幾個月前上網閒逛，見到好多外國人講《Tropic Thunder》，有Ben Stiller加Jack Black加《Iron Man》Robert Downey鑽石陣容，加上海報同預告片笑到爆，成為今個夏天一大期待電影，只係外國上左一段時間香港仲未有聲氣，都冇乜預過有得睇，即使陣容強大題材方向太過美國化，唔係崇日香港人杯茶。點知唔聲唔聲，變左萬聖節鉅獻。今年暑假太多猛片，要避避鋒頭卦？總之有得上就掂啦，因為好鍾意睇Ben Stiller，有佢份做ｄ戲通通笑爆，除左劇本往往得，佢認真的唔認真演技比好多美國喜劇演員吸引。

劇情簡介講一班戰爭片演員入左真戰場，點睇都係《搞乜鬼》系列出品，不過變左Ben Stiller自己出品，就多番信心因為一定唔會亂笑一餐就算，「玩野」只有一開始用假trailer介紹完幾個主要角色，入正題後向經典如《雷霆救兵》同《末世啟示錄》等「致敬」。跟住套戲變得無比正經。相信呢樣野冇乜人預過，因為見到Ben Stiller同Jack Black兩個，點會諗到原來Ben Stiller拍套戲，係為左批判商業電影，串荷里活電影浮誇包裝及古板制度、串大財團隻手遮天、串門外漢控制電影製作、串商業利益凌駕藝術、串人性道德脆弱、串藝員酗酒吸毒陋習、串政治正確、串種族主義、串方法演技、串在荷里活金錢比人命重要．．．好多情節「局內人」會睇得會心微笑、好有共鳴，至但係對於一般人同一心入場為睇笑片觀眾黎講，套戲只會太過沉重，尤其劇情同笑位咁美國化，香港人入場，分分鐘覺得悶。似乎Ben Stiller都開始步入收火講深度之「老」階段。

真係多野睇同好笑一點，要去到後半。全隊人被送到金三角，Ben Stiller俾毒販捉左，先發現原來自己當年拍一套戲扮弱智人士，想從動作影星轉型演技派卻遭一致劣評，反成為金三角cult片，令佢對電影藝術「開竅」，但唔多夠說服力，拍出黎似鬼上身多過諗通。想睇佢發揮演技唔係冇機會，不過唔算多。Jack Black戲份亦比想像中少，戲中介紹佢強項係一人分飾多角（明串幾流行之美式無聊胡鬧笑片），但到尾冇玩到，只負責吸毒俾大家睇，重要性大減。Robert Downey白人扮黑人最估佢唔到，順理成章最多野睇，尤其煞科一段，發現金三角班泰國人講國語（．．．），跟住同佢地溝通之「國語」笑到你仆街，自己身為中國人全程個幾字一句都聽唔明，然後拎住兩枝M16做「子彈農夫」，同Ben Stiller中門大開大字形機槍橫掃相輝映。真係放開搞笑集中最後逃走，全場反應最好當然亦係呢度，作為笑片就係欠缺呢種無稽一點亂黎情節，Ben Stiller開《Tropic Thunder》，野心大左少少，一套「笑片」可以涉及咁多敏感題材同粗口橫飛？不過全靠佢人面廣，能夠搵到Tom Cruise完全改變形象扮電影公司老細，成為全戲最搶角色。一向賣靚仔夠膽扮到自己成個光頭肥佬噉，仲要句句爛口，簡直破壞晒自己形象，睇佢仲好睇過三位主角。噉當然，除非你似佢本人已經賺夠錢加個朵阿響，衣食無憂之時，先有本錢「為藝術」、「終於做乜就做乜」。分分鐘呢個先係佢真面目。

「今年睇咁多戲，最多粗口、最真情流露，反而係呢套『笑片』。」

或者係宣傳方向誤導，又或一廂情願，初頭諗住係《星河救兵》種以假亂真，又或《搞乜鬼》擺明純搞笑唔理劇情，到頭來貨不對辦，甚至以為Ben Stiller自己為宣洩對對制度不滿而拍，但總算有點意思的一套戲。而家唔止英雄片、寫實片要加番各種黑暗面，就連笑片都要灰暗沉重一番先可以。反映出當下經濟蕭條，大家笑都笑唔出之現實慘況也。