一隻無間地獄flash game。因為已屬陳年代作品，畫面系統全部8-bit世代級數簡單過簡單：火柴人由左邊衝入畫面走向你座城堡，去到城門就會「叩門」扣你血，你要用種種方法阻止。主要殺敵方法，係用mouse拉條友上半空再放手跌死佢，玩到後來敵人數目會越來越多、速度越來越快、更出現唔可以用正常方法殺死之勁敵，就要靠每關分數換算成之收入，兩關之間過渡時段請卒協助攻防或花錢強化城堡。

聽落容易，但初玩可能去到十幾關就死，等我寫番個入門篇攻略。初期未有收入，就要靠自己一手一腳守城，因為用mouse捉人，待機時盡量將個箭咀放係左邊，噉樣火柴人一出黎就可以捉到，又只要將個人扯到個頭高過"casualties"個字一定跌得死（特別係遠景出ｄ人），唔識較位夾硬高速拋佢上頂就得，又或者掟埋牆邊，因為有得撞牆反彈所以會易跌死ｄ，不過因為好花時間之關係臨到每關最尾最好唔好用呢兩招。

過左第四關應該夠分起temple，起左之後將敵人低空放入城，隔一陣就會變成自己人。捉人好處係比殺人高分（普通人仔計五倍），但就唔計casualties冇kill bonus，不過計番都係高分ｄ。之後就可以訓練唔同兵種，人數同「出招」之密度／機會率成正比。通常都係起archery range訓練箭手，不過一定要好好好好好好多先有用，起得幾隻仔基本上完全冇威脅性，起碼每關請多五至十個先見效同夠應付面前挑戰，睇你夠唔夠錢啦。

跟住可以起workshop訓練工人，當俾人扣血時會自動幫你修理，唔使過關後俾錢買修理咁破費，長遠計著數好多，不過初期唔使請太多因為敵人攻勢並唔係咁密（尤其中期，請睇落去），又係每關加幾個就夠你捱住，請十零個左右可以捱到好耐架喇，之後先慢慢加番都唔遲，當然有閒錢都要加強一下城牆，總之盡量唔好浪費分數係過關修理。另一個更好玩玩法係先起mana pool訓練法師用魔法，跟住至起workshop同archery range，真係頂唔順先請番多ｄ箭手同工人。請十六個法師已經可以用晒所有法術，二十個夠頂好多關，因為十幾關開始火柴人一堆堆出黎，用一下爆炸就清噉一埋，又可以立即清場俾下批人出黎，絕對係好過請箭手，我特登開新一局玩用呢招，20法師1工人0箭手5000城牆，每關加多一兩個法師就得，去到呢個地步你只要耐唔耐出一下爆炸就搞掂，不過其實都幾無聊，所以我去到要教班靚仔玩縱雲梯。

十五關前你一定要有法師，因為開始出現只有法術或箭手先殺得死之巨人。至於demolition lab起黎都冇用，同法師招「爆炸」一樣不過就要先招降敵方再用條友做炸彈，我最後先買仲要買左番黎差唔多未用過，不過反正大把錢咪整黎玩下，而且去到廿幾關開始敵人都會有炸彈人，你整爆佢地就有同樣效果可以炸Ｑ死好多人，所以其實廿幾關開始反而易玩左，但要記住一定要親手整爆先有效果，箭手殺死對方炸彈人雖然一樣有爆風但冇殺傷力。。所以真係想（難）玩，唔好起箭手，淨係起法師之後主攻城牆同工人，好似我噉300法師已經可以去到hold實個3掣狂click不斷用法術招降人都仲係用唔夠三份一mana。

但記得初期唔好亂咁請人，因為請親人都需要軍餉，以每關埋單分數計，再計座城有幾多卒開支幾多睇你賺定蝕，如果唔夠錢俾就會走，所以開頭ｄ關唔好一關起人超過十隻，唔係過關會死好多卒又要蝕錢。雖然法師係好玩，但當你去到後邊又會玩到悶唔想一直施法咁困身，加上敵人越來越多越來越快，跟住就會請無限個箭手番黎抵擋火柴人浪，下場就同我一樣，仆街死＞炸Ｑ死＞射Ｘ死＞唔知做乜。無聊。

