《Outlander》時提過，科幻電影有兩個歷久不衰編劇方針：「仙人」下凡，同時光倒流，往往離唔開改變或建立歷史，普遍係帶住已有知識探索歷史真相，結果一手導致歷史發生（《回到未來》，《Johnny B. Goode》一段簡直經典），又或令未來越變越怪／差（《The Butterfly Effect》），「雞先蛋先」弔詭玩多一百年都唔會玩得完／玩得厭，而香港代表一定係《尋秦記》，就連metal都有首《Iron Man》。《Terminator》全故事同樣起源於時空弔詭，不過動作特技佔重下較為隱性。
最享負盛名之頭兩集故事一脈相承，中文名譯《未來戰士》，正好配合未來使者到現在維護歷史正確發展主題：第一集提到超級人工智能天網1997年獲得自我意識後，啟動全球核武引發審判日，之後派出機械兵團屠殺殘存人類，John Conno領導人類反抗勢力反擊，面臨敗北之天網將機械人T-800從2029年送返1984企圖殺死John Connor阿媽Sarah Connor，人類反抗軍用相同方法保護救世主。第二集去到1995年，John Connor十幾歲大，天網派出更先進之水銀人，反抗軍亦改造一部T-800保護Connor母子，同時計劃阻止天網及世界末日出現。屬於幾典型之「高概念」電影，聽落甚至有少少B片，但經大師占士金馬倫手，簡單故事變成曠世經典，第一集只得一部機械人但過程緊張刺激，第二集打到七彩之餘水銀人更加係當年電腦特技顛峰，睇真故事又有其思考性：其實真正歷史起點為何？故事中Cyberdyne公司發明天網，而第一集機械人被摧毀之地點正正是Cyberdyne工廠，事後Cyberdyne從Terminator遺骸中研究出天網技術，換言之天網將自己科技送返過去，先令到自己誕生；而未來John Connor派Kyle Reese回到過去保護Sarah Connor，後來Kyle Reese成為佢阿爸，如果佢冇返過1984年，John Connor就唔會出世；假如天網乜都冇做過，其實唔會出現人類反抗軍同佢對著幹，但同樣天網自己亦唔會出現。兩派行動皆為改變未來而作，卻直接創造出救世者、滅世者同世界末日，令未來成真，加添一份「會發生的終會發生」之宿命感。此種無始無終循環正是《未來戰士》／科幻作品一大趣味所在。
可惜第三集起占士金馬倫一走，轉左導演立即失晒色。1997年全世界（除左香港）冇事，去到2004年又出現Terminator，原來之前搞咁多野只能夠推遲世界末日，其實相當幾夾硬加勁食老本，好似大反派係T-800加水銀人合體諗新野都懶（雖則我諒解水銀人確是個難以超越之頂峰），而結局講到世界末日終於發生，算全集唯一新意之處，但亦都預左搞到咁大全因要完左第一個制止末日三部曲，留後路俾新劇本新導演，即第四集起之反抗勢力三部曲。既第三集已經牽強，第四集又何妨進一步亂黎？前提天網開竅世界末日不能避免，過去所有行動只會不斷改變未來，本來天網軍只得兩三款機械兵器，第四集預告片都睇到啦要幾誇有幾誇，劇情解釋其實審判日之前一年2003，Cyberdyne開發結合人類同機械之改造人，成為T系列成功原型之餘加快機械兵團發展，所以可以見到巨型機械人同電單車、水蛇之類，未來越變越灰。當然，真實理由離唔開以前冇錢冇技術整CG，而家有加有市場，順便開多條玩具水賺錢，仲唔有乜搞乜咩？
