點解成日話indie慘？我呢種人電影只屬於閒餘娛樂，睇戲多數只睇大label（當然，主因自己膚淺），唔會特登去搵甚麼藝術甚麼另類甚麼經典電影，成年都唔知有冇一次會去油麻地百老匯電影中心，出現一套單預告片甚至海報已經知道冇得唔睇的獨立電影，唔係因為金像獎突然令Mickey Rourke在港彈番起，《The Wrestler》分分鐘畫都冇得上，噉就睇少一套好戲。但亦無奈要遲幾個月先有得睇。否則，我唔需要後悔之前大大聲話「2008年我最喜愛電影是《The Dark Knight》」。其實之後已經想改口撐《Wanted》因夠奇特，睇埋《The Wrestler》，唔止話2008年，甚至近幾年最愛電影，一定係佢，因為已經好難再有戲可以似佢，一睇完立即覺得成功係實至名歸。同影響我咁大。

「點解唔俾我早ｄ睇？？？」

對於一個'80男，望住張海報好難完全冇感覺，因為包含晒八十年代代表之一切：英雄、血汗、不死。你見劉Sir成日提住八零，有乜好？'70仍是個苦困年代，大量經濟及政治問題困擾，最後總算捱過，踏入'80社會開始穩健，百姓自然追求更高生活質素，特徵是搏。生活剛安穩，即使教育程度普遍未算高，只要你肯搏就有得食，正如當年無線劇，劇中角色幾近定型成小學畢業做工廠、做侍應，中學畢業做文員，大學畢業做經理，雖層次唔同，共通點係人人能夠生活及做得開心，肯付出必定有回報，某程度上是當時社會寫照，潛意識鼓勵你發奮圖強。如果做藝術做文化，又因為媒體發展未夠蓬勃，主要宣傳途徑仍靠廣播傳媒報紙雜誌，大家又未被名牌及潮流至上觀念徹底污染（有幾多途徑俾你去追、去識？），要成功的確需要實力、創意甚至另類，唔止媒體深度同尺度，就連一般人接受力亦較高，最重要好多人係識英雄重英雄，你唔出名唔緊要，玩得好有心玩，就會黎支持你。八十年代的代名詞，是實力同勤力。

苦完、搏盡、甘來，九十年代經濟起飛人人收成，但多左錢無需勞碌擔憂，社會亦更商業世利，新一代品格及生活態度已經同十年前甚至幾年前差得遠，一開始乜都有從來未捱過，少少風吹雨打就喊苦喊忽，更加唔好話堅定不移計劃前路。'80一代物質未算十分富裕，部份人甚至活得艱辛，最少精神非常富足，正如你問任何一個七八十年代成長男性，有幾多個未試過每日得果十幾蚊甚至幾蚊零用錢，迫自己忍口唔食零食，晏晝捱麵包甚至望人地飯盒止餓，就係為儲錢買漫畫買玩具？或未試過做麥記做倉做跟車辛苦工賺錢買遊戲機？每一次講番，喜悅還是發自內心，更感到驕傲自豪，未捱過未辛苦過先俾人笑。九幾出世班靚仔靚妹？只會怨老豆老母點解每日俾得五百蚊零用錢佢咁「少」，食完大餐上完網吧唱完K媾完女，剩番ｄ錢唔夠買多個LV，好灰，甚至冇野做又搵唔到野做／唔搵野做，匿係屋企大半年唔知做乜，繼續怨。問點解唔努力打工賺錢？贈番一句「黐Ｘ線」。又同佢講，生活理應追求實際？送多句「戇Ｘ鳩」俾你又點話。

電影直接反映整個社會年代風氣。七八十年代流行勵志電影，好似《Karate Kid》同《Rocky》呢種體育勵志片成巷成市，同你講千錘百鍊方可成為英雄，不過英雄都有失敗有輸的時候，永不放棄振奮一番自會東山再起重奪皇座，日本都有套不能不看經典《鐵拳浪子》。'80一代生活態度積極做野又夠搏，就係從當時社會同呢ｄ經典名作中吸收，睇完會明。過埋九十年代初水尾《男兒當入樽》，難再搵到呢種勵志正面電影／漫畫／動畫，因為奮鬥是「娘」的，'90思想是走精面同怨天尤人（當事人說法是「憤世嫉俗」）。或者見世界已經回到六七十年代式低潮，而家又到需要勵志片之時代，《Rocky》隔十幾年仲可以再拍新一集已經犀利，都未講其他雖非勵志，但仍代表「那個時代」之舊作、舊人紛紛再現，史泰龍打完拳立即《第四滴血》，六張喇大佬！當年邊個男仔冇睇、唔迷《Rambo》？布叔五張幾《Die Hard》仲可以4.0！《未來戰士》都拍第四集（全部都係四），可惜冇州長份，否則真真正正'80回潮。數極，確冇一套感動得過《The Wrestler》，因為由現今導演創作新劇本追求番八十年代精神，而唔係靠延續經典，實在難得，等左好耐，終於有電影真心追溯'80，為我地吐心聲。

