PS1時曾經紅過一隻game叫《天誅》,扮演忍者利用忍術同敏捷身手執行各種秘密任務同暗殺,比《Metal Gear Solid》更早將隱藏元素融入第三身立體動作。雖因歷史同故事深度不及《Metal Gear》致知名度較低,但創新系統、幕末年代觀同忍者永恆魅力,仍為《天誅》贏得唔少忠實追隨者。

唔要求玩家見人就殺死殺難死而玩潛藏低調,顛覆動作game傳統,同《Metal Gear Solid》一同對往後動作遊戲發展帶黎衝擊,開拓出「間諜動作遊戲」新類型。唔止次世代,就連Flash都玩埋一份:



Ninja Rinseout




潛入

「喂!忍者黎咩果條?」
入到隻game,第一眼望到就係上面個刀客。點睇都似中華武俠game多過東洋忍者game喎!我地再睇埋遊戲簡介:

About入面果個就似番忍者喇!睇睇段英文,作者仲隆重其事「向《天誅》致歉」,即使商業成就唔及《Metal Gear》,玩家心目中《天誅》地位已經相當神聖,做唔到classic都做到cult也!
「Ninja Rinseout故事講乜?」
...唔好意思,從頭睇到尾都唔多覺佢有講到。但,算啦,你會執著咩會計較咩?




行動

遊戲以2D介面進行,每關只有一畫面大,其中包括若干敵人,全滅即過版,及就表現評級。作為忍者自然要隱密執行任務,遊戲鼓勵玩家避開敵人視線,但唔係硬性規定,你可以照當普通action game同敵人硬碰硬,但會大大失去樂趣。基本操作keyboard搞掂:

十字掣控制忍者移動,上係跳、下係跪,S攻擊,另說明中冇提到D掣向後閃。跳向牆忍者會自動跑牆上頂,跑牆時拉後會翻身落地,除左必要時迴避敵人耳目,同用作轉移至上層,仲有意想不到的特別用途。操作非常簡單易上手。




暗殺

合乎現實地敵我皆為一擊必殺,忍者攻擊只得一掣,透過唔同組合可以使出三種招式,站立S係直斬、前行S係突刺、跪低S係小刀斬,不論邊種出招時角色會向前突進一個身位,因為距離範圍一樣,加上任何敵人都係一招死,出邊招隨你喜歡,覺得邊招型咪邊招囉。不過論實際用途突刺使用機會係90%,因為係行走中使出屬於移動攻擊,收招後會繼續前行,更切合實戰情況。反正乜招都係一招搞掂,你唔會咁無聊行到人地身邊企定或者跪低再出招卦?除左某幾個特別時候,相信全隻game你都係用到突刺殺敵。不過有樣野一定要注意:角色攻擊範圍比你想像中遠,但因為突進性質,當敵人處於最埋身時你會打佢唔到,甚至出招突進後因為大家距離拉遠,反而令對方攻擊到你。同埋突刺係前行中使出,太遲出招可能同敵人重疊先出劍變成空招。攻擊判定同好多Flash game一樣覆蓋範圍內所有物件,亦即可用一刀解決複數敵人,加上忍者步速快,比敵人平時巡邏快一倍,不過發現左你佢地速度會變成你咁快,所以要把握速度優勢從速從後接近。

S掣右邊粒D掣係後閃,會彈後一個半身位,速度同普通行路差唔多,勝在唔使轉身可以快速後退同有無敵時間。要用到後閃相信情況相當不幸,因為唯一用得著係被攻擊時避招,閃時會自動擋住敵兵攻勢短暫無敵(只限刀劍,弓箭類防禦不能),又或者假身再反擊(此方為最大用途),不過如果係擋招,通常敵人見到你擋會繼續一輪亂劈,因為後閃之間有硬直唔可以連出,有時擋到死得仲快,同背住牆或版邊冇得後退會出唔到後閃,被屈埋牆角要非常小心。操作說明冇提及,或者因為作者都覺得作用不大,或特登唔講你聽可以擋招要你玩暗殺。但睇埋跟住部份,你可以將閃身融入暗殺術之中。




