「又黎病毒片？」
近來因乜解究病毒戲咁潮？睇完《Doomsday》冇幾耐，又一套《The Happening》講病毒殺人。劉Sir鍾意睇咩戲係捉到路的。病毒戲、喪屍戲呢類，不求甚解不斷死人／殺人呢ｄ，完全係唔用腦的佢必睇電影，但連睇咁多套病毒戲，睇到有點麻木。
「《廿八＿後》玩意境、《I Am Legend》玩心理、《Doomsday》玩動作，今次《The Happening》又玩咩？」
玩寫實。不過玩乜唔重要，重要係玩果個，叫M. Night Shyamalan，《鬼眼》導演。佢電影賣點係用寫實劇本及攝影手法，探討不能解釋之超自然現象，結局往往出人意表。以前讀書時，一到長假好鍾意走去人地屋企過夜，但齊人之後大家唔知做乜好，結果一班人係噉煲VCD，一晚通宵睇四五套戲，其實好無聊，不過令我睇到唔少戲，當中包括呢位名導最出名幾套。《鬼眼》唔使多提啦，佈局真係超超超超超絕，已被視為現代電影經典。可惜佢係個1-hit wonder，《鬼眼》之後持續插水浮浮沉沉，可能因為《鬼眼》實在係不能置信地神級。《不死劫》講現實中漫畫英雄，點知嚴重唔掂；《凶兆》講麥田圈講外星人，頭半的確非常恐怖，單麥田個外星人腳位同「外星人祝你生日快樂」兩段已經殺晒，可惜結局出人意表．．．地失望。直到《森魔》先正式入戲院睇，個故事講中世紀深山村民，點知最後發現原來係群現代人避世，好多人狂鬧，但我好鍾意呢套。隔左幾年黎左套《禍水》，因上套《森魔》印象正面曾經考慮過入場，只係導演狀態實在太唔穩定，而且身邊睇過朋友一致勁劣評，結果放棄等電視算（仲未等到可惜，廢到電視台都廢事買？）。今次《The Happening》，之前講過「捉到路」，上兩套玩到咁奇幻今次都市番現代番，興趣殊大，俾次機會啦。
「因為呢類戲想睇一定晨早去睇，相信在座未睇人士冇幾多會突然有興致買飛入場，所以我唔會就住講ｄ唔講ｄ。」
開始已經激正。公園吹起一陣風，跟住全部人企定唔郁，然後集體自殺，請為攝影師鼓掌。頭兩個字已經殺晒。劇情發展落去，美國東北部全部大城市發生同樣事故，然後由大城市擴充到小市鎮、鄉村、郊區，受感染地區人口密度不斷下降。大美國主義，首當其衝梗係話恐怖襲擊啦，但聰明的觀眾自然知道唔係。其實話從公園擴散開去，已經估到係植物引起，同《強戰世界》想法一樣：感到受威脅時，大自然會產生化學抗體排除，《強戰世界》中係自然界細菌同病毒殺死火星人，《The Happening》係植物感到人類污染環境太嚴重，而分泌神經毒素令人類自殺消滅人類。
「睇落似《無恐不入》，多過病毒戲。」
主線係大家跟住男女主角「一家三口」走難，一路睇各位美國居民點死。講到明都唔怕，因為幾行貨，同導演今次失敗在場景、對白同聲效方面太早提供過多線索，睇戲的唔使好耐已經估到晒成因後果，灰在我地輕易估到晒，戲入面偉大的美國政府同聰明的美國人居然諗極諗唔到？一開始有人死，立即公佈係恐怖份子放毒氣（典型美式反應），即係都諗到係同空氣有關，點解政府會完全唔執行任何措施，例如派防毒面具、透過傳媒提醒市民戴口罩面罩之類？只有講句，美國人真係抵死今舖。你一心想睇自殺想睇血，較可觀只得餵獅子同剪草機碎屍兩幕，其他全部碎料亦唔太露骨。大佬，導演賣點係寫實，玩到好似《死神來了》死到玩雜技咁有型咩你諗住。換言之，你想睇血睇死人而入場的（照計唔會，因為整個宣傳都冇乜涉及到呢方面），入場後必定係噉爆粗。
