！
只不過，都知道冇時間玩咁多野，唔敢執咁多住啦。
「下一場死貨場係幾時？旋call我！」