隱密

做得忍者、講到明扮《天誅》,自然要投入角色秘密行動。敵人視線可以視作一個長方形,頭頂至地下高、長約半個畫面,只要唔踏入長方範圍就唔會被發現,所以同敵人處於相同高度,只要遠離半個畫面以上皆作睇你唔到論。只因系統不足產生幾個盲點:

因為視線限制於長方面,站立或跳躍時位置高過頭頂低過腳下一律視作不發現論,所以高處準備落下時你可以走到最邊緣位置等待時機,你一日唔落敵人一日睇你唔到,雖則完全唔合乎現實。

另長方形係唔覆蓋敵人正中位置,所以你企佢前面佢睇到你,但你走到同佢黐埋一齊重疊,去到最埋身發現感覺唔到,無論你點郁敵人點轉身,只要唔踏出多於佢面前大半個身位仍然能夠隱藏自己,但同時因為你打唔到如此埋身敵人(或者係作者故意之「debug」設定?),重疊時出招移前反而會被發現即時死亡,最好係等轉身時走到背後或直接後閃再殺。冇錯,後閃最大用途可能唔係實戰中避招,而係暗殺用。有時走得太快出唔切招,亦可以利用盲點企定敵人位置,等佢轉身先行動避免暴露行蹤。你夠玩野,甚至可以黐實敵人一齊行,只要唔超前佢就唔會有事。

你話做忍者冇得出忍術冇癮?有。全game唯一忍術係隱身:

部份關卡會出現草叢,走入草叢中跪低,企起身前判定為完全隱身,但一定要人地見唔到時跪,敵人見到你先匿入草叢係冇作用的。不過唔係全部都得,只有會郁、闊過一個人同高身草叢(跪低時遮到一半)先能夠隱藏,判定同樣可視作長方形,有半個身進入已經得,唔使一定要行到入中間成個人俾草遮住晒先當隱到身。雖然機會唔多,但每次出現都係過關關鍵。
「上面,點睇都唔似棵草遮得住個忍者喎!」
「...吹咩?忍者大晒架啦!」

假如你咁唔好彩或咁低技術被發現就會被追殺,敵人唔會顧及地形就算會跌死照追,當你逃離佢視線範圍一陣,佢會於最後站立位置回復警戒狀態或巡邏。殺人時你可以肆無忌憚,唔需要擔心過程中或事後被揭發,因為敵人只見到生人見唔到死屍,背後有人被殺、睇住同伴被殺(well,應該話半個畫面以外的同伴被殺)、上面成條屍飛落黎跌正佢面前,或者行行下見到路邊有條屍都可以完全冇反應,同埋只限見到你先算發現,一個兵見到你,係唔會提醒其他同伴一齊郁你。
「好在佢地唔係我同事或者朋友。」

有樣野要格外注意,就係跳。跳角度硬性限定上斜前,唔可以垂直跳,中途亦不能改變方向、距離、落點或攻擊,最好先多練習。要攀高請跳埋牆,撞牆後忍者自動跑上頂,跑牆中拉後會空翻落地,可用作避開上層敵人耳目(但要小心翻身時拋物線被發現),同估佢唔到地,要黎升level。




傳承

每關結束後,電腦會以被發現次數、明殺次數及暗殺次數評級,低至高係Awful、Poor、Ninja、Master同Grandmaster五級,同時爆機後會按你整體表現再作最終評級。只係評級準則相當含糊,應該係明殺、暗殺同被發現次數三者一條方程式計分再定,以下全屬經驗推斷:明殺全部敵人的話,唔好意思,你完全達唔到忍者低調行事之基本要求,Awful;人均發現次數唔過一次而有半數敵人暗殺,可以升為Poor,大半或全數暗殺者,算作Ninja;冇被發現全部暗殺做到Master。可見暗殺會為你爭到好多分。至於最高級之Grandmaster,要求同Master類同,但加多樣野:要跑牆打一個空翻,打完空翻有限步數或轉身次數或時間內,殺死最後一/兩個敵人。因為唔係每一關流程都包括打空翻,有時為左拎Grandmaster,你要殺人前專登搵面牆打番個先,絕對搵黎搞。尤其爆機之最終評級,某程度上同你每關拎唔拎到Grandmaster冇關係。