睇開導演其他作品，你會預左自己入場後係感覺而唔係睇。去到邊都死人仲要係自殺，前提已經營造到成個世界（美國東北部嗟）好灰、好無奈、好doom metal，但隨著多人殺到少人死下死下死剩主角幾個，又太早可以估到晒所有野懸疑性都冇埋，走緊難的主角一班人似郊遊多過似被追殺睇唔出佢地會怕下一秒就冇命，過左頭三四份一後明顯後勁不繼，大家都係等主角幾時同其他人一齊去死，雖然明知唔會。至於嚇除左睇人自殺，查實冇乜位真係嚇人，最大困難係講左植物用神經毒素，聞唔到又見唔到，可以有幾恐怖？就係話毒素用風傳播，利用風將死亡威脅形象化，不過睇幾班人草原上走走走走同ｄ風鬥快，同吹脹地一定係其他人中招但一吹到主角時就冇事，實在唔夠嚇，而最後話要好大班人先會引發植物分泌毒素，到高峰期單一個人都會觸發，點知主角見全部人死晒決定陷家自殺時，一行出去，乜事都冇。點解？因為死剩果個係主角，死左冇戲做，個病咪退囉。直頭反高潮，同唔見導演賴以成名的結局中之結局，特色都冇埋，更顯平舖直敘。懷念場面設計同（前半）佈局一流的《凶兆》，深夜麥田見到外星人隻腳一幕仲係我印象最深驚嚇鏡頭。或者剛剛睇完《Doomsday》，硬係型住而家ｄ導演拍戲，好多時為拍俾自己睇／玩多過其他野，《The Happening》又係似tribute戲。在這單單鬼魂、猛獸都嚇唔到人的時代，恐怖片／驚嚇片除左要有大量爆破動作，來來去去圍繞巨大怪物、喪屍、外星侵略之類，以地球環境為題材得災難片，但作為驚嚇材料，好似「阿爸個年代」先至搵得番。同而家ｄ人睇恐怖片，係要講到明你聽有乜野會幾時出黎嚇你，仲要有幾浮誇得幾浮誇先鍾意，戲中乜都唔講明，仲要到最尾都冇任何直接及明確解釋（雖說半套戲唔夠其實已經透過多方解答晒所有問題），嚇又只得間中死人同吹吹風，邊度夠呀。今次導演加編劇太．．．上世代了。同埋，太隱誨了。
「所以，除左會同《Cloverfield》下場一樣，在香港。『都唔係』。」
另覺得導演開始走火入魔，一心要賣劇本實力而非賣演員叫座力心態。全套戲除左主角級三人，其他個個相貌平庸甚至擺到明樣衰，不過已經改善左架喇，上套《禍水》更加嚴重，除女主角明星級數，其餘全部路人甲丁丙樣，或者真係太難頂俾人狂插加唔夠吸引力，今集起碼男女主角真係靚仔靚女先。女主角外型討好之餘，前半演到「cult cult地」諗住會有好多發揮，點知去到後半正常番，立即好無奈（套戲都係想你噉嗟，呵呵）。或者cult開有舖癮，女主角正常左，最後又攝個唔知乜事就發癲的阿婆，但癲黎唔知做乜，唔加好過加。同成日刻意提醒你，全場災難人類係罪魁禍首，花草樹木殺人係大家破壞環境的報應，潛台詞係大家記得環保。但，會唔會引起反作用，即係當大家知道原來係植物想殺我地時，我地會唔會咁戇居唔理，而先下手為強燒死晒全部植物，進一步破壞環境？點解，劇中的角色知道毒源成因，都唔會做呢樣野？
假如你睇戲心態，係唔要求套戲有野講有野諗、要乜都明示晒不需思考空間、要緊張刺激要攝影花巧、＆非M. Night Shyamalan fans唔知佢乜水，似乎睇番同期甚至同年任何一套其他外語片，都一定滿足過《The Happening》，自己入場都係導演情意結，可惜真係唔太滿意。更不滿係宣傳方面，中文名叫《破天．慌》、片頭甚至戲中最後一幕都係影住個天風雲變幻、連海報都要擺一擺個天出黎，初時諗住故事會同天外、外星人、神靈有關。點知，全部唔係，中文名得個慌字關事，甚至海報個氣氛，仲勝過套戲、仲吸引過套戲。
「可能這就是《The Happening》最大的出人意表。馬蘭，真係估你唔到。」