最少對我黎講係，2010年暑假令八十年代成長男性相當振奮，萌風孱風當道，所有人包括現代香港男性都覺得男人應該瘦過女人也母過女人先至係man（相當諷刺），再俾港產片教壞打戲變晒玩靈活玩服裝玩道具，八十年代大隻佬舊舊肉硬橋硬馬一抽百不復見矣。所以今個暑假有兩套戲，無論拍得好唔好，即使擺到明垃圾（好在唔係），都一定會入場。先有《Predators》，第一集不論外星人設定還是劇本還是氣氛全部顛覆晒以往所有動作電影，就連之後現代及科幻電影軍事科技思維都受到一定影響，仍然係我最鍾意動作片之一，第二集差得遠《AVP》更加變成摔角式笑片，仍然照睇可也。新一集《Predators》，熟異形同Predator都睇得出導演刻意想將其定位為真正之第二集，雖然頭半太拖加戲路改到偏離晒原來種懸疑壓迫，後半情節動作黎得夠多夠密，而且事前完全唔睇好的Adrien Brody可以演得咁Lance Henriksen，《Predators》分數唔高都夠交貨。跟住到《The Expendables》。你同我同一年代睇同一堆大隻佬戲大的話，見到史泰龍帶頭加成班新舊打星all-star組合，就算睇過的朋友除了小還是小，有得唔入場咩？更何況今次我地有側田哥贊助戲飛？
「開場有兩樣野講講：贊助商將戲飛直接寄到我公司，自問寫字已經樣衰，見到個信封，立即覺得自己手字好靚。可惜唔太方便公開公司地址，大家無緣一睹側田哥的柒書真跡。」
「仲有，一定要先讀月巴氏《肌肉低泣時》，八十男肌肉男的唏噓，睇得感動。」
曾幾何時，男角肌肉尺寸同數量跟票房掛勾；曾幾何時，史泰龍同阿諾舒華辛力加新戲係全年年度猛片，大家每年都會期待睇佢兩個新戲，就好似香港人逢近新年都會等周星馳等成龍最新賀歲電影。而家？《血聘》雖然唔係動作片（唔好俾個名呃到），入面一個討論其實同動作片發展有關，就係肌肉男動作片角色已經過氣，因為潮流是瘦削黑人同窈窕亞洲人及港式動作，肌肉非必要有都唔好太過肉感，大隻佬多數只有得做反派爪牙。史泰龍算好好野，六十幾歲仲可以將捧紅自己兩個系列《Rambo》同《Rocky》整番生，大佬咁老發晒福，要操番fit再親身落場做自己後生三四十年都未必話黎就黎之高難度玩命動作談何容易？就係做得到。我諗同佢同期之競爭對手阿諾舒華辛力加，從政做左州長走晒樣，望望對方風采依然，唏噓之情唔會比大家見到而家大隻等於乞人憎而灰爆差幾遠。只係冇乜同類八十年代動作片，諗黎諗去只有《Die Hard 4.0》，《The Wrestler》算唔算？同．．．拎當年黎搞笑的《Tropic Thunder》。史泰龍見冇人拍，索性自編自導自演再搵黎新舊打星搞番套《The Expendables》。
呢種all-star動作片，史泰龍唔係第一個做，香港之光成龍大哥一早已經有《功夫之王》啦！（．．．）但西片，大家等左廿年至有如此黃金組合。好老實講，對班底認識唔深，亦非自己心目中之最佳組合：而家美國片一定要有黑人同亞洲人先政治正確，加上現今知名度，會搵李連杰預期之內，不過佢個角色其實主要用黎俾外國人開玩笑，打戲好少；有近年成日見的Jason Statham，佢拍ｄ戲例如《Transporter》系列香港冇乜人留意，但其實之前同李連杰合作過，李連杰唯一一套科幻電影《The One》中佢做路人甲，跟住《War》已經做大反派兩個打餐死了，而且係玩爛仔交，完全別於誇過漫畫的《Transporter》及李連杰平時打開種花巧派，而家升格埋做第二主角，睇黎外國佢好紅？