好耐冇認真寫過電影。自從夜晚再唔使睇舖得閒左，每星期起碼入戲院睇一場戲，印象中開始停寫係《變形金剛2》，可能因為凌晨三點幾去MegaBox睇IMax，比成套戲更值得提。同期又太多戲令人失望（唔好講不敗垃圾片冠軍《龍珠》，《忍者刺客》可能是2009年度比《Blood》更大遺憾），搞到冇晒心情之餘事幹太多時間太少，連累好多戲想講講如《Crazy Heart》、《D-9》，加近來《Kick-Ass》及大量project爛尾，一係冇左回事，另外好多寫左個稿但跟住走左去做其他野（Diablo．．．）結果不了了之，加上開始想寫番多ｄ音樂同metal，《Deem Theater》只好暫時休止。對上／最後一次認真講電影，應該係大半年前《音樂人生》。
寫完《音樂人生》好自然想寫埋《Anvil! The Story of Anvil》，不過要寫正經metal電影負擔其實幾大所以一直避免，沉靜多時難得有套戲睇完想立即寫寫。又需要重溫《呃劉Sir入場睇你套戲指南》，喪屍片同延伸變種而成之生化病毒片由古至今永恆不衰，逢掂親呢兩樣你想正經又得想發晒癲又得加實有人／劉Sir捧場，所以每隔一段時間就會出現一個小陽春，好似一兩年前幾套同類戲如《我是傳奇》同《Doomsday》齊齊上，雖則好多變成純刺激動作片，你睇《廿八＿後》第一集好地地第二集都要由頭打到尾幾灰？不過最想睇果套香港死都唔會上冇計。好在我係冇故事冇深度唔緊要夠暴力夠多血就得果種膚淺香港人。《The Crazies》trailer唔錯，睇完有興致到想寫，因為唔止普通病毒片／喪屍片咁簡單，是近幾個月最有驚喜一套戲。
去戲院買飛見到張海報，先知原來係重拍「喪屍之父」George Romero廿幾三十年前出品。唔好誤會我知佢好出名同影響好大，但印象中因為太舊冇幾多套睇過，就算有都只睇過翻拍版如《Dawn of the Dead》，所以冇任何「會唔會新不如舊」負擔可以當原創電影。George Romero證明左電影即使唔交代清楚任何前因後果加咁多年都唔更新絕對冇問題，基本上睇完預告片，已經知道晒成個故事就係老生常談的點解有喪屍呢一係外太空黎一係軍方實驗一係蠻荒古老大不了玩埋超自然巫術一句起幾句止輕輕帶過就算＞神秘病原傳入市區＞居民病發失常變喪屍係噉殺人＞政府派軍隊隔離全個地區見人就殺＞最後一個核彈搞掂＞結局A：疑似帶菌主角或一／幾條喪屍走甩到第二個城鎮案件重演 或 結局B：已經全國全球感染晒人類聽收皮了。第一日到今日無數喪屍／病毒片都係呢個格局，正路到想講多少少洩露劇情都難因為根本冇野你未睇過。成個故事、成單大災難往往冇得或冇必要收科，總之中間食人走難過程有幾灰得幾灰才是重點，想玩得政治或心理一點，定還是死殺爛殺大家開心？其實我好怕商業導演拍呢類戲時太玩深度，為顧票房同故事性質冇可能唔加血腥暴力場面，反思人性同感官刺激兩者間取平衡難度極高，最保險當然按動作片包裝拍到成套《Bio HazardResident Evil》噉，俾人彈極都有一定票房保險，好可惜導演們總希望追求藝術性，想講番多ｄ本世災難生還者點面對自己同世界，卻多時失手而回，如果《Legion》算是喪屍片，就係個失敗示範。
《The Crazies》成功在導演好。主要人物得四個嚴格黎講兩個，走難途中遇上失常鎮民、軍隊追捕加內部爭拗，帶出瘋狂病毒點樣影響倫理人際，步伐快而事件多，唔會某個情節花太多不必要時間拖慢，加上人物少描寫集中，演技唔太得都做到各人心理變化同緊張，所以動作場面好少亦唔多震撼，特技只有臨尾核彈，而且大量罐頭橋段即係應殺人時唔殺結果累死自己、主角臨俾喪屍做低救星就會準時出現等等同喪屍片本身一樣咁歷史悠久的cliche，唔多似劉Sir鍾意的打鬥片喪屍片冇問題比好多同類戲e.g.頭先提過多套睇得更愉快。不止於此，仲有一樣「new-school cliche」：自從《廿八日後》將套戲拍成長篇post-rock MV，間接將新一代病毒片／喪屍片定型，而家拍親呢類戲，總要有幾幕玩靚構圖夾飄或post配樂，做到「與亂世成強烈對比」乜乜物物，《The Crazies》有起碼兩場，睇果陣真係以為睇錯戲。點解？就同John Woo加《Matrix》之後，逢動作片槍戰片一定要雙槍慢動作一樣道理：
