2077日本鎖國

近年好少有（新）日本動畫提得起興趣，因為自從「萌」風起，日本動畫開始淪落，畫功及內容變得細路向，慢慢忽視以往之深度及宏觀。亦少見如《攻殼機動隊》之類，批判性、電影性、真實性高之電影動畫。所以知道《2007日本鎖國》，相當振奮，等左好耐，終於有「似番樣」的日本動畫睇睇喇。

來頭唔細，導演係曾利文彥，即係《乒乓》導演，同揚名動畫界之大作：
「《Appleseed》。」
機初中超任打過，動畫成200X年先出，仲要係當時感覺上尚未成熟之全CG動畫，經歷過之前幾年出之《FF》電影版大災難，都擔心《蘋果核戰記》會唔會又係食住潮流以CG作賣點但出黎唔人唔電腦得個靚字之電腦科技負產物。好在某日行過CD舖見到門口播緊，
「有冇靚得咁犀利呀？」
不過到而家仲未正式睇過呢套野，只知道非常靚。一灰也。

事隔幾年，《2077日本鎖國》出現，再續傳奇。時值廿一世紀中後期，科技發展已達非常高之層面，其中表表者（自然）係日本。其他國家（當然）懾於日本淫威之下，決定聯手制裁日本，日本（梗係）不畏強權，2067年宣佈鎖國，利用科技屏障與世隔絕，十年間全世界對日本國內情況一無所知。2077年，除左係香港回歸八十周年，亦係日本鎖國十年以黎，首次有外國人踏入日本境內，冇錯就係偉大的美國，因為感覺到日本科技已達危害全世界（＆特別係美國的地位），以一支特遣部隊潛入，結果全軍盡墨，只死剩男主角＆女主角兩個。跟住開估，日本已經非人。順便幫助各位平民百姓推翻埋統治勢力，因日本之名打救世界。

起初諗住會十分大日本，打正日本個名，再加埋「美國受脅潛入」，加上好多日本動漫民族意識實在強烈得比動漫本身更誇張，確有好大擔憂，會唔會好似睇荷里活片咁頂唔順當中強加之愛國思想。結果？真係好大日本，好在較為隱晦，叫做易頂ｄ，雖然睇到最後都係笑到出口。之前西史有讀過，日本曾經鎖過國，電影中係第二次，不過性質相反：第一次鎖國係古時，為防外國文化同科學入侵「污染心靈」同動搖當權者，斷絕一切外交及貿易上之進出；第二次，係因為日本科技太發達－按電影所講水平係達「美國科學家研究多一世都唔會理解得到」－其他國家因而進行制裁，既然自己最勁勁到其他人妒忌加加害，就封閉自己唔益其他人，因為大日本而鎖國。正唔正？

及後美國特種部隊入到美國，發現日本已經再不存在日本人。同好多同類科幻作品及學說論點相同，當人類高速發展科技，最後會過份依賴機器甚至同科技結合，更甚被機械取代，令「何謂人類」成為當代一大疑問，人類身份之定位問題往往係作品同學說之主題核心。《日本鎖國》處境，係外國人十年黎完全冇任何來自日本之線報，主觀覺得日本已經成為超時代科技都會，但進入後發現，全國只餘東京尚有人口居住，但正確黎講都唔係人，係生化人。鎖國前夕，日本政府已經被財團控制，鎖國後財團以政治及科技壟斷，以日本人民做為實驗體，研究將人類「進化」成生體機械融合之生化人，到最後全日本已經再冇真正人類存在，實驗後倖存之生化人全數聚居於東京，財團則自建人工島嶼作為基地，「東京城」以外了無生命跡象，全國國土已成一片沙漠。初睇，好《Dune》。事實上亦同《Dune》非常／太過相似。除左遍地黃沙，沙下潛伏沙蟲，一種巨型蚯蚓狀生物，以吞噬地面物體為生，分別係《Dune》中沙蟲為沙丘星球之土著生物，會受地面節奏性運動如腳步及引擎吸引，無差別吞食一切物件；《日本鎖國》之沙蟲叫「嚼屍」(jags)，係生化實驗失敗副產品，由垃圾堆砌成巨大環節動物狀之低智慧機械生命體，會受金屬吸引不斷吞食成長，體內充斥機械零件之生化人自然屬於食物一種，而東京依靠城牆將「嚼屍」隔絕於外，電影中冇言明，可以假設日本之所以成為荒漠，係「嚼屍」橫行令地表所有建築物、「人類」及地理環境消失，「生還者」最終集結於城牆保護之東京同以海阻隔之人工島嶼求生。唔知係致敬還是巧合，設定上《Dune》同《日本鎖國》實在非常相似，就連結局都係藉巨獸推翻極權，或者無心，但我睇時心中硬係型住似得太緊要，有點兒「唔聚財」。

