Transformers



八十年代成長一代,相信冇幾多個唔識變形金剛,除左陪伴成長之餘,亦係各位男性兒時最愛之一。最初係八幾年頭漫畫開始,不過到電視卡通版先得到全世界注意,雖然合體機械人日本仔已經玩左十幾年,但變形機械人概念仍屬新穎,有一定原創性同突破時代,而且畫功果個年代算靚甚至比當時之日本動畫好,劇情淺白角色又多,有飛機有車有機械人男仔夢寐以求包羅萬有,你叫當時仲係個死靚仔的你同我點會唔著迷?睇完自然想買玩具,而變形金剛包含晒變形、機械人、未來、科技,男仔想擁有全部有晒,加上一件玩具等於兩件甚至幾件同最大賣點變形機場,呢套公式就算去到廿幾年後之今日仍然係無敵,由面世開始變形金剛順理成章一直係全世界最受歡迎玩具商品系列之一。所以2007年對fans黎講好有歷史意義,因為《變形金剛》終於由卡通片變成真人電影,一個縱橫廿幾年之最成功科幻卡通玩具系列,加上時代尖端電腦特技,真係等足廿幾年。


年頭公佈電影版消息起,最先留意係邊個拍,一套戲好定唔好導演係重要因素。有兩個人名:Michael Bay導演、史提芬史匹堡監製。知道Michael Bay係好好好耐之前 - 十年以上 - 睇報紙講一個MV同廣告導演轉攻電影,除此之外冇乜特別留意,但幾年黎睇戲,一套一套噉睇,唔覺唔覺我已經睇晒佢近全部作品。相信我睇佢第一套戲係辛康納利加尼古拉斯基治《石破天驚》,明珠930播,最記得係電視播居然全部殺人流血鏡頭冇剪到,加埋劇本加鏡頭全部屬最高水準,多年黎仍然係Michael Bay最佳電影,亦係佢血腥暴力得最露骨最真實之一部。跟住係《絕世天劫》,係殞石撞地球災難片熱潮時同《Deep Impact》一齊上,但去左戲院睇《Deep Impact》,《絕世天劫》屋企見到有隻DVD先睇埋,直頭後悔啦應該調轉呢套入戲院睇至係,你可以話好精彩(Bruce Willis!),但亦可以話劇情錯漏百出夾硬到爆,不過好睇就得啦對動作片我要求好低,最正就梗係隻DVD送埋《I Don't Want to Miss a Thing》個MV,未開始聽歌、未識AEROSMITH乜水,已經覺得首歌正到爆,只係而家諗番起唔明,

「既然Michael Bay本身係MV導演又係《絕世天劫》導演,點解個MV唔係佢拍?」

《珍珠港》理論上係佢最出名最重要作品,但唔好意思我睇都冇睇興趣係零,因為同《鐵達尼》差唔多時期上,搞到我覺得係另一套食住潮流上、災難為副男女關係為主我唔多鍾意果種戲黎,拍同炸得精彩一回事甚至有少少反感添,

「就噉好地地拍套戰爭片點解唔得,係都要加多兩條仔一條女入去?」

其他果d都係後來屋企睇電視撞到睇埋(我愛有線&NOW爛片台)。《Bad Boys》系列我當係漫畫化加南美化之《轟天炮》,兩個黑鬼隻揪成個犯罪集團,第二集仲要誇到兩個差佬搵埋班特種部隊美國打到去古巴殺Q晒d恐怖份子,太正氣加太誇張了,對動作片劇情冇乜要求的我都唔多頂得順,但同成龍d戲一樣,鬧係噉鬧,但相信要拍拍多十幾集都仲有得拍落去,而我又係繼續望實爛片台撞黎睇。《謊島叛變》前幾年香港有上過畫,講主角想去傳說中世界唯一未受污染之天堂島,點知後來發現自己係複製人,係現實世界人類代替品,跟住梗係帶多條女打打打噉打出去啦,論劇情呢就算啦唔多掂 - 對我黎講好過接近冇劇情可言之《Bad Boys》系列先囉 - 睇都純為睇番Michael Bay招牌設定同手法:近未來高科技(《珍珠港》唔計啦)、角色道具勁豪勁型勁奢侈、佈局勁大陣仗、中間一定要有飛車戲、密集加高速動作場面、勁多爆炸同槍戰、同環迴多角度旋轉鏡頭。假如你有睇過頭先所講任何一套,都會明白到Michael Bay風格係點,共通點係動作好勁、鏡頭好凌厲,但顧得影像時敘事劇本,加上有時太追求動感同速度感結果弄巧反拙,佢d戲睇係好睇,但唔襟睇,商業角度非常成功,但接近無深度可言 - 除左《石破天驚》,所以佢咁神聖。


