The Prestige



罕見以魔術為主題之電影,上畫唔太耐後一個禮拜三晚去朗豪坊即場睇九點十,似乎好受歡迎,即場飛只賣剩頭三行,雖然朗豪坊唔好坐影音亦唔夠其他戲院例如新世紀好,好在套戲唔錯唔使灰。對唔用腦人士劉Sir黎講,《死亡魔法》係少有會留意之魔術片(噉係因為一向膚淺地只睇打打殺殺果d遮),亦係難得膚淺的我都會鍾意睇之劇情片,講兩個魔術師點樣為名為氣鬥生鬥死,最後開估出人意表,不過剪接得太亂,成日呢個時空突然間飛前或者飛後去另一個時空,飛下飛下,頭果半個幾鐘飛到我連兩個主角邊個打邊個、邊個得罪邊個都仲未搞得清楚,但前半交代晒來龍去脈之後,後半先冇飛得咁過份順番d,但呢種超時空剪接實在過火左少少影響理解。套戲賣點係魔術,但其實只係裝潢,到後來由魔術變成科技,而全套戲真正賣點係思考、深度同編劇。呢類劇情片賣點當然係最後峰迴路轉,呢套戲最後逆轉位同開估位一個接一個,對我黎講有好多意思好多思考空間,但一直以黎d開估位唔夠震撼力,可能因為去到中段已經開估得太多,大半個結局已經估到晒,但實在鍾意編劇同講故事之方法,好多細節同呼應低調得黎精妙,亦係令呢套戲值得一睇再睇之原因,因為每睇多次,都會發現更多導演之匠心編排。

當中最明顯係首尾呼應,同兩個主角死法係同佢地老婆一模一樣,直到結局前都冇講過其實主角係孖生,但當中幾場戲半刻意地俾你思考當中有問題。雖然個個都想知道魔術背後之真正原理,但其實魔術呢樣野真係好邪惡,好似變雀個變法絕對係唔知好過知,而主角最後用Tesla科技複製自己,令變自己同變雀同出一徹,係一個好有力之諷刺,特別係佢同雀之分別係佢係清楚知道自己會死,又唔可以唔死,但最後用複製自己殺死另一個主角有個漏洞:最後一次表演,對頭人襯機入後台埋伏,點知去到發現主角「施法」時,會跌落後台一個水缸浸死,而在場之佢因此被視為殺人犯。問題係複製之後,另一個自己唔會知真身情況係點,又點會知道佢對頭人走左去後台伏佢,而專登唔出黎陰番死佢?但係唔理呢樣野,好多細節位真係睇到拍案叫絕,好想搵一間靚戲院再睇一次,睇明d,同真係值得。今年甚至近年睇過最滿意之一套戲,就係《死亡魔法》,可能我求祈,除左頭果半個零鐘即係好亂仲未明果段,之後冇乜悶場。一向係追李連杰系列的劉Sir呢個唔用腦人士都會鍾意呢套要睇幾次先會明晒之劇情片,就知道呢套戲襟睇同成功。

戲內其中一個大角色係Tesla。後來先知道原來Tesla係David Bowie演,又超人又蝙蝠又David Bowie,原來呢套都係all-star片黎,不過呢度唔係講David Bowie,而係講Tesla。相信好多人識Telsa係因為C&C Red Alert,佢係物理學傳奇人物之一,傳奇在發明左其中一樣人類最重要資源:用之不盡之無限能源,一個可以於真空空間中無限發電之發電源。你當然會問,如果真係發明左呢樣野,點解而家我地仲係硬膠膠地用石油做主要能源?又係最簡單果個原因:錢。唔使講在座各位都知道,世界上最有錢果班,就係攬住石油果班,有石油就有錢有權,當發明到呢種足以令最有錢果班人破產之無限能源,你覺得佢地會唔會支持、會唔會鍾意?而且越係有料、越係有價值,就越容易比人杯葛同挑戰,好似電影入面,Tesla呢個「超現實科學家」最後俾愛迪生呢個「正派」趕絕。呢個又係一個諷刺,因為愛迪生發明電燈時,都係俾當時炭火燈年代之煤炭公會同商會趕絕,就係因為呢樣發明影響到各位商家老細個荷包,如果佢後來唔成功,下場會同Tesla一樣,而我地而家會仲燒緊煤炭同唔會有電器呢樣野。人類同你我到而家仲係咁硬膠膠,就係因為人性。耐唔耐會係新聞睇到有人發現到新能量,可以減少污染、舒緩能源危機、令能源普及化,但轉眼就冇左冇晒下文,商賈介入相信係影響之一;剩番落黎日日睇到,係石油點樣帶黎經濟同政治危機、環境污染、戰事紛爭。

絕對相信,如果唔係因為《死亡筆記》同期上畫,中文譯名一定唔會叫《死亡魔法》,而會叫《驚世魔法》、《驚天換日》之類;如果唔係已經俾人用左,肯定會改《驚天動地》。