「唔係卦！《功夫之王》你都睇？」
未上畫好多人已有以上反應，因為除左有個鬼仔，同大家由細睇到大的呢套果套冇分別。點解仲睇？除左成龍＆李連杰＆袁和平，仲有另一個原因。每套戲一開頭總會話你知邊幾間公司有份拍，《功夫之王》係中外合作，足足有六間label亮相，當見到有成龍，你都估到大半會係英皇出品，但相反黎講英皇對部份人如我只有趕客效果。仲入場，因為美方發行商係
個名你未必有印象，但佢地出品／發行，好大機會有睇過，性質亦普遍偏indie，好似《Saw》同《Cube》兩部智慧型血腥電影經典，近期的話同《功夫之王》差唔多時間上畫有《Rambo》，連幾年前紅過一時的《Crash》都係，數量之多不能盡錄，有興趣上網搵搵佢地公司資料，好多近十年你聽聞過甚至睇過，而又好睇或具爭議性，都係來自獅門，就係鍾意佢地執著於indie，就算商業作品都有味道有內涵過人。值得一提係，Lionsgate來自我最愛國家之一：加拿大。
「係，我會睇《功夫之王》，唔係因為班底有邊個，純粹間label我鍾意。」
從來對英皇出品冇乜好感，因為佢地ｄ戲一係演出果班「英皇紅星」絕對難頂加劇情低能弱智到爆，一係充滿一份祖國色彩脫節味，睇入場觀眾好多係一家大細同自由行就知市場對象。未睇戲先睇戲名，英文名《The Forbidden Kingdom》，中文名《功夫之王》，完全兩回事聯想唔埋。初時見中文名以為係爭天下第一果類，結果梗係唔係啦；英文名又扯極都同劇情扯唔到咩關係，諗唔明點會改呢兩個名？片頭唔知特登定本性，娘到爆晒燈，最難頂係全部英文名譯晒中文呀，噢．邁葛！故事同樣十分無聊：孫悟空大鬧天廳得罪戰神被封印，如意棒流落人間去左美國波士頓一間當舖（．．．），將港產武打片fans的鬼仔主角帶到古時中國，同幾位中土武俠踏上復活齊天大聖、打倒戰神暴政之路。
「同七八十年代香港武俠片有咩分別，唔計個鬼仔主角？」
此謂之「祖國色彩脫節」也。係咪因為鬼佬編劇，所以諗得出crossover《西遊記》咁過癮？同時帶出個非常搞笑問題：當一個美國人去到中國，仲要係古代果隻，大家如何溝通呢？在現代波士頓時，當然係講英文啦，而到中國古時，從口形可以聽得出全部中國人都係講英文（！），但對白配番晒廣東話，即係個鬼佬一回到過去自動學識中文，仲有記住而家係古代，但唔知點解成班人講ｄ中文出奇地現代港式喎！基於先天怪相，無論講中文定英文都係戇居架喇，但我寧願佢索性當西片噉上畫，成套戲全部人講番英文，感覺上點都合理過講講下英文講中文卦，同唔會片頭ｄ英文名變晒中文字咁樣衰卦？
撇開語言不談，一個鬼佬去到中國，人人見到佢都可以若無其事，仲好快搵齊一班人聯群結隊去剿滅魔王，普通過普通，唔好話武俠片，打RPG都打到悶啦呢家野。所以只關心打成點。成龍同李連杰叫做歷史性首次合作，但首次亦只得一次，對成龍動作印象九十年代起已冇以前咁正面，因為太玩雜耍同搏命特技，反而假過頭唔夠紮實，今次一睇即時覺得回勇，真係有對手卦，雖只此一場但夠長夠精彩，同埋果份意義。其餘大部份時間打雜卒多，大佬級只得戰神同白髮魔女（crossover完《西遊記》再crossover《白髮魔女傳》，問你死未？）？戰神梗係李連杰打啦，佢兩個角色孫悟空同和尚互有關連亦同戰神千絲萬縷，加上而家外國佢應該受歡迎過成龍加好打過成龍，就梗係搵佢同大反派打啦。按照武俠片傳統女角對女角，跟住唔夠抽再由主角or大茄即係成龍出馬，兩位女角本身識唔識打唔多知，但戲入面起碼呃到人，袁和平功勞非常大。
「咦？主角呢？」
係囉，主角叫做得主角，點解冇佢份？除左同白髮魔女打過一次 － 當然係輸到仆街晒果隻 － 主角來來去去都係打卒仔同打卒仔，仲要連打卒仔都只符符碌碌贏到果種，幾時威風過？到佢返到現代美國，以前屈佢機的各位損友甲乙丙，調轉俾佢屈番轉頭，因為美國得佢一個武林高手其他人全部雜卒，先有機會做番個似樣的主角。換言之叫做主角，都只得雜卒命一條。
「做主角做到佢噉，都幾失敗。」
噉套戲到底好唔好睇呢？對我黎講同《臥虎藏龍》一樣，純粹呃鬼佬的中國武俠片，你飛走個鬼仔同所有美國部份，可以自成一套武打電影or成龍出品，就連以前ｄ老土野都加埋落去。成龍成名作係《醉拳》同《蛇形刁手》，正正係戲中佢常用兩式，tribute番佢自己同以前邵氏，其實幾慳皮。同唔知點解，女主角一定要死，仲要係死得好無聊果隻，往往係奸角打到興起時女主角就會出現單挑，之後梗係唔夠抽啦幾下散手就戇居地被打死左。唔多妥武俠片就係睇到呢ｄ女主角自殺的笨實場面，實在蠢到頂唔順。同之後主角「幫女主角報仇」，又一定係自己唔多使郁，到適當時候大奸角自動走／飛／仆去佢果度俾主角插死佢。
「頂唔順。Lionsgate，今次我真係純粹俾面你。」
最後，我地要特別多謝英皇，全靠佢地，保住我地中國人的顏面。話說主角殺死戰神之後，玉皇大帝降臨人間，問：
「你打救左中土，你想要乜野回報？」
「我想返美國！」
「好！非常好！」
玉帝立即興奮曰。梗係啦。因為佢心入面諗：
「你想要乜都得，如果你話想坐我個位，我咪大九鑊？」
假如成套戲係外國人拍，結局會搞到噉絕對唔奇，大美國嘛，好在有英皇份，立即令主角變成一個有著數都唔識貪、忠忠正正結果乞食的白痴仔。
「多謝英皇！除左閃卡，我未試過感受到你們的偉大！」