監製史提芬史匹堡風格好唔同。雖然都係商業片起家,甚至因為有佢先至有「荷里活大製作」呢家野出現(電影係因為佢而進步還是退步,係另一個討論範圍),第一次聽到佢個名時係小學,當其時做《ET》紅到爆,不過細細個我已經唔想睇,經典一回事我對溫情片一向全冇興趣,對之前果套《第三類接觸》興趣更大較接近我鍾意果種風格,但都係冇睇,可能因為唔見血。跟住電視播《大白鯊》,見血喇今次,但同樣只知係佢拍但冇睇,約略睇過,只記得最後條鯊魚炸到成棚牙飛出黎,可能太舊喇細細個已經覺得好假。然後播《奪寶奇兵》,第一集超好睇,打得出色從頭到尾全無悶場,劇本出色之餘又有批判性同警世意味,依然係劇情動作片典範,只係跟住咁多集我冇一集係完整睇晒甚至冇睇過,好想買番個boxset睇番,冇計啦而家電視都唔重播喇,當年外購劇未興時無線係搞明珠930,晚晚一到九點半就有戲睇,而且成日一播就播全線架試過一個禮拜五晚都係動作戲,上面所講咁多套史匹堡都係明珠930撞,但自從開始買美國戲,一至五晚再冇得睇戲,有時禮拜六日都播埋肥皂劇同資訊節目戲都唔播,對我呢個戲迷爛片迷黎講,只有嘆番句「俱往矣」。史匹堡真係每個年代都有經典出,七幾年係《大白鯊》,八幾年係《ET》同《奪寶奇兵》,到九十年代唔使講大家都記得啦,《侏儸紀公園》又係商業電影史上無敵經典,講猶太人之《舒特拉的名單》完全唔係我杯茶,但居然都會睇埋仲要覺得非常好睇,仍然係好震撼好真實之一套電影,史匹堡就係勁在一套戲要拍可以拍得好好,就算唔係睇開果類都會感動得到。然後佢風格開始由以前奇幻溫情變得寫實同偏黑暗,好似《雷霆救兵》,同Stanley Kubrick合作之《AI》或者似番以前果種細路仔進入成人世界戲路,但個feel太灰了。反而其他「小品」我仲有興趣,《未來報告》講預視輯兇,呢套我係去戲院睇都幾滿意,但反而更鍾意差唔多時期上吳宇森《Paycheck》,一套講預視未來改變際遇埋尾再加多少少賀歲片feel之科幻片,d人話係吳宇森最差作品,我睇得好開心我自己like就得啦。另外《Catch Me If You Can》而家都未睇覺得有點兒對唔住自己,可能睇落好似益智片,係我知係超好睇個個睇完都推介,加上史匹堡拍呢種片始終有一手,但仲未睇過,又要撞爛片台同DVD。到二千年後風格同手法再變,《強戰世界》改編殿堂級科幻文學,只係有d失望唔達我預期,有好多位係好特登做俾你睇但到尾都冇解釋到,或者係用計呃我買番隻DVD睇埋解說?《慕尼黑》繼續玩寫實繼續玩黑暗,同樣人人話正,但興趣確係冇乜,反而想睇佢監製套電視劇《Taken》,引番2/11/2004段記

「呢套係由史提芬史匹堡監製及創作,以有關外星人之事實及史實寫成之電視劇,而且一次過推翻晒史匹堡自己以前所有外星人電影。套電視劇有十集,每集長兩個鐘,而且同美國傳統電視劇唔同,係美國首播時唔係一星期一集而係一晚一集播兩星期內做晒(明珠台就當然係一星期一集啦)。因為咁不正常、因為建基於事實、因為史匹堡居然會用黎推翻晒自己以前作品,所以好多人都覺得,呢套野真係想話d野你聽。」