但,以上純屬猜測。好多時玩完覺得(唔)會係邊個評級,點知,(唔)係,好似有時似Ninja但俾Master,有時應該係Master又話Ninja,甚至明明Grandmaster點知走Grand。我試過唔打空翻都做到Grandmaster。亦試過拎盡Grandmaster但爆機後做唔到。吹到脹晒。所以以上當吹水算純粹大概參考用途唔好當100%正確。睇落去你就知。




任務

遊戲共分十關,清晒關卡內敵人就可以進入下一版。以下全攻略包含Apprentice Guide(入門心得)、Time Attack(以最快爆機為目標)同Title Attack(以每關拎最高評級為目標)打法,部份關會分超級型(用盡bug顛覆現實及物理常規之超級英雄破關法)同真實型(貼近忍者身份或現場環境之真.破關法)兩種攻略。



第一關俾你熱身用,一開始站於屋頂面對兩個敵人,
樹上士兵只會原地轉身,樹下士兵則左右徘徊巡邏。
難度低,但有三種方法過版。



因為開始時兩個士兵都係背向你,常人推理,
自然係先跳上樹搞掂一個,殺佢時連個天都行雷歡呼!



之後下面個士兵差唔多走出樹蔭範圍,時機到可以走落去殺埋佢。
記住行就得,因為用跳會去到好遠反被發現。



呢個方法,可以輕鬆拎到Master,加最短時間內過版。
你接受唔到樹下個士兵睇住上面條屍跌落黎都掂行掂過,
或者嫌拎得Master太cheap,以下係兩個真實型打法:



就係先行落地下,殺死樹底個士兵,避開上面士兵耳目...



之後立即轉頭跳牆再翻身上樹,順勢回身一刀殺埋另一個士兵...



「你就能夠贏得Grandmaster的稱號。」
正常黎講,你殺完下面,上面個已經差唔多夠鐘轉身,
所以通常殺完樹下,等樹上再轉一次身先至衝上去。
想挑戰難度,咪殺完下即彈牆殺上,時間係剛剛好半秒都唔多,
夠晒戲劇性同真實性。嫌太難太煩?仲有個超級型加真實型過版法...



就係跌落地後唔殺人,而倒轉頭立即跑牆翻身...



之後同超級型一樣,殺完樹上再殺樹下,搞掂。



「Grandmaster!」
個天又再行雷,型呀。冇錯,型,真係搵黎搞的。
好似好多方法做Grandmaster。但我試過先屋頂跳上樹殺,再落地空翻上樹再殺樹下,
反而做唔到Gradmaster。都唔知佢點計。無奈。




第二關要越過哨兵台,沿路解決三個士兵,步伐夠快十分好玩,基本上一味死衝就得。



第一個敵人係首次登場長刀兵,攻擊距離長,盡量唔好同佢正面交鋒。
所以一開波,襯佢未轉身立即衝前殺死佢先。時間絕對足夠。



唔好停繼續走,立即跳牆跑上去...



再殺第二個。假如你手腳慢,好容易上到去撞到佢剛剛轉身。
驚唔夠時間又唔打Time Attack,可以等佢轉一次身望番右先走上去。
如果跑緊牆時撞著佢望左,就空翻落地等佢下次機會先上。



殺完哨兵佢條屍會跌落下面,唔使停繼續行同佢一齊跌落去...



