我鍾意吳宇森。我鍾意周潤發。我鍾意雙槍雄。我鍾意慢動作。我鍾意槍花血雨。我鍾意造作扮型。我鍾意hard rock同heavy metal。
「所以，我鍾意《Wanted》。」
其他原因，包括我鍾意超級英雄，我鍾意美國漫畫。《Wanted》係美國漫畫改編，作者係Mark Millar。
「請勿認錯。《Sin City》同《300》兩套戲原著漫畫，作者叫Frank Miller。」
Mark Millar係當代美國漫畫界最成功創作人之一，致勝之道係異色題材。一般美國漫畫因為政治正確關係，大多從英雄角度出發，結局亦往往邪不能勝正，同一貫美國作風一係民族主義一係頗為低能，又好難怪香港人睇日本漫畫而唔鍾意美國漫畫的，我睇開都撐唔落有ｄ野。不過英雄漫畫經過左幾十年，大家開始追求寫實同黑暗，好多作者大膽嘗試，好似《Wanted》調轉奸角戰勝英雄，角色擁有異能唔係儆惡懲奸維護和平，而係無惡不作想做乜就做乜。故事講世界上所有壞人團結一致，殺晒全部英雄，再在幕後暗中主宰世界一切運作。主角本來係朝九晚十凡人一個，某日秘密組織搵上門，發現自細離開的老豆原來係世上最強殺手，不過剛剛俾人殺左，組織就搵佢繼承父業。除左劇情得、畫功好，更好睇在真實：平時睇漫畫各位正派文質彬彬打架都打得斯文過人，而家係奸角話事立即順眼順耳得多，人人爛口99%對白充滿粗口同助語詞，部份角色直頭用粗口或俗語改名，睇得非常爽快：做得壞人、打到飛頭爆肚，唔加多幾錢粗口，邊度似樣？你有冇見過唔講粗口的壞人？未睇故事齋睇對白，《Wanted》呢部漫畫已經唔可以錯過。
「咪住！《殺神特工》唔係講殺手咩？」
首先，《Wanted》電影的而且確係講殺手，但當中冇神，亦唔係咩特工（or特攻(?)），全個名只得「殺」有關係，我唔知邊個譯得出呢個名、同片商點解會批，譯《邊緣殺者》之類林嶺東槍戰片式娘名，可能都好過完全同戲中主題無關的《殺神特工》。
「但，well，老實講，其實本身漫畫，都冇乜『Wanted』的意思，又或表達唔出當中含意；套戲也是。」
可能要同漫畫一樣講超級英雄大戰成本加設計有排計，秘密組織由超能人變成殺手，聽到都知完全兩回事。過癮在連製作都偏離常規搵左俄羅斯導演Timur Bekmambetov，代表作有《守日神》＆《守夜神》（正戲也）。電影同metal一樣，東歐獨特在有一份其他地區搵唔到之神經質、反常規之瘋狂觸覺，既然原著都唔係範疇中常規，改成電影自不然同樣追求離經叛道。美版trailer典型荷里活格打到飛起加一睇立即俾錢入場（我嗟），但真正想感受套戲，應該睇俄羅斯版trailer，導演同地方文化唔同，連個感覺非一般，更接近原來想表達之感覺、氣氛。
「美國播？一槍爆頭冇可能出到街先啦，第一件事。」
trailer吸引（兩個版本都係），但上畫只算2B級，有點擔心。漫畫中血腥暴力同粗言穢語獲保留，但通通有所收歛，例如唔會出現漫畫中一槍射到個人分開兩截、成抽腸飛出黎呢類精彩場面，又對白勁爆粗字幕卻譯得頗為和善 － 話時話，好似同期上畫的《Superhero Movie》，都係2B級，字幕反而仲勁仲放！話冇咁過份，已經好過好多改編電影，如Marvel Studios出品i.e.變形俠醫，兩隻怪物拆左成個州，一個人都冇死到一滴血都冇？好睇一回事，有時寫實好緊要，就如近幾年漫畫發展。
故事方面，一開始已經係絕代殺手俾人佈局殺死，然後朝九晚十凡人主角出場，大名篋神衛斯理（沒錯，這是真的，漫畫都是這個名）。直到呢個部份都同漫畫好相似，就連主角介紹自己段獨白，幾近完全引晒漫畫頭幾版所寫，不過冇睇過原著完全唔會有影響，因為套戲改到可以當另一個故事看待。電影版保留左秘密組織，但變成殺手公會，用織布機織出人名天機決定暗殺目標，已經係完全另一回事，而且所謂從布中取出人名之方法，十分敷衍了事同欠說服力。全套戲真正擁有超能力只得主角同「佢老豆」兩個，漫畫中篋神衛斯理絕技係直感殺人，可以任何場合用任何工具奪命，手上有槍更加係一擊必殺唔諗唔望自然會瞄準射中一發子彈死一件，電影入面用科學角度為大家解釋。不過直到最後大戰前大家可能唔多覺主角點堅料法，因為公會入面識親開槍，都必定識得拉西絕技，開槍開到好似打乒乓波殺波噉款，跟住粒子彈曉轉彎，換言之隨心所欲百發百中 － 聽落都幾武俠小說。但美國漫畫中的英雄歹角，又何嘗唔係中國武林俠士的西洋寫照丫？