只可惜當年明珠台播果時撞晒時間睇唔到,有機會遇到重播先睇番啦。你知劉Sir口味,都知道史匹堡冇幾多套戲係佢杯茶,都係人情片歷史片紀錄片,雖然好多都係睇過之後會鍾意覺得好睇,但唔係送到上門唔會係我主動摷黎睇果種片。早期戲路明顯商業,後期現實得多有深度得多(雖然仍好商業),只係佢種思路同手法確係自成一家冇人會似同及得上。因為佢方向同Michael Bay咁唔同,見到《變形金剛》幕後兩大商業片王碰頭,未上畫已經好期待,真係齋佢兩個個名已經夠晒吸引力,亦都好想知一個官能向一個內涵向,夾埋出黎套戲會點。


《變形金剛》之前,未見過有一套電影宣傳攻勢會咁強,就算唔係fans都註定要面對,想避都避唔到。上畫前一個月全世界所有角落都見到變形金剛,真係無孔不入到去邊都見,行行下街唔關事舖頭都有張poster,我試過行個超殘商場都可以成條走廊兩邊牆貼滿晒巨型電影海報,商品周街都係預告片又通街熱播,唔知變形金剛咩黎半個月唔使已經俾人講到個個變專家。玩具更加係史上最強最大規模,四五月開始出到六月底正式發售直頭谷到恆,款數相信有近百之數,一路到上埋畫八九月仲有新玩具新漫畫出,電影衍生之《Transformers: the Game》更加係破天荒地所有平台家用機至手提機一網打盡,只要你有遊戲機一定有得玩。都未計其他衫呀袋呀之類版權商品。以前有邊種玩具、有邊個漫畫/電影商品系列會投資咁多,多到根本供過於求幾倍?為左套戲,孩之寶今次真係盡地一舖。香港/外地都咁犀利,相信美國本土宣傳會更誇張。


但你宣傳勁一回事、多野賣一回事,套戲本身拍成點先至關鍵,拍得屎的話都係得個笑字。大家最關心梗係變成真人版會點?始終卡通想點都得,變形前後比例同紋理差別可以好大,但大銀幕電影要合乎真實限制大好多,好似你想柯柏文貨櫃車變型之後同卡通一樣係一舊舊砌成個機械人,難左d喎!只係如果唔似番卡通方塊樣又會俾fans鬧。結果?好明顯Michael Bay係非變形金剛fans、唔係睇同玩變形金剛大,否則唔會改動咁大幾近放棄原來之整體,根本唔再係機械人而係外星人,連柯柏文而家都有口講野,狂派更加係三尖八角d樣似蟲多過似人,再者車款都係用新車顧及番現代觀眾同市場,雖然造型、顏色同性格嘗試模仿舊版,但唔同就係唔同,好似大黃蜂由甲蟲車變成高檔跑車,Ratchet亦係變吉普車唔係救護車,爵士仲變埋「黑鬼」,都唔夠變收音機之Frenzy同由大力士級數城市基地變成機械蠍子仔一隻仲要只係Blackout條靚之Scorponok,鬧得最嚴重,梗係麥加登個樣已經完全唔係麥加登,而且係變飛機而唔係變槍,你叫由細睇卡通睇到大睇足十幾年班老fans點頂?保持神秘,又或者盡量唔想挑起太多紛爭,電影宣傳一直冇得你睇機械人全相,間唔中一兩個鏡頭露下手手腳腳、俾你望望點變形法,到後期先全部俾你睇晒,由淺入深等你慢慢習慣同接受新設計,「好樣衰」的新設計。Michael Bay亦係電影官網定期放片講解製作同概念,用「比爾飯局」方式說服你,不過最過癮都係幫戲入面個神秘組織Sector 7整左個「官網」http://www.sectorseven.org,要用耐唔耐上網發放之password登入,用呢種方式發佈電影新資料同片段,有娛樂性之餘又留得住你定期上網睇實發展。最頂癮係其中一個「機密檔案」放左幾條片,有卡通版幾個角色出場,包括甲蟲車大黃蜂、昆蟲派、錄音帶變雀同鋼鎖,鋼鎖仲要係同卡通版一模一樣之機械暴龍,單係鋼鎖段片已經滿足晒各位fans的願望。只可惜,都係整出黎安慰一下你同呃你入場嗟,以上全部電影版都見唔到,戲入面只搵到外星人一堆。