落到時,會同下面個士兵企埋一齊,條屍跌正佢前面。你可以立即行右再轉身殺佢。



驚的話,唔好郁,佢點望都望你唔到。可以選擇此時D掣後閃再出刀。



想拎Grandmaster,一落地或等佢轉一次身望左時立即前衝撞牆,翻身落地再殺。



搞掂。Grandmaster。真實型超級型都得。不過超級型打法(黐身等)絕對易得多。
真實型拎Grandmaster時間好緊迫,落地要立即撞牆,仲要係剛剛好唔走多先夠時間。
整體今關好好玩,因為由頭到尾就係路上遇人殺人,夠爽。




第三關得一隻敵人,佢死守屋內只會望左。一睇,都知今關易玩...



跳上屋企走到後面暗殺就得,夠晒忍者格。



因為佢唔會望後,所以一開始冇跌落地或跳錯位,正常一定拎到Master,完全冇難度。
可惜在今關冇得拎Grandmaster。




黎到第四關,除左樹頂士兵一個,仲有新敵人弓箭手,見到你時佢會猶豫一陣,
再退後拉遠距離拋物線射箭。要小心射箭係冇得用後閃擋,
所以唔好俾佢發現,迫不得已時要速戰速決。



不過初登場時佢向右行緊,亦即擺明叫你立即衝過去殺佢...



之後走到牆角,等樹頂士兵轉身望左時撞牆翻身上樹...



噉又Grandmaster。相當簡單。你話個士兵睇唔到地下弓箭手條屍唔合理唔夠真實?
「好,我地玩多次...」



「等箭手去到樹底先殺...弊!遲左出手,俾佢發現到!」



「暗殺到樹頂士兵,不過衰左一鑊,點算呀?」



「唔係卦!噉都有得做Grandmaster?」
就係咁不可理喻。都唔知幾時係乜。吹脹。
「空翻大晒?」




第五關只得一個兵守屋下牆腳,同一個箭手橋上巡邏,睇落簡單,其實好多道理。
一共三個玩法:難度最高真實型、簡易版超級型、同奪AGrandmaster攻略法。



真實型的話,首先企到如圖大概位置,然後等。箭手會向右行...



行到大概距離橋尾三份一左右,跳...



落地時應該牆腳士兵轉左身向左,箭手亦走到最遠...



立即轉身一刀...



再潛入草叢。怕唔夠時間匿得切,可以走返上屋頂暫避,企牆角位箭手會睇到你。
今關係第一次出現草叢,用過就知重要性,唔靠隱身唔會夠時間暗殺箭手。
嫌難捉時間,有個極簡易方法,超級型...



一開始立即直行跌落去,就會剛剛好同士兵重疊。唔做大動作,佢就唔會發現你。



因為要等佢轉身,可以先面向定左...



等佢轉身時,立即閃後...



再一斬!打晒成隻game,呢個可能係唯一一個位你會用到D掣後閃,
方向一定要同上,向右的話牆角位唔空間俾你後閃或出斬而不被發現。
之後仲有充裕時間匿入草坪。覺得又太簡單想有番少少挑戰性,得...



就係玩Grandmaster。一開始落地入草叢,再伺機解決箭手...



之後企橋三份一位置,剛剛好士兵睇唔到...



等佢轉身立即衝過去,要走到埋身。怕趕唔切,可以先入草叢避一避等佢再轉身。



埋到身後,唔好輕舉妄動住,等佢再面向左...



跟住上掣跳唔會俾佢發現,立即打個空翻落佢背後再殺...



就能夠奪得Grandmaster稱號。只係,要浪費你好多時間同工夫。
三個玩法,睇你鍾意邊個任君選擇。




第六關似第三關,又係一個兵守住一間屋,分別係今次冇得走屋頂。
一開始個兵係背向你,睇落好似立即直衝就得,
其實係假象,因為就噉直衝會差少少時間先到暗殺不能。
如果你玩Time Attack唔計較有冇被發現,直衝望到你時你仲夠時間先發制人,
但想走正宗忍者隱藏路線...



正確方法係用屋前草叢匿埋,等佢望一次左先...