既金像獎時谷到咁恆，原先擔憂上畫後會唔會難搵到位睇？後來發現，應該擔心搵唔搵到場睇至係，唔多大院有得睇，場數又難就時間，我要上畫後第二日4/4星期六特登一早去睇中午場，細院上，廿個人唔夠。算好架喇，我上網查過，之前十點幾早場，太早卦，好似得四個人睇．．．取材絕對有影響。摔角，幾多香港人識？九幾年紅過一排，亞視《週末摔角大狂熱》令全城都講摔角，當時紅到老豆老母街市阿嬸都睇埋一份好勁架，但香港人始終唔接受美國文化，過一排新意冇左，立即高速收檔，而家更加冇人會理，台上兩個／幾個男人攬埋一舊，BL乎？仲要明顯做戲打假，得啖笑，自然無以為繼。故事走「後《洛奇》」路線，唔講成功過程而係成名多年後，鉛華盡洗人去樓空，退休英雄變落泊英雄，構思在現代絕不罕見，劇情亦簡單至未入場已估到大概，自必然又窮又老打唔到摔角迫住搵份普通工，心思思懷緬過去想東山復出。題材甚至劇情普通冇所謂，重點在於導演同演員。出名如Mickey Rourke都唔多識，何況其他人？冇所謂，睇的是演技，由最路人到主角通通有戲味，取鏡用色又夠自然，最鍾意拎住部手提機跟住角色一路走，寫實之餘獨立意識強烈，配合樸實戲路。

最動人心，係拍得出主角潦倒一面，同其他人格格不入，雖已過氣又放唔低光輝往事，唔甘心做份苦力工賺得少錢，唯有靠打細規模表演賽幫補加重拾自尊。台上篇幅唔多，畢竟重心並非動作，主要帶出摔角之表演性質，普通賽互相遷就，必要時用刀片自殘扮到真實，真正角力調轉打到全身傷口血肉橫飛，到頭來都係事前大家議好劇本。即使做戲一場，又唔知點解美國人男女老幼明知係假都咁鍾意睇呢種「美式特攝」，摔角手身上所有傷痕冇得假，名副其實賺緊血汗錢，見到主角周身傷又老又殘仲要戴助聽器，望見已經覺得好灰，更灰係搞到噉仲要繼續打落去唔可以停。其中一幕主角開簽名會，身邊有其他過氣明星同退伍軍人，得小貓三四隻入黎傾偈影相拎簽名，空洞大堂中影住佢坐係成班老人、廢人旁邊，加埋低調配樂，睇到人好凍。導演同Mickey Rourke成功令觀眾代入主角角色，令你驚自己都會有此一日。

不甘於平凡，主角決定藉同廿年前宿敵重賽時機重出江湖，希望可以尋回昔日成就感，點知年老舊患多加上心臟病，已經負荷唔到咁大運動量。人之將死 ，原打算安穩做份散工過活，再從身邊人找寄託，通通悲劇收場，只好再次回到摔角台。對此導演保持模糊，冇明確拍出主角最後戰勝宿敵，係咪賠埋條命黎成就傳奇，影像上第一次心臟病發時畫面立即轉黑，結局影住主角繩邊跳起後，畫面突然全黑幾秒至播字幕入片尾，可能有所隱喻。不過其實可以話，當佢發現自己有心臟病，個女唔肯同佢和好，表白又被拒絕，佢已經死左 － 心死。從而決定死都要死在戰場上。寓意是做人唔好過份執著，否則好易將自己迫上絕路，但這又何嘗不是八十年代男子氣慨？《死亡筆記》創作組新作《爆漫》（難得追求'80精神佳作！），有一句：

「男人有男人的志向，女人不會明白的。」

唔止女人，普通人都唔會明白。'80一代，即而家近三十一班，你問佢想做乜，寫幾份報告書同你講都得，不設實際空想大量，但十幾廿頭一班，答案接近一定係「我都唔知自己想做乜」，又或十分世利。兩者分別在於「老鬼」細個係睇超男性化、陽剛味重到爆的動漫，即係《北斗之拳》同《鐵拳浪子》同《魁男塾》，屢屢提醒你「男人應該要有大志！」，尤其《鐵拳浪子》，《爆漫》兩位主角回想當年睇到自己都想做埋拳手，與《The Wrestler》有點同工之結局更成永恆經典，加上同你講唔係自己最強代表大晒，亦要尊重、欣賞其他人，並非門外之見打打殺殺咁簡單，內裡實際充滿正面訊息。新一代男性經常俾人／俾本地女性睇死，甚至連自己都面對唔到，就係失去左「Masculinity」。又好難怪，死跟日本潮流，而《北斗之拳》時代早已過去，而家講到男人都要女人型先合乎潮流，以前漫畫男角個個全身肌肉胸肌四五十寸，而家？ｄ男人仲瘦過女人，男性化不是熱血男兒情懷，而等同於BL，換言之以女性氣質掩蓋自己男性特質，從而取悅異性多於自己。「做（男）人要有理想」？「愛拚才會贏」？試問'90/'00男又點會明？好簡單之道理，居然被遺忘左不知多少時日。《The Wrestler》唔能夠喚醒新一代，但夠令我們老坑感動。