「唔好意思,你中招了。」


美國本身係國慶日7.4.7上畫,後來提早兩日7.2.7趕星期六檔期,不過韓國同澳洲六月底已經上畫,中國大陸七月十一都上喇。香港?可能係為避《Harry Potter》,要遲多大陸兩個星期到七月廿六先上畫,只叫做好過日本八月初先上,大陸仲早過香港甚至日本有得睇,仲要話五日過一億票房,如此景況竟然會發生於全球翻版強國,世界真係變喇。為隆重其事,專誠搞個Trans罪mers,大家一齊著晒10柒牌變形金剛tee去睇,最後就梗係冇人理啦你估個個好似我地咁白痴咩!廿六號星期四上畫,禮拜五晚去旺角新世紀買飛,已經要排到禮拜六晚十一點半場,開場時除左頭行之外全院滿座,對當今香港人黎講唯有荷里活級大製作(用錢撻死人果種製作)先引到佢地入場,就算唔知乜野係變形金剛,單因為名氣同宣傳加特技效果已經會自動俾錢入場睇,此乃傳媒的力量。好少戲我會覺得睇一次唔夠,之前試過兩次《Doom》《AVP》,都係因為本身太鍾意原版而電影改編太廢,心有不甘決定再入多次戲院,只可惜兩套都係改變唔到徹底失望之負面事實。變形金剛係第三次,睇完已經立即決定再入場睇,起初諗住去I Max話晒超巨型銀幕又立體效果,加上仲未去過Mega Box,個個行完話唔掂都想順便中下招,但I Max已經俾《Harry Potter》壟斷晒,會唔會有機會睇立體版《變形金剛》都唔知,折衷係跟住個禮拜三晚1/8去朗豪坊睇,而家間間戲院一日播足十幾場,但咁多場好多都係想搵個靚位都難,當紅就係當紅,而選擇睇多次除左重溫精彩場面,亦都想睇番明未清楚之情節。


首先,劇情同機設都同卡通版相差好遠:柯柏文同麥加登本來係兩兄弟共同統治機械星體斯比頓星,保護可以賦予機械生命之全能之火Allspark,但麥加登想獨佔斯比頓星同Allspark,組成狂派發動斯比頓星內戰攻打柯柏文為首之博派,柯柏文兵行險著將收藏Allspark之能量磚射上外太空,漂流到最後墮落地球北極,麥加登突入大氣層時損毀加上極地溫差,最後撞落冰層底部冷藏,到1897年極地探險團隊長意外跌落冰層先發現到,而麥加登將Allspark收藏地圖焊上佢副眼鏡度,隊長因為見到麥加登而精神失常。過左一百一十年,主角Sam Witwicky接收佢太爺Archibald Witwicky - 亦即係探險隊隊長 - 生前遺物包括呢副眼鏡,同時買左佢第一架新車,其後發現就係大黃蜂。接連遭到化身警車之狂派機械人路障襲擊,同遇上博派各員,經柯柏文解釋,得知變形金剛已經為Allspark落到地球,狂派更早以唔同型態潛伏,搜尋麥加登同Allspark線索。再經歷神秘組織Sector 7介入、麥加登解除解封,博派同美軍聯手對抗狂派,最後男主角以勇氣擊倒麥加登,一貫典型荷里活簡單格局。兩派之爭由卡通版為爭奪能量,最後由斯比頓星意外打到落地球,變成用原創之斯比頓星能量及生命之源Allspark做主線,能量磚亦由裝存地球能量之普通容器變成關鍵全種族之聖物,定位大不同。另兩幫人馬唔係太空混戰後一齊墮落史前地球,先到地球只得麥加登一個,其他角色係其後陸續抵達同追尋其下落,既搜索時期短加上角色數量少,原作一切重要地點如基地等都省略晒。即使加多其他枝節好似Sector 7、人類同變形金剛間近密得多之關係,整體仍算通順同合情合理,睇卡通大果班相信唔會有咩投訴。