有鑑第三集已經世界末日，加上戲名都同你講發生於2018年，預期第四集開始玩人機大戰，即從動作片升格至戰爭片，結果非常失望。我先入為主卦，睇得舊戲同動畫多，覺得核戰後地球炸到爛晒之餘因為核子麈不見天日，戲中地球只似被荒廢而冇經歷核武洗禮，加上風和日麗，睇唔慣喎有幾末日呀，尤其是頭兩集出現過之未來世界正是此種黑日廢墟？或者今集描述先係真正核戰後世界，但睇慣核子塵遮天，又冇話爛得好犀利加仍然大把人生存到，而家只覺得似《Bio Hazard 3》．．．而且機械人勁咁多加打緊仗，全套戲冇出現過軍隊鬥軍隊之大規模場面，預告片出現隻超巨大機械人雖然明抄鐵甲威龍二號，但戰地概念及與其他型號機械配合設計得好，點知出一段仔戲咁大把，最慘得佢老屈人類雙方間冇「打」可言，其他機械兵器更加驚喜不大而且場場得三四隻隻，慘在最後主角一個人潛入生產工場重地，居然咁重要設施得兩三部機巡邏，大佬只得／又係得一部T-800，跟住人類軍隊攻入基地時居然乜事都冇，巨型機械人呢Hunter Killer狩獵攻擊機呢？完全唔覺得打緊仗、人類點睇都處於平勢而非劣勢。難得機設唔錯，但出少少鏡就冇，大部份時間用番T系列舊機，浪費晒。
故事更加大失所望。次次有乜大行動，唔係個個死晒得John Connor死極唔去，就係John Connor自己一個戇居居走去單挑，可惜拍唔出八十年代種一人英雄氣勢，只覺得佢未夠班勝力死符碌，好似開場冇耐攻入天網地下基地，人人做緊野時佢上番地面偷左唯一一架直昇機去追人唔理同伴生死，又次次遇著敵方襲擊，同伴甲乙丙幫佢擋晒彈得佢走得甩，做主角做救世主做到噉唔跟佢好過啦！跟住一個人潛入基地，機械人行過居然睇見俾人開晒門爆晒鎖都當冇事發生行過就算，同班機械人平時射一射掂一掂就殺死人，佢俾部T-800打到飛黎飛去撞左十幾次牆都冇事，我知搵到《蝙蝠俠》Christian Bale有號召力，角色設計同編劇太差喇。
新意叫做出現肉身加機械之改造人Infiltrator，但未有多少發揮此概念，基本上一出現你已經知道佢唔係普通人，隔十幾年先出番黎又連續行幾日路唔使飲唔使食，冇乜伏線可言。「峰迴路轉」在佢撞到Kyle Reese再遇上主角一夥，之後幫手潛入天網基地，跟住天網話「其實你做ｄ野，都係我地一早計劃好晒」，即派佢出去搵加幫天網捉Kyle Reese全屬精心安排，但點睇佢都係出黎亂行跟住咁蹺撞到，而唔係特登去搵、背後一早有乜野計劃，最抵死天網俾佢返到去基地，居然唔洗佢腦或者有任何程式控制，而任由佢入到基地核心破壞同幫主角手。呢兩樣都未算最白痴。世上有兩個人天網最想殺死：John Connor同Kyle Reese。前半講到Infiltrator「捉到」Kyle Reese，當時佢未返到過去，只要天網立即殺死佢理論上可以令John Connor從歷史中消失，點知唔殺只帶佢返基地收埋，解釋用Kyle Reese引John Connor入基地，但正常黎講John Connor唔會知天網捉左Kyle Reese（唔好問我點解會知，我已經講到眼濕濕喇）。到John Connor單人匹馬潛入基地，跟住追蹤器訊號搵到Kyle Reese，原來係一部T-800發出假訊號，換言之就算冇Kyle Reese，天網一樣可以用假訊號引到John Connor入局，噉你捉Kyle Reese黎做乜、留佢條命有乜用，點解唔直接殺死佢？劇情話果部係剛開發完成、史上第一部T-800，但講到咁想殺死John Connor，咁大間兵器工廠居然只派一部T-800殺佢，搵多幾部埋伏佢包圍佢都冇，仲要好諷刺劇中出現之舊型號T-600有機關炮而T-800乜武器都冇，就算只派一部機，你搵部T-600企係度等John Connor一出現立即開槍射死佢就搞掂啦，何必如現在玩拳腳仲要殺唔死咁笨實？