2009《機動警察》加《之戰》一連兩套港產片開年，終於「正常番」睇睇西片，第一套睇《The Spirit》 － 比《Watchmen》更早。2008西方商業電影屬ACG天下，2009開年電影繼續ACG，頭炮有《Sin City》同《300》作者Frank Miller執導之《The Spirit》。鑑於兩套都鍾意，加上今次Frank Miller首次做導演，唔識Spirit照入場。我是個盲目美漫迷。
其實仲有兩個捧場原因：Frank Miller來頭非常大，創作風格寫實陰暗，大家而家睇到之《蝙蝠俠》都係源於佢八十年代筆下蝙蝠俠漫畫名著，不過自己第一次以漫畫家身份執導，卻同自己作品無關：Spriit已有超過五十年歷史，屬於殿堂級漫畫角色，而家漫畫同拍戲個個英雄唔玩高科技就超異變，四五十年前漫畫較簡單，冇而家郁下就死人講人性討論政治倫理，雖然Spirit都市版黑俠梭羅性質返璞歸真，感覺接近《Sin City》甚至《蝙蝠俠》，斷估好難將Spirit變到咁沉重喎？所以要入場睇佢點處理一個古老漫畫人物。
唔識Frank Miller同Spirit，始終有兩樣野一定認到：同佢有關電影，作品名例定大大個油墨手繪紅字，連字體都要差唔多，抵死在Spirit唔係佢創作照樣「Frank Miller字體化」，慌死你唔知邊個出品。影像例牌重藝術感，主要場景圍繞黑夜城市，自不然用番《Sin City》玩黑白同主題鮮色種高反差手法，好夾世界觀氣氛，係《Sin City》fans如我，齋睇攝影已經覺得抵番張飛。至於點樣將一個五十年前經典人物融入現代呢？方法好簡單：索性唔現代。有冇睇過舊時ｄ外國電視劇，即係行步路都要好誇張好扮野果隻？導演捕捉晒果份老土造作，除左四五十年代街頭你會見到手提電話同電腦叫做最現代化，基本上同你睇以前英文台夜晚播ｄ外國片集差別唔大，配樂都係舊時西方時裝劇常用之jazz、big band，而家大家睇番會因呢份脫節當成笑片睇，就如《蝙蝠俠》比較任何一集電影同連續劇版本，年代感加創作風格根本兩回事，難怪一開波兩雄相遇已經要黎番場泥漿摔角爛仔交，做俾大家睇英雄用黎笑俾人多過型。向舊世代作一點致敬無任歡迎，但復古到當而家仲係二十世紀中期就中晒招。
就因咁「破格」，一路睇一路唔對路。相信典型入場歡眾有兩種：為睇《Sin City》續集，或為睇又一套燒錢動作片。前者除顏色同攝影一定頂唔順，後者都唔會點好受，尤其面對眾多舊式詼諧笑料，出到黎造作過頭，加上動作成份超低又唔係型，後半基本上變左泡妞故事，睇到喊唔出奇，原因可以是悶，可以是灰。又要反英雄最強傳統，追求以前乜都帶點幽默種玩法，致命傷是顛覆主角設定：我膚淺知識範圍內，原著Spirit係正常人，點知戲入面講到佢有不死身，令主角變成白痴仔一名，打大佬必定被老屈，最後要其他人幫拖自己再執雞贏，三十年前睇可能好玩好笑，家陣廿一世紀套套戲主角一個打一萬個，你搞到主角俾人恰到成個傻仔噉，再加不死身強化等佢俾人打個無止境搏大家笑佢戇居？不如正正經經拍套現代版梭羅算啦。
千錯萬錯，錯在Frank Miller決定執導，事實證明一個好漫畫家唔一定成為好電影導演。睇開美國漫畫都知美國佬好興長篇大論，一格仔寫三四段、一版填百幾字，將所有人物歷史事情來龍去脈解釋到篤，但空間限制往往精益求精，甚至利用旁白巧妙過場。導演畫開漫畫，電影使用相同手法，反正拍戲大把時間，想點講想講幾多無限制，不過講時畫面缺乏變化或特色，有時更加得主角一個自己對住鏡頭係噉講，就顯悶同戇居，相比《Sin City》同一招數發揮得有趣味有深度得多。諗住Frank Miller接手故事會有突破？點知平淡冇驚喜襯番年代感，最慘演員好硬全部冇乜演技可言，漫畫唔識郁，人物都有血有肉過戲中任何一個人，打又打唔夠型又唔夠型笑又唔好笑發展又鬆散，掛住Frank Miller個名搞成噉，絕對大失所望。埋尾最灰：故事講反派大佬找尋海格拉斯之血，話只要飲一滴仔就可以進化成神，最後入手硬要死拖爛拖唔飲講一大輪廢話，跟住俾人一槍打爆樽血倒晒。按照故事所講，飲到一滴都做到神，爆左樽都冇問題，立即執番碎片甚至飲地下一滴血已經可以啦？又唔會噉做，因為飲左主角就做唔低佢嘛！
「我自己型住卦，硬係覺得最後炸死Dr. Octupus一幕，導演想tribute《Watchmen》。」
阿Frank哥都係唔太適合自己一人全權做導演，皆因電影同漫畫屬兩種完全不同媒體，《The Spirit》本身非佢創作風格差好遠，編劇又失敗，好似之前兩套噉交俾真正導演主理，自己頂盡只做助導，相信好難差得過而家。你話有佢插手，最少保留到FM式演譯風格，可惜劇本差演技生硬而誇張，非常似睇舊時電視劇同漫畫，單靠顏色影像救唔到多少。點解會有片商投資開拍呢部戲？又點解會搵個漫畫家做導演？實在太投機，而Frank Miller肯玩，有錢搵之餘又滿足到自己童年夢想加導演夢多過真正為拍好戲卦？最後留埋伏線，我諗幾難有下集，套戲爛成噉。
睇《The Spirit》實在好難唔諗番起《Speed Racer》，大家都係做／扮老土想真人變卡通，《The Spirit》叫內容冇咁益智、態度冇咁正氣、題材冇咁勵志、顏色冇咁鮮艷囉，即使《Speed Racer》導演有錢有面所以鍾意點玩就點玩吹咩意識更強烈，加擺明低B得多，都要好睇過《The Spirit》。多麼的灰。同呢種全CG式攝影手法拍得好定壞只是一線之差，用得好如《Sin City》，成果非一般拍攝手法所能達到，可惜先天之限，過份漫畫風格化致與現實建立距離，又直接影響市場及藝術接受性，你可以諗諗《蝙蝠俠》用《Sin City》種拍法，可能一樣超級好睇，但會感到虛幻過頭，未必能得到相同好評。暫時睇過最成功之「真人卡通」，係睇完《Steamboy》追番之《Sky Captain and the World of Tomorrow》，復古之餘又唔似《The Spirit》做到咁老土咁脫節，不過故事世界觀設定於二十世紀世界大戰時期，加上擺明想拍番黑白片時代科幻，成功全賴完全擺脫現代現實 － 唔需要創造一個空想世界天馬行空，都唔使全CG啦。
「估唔到09開年，港產片好地地，西片一開波就中招。不過《The Spirit》唔好彩，唔係跟住出左套《龍珠》，09年廢片王之位簡直垂手可得。」