故事(加成本)所限,變形金剛數量比卡通版少得多,博派五隻再加狂派八隻,機械人之大小亦冇以前咁統一,會挑選同自身體積接近之變形型態,好似本身高大之柯柏文變貨櫃車而其他博派同伴變房車,狂派除左Frenzy變收音機同本身蠍子型之Scorponok冇選擇其他變形,因為係取樣軍事武器形體上已經佔優,保留斯比頓星戰機型態之麥加登更加巨型過所有角色係博派機械人兩三倍高,前提設定已經刻意區別兩派,突出狂派邪惡特質同威脅性,只係外星生命體特質過重之外型設計,實在太惹爭議。另一個特色係變形金剛唔係靠太空船例如卡通中之方舟宇航,而係自身變成殞石(即斯比頓人原型,稱為protoform)穿梭星體間,降落星球後再取樣星體上之機械隱藏本身,省卻好多功夫之餘亦型得多。角色間大小差距可以咁大,其中一個原因係想兩個型態間質量同體積可以維持比例,唔會出現卡通音波廿幾米高變成一部錄音機咁唔合理之情況,但劇中Frenzy示範先變收音機再變手提電話,顯示一定程度之質量改變、放大縮小係可以做到,同第二型態可以隨時轉換,亦即係理論上各角色係可以選擇劇中以外其他變形,包括比自身大或者小之型態。因為多數係選擇最先遇到之交通工具以盡快隱藏行蹤,而家柯柏文係見到部拖頭經過所以變成拖頭,假使咁唔好彩落到地球係大黃蜂見到貨櫃車而柯柏文見到部單車,結果博派大佬仲細粒過條靚,噉咪好笑?又劇情顯示變形金剛可以隨時掃瞄身邊任何機械改變變身型態,既然係噉點解唔善用呢種特質,好似見狂派曉飛就立即將自己變埋做戰機同佢打空戰?


係鍾意變形金剛好,係因為名氣而入黎睇好,就算最忠實擁躉都會坦白同你招供:

「睇《變形金剛》,我都係為睇機械人變形打架同睇特技嗟!」

最初機械人咩樣乜都冇得睇時,你都知道套戲一定有料到,幾時試過有荷里活電影會得到美軍、國防部、五角大樓咁鼎力相助,就連真正場景同新科技武器都借出黎拍戲?由此可見美國本土變形金剛已達建立到相當神聖之地位。電影業黎到廿一世紀玩CG已經係指定動作,差唔多每一套新電影都係CG界之突破,而《變形金剛》毫無疑問係現時之極致,全部機械人真實到難以置信完全唔會覺得係電腦畫出黎,其他電影CG同真實背景兩者動感同色調唔夾之問題完全搵唔到,加上睇佢地飛簷走璧、埋身肉搏、點樣一瞬間由架車變成機械人,唔好理個樣係點,視覺同機械效果已經係動作片迷/男性無法抗拒,單靠特技睇一次已經令你想入場再睇,論荷里活大製作黎講係超成功,難怪好多國家都破開畫票房紀錄,綽頭已經夠呃人入局啦,之前邊有人試過玩到咁大,真係做到部車變到成個機械人出黎?唔想掃未睇之朋友興,但《變形金剛》正正係荷里活「典範」,睇左預告片幾乎等同於睇左套戲,因為一切精華都收集晒,當然最精彩好似最後兩派城市中大戰自然係保留到最後先揭曉,但你係想睇機械人的話,你睇晒幾條預告片已經等於睇晒戲入面近半特技場面,特別係動作場面,呢樣係幾失望,因為你冇諗過最重要之變形金剛出場同打鬥時間會比預期中短,例如Bonecrusher,你預告片睇到佢公路上面變形,撞爆架巴士之後再一野衝埋柯柏文度,兩個一齊跌落橋,諗住電影入面會有連番激戰,但實際上跌落橋之後,唔使一分鐘佢已經俾柯柏文一刀斷頭,實在係好可惜,因為冇諗過狂派最型角色之一會打得咁少死得咁快,就好似睇武俠小說,諗住睇金庸,點知拎上手係古龍。好在動作方面不多但精。只係太多人。大家都係想睇博狂兩派隻抽亂鬥,但大半都係人類同狂派之間射射射射射射跟住就射爆左狂派,真係機械人間之肉搏其實好少,幾失望,大家係想睇呢樣野,而唔係睇人類打外星人嘛。


