好耐未試過睇戲可以睇得咁柒。唔止講套戲。連前因都柒過人。話說2009-2-12這個星期四晚，「睇《同級生》點知睇到食左帶」的R先生、劉Sir個forum活躍電影迷白告加佢位非常有文化的朋友軒爺，相約今晚一齊去睇《驚世真言》優先場。因為九點三奧海城開場，中間幾個鐘空檔，梗係鼠上黎皆旺108 32"闊銀幕大電視4.0影音豪華影院 TRHK攝時間啦。既大家都鍾意睇戲／睇爛片又咁人齊，就開隻好野大家睇。成日捐獻陳年音樂雜誌的文化人史丹兄（定叫阿叔好ｄ？）有次整左隻DVD黎，今晚是吉日開光了，蹺衽今晚阿軒爺帶左大疊DVD上黎，當中又有呢隻《機關槍少女》！即係天都話今日我地唔睇呢套戲唔得！

係咪見《Kill Bill》同《Grindhouse》成功？日本仔又一齊癲搞番套《機關槍少女》，全世界講喪戲白痴片日本一定係最極端國家，初出trailer全世界瘋狂互send，cult到爆睇完真係唔睇套戲唔得，但呢ｄ戲唔使旨意會有得上畫，唯有靠DVD。劇情簡單過簡單，睇完trailer基本上你已經知道晒個故事＆知道晒所有需要知道的事，非常典型《Kill Bill》怨怨相報何時了粵語殘片劇情不必深究。但睇左套戲先知，某程度上導演對個故事幾認真，用左大半套戲交代女主角點樣陷家產，我成日覺得拍呢ｄ戲ｄ導演好容易如此兩頭唔到岸。老實講，做得觀眾入場睇呢ｄgrindcorehouse爛片，為乜？為官能刺激睇佢係噉殺係噉爆嗟，為睇各位人物心路歷程同哲理大義咩？主角咩料同發生咩事唔緊要，最緊要夠慘之後殺得轟烈；多角色唔緊要，出場為死俾你睇就夠只怕唔夠多。大家絕對唔介意劇情必須清晰仔細，即使全部影評對劇本一致零分，一樣會大把人入場支持，你睇睇《AVP》同各大動漫改編電影就知，或者又係導演脾氣硬要顧及劇情，唔係話身為爛片冇可能做到，你可以睇睇《Grindhouse》入面《Death Proof》，唔太鍾意都睇得出有料到，但呢樣除故事設定前提又要睇埋導演功力，《機關槍少女》明顯血腥動作向加擺明粗製濫造，仲俾咁多心機落故事入面，就眼高手低了。

預告片爆到九彩，打鬥卻遠比想像中少，基本上trailer入面已經睇晒咁多場打戲精華，就算預左會特登製作成陳年爛片，都冇諗過打鬥流過無線、特技流過特攝片咁堅嘛。如果係其他片拍成噉就死硬實被怒小，好在《機關槍少女》一開始已經話「我係cult」，反而你唔玩到咁流唔開心喎？大反派係黑社會家族，又拉到去忍者傳人搞到機關槍打忍者先吹脹，睇ｄ人被射到爆頭爆身斬到斷手斷腳加送比《Kill Bill》更誇更假的噴血，流到你睇到有個水管位花灑位三百六十度全方位持續噴射成分鐘仲有血出果隻，真係笑到你爆晒咀，就連血都有無數種型態，血水、血漿、血膏、血霧、血煙．．．乜都有，直頭可以用黎教常識「物質的三種型態」。身為日本仔cult片又點少得連串極具創意殺人法？仲有講到全個鎮家家戶戶郁ｄ就開拖殺人的超典型東洋瘋狂世界觀，一次過tribute晒七八十年代日本動作片、特攝片同cult片，就連《Planet Terror》都唔知有意定無意玩埋，過左頭三分二開始係噉殺套戲就好睇了。當然好多野唔好計較，例如女主角俾人鑽穿埋心口居然仲可以冇事加打番贏大佬，轉頭兼打完可以企定定同你吹一大輪水完全冇傷冇痛，但睇呢ｄ戲仲用腦睇就死得人啦。我略嫌劇情講得太多，因為場面設計極度出色（無與侖比地假／cult），所以套戲反不及trailer咁有迫力同緊湊有點失望，最後擺到明有伏線，真係出第二集的話希望會集中番打同血啦，既女主角講晒，一味死打咪好囉！又唔係軒哥同大家分享，都唔知道原來戲中唔少女角係搵AV女優演出，全套戲仲要佢地演技最好，專業演員確實唔同ｄ！每次有AV女出場Rock爺立即100%留神，不過每次去到AV片中理應開始搞野的情節，冇搞就飛左去下一場了，令Rock爺睇得非常之唔開心。我諗《聖少女戰隊》較適合佢。

「下套睇乜好？《伊波拉病毒》是大熱之選。有冇人有《力王》呢？呢套要成班白痴仔一齊重溫先有癮喎！」