The Invasion



中文名叫《無恐不入》,係我都知道要譯確係難譯,但香港地好鍾意執個四字詞改少少玩食字就當戲名。"The Invasion"其實唔係新戲,已經有五十年歷史,第一次上畫係1956年,全名《Invasion of the Body Snatchers》,廿年後1978重拍完,再過三十年2007又再重拍。因對科幻之熱愛都略知一二:《Invasion of the Body Snatchers》(個名好長),係黑白片年代科幻名片,亦係史上最經典科幻恐怖片史上之一,故事好簡單甚至而家睇番會覺得老土:一種植物目外星生物入侵地球,當人類訓著時,植物會孵化出複製軀殼取代,外表一模一樣但原主來之靈魂意識會被銷毀,只成為冇任何情感之外星人寄居體,再透過將孢子傳播各地,計劃於睡夢間取代人類侵佔地球,主線自然係主角一夥幾個人發現外星人侵略地球之陰謀,但為時已晚身邊全部人已經被感染,逃避外星人之追捕同時拯救世界 - 假使仲可以的話。冇幸睇過原版,五十年前喎大佬黑白片喎大佬而家電視仲點會做呀?78年版反而有少少印象,應該係以前明珠930時代播過睇到,只係年代久遠唔知中文譯名係乜,但細細個睇覺得好恐怖,睇d人由朵花度變出黎同外星人發現人類時會尖叫,呢兩樣野見到好驚架,而且結局唔知有冇記錯,係主角發現全世界變晒外星人,連本來一齊班倖存者都無一幸免,只得番佢一個人類等死/等訓著變埋做外星人,勁灰。

冇乜超特技或者視覺震撼都可以成為經典,全靠無形氣氛。同音樂一樣,舊世代資源同科技不足,就唔倚重表面而靠表達,雖然唔太多動作場面外星人亦只現人樣未見過真身,卻做到恐怖片應該達成之目標:刺中人類心理最黑暗面,唔係靠點咩外星人咩鬼咩血嚇人,而係透過人類被外星人同化取締、身邊人類同同伴一個一個成為敵人而敵我難分,令觀眾感受到孤立無援、被出賣地之可怕,同全世界人類突然間死晒得番你一個,而外星人仍然步步進迫果份無助,恐怖片點核突點血腥都好,影像刺激唔會夠心理打擊黎得咁深刻咁持久。要玩官能震撼,一兩個成功重點鏡頭或者焦點已經足夠,正如每每講起以前之恐怖片經典某幾套戲某幾幕一定會提到,而78年自然係花孵人同尖叫,人性消失同外來危機迫近卻無能為力兩個象徵,同最後走投無路全世界陷落之灰暗結局。之後九幾年好似仲有一個重拍版唔太清楚,到05年有套連續劇好相似,The Invasion《來者不善》(都話求祈搵個夾戲路的四字詞就係香港中譯名啦),颱風捲出海底神秘生物,將體格健壯人類同化成外星人,同樣被同化之人類外表同本來完全一樣,甚至記憶生活情感冇變,但心底媟P覺到有所不同,到被感召時就會組織起黎,將其他人類同化,同作為外星生物之繁殖母體。尾二一集講到而另一個颱風迫近帶黎更多外星生物,主角一伙人所住城鎮大半人口已經被外星人同化,而剩下之人類面對被強迫同化之危機。
「結局點?」
「我都唔知,因為全輯咁多集追晒,就係大結局果晚,去左trhK。只差最後一集冇睇。遺憾也。」

2007年The Invasion新版,宣傳焦點係Nicole Kidman,而非經典改編。同原來隔左五十年,唔多唔少會有改變。一開波已經唔浪費時間,立即有架穿梭機由太空撞落美國碎片散佈全國幾個地區,架穿梭機點解會上太空目的係乜又點解會墮落地球通通冇交代,總之架機帶埋一種外星病毒到地球,人類感染後當訓覺時發生高速眼球運動(REM,發生時通常處於發夢或出神狀態),病毒就會入侵腦部侵蝕神經,醒番時就會同原著一樣,成為冇感情冇意識,只按外星人意願,以體液同嘔吐物傳播病毒同化其他人類為己任之行屍走肉。Nicole Kidman飾演之主角心理醫師個仔免疫唔會被同化,但佢自己被感染左,就要一面克服睡意,一面帶住佢個仔逃離外星人追捕,到未被感染之隔離區尋求解藥。
「咁簡單?」
「冇錯,就係咁簡單。」

太空威脅由植物變成病毒,連特技同道具都慳番,前半係講外星人點樣透過同化政府部門同執法人員,令病毒得以無聲無息下迅速傳播,真正想睇之大逃亡戲肉要到後三份一先開始,只係一切大家期待之動作打鬥飛車流血通通欠奉,開少少車開少少槍,同人類&喪屍一定走走走走走追追追追追,加起上黎冇新意冇驚喜亦冇緊張冇刺激,只有一大堆符碌同理所當然,令人覺得幾個重要角色全部走得甩係為大團圓結局做好準備,特別最後主角帶住個仔俾全城外星人追趕,但一路著晒火炒晒車佢同個仔乜事都冇,一上到天台就有直昇機接走,然後靠佢個仔就發明到疫苗,全世界人類回復正常,全球性全人類危機,半個字就交代晒點搞掂,直頭係反高潮。放棄左78年版兩大恐怖點,心理層面之恐怖氣氛又因為步伐太慢而營造失敗,如果有更多動作場面可能陷挽救得到,但冇。變左改編但唔忠於原著,除左世界觀現代化左亦冇加入任何新意,老實講,除左掛住「當年經典」之名欺騙各位傻仔(如我)入場,真係唔知道2007重拍版有乜意思。

唯一值得思考,只得一樣。外星人來歷同降臨目的完全冇講過,但來臨之前,全世界係史無前例咁混亂;到左之後,「人類」開始和解,北韓同意制裁核武、美國撤出伊拉克、中東地區戰亂結束,一切美好。人類其實一直都想達到以上目標,真正世界和平,同希望人與人之間冇任何紛爭拗撬,而外星人同化之後,理想確實慢慢達成,而當外星病毒被消滅後,人類「回復正常」,之前各種戰火同爭鬥再現,世界回復混濁一片。換言之,要想完成世界和平,就只可以靠取締人類,因為再冇可能完全改變世界上所有人類思想,特別係擁權之小數。但如人類消失後先可以建立和平世界,到時仲剩下乜野意思?一個永無止境之矛盾。不過相信前幾作同樣有討論到相同題目,今作亦未能成功發展呢一點,只較說教式讀白帶出亦冇深究。睇冇咩野好睇,諗亦冇乜好諗,唉。

所以完場就走。呢種戲通常字幕過晒,最後會有隱藏結局,外星人仍然潛伏只伺機再侵略之類。不過等都冇心情等,完場出字幕即走。因為太過失望。