黑鬼只知拍過《Gamer》，一套唔算拍得好，不過用新攝影技術幾玩野所以好想講的電影，我係cyperpunk迷嘛，但角色都是路人性質。仲有《Rocky 4》個俄羅斯拳擊手，後來《Punisher》第一集都有佢，又係做俄羅斯人。最後一個白人．．．完全唔知咩料唔好意思。其餘都係串星性質，Mickey Rourke紅到爆搞到乜都搵佢而家，但《The Wrestler》之後睇過有佢份ｄ戲，好似《Iron Man 2》同呢套，其實角色根本完全冇發揮，冇一定要搵佢做之必要性。重點當然是Bruce Willis同州長，八幾年大家已經好期待史泰龍同阿諾舒華辛力加可以一齊拍套戲，但兩個都係一線頭自然難成事，一正一邪的話，邊個肯做打輸果個？兩個都正派，又會計較自己戲份夠唔夠對方多。等足十幾年終於見到兩個一齊出鏡送多個Bruce Willis，雖然冇打純粹吹水，fans們已經好開心了。
「不過你問我，見到兩樣野，總唔開心：人多勢眾，但大隻佬唔夠多，太瘦，仲要搵Jason Statham拍史泰龍做第二男主角，係咪真係咁難搵人，還是市場始終要遷就？而片頭話俾大家聽，套戲係Lionsgate發行，即係當得做indie。而家大隻佬打鬥片，幾大卡士，都只能夠獨立製作。」
一向唔多鍾意香港電影公司幫外國戲譯名，除左今次，因為套戲擺明老土，《轟天猛將》咁八十年代襯晒，但係台灣《浴血英雄》更熱血。見到個名同成班肌肉佬，唔講都估到實係特種部隊去拯救人質／女順便打倒邪惡組織之類，從來唔會對呢種戲劇本同導演有咩期望，但爛片迷如我都頂唔順。頭半套戲可以完全唔要，想帶出角色，完全講唔出咩人咩來頭，總之你只知道有個人係度會開槍會打人，唔會有其他印象，除左兩位主角之外基本上冇打算過講多少少其他人。你亦好難想像得到，一個已經預唔會好得去邊的劇本可以低處未算低，本身敘事已經唔掂，剪接果班好似唔識咩係剪接噉剪到有咁碎我咁碎，即使你當套戲B片黎睇（本質上係丫），仍然比好多BC片甚至二三線電視劇更差。敢講，唔理明廢明柒明垃圾果ｄ例如《龍珠》，認真／正經拍電影中，《轟天猛將》必定係睇過最廢最爛其中之一。
「史泰龍，我知你好俾心機健身，我知你仲跳到跑到打到，不過，請自知識演打戲唔等同於識拍打戲。都係專心做好演員本份，交俾其他內行人負責編劇導演啦。仲有，搵過人做攝影同剪接唔該。」
所以唔講差在乜喇，太差太多。但相對地拍得好果ｄ亦比預期中理想，絕非純粹搵齊人就開戲交差心態呃票房。文戲充滿驚喜。唔知點解我好鬼鍾意入面ｄ笑料，包括李連杰被曲線種族歧視果個。重點兩場文戲更是要讚啦。冇可能唔提係史泰龍 + 阿諾舒華辛力加 + Bruce Willis三鉅頭聚頭，唔打齋講，卻比其他場面更有戲味。一定要教堂見面，是個吳宇森tribute。對白冇其他文戲咁普通咁白痴，一人一句非常精警，而且笑料唔限於戲內，州長寸史泰龍鍾意去森林玩，史泰龍寸番佢想做總統，睇番現實二人就會笑爆咀。同埋主角深入敵陣救女主角，女主角問佢點解會黎搵佢？「路過嗟。」