轉身立即入屋暗殺。記得唔好衝動,一開始直衝差兩步佢就會擰轉頭發現你。
「棵草叢咁矮,我唔信匿得埋個忍者!」
有讀者投訴。方才攻略唔合乎現實,亦即屬於超級型。噉我地研究真實型玩法。



其實唔一定要跪草叢匿埋。可以捕捉敵人視線只得半個畫面遠之盲點。
其實你企到草叢邊,只要唔係成個人入晒草叢,都唔會被發現。
「...仲唔真實過跪草叢喎!」
好,我地又討論另一個方案...



因為一開始位置起衝只差幾步,我地就行前幾步先,假設靠棵樹遮住,
等長刀佬轉身,立時樹後現身衝入屋中將佢暗殺。
「噉會唔會真實少少?」
好似仲假...不過,Master過到關就得啦,理得佢?






黎到第七關。攀越幾塊岩石,殺石頂士兵就得。
睇落好簡單,但有少少蹺蹊。



士兵巡邏路線非常短,最右大概係樹蔭邊...



最左就約上面,同岩石邊差四五個人位。
要上石,唔好靠正石邊,要隔一個人位左右。



當佢行到左邊就黎回頭,立即跳埋牆...



上到岩石頂,應該仲有一秒幾佢先到最右邊轉身...



時間剛剛好,只剩多少少俾你走盞。要強調上石時唔好企到貼邊,
要隔一個身位先跳,因為塊石唔係垂直平面有彎曲面,
貼邊跳有時會上唔到,跳第二次先跑到牆,上到去就撞正佢轉身。
企開少少先跳,就唔會有上唔到情況發生。此乃蹺妙一。



蹺妙二,在於你一上到右邊岩石頂,左邊就會出現一個長刀兵。
要解決佢冇難度,企定岩石邊(噉都睇唔到?),等佢向左行就得。
當然,想型/想搵野黎搞,仲可以玩多少少野...



就係等佢一轉身,立即落去先打個空翻再殺...



搞掂。Grandmaster。相信冇幾多人會咁無聊。因為浪費咁多時間加危險。



第八關係初心者難關,兩個士兵長距離巡邏,再加箭手原地警戒。
今關重點係耐性。千祈唔好落地一落就死,先跳上樹頂走到邊位等。



等前面士兵走完一轉返轉頭向左,就會出現如上虛位,
前面個士兵走過你位置,另一個士兵同箭手都望向右,
此時就可以行落去,跳會去到兩人右邊即死。



落到去應該撞正士兵箭手二人黐埋,可以好順手一刀兩件,
建議用不斷S出直斬,因為突刺有機會殺到士兵,但出招時黐住箭手過左判定。
只要殺到右邊兩個,左邊個士兵有排未轉身,好易搞掂埋佢。



記得落去之時機,一定要士兵超越箭手前,
如果好似上面兩個重疊左,落到去就只餘非常緊迫時間不宜冒險,
而錯過一開始機會,就要等長時間先再撞得到盲點。記住要有耐性。
「我冇喎!」
冇耐性,或者玩Time Attack者,都得。直接衝埋去一抽三啦。



「......」
我已經冇晒聲出了。試過彈牆先殺左兵,都冇Grandmaster,
反而我乜叉唔理,一開始立即跳落去見人就斬,最後做到。
真正無話可說。會唔會後閃都同Grandmaster有關?已經唔敢研究。
此乃歷史性唯一第八關Grandmaster,仲要唔彈牆加被大庭廣眾目擊都拎到。請鼓掌。




上關係初心者難關的話,第九關關會係初心者絕路。



第九關,作為尾二一關敵人唔多,一開始即衝上岩就可以殺到長刀兵。跟住...
面對懸崖峭壁,加上另一邊有士兵睇實,好多人唔知點過。
下面棵樹純粹假像,唔可以用黎踏腳。
「...點算?」



正確攻略方法,首先走到崖邊最角,可以用長刀兵條屍做記認,
當前腳踏空、忍者同崖邊橋柱重疊,就差唔多到位。



一見士兵轉身向右,立即跳過去...