天網作為電腦程式人工智能，理論上唔會如人類咁多顧慮同猶豫，一有機會肯定即時用盡所有及最有效方法完成任務，點會好似戲入面諗埋呢ｄ明玩自己屎橋仲要拖泥帶水？例如搵番Connor家族第一次遇上之Terminator T-800「好頭好尾」咁有情操？對舊作認識唔深或者唔覺有乜問題，但有睇頭三集肯定會睇到喊，天網之謀略甚至劇本後三分二，根本冇可能成立。
最大問題在於連中心主題都模糊化。頭兩集講時空弔詭，第三集已經變成普通賣女加打打打荷里活戲，最少仲同此主題有點關係，新一集已到未來，又何再來未未來戰士時光倒流而來保護歷史之有？相反，變成今集由原為天網秘密武器之Infiltrator，自過去來到現在以僅存人性保護John Connor及人類，仍然係人鬥機械，不過新角色改造人有自己主題，即電影副題《Salvation》 － 你話套戲其實John Connor做主角定佢？角色原是死囚，還陽後佢講過不知多少次「second chance」慌死你唔知想帶出乜野訊息，不過係噉講實際上卻冇乜發揮，唯一真正救贖唯有最後捐自己個心救John Connor一命，亦唔見得有幾偉大有幾煽情，再顯佈局有大問題：當副題叫《Salvation》、講到John Connor傷重必死，冇理由唔係改造人利用佢Infiltrator特質，假扮John Connor繼續帶領人類對抗天網，如此結局除夠晒典型日本動漫「你改造我我搵你復仇」式以夷制夷諷刺意味，亦真正切題俾到佢第二個機會同救贖，點知會寫出理應得武俠小說或者《封神榜》先會出現之換心情節，唔止完全欠說服力加太簡單太戇居，我覺得搵個機械人扮個死人，絕對合理過加容易做到過換心喎。不知何解下，放棄左可能屬全套戲最有意思、唯一可以為下（兩）集帶黎突破之舖排，點解導演會搞到個結局噉？（或，點解會搞到今集噉？）全集主題／副題同編劇一樣徹底失敗。加上實在太想食老本討好觀眾，開場冇耐John Connor打斷腳機械人根本同第一集結尾一樣，T-600常規武裝火神炮明翻炒第二集警署一段（唔講你唔知，其實阿諾舒華辛力加電影對'80末至'90中電腦遊戲武器科技發展有密切關係，有時間會寫寫），大決戰同樣工廠鬥T-800／鬥機械人，再學《異形3》先火後冰，就連今集冇州長份都用CG整番佢個樣出黎，加煞有介事地講番句"I'll be back."，同借ｄ倚播GUNS N' ROSES《You Could Be Mind》，造作過頭了。尤其大家想睇人類兵團鬥機械人大軍，唔係八幾英雄片式打摔角呀，點解大佬唔可以係部巨形機械人，拍反抗軍點樣裡應外合炸爆佢？難怪劫間普遍評價係「一流特技、合格演技、九流劇本」。
見到第三集已做衰自己品牌，加新故事劇情改晒，難得已經完全冇期望都可以睇到好灰，演技有卦，劇力差以前太遠，劇本更加垃圾，搞到明珠台播緊《Sarah Connor Chronicles》新一季，睇完電影新一集連追之心情都冇埋 － 電視版起碼配樂插曲同分鏡風格夠特別先啦，套戲反而唔知佢想點。數2009年最失望電影，佢緊隨《龍珠》同《血戰新世紀》之後，但贏都只係贏特技。既講到明三部曲，黎多兩集我無任歡迎，但首先成個導演組編劇組大換血唔該。同記住，世界末日之後，主路線唔再係打摔角，而係史詩大戰爭，頭兩集間場堆未來時空片段，末日感同千軍萬馬氣勢仲勁過第四集全集呀陰公，最起碼唔好拍到個天咁好陽光先啦。