大家最關心梗係班機械人可以點打法、有咩武裝,同埋兩派間之衝突,你唔通入場係睇大黃蜂點樣幫男主角溝女咩?鍾意變形金剛就係因為識變形,但似乎只有狂派會善用自己種族特質,好似星星叫同Blackout都識得經常用唔同變身,空中突入打一輪之後立即變身飛走,博派根本完全唔夠佢地黎,唔係有美軍擋住一早俾人打死晒。新意除左protoform之概念,幾個角色好似柯柏文、爵士同大黃蜂有戰鬥型態,柯柏文開打果陣會加番面罩似番卡通版面相,大黃蜂亦有個頭盔,但最正都係爵士會有副超,戴左之後同卡通造型勁似,我自己就好鍾意呢個設定,而每個角色身上都有唔少機關同隱藏武器,好似麥加登最勁手有鏈槌雙手又可以合體變做枝槍(最接近初代麥加登係呢樣架喇),其他角色手都可以變成武器,好似Ironhide重火力兩隻手都有重炮,但冇乜出過招講開火狂派班友多好多。Blackout周身都係武器亦最高科技,公佈叫Brawl但電影字幕係建造派個名Devastator之坦克打得最似樣兩個型態都超勁,只係激戰之中有d角色死得好無奈:博派只得爵士一個死,仲要係一出場就俾麥加登做低,招出得幾野樣都未睇得清楚就俾佢一野撕開兩截,變成示範麥加登威嚴之炮灰;Bonecrusher講左啦,出場時間都唔知有冇兩分鐘,預告片中之神勇只得個失望收場,Blackout同坦克都係俾美軍打死,坦克都話有大黃蜂支援,本來話有防護罩打不死之Blackout俾人係佢身下面一野加多幾粒飛彈就死,先灰。麥加登最後就梗係對柯柏文啦,全套戲最巨型就係佢要高博派最大之柯柏文成截,講打就梗係屈晒機啦,柯柏文打Bonecrusher時有無敵熱能劍但對麥加登時又唔出只有話佢抵死,最後又係靠人類先打得低佢,而麥加登之死對好多人黎講更加係一個謎,遲下會特別講講。不過最正都係Frenzy,由錄音帶變成錄音機,後來變埋手提電話,更突顯到佢地特性:見到乜野就可以變乜野,只可惜劇本唔多講同用呢點只得佢一個會做,最後「自殺」死得幾夾硬個角色純粹要黎搞笑,亦因為噉戲份係狂派中最重,係樣衰不過我幾受,好多人話係史上最樣衰變形金剛,我寧願要佢都唔想對住後來立體版變動物果班。好想知佢隻玩具會唔會有人買?買都可能係只為玩飛CD個機關。柯柏文係搵番卡通版配音員,當然唔少得集集都有之名句

"Autobots, roll out!"

不過對於聽中文配音的香港人黎講完全唔係一回事。麥加登由《Matrix》Agent Smith配相信會多d人留意。但論對白除左博派之外多野講之外,狂派有對白之角色只得麥加登、星星叫同路障,路障有幾句算多架喇星星叫全場只講得兩句咁大把咋連「唔識講野」之Frenzy都多過佢,其他全部用外星電腦聲人聲都冇把夠晒慳皮。可能係劇情薄弱導致。


Michael Bay之優劣已經討論過。有個好故事、有變形金剛做強力後盾,拍唔拍得出好戲真係好睇導演功力,好易明白點解會搵佢負責導演部門,編劇唔係佢但唯獨佢種電影手法先帶得出迫力,就算係最「老土」之《珍珠港》都連串追逐爆炸,現代講動作片場面處理實會提到佢個名。《變形金剛》一樣有晒招牌拍法,好似Ironhide對Brawl/Devastator時兩個慢鏡,同麥加登變飛機帶住柯柏文撞穿大廈,就連Frenzy入地牢同軍部班人對峙個旋轉鏡頭,都係Michael Bay電影常見,全部MV感十足視覺享受一流,當然仲有飛車橋段只係比重冇佢其他電影中咁高,爆破同打鬥梗係全線高水平,但老毛病依然存在甚至有點惡化:有時我嫌鏡頭太快太花,係好有動感,只係間中亂過頭唔清唔楚,亦因為冇研究過的話隻隻機械人都係差唔多樣(特別全部沉深色之狂派,博派叫做有顏色易分d),幾時邊個出場邊隻打邊隻都唔會知,角色加鏡頭亂有d過左都唔記得印象唔夠深,係引人入多次場「睇番清楚d」之商業陰謀?係鏡頭飛咁快同成日郁做特技時容易d?花巧過頭為現代港產片同荷里活片通病也,但你會唔會投訴丫已經打得咁勁仲歷史性地有得大銀幕睇到一部車變成大大部機械人之鬼斧神工。另外亦冇突出到robots in disguise特點,全套戲只有Blackout突襲美軍基地同星星叫混入空軍中隊話係利用到本身偽裝達到奇襲效果,但亦只有咁多,雖然兩段都拍得好(係星星叫單人匹馬擊落半隊空軍好短亦虎頭蛇尾),如果我係編劇,肯定會講到最後大戰前狂派用佢地化身癱瘓美軍軍力就如Blackout保留斯比頓星戰機型態,噉先夠迫力同危機感,而唔係而家突然出黎大家就打咁直線。另一樣同樣唔會少就係配樂,雖然動作戲大家都係睇快脆利落,但好鍾意戲入面加番幾個好慢之片段,成日見係大戰或者上場前整段超悲壯弦樂加慢動作/造作加獨白,《絕世天劫》美國總統段救世宣言加主角慢動作上穿梭機已經係經典啦,睇完真係要立即叩頭多謝美國佬咁偉大犧牲自己去拯救我地全世界,今次一樣有,而交響配樂比搖滾插曲吸引力大好多,始終呢瓣一向係Michael Bay史詩電影強項,其中最搶係每次麥加登出場都出現之唱詩班,夠晒邪惡同宏偉,襯晒麥加登身份。講睇同聽夠晒加有突架喇,假使你本身接受到機設,對故事同劇本要求又唔太高的話。