較得正位,就會剛剛好落到崖底跑番上去...



就上到時不斷S直斬,一上到去就可以立即殺死士兵。
士兵轉身極快遲四份一秒跳已經太慢,一定要同佢轉身同步先會不被發現,
冇信心,跳時可以專登俾佢見到,因為AI問題,佢會顧住追你衝落懸崖跌死。
因為跳位同士兵轉身時間要對得好準,跌死無限次之後就會掌握得到。




終於到第十關,敵人亦係最多一次。重點係所有野要頭一round做晒,
因為各敵人速度唔同,唔可以一次過完成,亂左再抓緊機會全暗殺好難。



第一層有兩個,士兵企定,箭手左右行大約一秒轉一次。
一開始(要一開始)立即跳上牆,跑牆時拉定下,上到頂落點正正係草叢,
拉實下,一落地就可以立即跪低隱身,唔係是但一個會見到。
一定要一開始立即行動。遲半秒都唔得,否則會被其中一個見到。



又基本上一落地要立即出招殺兵,殺唔切匿埋等待下個時機需花一段時間。
因為係隱身殺法,正常可能係全隻game唯一一次出下S。



等箭手背向你,再上前殺埋佢。搞掂一樓。
小心箭手巡邏路程短轉身頻率高,但可以一開始上到去,應該冇大問題。



上面兩個長刀兵較麻煩,一個企定一個徘徊,要就到兩個一齊望右較難。
假使你一開始清晒一樓,巡邏長刀兵應該走緊向左,最佳行動時機,
係佢走到崖邊棵草時,佢踩草就可以跑上去...



落地時應該可以撞到佢回程,兩個一齊背向你。夠快手...



可以趕得切上前一刀插死晒兩個。任務完成。




「爆機!」
正常高手一舖係兩分鐘甚至分半鐘內完成,打Time Attack超過一分鐘已經唔合格,
如果認真打,最高目標係全廿二員暗殺做到真正之Grandmaster。
做Grandmaster一定唔可以被發現,就算做到全暗殺,暴露行蹤一次都只可以做Master,
同埋你之前幾努力每關拎Grandmaster,黎到爆機只計你總表現,係唔會睇你每關拎咩級數。
「所以,無謂搞咁多野喇,有時真係。」
爆左機,先發現你打生打死,原來係為左救公主(卦)。成隻小丑噉款的公主。



「枉我替主公打生打死,
點知救左你仲唔安樂!死啦!」




未玩夠?唔緊要。仲有個終極挑戰。首先,問問大家,知唔知個死字點寫?Ninja Rinseout的寫法,是
不見血不死
冇錯。但有冇可能唔見血死?有。尾二一關你都試到熟晒啦。因為崖邊有個長刀兵,殺佢之後跳崖再從頭黎過,跌死不見血,所以唔當你死但計殺多一個人。持之以恆,你就可以達到...


「這就是傳說中的百人斬??」


想的話,77人斬、107人斬、167人斬、169人斬、777人斬、7777人斬、Megadeth咁多斬、想幾多人斬都得。當然,
「你要無聊得過劉Sir先。」
有性趣朋友,不妨挑戰劉Sir的無聊/on9。


實在太鍾意打Flash game,特別呢隻完全補捉到忍者神韻之Ninja Rinseout,打贏之後再不停向(更)完美進發,令我重拾以前打紅白機灰機超任研究屈form同bug鬥高分之樂趣。
「自從次世代出現,新出的電子遊戲,好似已經唔記得晒呢兩樣野,打機真正開心過癮之兩樣,要靚要真,而唔要好玩襟玩。」
而家新game玩落似做功課多過似打機,好難吸引到我投入,唔似舊game系統簡單但變化無窮,在簡約規範中開發各種不可能及可取可笑,爆左無數次仍然有癮拎出黎繼續玩繼續摷bug諗屈機,都是old-school好。
「向Flash game的retro spirit致敬。」

「有緣,自會與『續集』Ninja Rampage相見。」