「令我諗起一位中五同學。當年放榜唔夠十四分要周圍撲學校，成班人去到佛教孔仙州，面試位主任問點解揀佢地學校？唔夠分的佢若無其事地答：『咁蹺行過，咪入黎面試囉！』這就是美國佬式霸氣了。當然霸氣完下場係點，就另一回事啦。」
頭半奇廢無比，後半重頭戲打到尾，先係大家入場原因。個人覺得整個主要動作部份掌握比以往同類電影進步左，冇太多cliche場面。如果人人一樣多多角色都悶，唔同人打鬥都有些少變化，最突出當然係用黎俾外國人笑亞洲人身材的李連杰耍武術，不過只得一條幾夾硬砌出黎的無聊支線俾佢表演一場，又唔係打得勁，搵另一個人 － 東方人好西方人好 － 拍出黎一樣，佢存在只為成全all-star組合。唔識果個白人玩柔術叫多ｄ野睇。戲中其中一條小主線，係史泰龍角色已老不復當年勇身材走樣又唔夠氣，自然為減少埋身打鬥轉玩軍火爆破為主合理化，如此安排更好，因為埋身打全部幾招了，突出每個人招式風格，又唔會出現舊時最鍾意一正一邪兩個人玩短打打兩三個字未分勝負種死拖爛拖。
槍戰先多野玩。唔興大隻佬，好耐冇動作片會大大枝槍擺出黎，手槍仔雙槍舞黎舞去先型嘛而家。既然復古冇理由唔搬番晒ｄ大碌野出黎啦，不過要更加刺激，速射是今作主題乜槍都要玩連射，黑鬼用《Predators》Adrien Brody枝自動霰彈槍（真巧合），睇佢一槍打到個人斷腰爆頭好爽的，但講到兩三發可以成架軍車甚至成棟建築物爆晒就誇左少少，同明顯地睇到佢開槍動作同現場反應彈係唔夾的，好多時第一槍已經大爆炸，以為佢拎住枝火箭炮。Jason Statham比較另類人人玩槍佢玩刀，明谷佢做大角色，次次出場，劈友還是飛刀還是開槍，都要不斷地轉圈轉圈轉圈．．．其實咁亞洲不如俾李連杰玩啦，而家佢變成只得枝機槍仔射再掟掟手榴彈，東方人冇得用東方武術，非常浪費佢身份同身手。史泰龍自己反而跟隨大潮流用雙槍，不過換晒全自動手槍加型爆極速換彈匣，嫌仲未夠的話連牛仔式左輪連射都玩埋。追隨舊派中與時並進加快步伐加重迫力，不止於槍戰後半套戲亦是，欣賞在搏鬥同槍戰平衡到，亦唔會個別環節花太多篇幅。史泰龍又衰唔晒。
印象最深係史泰龍對全自動手槍，印象中好少槍戰片用到，第一次見過全自動手槍係鐵甲威龍，雖然大個諗番都幾戇居，枝槍口徑大仲要一次射三發，咁猛火力射中個賊即死啦射中手腳都會射斷，仲話用黎捉賊？出一次勤相信冇幾多活口剩矣。但係，型是最重要，所以諗完就算照係噉睇。第二次見去到十年後《Face/Off》，尊特拉華達臨尾攤牌時拎枝出黎掃一輪，啡左幾秒鐘就冇晒彈，明白點解咁少槍戰片用了，因為型還型唔太實用。又過多十年《Dark Knight Returns》小丑公路追蝙蝠車，由細槍玩到大槍去到火箭炮有點玩野果幕就用過。跟住係《Punisher: War Zone》，單講動作同暴力，仍是近年最強最無敵一套。《The Expendables》係第五次，而且連射加超速上彈，Punisher之外玩全自動手槍最型莫過於史泰龍了。