劇本起承出人意表地強，動作場面更加近年難得可以再有新意，睇預告片都知重點係玩子彈，槍大家一樣（當然，主角的槍靚人一等啦），反而子彈多花款，似武俠片各有自己一套兵器，用子彈突出每人特色。鏡頭同慢動作同樣開左個新天地，好多戲預告片輯晒最正重點（甚至正過套戲，如《Superhero Movie》），《Wanted》相反預告片好睇、正場更精彩。後半一如傳統發現被組織出賣，跟住單人匹馬以一敵百，但老土還老土你未必咁快估到晒，因為前半步伐夠快，只係亦因前半咁穩當，發展完角色去到轉合差稍欠力度。故事新加主題宿命論，布中人名會影響將來，先下手殺左佢可以預防災禍發生，但此「殺一救千」之天意主題除左最後方便全個公會順理成章地斬草除根，未有完善發揮得到，而且相比下漫畫版無限制作奸犯科之題材更吸引、更黑暗、更多野講，惜現在世界觀大改動，這是先天不足。不過漫畫中仲有兩樣電影版用番，全個故事係主角旁白型式講番出黎（十分《Fight Club》），而去到最尾，主角同面對螢光幕的你贈番幾句串爆你，但本來漫畫作者係透過全個故事同入面主角說話，串爆睇緊本漫畫的你、串晒全世界所有人、串埋整個漫畫工業、串死被消費主義蒙蔽的各位（十分《Fight Club》），相比下電影版想串又串得唔多夠應。講得有點負面，但後半覺得差少少，只係同前半比較之下，整體仍然相當出色，最少你唔會覺得又係普通荷里活電影先，因為就算幾高級數幾大預算的製作，睇得多會覺得套套都係果款格調，《Wanted》成功在擺脫得到呢種典型美式商業片格調。多謝原作者同導演啦。
睇之外，聽又係一流。前半主角仲係渾渾噩噩時，用大量rock & metal歌造氣氛，包括NIN《Year Zero》single《Every Day is Exactly the Same》。NINE INCH NAILS曲同詞根本就係《Wanted》想表達的灰暗，歌名同歌詞完全為主角度身訂造。去到後半醒覺同大戰轉用交響樂，從插曲到配樂全部極度貼題，唔止通順，好多時畫龍點晴。動作設計、攝影同音響製作全部達高水平，《Wanted》係近年見過製作質素最高最專業電影。簡單總結：唔用腦睇的話，《Wanted》絕對有90分以上，就算用腦睇，套戲都唔算差合格有餘。如與漫畫版相比，仲能唔能夠稱為改編都頗具爭議，因為似借用漫畫中主角背景、公會組織同敘事手法三個元素，再自行創作一個全新故事，多過嘗試將漫畫故事同世界電影化，而獨立作評，電影版絕對足夠自成一格。所以話冇睇過原著入場完全唔會有影響，分分鐘冇睇仲好；睇完漫畫見到套戲完全另一樣野，小硬。（我冇，因為拍出黎真係好睇嘛）
假如你睇完《Wanted》發現自己超鍾意，除左吳宇森同林嶺東全線，仲有兩條線務必追埋。首先係亞視cult片《槍神》，我小學時期即係九幾頭的「劃時代電視劇」、堪稱香港電視史上首套大幅使用CG劇集，那時候電腦特技仍是非常專業的專業名詞、可以用黎做乜香港人都未知，而且果時的CG唔係多邊形砌，而係軟件手繪，樣衰程度你唔會想像得到，而最抵死係主角呂頌賢（唔好問我點解身為無線人的佢會拍亞視劇）用槍但唔裝子彈，唔使多講已經知又一套笑片啦。唔好理劇情、唔好理「特技」，玩子彈玩彈道、武俠式槍戰場面，同十幾年以後至《Wanted》如是一轍。
「成日叫你睇亞視架啦。其實亞視比好多人特別無線行先左十幾年。或者就係太前所以大家理解唔到，搞到冇人接受。」
同埋《無名火》，英文名《Shoot'em Up》，2007年尾出品，出左都唔知就收左皮的吳宇森tribute，標到走火入魔果隻。
「如果你鍾意《Wanted》，或者如我開親槍扮晒型John Woo Style就必睇，法例規定，你一定要睇埋《無名火》。」