以超筍半價執左部性能規格僅次於S3的Razr Maxx（Motorola HK R.I.P.，我這個Motohead會永遠懷念你），終於用返電話打機殺喪屍，唔係Dead Trigger，而係曾經一上Play就見到Glu Mobile賣恆廣告的Gears & Guts，玩落就醒返起，點解我咁唔鍾意玩電話game。

隻game好簡單，飛車入城殺喪屍賺錢執道具，完成任務過關之後買野升級再殺過，畫面靚玩得又夠爽，衝入喪屍群時近鏡zoom埋去睇點樣撞散晒堆喪屍濺到一車血係幾正的。不過玩一陣就由好想玩下降到純粹為過手癮層面，因為遊戲性同Flash game分別不大，6關各6排全36版來來去去不離限時內殺某數目或某種喪屍、搵物資、走checkpoint等幾種玩法，就連地圖都要幾個輪住翻炒就算，分別只有越後關數敵人越多越屈機，實在有點馬虎，即係我寧願你唔整咁多關但每排都有自己特色任務好過。老實我成日覺得iPhone同Android唔器重Flash是個陰謀，除左Flash食ram食電，仲因為一行Flash根本有超大量性質非常接近的現成遊戲你揀，好似Angry Bird未出之前已經有無限個一樣玩法一樣得意的Flash game啦，唔係排斥Flash黎保住Appstore/Market，真係好多遊戲唔會發到圍，繼而冇得發大財。

而最唔妥就係陰謀之真正目的：game免費你玩，但玩落就會發現一定要使錢先可以繼續落去。最常見手法係遊戲入面有兩至三種貨幣，低級免費而高級要用真錢兌換，呢樣野Glu就係經常俾人小到爆炸的表表者，好似之前玩佢地另一隻喪屍game Infected，畫面靚又非常好玩的守城策略遊戲，唔同兵種相生相剋設計得十分好，係難得優質電話game甚至可列為最佳之一，但你可以用免費貨幣買同升級的兵仔只包括幾種屬性，要集齊唔同性質兵種克制敵人，好多要用真錢先可以買同升級得到，換言之你唔俾錢就肯定唔可以玩超過頭五關。今次Gears & Guts打喪屍可以執螺絲，但螺絲只買得到垃圾道具好野全部要金幣，一係以平均每日有5個進度慢慢儲，一係俾錢買，一個金幣價錢相等於五毛黨一個post人工。前半隻game你可以靠螺絲應付，但去到後半就算所有螺絲買得到之道具買齊、通通升到最高級，都冇乜可能過到關，想玩落去？俾錢買金幣囉。但超戇居通通唔平，勁少少都要幾百個至千幾個金幣，你會唔會為左買枝槍仔俾三十幾蚊真錢？為架勁車俾百幾甚至幾百蚊？仲未講隻game都幾多廣告喎。你叫我使幾蚊我冇所謂，但為一隻電話game俾幾十蚊甚至幾百蚊仲貴過PC game，就未免太on9了，我去歡樂天地使完百幾蚊都最少可以用飛換禮物，你俾到乜我？

打左個幾禮拜玩到第四排，仲徘徊於不斷打螺絲同搏執到稀有道具打到悶，本來諗住廢鬼事玩，點知見到Market上面有個Glu金幣修改器，一用立即有十八萬金幣點亂買野都好難用到一半，隻game就突然間變得冇晒目的同挑戰性了，由前半隻game玩近兩星期都冇大進展，到後半兩晚爆機 － 其實一晚都爆到，不過連Razr雙核兩激ram咁勁都可以成日lag同crash，拖下拖下搞到要兩晚，而打爆機只得一副畫連動畫都懶整，果然拍得住Flash game咁頹，冇枉我一蚊都唔俾你賺，因為玩完發現真係好搵笨，我力量型同速度型最勁兩架車升爆級全部裝晒最強武器攻擊力去到兩萬幾，而最後一關話喪屍只有千幾攻擊力，但我架車數字上勁佢地廿幾倍玩落都有壓力，如果單靠俾盡得兩三千之普通車同道具，我真係唔明有咩可能打得爆機，甚至黎唔黎到最後一關都成問題。

其實好想玩多次Infected，隻game真係整得十分之好，但好似係用自己貨幣唔係用金幣，即係個破解器冇用，可以不理了，Glu的貪婪整死左呢隻佳作。下隻玩乜好？Dead Trigger要再等等，梗係煲今期流行加擺明柒到爆炸的Black Metal Man啦。