對我地老餅動作片迷黎講，玩老坑動作巨星重出江湖同台獻技之《Expendables》系列，偉大在世界末日之前為我地圓左個心願，尤其第二集八九十年代三大動作片王史泰龍、阿諾舒華辛力加同布斯韋利士，老到將近退休終於肯同堂演出成就《The Expendables 2》，睇完可以等十二月安樂去矣。

7X 8X出世一班睇一舊舊肌肉大隻佬打鬥片同公仔書大，所以黎到廿一世紀相當痛苦，因為真男人唔見晒：電影，要潺要瘦；動漫，要萌要腐；音樂，要基要emo；總之男人越冇男子氣越多人受落。難怪今代人成日俾人標籤ＸＸ後低分低能，唔使睇你做唔做到野，見到個樣已經唔開胃啦。可能就黎要退休的史泰龍都睇唔過眼而搞左呢個project出黎，搵一班跟自己同期出道但已事業走低潮甚至過氣肌肉人加埋新一代打星，唔靠CG回頭用真人親身上陣特技，打好勁不過佢熱心到自己做埋導演，結果第一集證明俾全世界睇識得演動作片唔等同於識得拍。今次搵人幫手導演編劇立即唔同晒，雖然有時拖左少少橋段亦無驚喜（只有話，這才是傳統派動作片），但整體已大勝支離破碎步伐又亂的上集。

換一換製作班底戲路都改埋，上集一如史泰龍出身年代路向拍得好嚴肅，不過廿一世紀唔興自我盛行自嘲，新導演接手主題變成成班老野寸／笑自已光輝不再，唔係二三十年前流行的老而彌堅，old-school但不恃老賣老。再玩到笑片噉款，第一集基本上得三大鉅頭教堂講數一幕叫做精警同有得笑，今集得閒無事就幾條佬圍埋講麻甩笑話（但可以寫得更抵死可以玩得更盡），同戲外演員相關笑料已成家常便飯，阿諾舒華辛力加 X 未來戰士事少，當meme界一大神明Chuck Norris都有份，仲有咩玩唔到？查實好多對白同gag位都好鬼死爛，尚格雲頓個大反派就係叫壞人Villain死未，不過我鍾意，噉反而配合返套戲種懷舊感覺。另一大改善係唔再死氣沉沉顧住打，演員發揮大左好多真正有戲做，Dolph Lundgren即係Rocky 4個俄佬變化最大，上集除左多幾句對白只有由頭打到尾有點路人，今次正派當中佢極多戲加勁好戲，再過癮地將佢本身化學工程學歷加入角色度，又係戲外戲外相呼應聰明一著。

雖然劇本、攝影、武指、技術通通進步班底又超強，睇得好開心但覺得導演忽略左Expendables原來特色。上集成支傭兵兵團每個角色都有自己性格，好似史泰龍玩手槍、李連杰短打、Jason Statham飛刀，今集李連杰只開頭客一客串，Jason Statham飛幾得幕刀，史泰龍全自動曲尺超速上彈唔見晒，全隊人馬成班巨人拎長槍一面倒壓倒性重火力，睇Chuck Norris讓你散住步單手渣槍都可以行步路殺死幾十人連坦克都打爛埋是爽的，但下集希望可以再著重當初搵唔同特質同年代演員以達多元化原意去發揮。感覺上比第一集暴力左，大量擺明CG key落去假到爆炸的血拍得住gag咁爛（真係爆出黎，郁少少都成條血柱標出黎，搞到好搞笑），同係咪又剪左？第一集一開始打海盜霰彈槍射到條友上半身斷開飛十幾米撞埋牆戲院居然冇得睇，今集臨尾推條友落直昇機機葉分屍中間又有段空白，睇黎想睇足版要磅水買碟。呀我係話要等Youtube。

假如過到世界末日，希望快手拍新一集啦，話晒成班主角冇七張都六十幾，史泰龍個樣已經超殘尚格雲頓差唔多認唔到，好難講幾個大主角仲可以拍多幾多年。連佢地都停的話，唔知第時仲有冇新晉導演同演員會繼續拍呢種巨人派動作片。

睇完套戲，有個大疑問：記得之前睇報紙講有組戲專誠飛黎香港拍，但邊忽有香港？定係又係某幾秒鐘飛一飛過高樓大廈就叫香港出左鏡？