但牽涉到劇本,再顯不足。為「忠於原著」、為滿足老fans幻想,除左造型角色關係亦參考卡通版,好似Ratchet仍然係救護員、星星叫仍然唔妥麥加登,係爵士唔知點解勁黑鬼feel,不過實在表面,除左博派叫做多戲份同多對白你會對佢地理解多d,狂派基本上出親都係打唔係唔識講野(好多)就少講野(星星叫,兩句...),麥加登同星星叫之間顯示不和關係之對話(就係果兩句)好似想應酬 fans為加而加反唔湯唔水,人機之間一樣咁薄弱,角色間感情完全唔深,講講下無端端又會講到全人類危機,但完全做唔到危機感只覺得突然,亦完全說服唔到一個死花靚點樣關乎世界和平,演員唔係演得差,可能又係導演累事。呢個時候,就到史匹堡出場。事先張揚左大黃蜂會同男主角有非常多交流,可能係將《ET》果套再用一次,仲特別提到機械人對眼改成相機快門設計,就係等佢地都可以用眼神表露到感情,只係一切都太片面唔多成功,你可以話史匹堡之任務就係平衡番Michael Bay純官能刺激之缺憾加入番感情用深度,只係成果係到喉唔到肺,我反而會話係兩種不同手法之衝突結果,如果一係全史匹堡做到《奪寶奇兵》式驚險動作,又或者齋Michael Bay搞掂放棄劇情一味死炸難炸,噉樣極端法效果會比而家更好,雖然後者會俾人鬧得比而家勁N倍。會驚因為一心睇打,文戲會唔會悶過頭拖慢發展,好在加左唔少笑料入去,仲要真係笑得出果隻唔係老老土土硬滑稽果種,亦有d係玩番自己,好似玩變形金剛標題More Than Meets The Eyes,同Ratchet降落地球時,附近一家人個黑鬼肥仔走出去睇時話protoform著陸勁過《絕世天劫》十倍。可惜最好笑果d係動作片成日犯忽略物理同生體之錯失,全套戲最大笑料係路障第一次撞到主角果段,佢一拳打到主角飛起,飛到幾米遠一野撻落架車上面連車窗都爆埋,下一個鏡頭主角居然生理同心理完全冇事立即起番身。荷里活片就係好多呢d比港產動作片仲差勁之「笑料」。