其實唔使睇真，單用對耳，套戲已滿足晒。冇任何一首歌唔係我地唔想聽。片頭一出QUIET RIOT《(Bang Your Head) Metal Health》，立即知乜事。中間ACCEPT《Balls to the Wall》，主角最後一戰開場曲選GUNS N' ROSES《Sweet Child O' Mine》，就連soundtrack都有Slash彈結他。片尾字幕見到SCORPIONS、CINDERELLA、RATT (ATTACK)，睇完套戲感受完，再望住螢幕呢ｄ樂隊名、金曲名，你冇諗過單睇字幕可以感人到喊。而且，最強一首，在片尾。Bruce Springsteen特別為套戲所寫之同名主題曲。

Bruce Springsteen係近代美國史上最重要創作歌手之一，音樂、歌詞、氣質通通代表緊美國大眾，基本上佢個人已等同於美國精神。首歌非常簡單，歌詞彷彿主角夫子自道，誓要不顧一切向前衝，感人肺腑。幕後更多動人情節。獨立電影點樣用到咁多名曲，連GUNS N' ROSES都有？全靠Axel Rose肯准套戲免費用《Sweet Child O' Mine》，真係收版權費的話，相信套戲總開支拍得住大製作級數。Bruce Springsteen亦係，Mickey Rourke想佢幫手寫首歌，寫完一蚊唔收免費送俾佢。呢份情懷好耐未遇見過。導演特別加插一段，主角同女主角聽歌跳舞，明言好多'80人士所想：九十年代（起），搖滾樂／流行音樂變得不值一提，全因被Kurt Cobain殺死，先將享受生活、享受音樂定型為有罪，再令音樂被傅媒徹底商品化內涵不再。grunge的開始正是metal的終結。當然代溝從來存在，舊人聽grunge聽alternative rock覺得咁簡單意識又低能，新人聽番七八十年代rock同metal一樣覺得悶同老土。當然客觀黎講，「舊派」音樂性比新派高，你任何時間隨便搵隊八十年代樂隊求祈播首歌，都可以覺得好聽順耳，呢樣野九十年代起冇多少樂隊做得到。不過，有料有深度又點？某程度上，你可以話導演以Kurt Cobain同九十年代音樂作比喻，指出真正男子氣慨已隨八十年代完結而消失，就如同代表物之一、「真正」之hard rock與heavy metal。

要再次多謝Mickey Rourke，演技實在太出眾，唔係靠佢上到金像獎，套戲咁小品格題材又另類，黎到香港可能只得油麻地百老匯三四日晏晝場有得睇，上左過左都唔知果隻。廿年前「搏」時代，無線劇大學生畢業就有得做經理，而家「甘」時代完結，「苦」時代回歸，開無線係新聞話曾俊華叫你地大學畢業生拎四千蚊做住先算（讀：「曾俊華叫你地班大學畢業生食屎，冇大學學位者屎都冇得食」），世人再次需要勵志片、男兒電影。成日怨天怨地的後生仔女們，你地應該睇《The Wrestler》。唔止睇。係感受。

雖我唔打摔角，音樂方面亦是獨立人士同「過氣」，所以對套戲感受，比絕大部份人深。戲中有幕，主角叫個靚仔同佢一齊打任天堂（美國冇紅白機而打灰機，襯晒故事），同佢講番當年往事、以前有幾好玩，個細路打得好冇癮，同番佢講Call of Duty，跟住走人。表達兩代人之間深溝，同老一代融入唔到後生一輩。正好等同於俾錢買音樂慢慢嗒，同上網魚翁撒網大包圍最緊要夠新夠快兩代／兩派對比。同本地metal界，我真係未遇見過多少識英雄重英雄之景，正正經經同人講音樂，倒不如直接俾條link佢download，最少，你唔會俾人笑＆小再被當隱形冇到先。英雄＝圍威喂，真材實料做唔到英雄，只能做到反派。要寫呢個主題，相信可以又幾千字，但在此冇意思 － 甚至其他地方都係，因為這是香港無法改變事實。《The Wrestler》套戲同首歌對我影響有幾深遠？因近來音樂界頗多暗湧，皆旺又發生左ｄ事令我好唔開心，加上身邊、個人同期遇著唔少問題，睇完套戲聽完首歌，啟發左好多野，《The Wrestler》令我作出一個決定。

「但天下無不散之筵席。仍想在TRHK見到劉Sir的話，請把握2009年四月餘下之光陰。TRHK將會一切如常，但自己或會離開（音樂／metal）一段時間。」