雖然唔再係人類亦再冇任何生理需要，生化人仍然按照人類方式生活以保存人性，當中少撮更決心推翻財團統治，
「做番人類應該做之事。」
及後揭發因為本土已經冇真正人類作為實驗素材，財團計劃以複製人取代強國領導，進而控制其他國家、利用他國人民繼續實驗，第一步－冇錯你已經估到－就係入侵美國。日本人真係好沉醉人類滅亡、世界末日之世界觀，但更沉醉於敵視美國、踩住美國上位。特種部隊被瓦解後，女主角理所當然獲救及成為反對勢力一份子，至於結局呢，精彩：最後已淪為生化機械之日本國民為左拯救美國，全民犧牲推翻科技機制，世上從此再不存在日本人，美國以至全世界（重點自不然係前者）因為日本民族之捨己精神得以逃離厄運。如果我係美國人，肯定睇到標晒眼水，笑果隻。

挾住《Appleseed》餘勢、《攻殼》式日本灰暗未來景觀、超這質電腦動畫製作，《日本鎖國》風頭確係一時無兩（．．．我覺得卦，起碼得百老匯電影中心上都會周圍賣晒廣告先），只係成果冇想像中咁理想。故事唔算新穎或特別，冇辦法同類題材已經好多日本動漫研討過，論深度又未及，導演手法有待改進。想思考，唔夠，除非你係日本人，否則好難同當中之「大和精神」有所共鳴；有關人類身份，亦未有太多或刺激性對白及情節引動思潮。而編劇同導演之（最）敗筆，我覺得係結尾，臨尾正式攻打極權財團開始。
「脫離唔到。」

當日本鎖國磁牆被解開，除左睇到日本現貌，亦偵查出日本只有三個生命反應。（第一個女主角，第二個（迫於無奈）要保留的男主角，第三個，此時冇講但已可猜到，係始作佣者財團總裁。慣例也。）
兩位重要女角被生化人輯捕見財團總裁，發現男主角未死，總裁計劃用佢作為下一個實驗品。（冇錯，千死萬死，主角不死。同反派永遠可以一早進行實驗，就係唔做，臨做時其他主角就會出現，跟住暫且放下實驗等各位主角有機會甩身。）
女主角揭發總裁人類之身份，身邊生化人立時郁手殺人。（同頭先所講一樣，「慣例也」，無論反派身份還是事態發展。）
雖然人類血肉之軀唔會夠生化人鬥，但反派一定福大命大死唔去走得甩，而反派條靚臨死前，放走晒兩位女主去救男主角同追捕大佬。（點解身為生化人的頭目甲一直唔妥主角班人，到最後有機會殺晒佢地時反而良心發現，突然間變得咁人類？唔知。為劇情可以順利發展卦。）
大佬逃走地點：天台。出現角色：主角、大佬、兩架直昇機、三部守衛機械人。（又慣例也。熟口熟面至極）
大佬搭其中一架直昇機走，另一部直昇機（咁蹻）入緊油，女主角一槍打爆油缸，炸晒三隻機械人。（真係蹻。ｄ奸角走佬時永遠唔識得截斷主角追捕之後路。）
大佬已經遠去，女主角手槍一枝傷唔到直昇機分毫。但方才之爆炸，其中一台守衛機械人未完全損毀．．．（係呀你估中喇，就係唔知點解咁蹻有一部壞到枝槍唔停係噉亂射。）
女主角就用機械人射唔停枝機槍，射低左大佬架直昇機。（睇到呢度，我已經好灰了。）
平時ｄ機械人同交通工具隨便一槍已經爆到七彩，但今次射足成排幾十發，機冇爆大佬冇事，轉個頭想成架機剷落女主角度同歸於盡。（我已經（笑到）喊緊。）
女主角唔迴避，神勇地企定，企圖用手槍仔射死駕駛倉中的大佬。（其實要射，主角之身手夠及早離遠射死大佬加避開。就係要9up一大輪，到大佬架機剷到撞埋身咁滯先射。抵死。）
直昇機撞毀，爆晒，但所有人安然無事。當男主角想救被直昇機殘骸壓住之女主角時，大佬著草。（繼俾生化人企圖殺死、中左女主角一槍、加成架直昇機撞落地都冇穿冇爛完好無缺，原來全套戲最勁係大佬。噉仲研究點樣改造點樣生化人類做乜？做人類做到噉咪幾好？）
當大佬即將走甩時，被另一女主角捉住，大家攬住一齊死。（係一定會係溝唔到男主角的另一位女角，為成人之美犧牲自己。）
大佬死左、風平浪靜，總部（先）派出直昇機拯救男女主角。（戲入面，日本係「強大」得美國政府都唔敢得罪、下令全個潛入行動終止、全特種部隊視殉職論被放棄。何解突然間咁大團圓？）
直昇機接走生還者，遠去，劇終。（好似打贏大佬就乜都搞掂晒。日本之後點世界之後點人類之後點？完全冇交代。）