雖然唔係咩深戲難戲,但個結局唔係好多人明白:麥加登黎到地球就係想得到Allspark,但最後主角一野隊舊能量磚落佢心口度佢就死左。其實第一次博派成員「開會」時,柯柏文提到如果最後阻止唔到麥加登,佢會將能量磚放入佢心口,因為能量磚/Allspark係原能量,結果會係佢同Allspark一齊毀滅(有趣地雖然動作、鏡頭同言語間都係暗示所講係將能量磚放入博派聖物Matrix,但由此至終都冇講過Matrix呢個字,或者因為《Matrix》套戲太紅?);第二次係麥加登打低柯柏文之後,佢再叫阿Sam塞舊能量磚入佢心口同Allspark結合同歸於盡,但阿Sam轉而隊落麥加登心口(喂狂派麥加登又有Matrix咩又?或者可以假設唔係用Matrix計而係用心口計),佢係人類所以冇事,但麥加登機械身體抵受唔到Allspark之原能量而融毀。單睇一次又或者唔留心睇肯定理解唔到,只係其實當中玄機一直隱晦,對白同劇情中再明顯地說明番能量磚對機械種族之影響觀眾會容易明白得多。另亦好多野冇交代到,好似狂派最後死剩星星叫、路障同蠍子,但除左片尾有影到星星叫飛出地球,蠍子最後話佢潛左入沙漠逃走左,而路障更加係除左起初撞主角同大黃蜂之後,跟住突然鏡都差唔多冇出過亦冇份打最後大戰,成個角色刻意被忽略左,噉樣留伏線都留得幾差勁喎。另外主角帶住Allspark走佬時,沿路Allspark令好多機械變成機械人,好似一部X Box同一部汽水機,只係話佢地變左形就算,冇講到噉樣變左咁多變形金剛出黎點收科法,好似麥加登一死就世界太平了。搞到似收左人錢賣廣告多過真正劇情一部份。如果想對情節知得更清楚,好似預告片中火星探測船俾人破壞之詳情,同麥加登點樣由極地運送到美國,電影都冇講太多,好多野都交由周邊漫畫同小說交代,例如地位都幾重要之前傳漫畫。只係香港地有幾多個會花心機去睇,同有幾多有機會睇到?


睇完戲連汁都要撈埋。一如而家動作或科幻電影大潮流,插曲都係搵當紅pop、rock、(nu-)metal、emo band新歌,睇過soundtrackdband名都知。片尾先黎LINKIN PARK新歌《What I've Done》,同上隻碟隔咁多年,而家nu-metal唔興就立即改組放棄nu-metal,樂隊本身冇乜技術可言又玩唔到而家dmetalcore野復古野,結果變成高不成低不就之alternative rock,唔使我多講啦新碟完全變晒樣放棄埋自己已經受盡千夫所指。跟住SMASHING PUMPKINS新歌《Doomsday Clock》先至重要,隔得仲多年過LINKIN PARK因為已經散左喇,一路都非常鍾意佢地視為我最愛grunge樂隊,臨散前兩隻碟變左玩實驗野,好多年後而家復出真係唔敢諗會玩乜,點知原來玩番初頭好feel好迷果種,

「雖然冇以前咁正,但都得喎隻新碟似乎!」

比較LINKIN PARK因為而家唔興自己玩開果種野就立即改路線,同SMASHING PUMPKINS隔幾多年都好仍然玩番自己隻grunge,音樂同態度高下立見。再跟住係DISTURBED 《This Moment》,片尾歌次序同soundtrack完全一樣,只係搵唔到卡通版主題曲《Transformers》。娘過頭卦,音樂同歌詞都,但片尾過左DISTURBED黎多首電野埋尾,soundtrack有隊野叫MUTEMATH將本來首主題曲變左電子版,唔知係咪就係呢首?至於其他歌,基本上你係聽開而家新bandd歌同出名樂隊,相信都總會接觸過同有興趣,但傳說中之變形金剛插曲之王Stan Bush話有兩首新歌,戲入面一首都搵唔到,就相當失望,冇佢把聲又點可以叫做完整之變形金剛電影?而個人總結同前述一樣,

「交響配樂比搖滾插曲吸引力大好多。」


有樣野反而印象深:中文字幕識得就番擺位,唔會將白色文字同淡色背景重疊,有時背景太白好似沙漠戲時,字幕組會將中文字放陰影位,唔似以前d戲係唔係都放中間,有時白色撞白色搞到半句字幕唔知講乜,我都係第一次見。套戲商業理由要做到全家老少甚至男女咸宜,起初都驚會唔會搞到好益智、好一級片?當睇到預告片Bonecrusher一野撞爆架巴士發覺唔使太擔心,成品似番套後生仔電影,唔係夾硬做到個個年齡層適合又唔會只顧及家展而都有照顧我地影迷感受,粗口都搵唔到,除左幾句shit之外,其他只有隱晦的「son of a」同「mother」,噉又唔係一定要粗口我份人有係更加好噉嗟!有機會我係會再睇,不論戲院還是DVD。齋係動作片迷,《變形金剛》夠晒,本身鍾唔鍾意變形金剛都好,場面設計同導演功力夠照。《變形金剛》肯定係神聖不可侵犯之《石破天驚》後最佳Michael Bay電影。即時期待第二集。