因製作於'2000世代初偏中期，flash game仍屬萌芽時期，冇而家咁花巧咁靚，同往往似紅白機game無限輪迴，睇個勢都預隻game冇得爆機，flash本身幾食memory，後面關多人又多動畫好易拖慢部機，正路玩三四十關就會收手，不過我已經去到乜都唔使做淨係睇班友送死境界，自然會無聊繼續落去睇下會點。要建成一個初期天下無敵城堡，目標係100個法師無限出法術，城牆起到5/600000已經好足夠，因為只要有50個工人實修理得切，而且後來ｄ錢係多到用唔晒，到時你起多百幾二百萬城牆都仲有錢淨，總之寧願請多個工人都唔好過關時俾錢補血，反正實夠時間修理番。反而箭手先係要有幾多請幾多，好似我四十幾關時1500個箭手根本冇乜人可以埋到座城，但係到百幾關4000個箭手都有一半人截唔到，我兩關時間已經自己施法捉左千幾人，可想而知再後面ｄ關幾咁恐怖，全靠之前投資城牆，夠硬淨又夠多工人所以點打都冇乜扣過。但要記住唔好見自己大把錢，過親關立即瘋狂請卒，一開心得滯過左預算就會搞到跟住ｄ關係噉死人。

因為年代恆久遠，而家叫我再認真煲一舖相信我都未必頂得順，所以摷番Ｎ年前2004段記歷史紀錄，同大家分享當年我有幾戇居。諗番，都唔知點解會忍受到去三百幾。

第五十二關，紀錄係115XXXXX分，57XXX Casualties，120000城牆，100工人，300法師，2000箭手。

去到第八十關，分數同殺左幾多人都冇咩意義，反正而家我只需要請3000個箭手之後放係度唔使理等班友一衝出黎就射Ｑ死。冇錯，其實隻野去到後面同本來個目標完全相反，唔係要ｄ人仆街死而只係等佢地「自然」死。所以基本上玩左頭廿關之後，你已經唔使再玩落去。你根本完全唔需要出手。甚至想出手都出唔到：太快。

去到105關，150000城牆，4000箭手，300法師，100工人。

應該係去到第116關，我都唔記得喇，有次試過一面等過關一面由頭玩過，結果新玩果盤玩到第十幾關呢邊先過到一關，而家一晚先過得幾關，淨係過關計分果度都耐過打一關呀真係。現況係200000城牆，4000箭手，300法師，151工人（多左個忝），每回氣7XXXXX unit upkeep，10939410 spendable points。呢幅圖我捉得好辛苦架，須知而家ｄ人由版邊去到我座城門口只需要半秒時間。呢一幅圖算少野架喇，其他時間之血戰情況係絕對比相中精彩。

未放棄，不過一關要成個幾鐘，過得好慢。終於過第二百關，9999箭手，666法師，666工人，200000城牆。話就話成萬個箭手，但係其實都唔係所有人都截得到仲係有四份一人可以埋到座城。本來城牆都想起到999900，不過而家每回合二百萬分都唔夠但係unit upkeep就要差唔多二百萬，廢事搞到破產所以城牆遲ｄ先再起。

突破250關，9999箭手，666法師，666工人，9999900城牆，千四萬Casulties，三億分，每回合二百二十萬軍餉，過一關要成兩個幾鐘。冇得爆不過並未放棄，繼續無聊落去純粹因為無聊。（．．．）

三百關，四十三億分，二百萬傷亡，二百二十萬軍餉，666法師，666工人，但係因為舍妹玩野搞兩搞之關係，箭手多左個變左10000，唔夠型忝唉（冇計去到呢個境界只有追求呢樣野）。可以講之說話同幅相入邊ｄ血一樣，唔係好多。

第三百三十三關。夠喇。其實目標係666。不過當開住隻game可能到訓覺都未過到一關，仲要開始窒甚至lag埋部機．．．都係收皮算啦。

現今flash game越來越專業，從畫功到製作質素到遊戲性，唔少業餘作品水平甚至不下於真正工作室製作之收費遊戲，比較起黎Defend Your Castle實屬相當初階之作，不過不損其存在意義及娛樂性。就如個人心目中史上最佳電子遊戲之一Wild Guns時所言：

「old-school才是皇道。」

這份老感覺，而家ｄgame有幾激有幾靚一秒有幾多多邊形，都帶唔出。