以上情節，大家睇戲、睇荷里活電影睇左十幾廿年，每三套動作片有一套臨尾半個鐘有60%相似，即係所講「慣例」，冇乜值得咁仔細寫出。問題係，我入黎睇《日本鎖國》，唔係諗住睇荷里活片。我係想睇美國人做唔到、日本人得以優於美國同業之思維性動畫／電影。點知開頭精彩，臨到最後，越睇越唔睇路，以為自己睇緊套B級西方動作片，唔係主角班人走晒之後，整多段獨白提醒大家總有一天會「以日本人身份重生復國」，都醒唔起自己係睇緊日片。最失望係瓦解財團後，對往後之世界發展絕口不提，整幾段文字大概講講都好丫。講到好似日本滅亡／日本人民「救世」，就一了百了，世界所有問題解決，亦再冇就人類－機械人之身份問題進行呼應或回應。

除左劇情，對《日本鎖國》另一最感興趣之處，自不然係畫功。最初接觸CG，相信好多人同我一樣，係打機開始。當其時個個話PS1點勁點勁，但其實講CG靚，好多電腦PC game比PS強得多，因為硬件黎講PC當時超過PS，玩電腦出身的我，對PlayStation之所謂「次世代影像」有點不以為然。CG主要用於打機，或者電影、動畫中部份特技場面，果時未有而家咁發達，CG成果可以樣衰到極，第一套打響名堂之全CG野心作係《Final Fantasy》，以接近真人真實為目標，但當年加上CG先天限制，失敗到連Square都執得笠。《Appleseed》都係玩真實，但隔左幾年科技加經驗提昇，成功，動態同物理，簡直真實得得人勁，全部細節仔細到嚇親人，人之面相亦說服到你，冇《FF》咁無神咁生硬咁數碼化。《日本鎖國》自不然延續高畫質，不過方向唔同轉玩風格化，玩光暗玩陰影玩對比，重菲林色彩之電影格調，其實做CG電影呢種玩法更加合適，與其你點追求逼真，最多俾你去到99%，都總會有數碼痕跡留下，不如利用CG能夠超現實同天馬行空之特性，為畫風加添獨特性格，做傳統電影所不能做。配樂方面迎合世界觀以電音為主，trance多，片頭會見到Paul Oakenfold個名，選曲作曲皆優，雖然唔算太突出，但作為配樂之用效果不俗。（well，可能你唔知，聽metal之前劉Sir係聽電子野的）

可能曾利文彥導演同敘事手法唔完全係我杯茶，又可能直頭日本電影整體風格問題，睇過《乒乓》同《日本鎖國》，硬係覺得有點偏平舖直敘，雖然《日本鎖國》個人眼中較具完整性同流暢度，但仍有所不足，更失敗在予我虎頭蛇尾之感。雖被喻為「新世代《蘋果核戰記》」、「《攻殼》後繼」，但功力未夠、深度未夠。同類製作及題材之動畫，已經買少見少。何時（再）有後浪推前浪？