「可唔可以唔跟風呀？」
「你有冇信心唔跟大方向拍都有人留意你先？」
滿意一回事，有點同預期唔同。雖未睇過George Romeroｄ戲，久仰大名都知佢其中一項成就係借超自然亂世批判社會現實，換言之喪屍走黎走去食人咁簡單原來可以好政治化。套戲講軍方研製生化武器，點知運輸機意外墜毀做成社區爆發，政府介入隔離現場控制擴散，照道理美國政府點為顧全國大局封鎖消息草菅人命，已經有大把空間發揮。到頭來，呢ｄ野係冇的。軍隊撞到你，會好禮貌地講一大輪野先凶你一凶都搞唔掂至開槍，畫面冇出現過見人就開槍場面，即使結局係全鎮不留活口，都表達得相當隱誨；有提到嗜血狂徒乘亂殺人為樂，但只得一小段無關痛癢；全電影更冇任何高級官員出現過，只得人造衛星天眼視點比喻政府監察掌握一切而且唔會留情。未必壞事，一貪心想兼顧好多瓣好易頭頭唔到岸，集中幾個角色決定正確。另一永遠唔明，係拍親呢種戲，控制過程不離封鎖邊界＞殺感染者＞冇感染者照殺＞一個核彈炸晒成個城，基本上冇邊套最後唔將成個災區炸爛晒唔收手，已成為生化危機「正規」處理程序。既然係噉，倒不如只做第一同最後兩個步驟，一封鎖完邊界立即掟核彈？反正係唔係都殺晒全城所有人架啦，抽調屠城人手封鎖邊界或圍大ｄ個圈，咪仲慳工夫、仲快壓制到危機蔓延同仲安全？尤其，好多時劇情都係派軍隊入災區之後，做成漏洞或過份逼迫導致諷刺性延續，如今套戲假使政府決絕到衛星一拍到出事立即派轟炸機，中病毒者未全部發作、居民未知到底咩事未諗過要逃走時，件事已經解決左，而唔會搞到主角知道再留低死硬夾硬走到隔籬城累街坊。點解咁多喪屍片，冇一套個政府會咁醒？可能通通俾George Romero教壞卦，唔整隊軍隊落場做野你睇，又何來緊張刺激場面，又點批判得到社會黑暗政府昏庸？一黎就掟核彈，全套戲會得五分鐘唔夠，計埋字幕。
對於全套戲咁隱誨之表達方式，再不期然浮現另一個問題。戲院紙牌話套戲本身三級，不過太過暴力被迫剪成2B上畫，但點睇都唔覺有幾多場面三級會激得幾多喎？再諗真，挑電影公司咪吹水啦，套戲三級上有乜問題？為入2B市場搵錢就名正言順啦！B片當道加尺度遠比而家寬鬆之七十至九十年代，呢類（偏cult）戲多到爆炸，我地睇喪屍片恐怖片大自然唔覺有乜特別，但今場入戲院先知，原來對好多靚仔靚妹黎講，此等電影加悶到喊cliche仍然非常新奇，我睇晏晝場有幾大堆十零歲小朋友，好多時間聽到佢地把聲，都未殺人單見到癲佬拎住把刀個黑影慢慢行，靚妹們已經叫「好恐怖呀！」坐我隔籬條女更大半套戲同男朋友攬埋一舊。難怪要「被迫2B」啦，三級市場係我地呢種視作等閒根本唔當套戲咩一回事自不然唔夠人入場，但而家「被迫」剪完，MK仔女可能包起一半以上票房。對住佢地我又冇乜所謂的，而家ｄ人睇戲實在太含蓄恐怖片唔會叫喜劇唔會笑，噉樣大班靚仔靚妹齊齊蘊釀俾反應，先有以前大院幾百人入場一齊出聲種臨場感。
「正正《The Crazies》上畫，就撞正葵盛東村癲佬殺人事年，同戲入面劇情一模一樣更加100% death metal，都咪話唔邪。電影公司宣傳部，你真係夠薑，應該搵呢單野抽水做宣傳，而唔係扮委屈噉話三級上唔到！」
睇完《The Crazies》，兩樣野要做：首先，作為一個喪屍fans，仲未認真研究過George Romero，可說對唔住佢對唔住自己，需要搵番佢ｄ戲補習一番。第二：