睇《The Expendables》果陣亦好難唔聯想到另外一套，兩者都採寫實風格，以前槍戰片最鍾意射個雜卒都要開五六槍殺晒全場幾十人都唔使換彈（請為周潤發鼓掌），又或者寧願帶十枝槍射完冇子彈槍掟左佢拎枝新出黎繼續射而唔係一枝槍跟十個彈匣（oh yeah《Matrix》oh yeah），而家觀眾識野左，除非拍得超超超超超型，否則見到呢ｄ場面只會發笑（《Matrix》你好彩）。好在今次冇cliche到，子彈是有限的、槍唔係多到用唔晒的，荒謬場面好少出現，唔會覺得個個都係超人而只是凡人一樣會受傷會流血會死，再符合受過專業訓練之突擊隊身份，單睇史泰龍個上彈手勢已經夠說服力啦。當然，講勁始終未及Punisher，每次槍戰完會上彈補充加收齊整理好裝備迎接下一場仗，一睇就知佢個角色係經驗老到特種部隊非常真實專業，《The Expendables》唔夠場面做到同一效果，仍然俾到人一種「在做戲」感覺。點解以前ｄ導演唔明，槍戰途中瀟灑地換槍、上彈，可以令大家冇得駁戲之餘比一個彈匣由頭射到尾型幾倍以上？
事實係論戲的話的確唔掂，事實係一定小的人（大幅度）多過讚，事實係套戲只是用A級明星包裝的B到爆B級片唔係星光熠熠一定冇人入場，好遺憾（開心？），會成為自己一個系列長拍長有，亦是事實。第二集已經講到去硬馬了，吹到好恆是Bruce Willis同阿諾舒華辛力加好大機會一齊做反派，州長仲會正式落場同史泰龍打，可能佢見加州就破產就爆噉情況，驚黎緊州長都冇得做更加唔使諗選總統，所以舖定後路先？如果真係會比今集更加期待呀，只求劇本同導演唔好咁爛，簡簡單單就夠架喇，亦唔好刻意追求表達演技。相信會由今集結局延續落去，一如當年九成英雄片，主角打死大佬就算施施然一走了之，唔會諗死左個總統國家政權兵權會點亂，唔會理接手果個（往往係救或保護果個，更多時係女主角）係咪一定接管得到？肯定話唔掂啦，然後美國政府又會派人去奪取商業利益，女主角求救，又拉隊Expendables去救人順便探探條女囉。咪俾我睇死。同搵多ｄ新人唔該，其實仲有唔少打星可以揀如雲迪素、尚格雲頓（官方表示佢唔肯演今集因為劇本要佢做俄羅斯人個位輸俾李連杰佢唔制。明點解李連杰個角色文戲打戲都冇發揮仲要俾人笑啦，種族主角始終存在的在美國）。亦希望畫質可以改善，唔知係原片已經有問題，定戲院見套戲好多時候都係黑麻麻，逢黑色暗色景畫面一定爆晒雜訊，大佬我俾錢買飛入戲院，播出黎衰過我屋企睇VCD，點順氣呀點叫我再入戲院睇呀？（係今次我冇俾錢仲要咁大聲唔好鬧我）另睇完戲返屋企上YouTube望望，似乎刪剪過唔少，即係一野大口徑長槍射到個人爆開兩截飛到幾米遠，戲院睇到佢中槍，最多去到爆開，但飛黎飛去周街血ｄ場面見唔到。灰。又要拉到《Punisher: War Zone》：除左主角異常真實專業之軍事手法，仲有睇到笑爆咀的死法，一發麥林個頭冇左一半、霰彈槍射頭直頭成個頭爆開唔見左果種震撼，唔計《Kill Bill》之類明玩野片，暴力得空前絕後。好希望《The Expendables》中會出現，反正都係Lionsgate都係indie，去盡佢啦。
「信我，你鍾意睇槍戰、鍾意睇踩住漫畫化界線之超誇張（但仍覺得寫實）暴力，《Punisher: War Zone》絕對肯定真係不能錯過。睇完《The Expendables》，立即有興致重溫一下。」