Taken



人人都知劉Sir完全唔識睇戲,只識得睇最簡單最商業最膚淺最官能荷里活戲e.g.李連杰全線,所以2009年暑假《變形金剛2》同《義勇群英》兩套無敵商業片唔使用腦即時俾錢入場,間場遇上《Public Enemies 大犯罪家》及《Taken 救參96小時》,興趣黎講前者較大。點解?


「因為我鍾意THE DILLINGER ESCAPE PLAN囉。」(...)


受佢地影響特登睇書認識大犯罪家John Dilliger,見拍埋戲梗想支持,不過聽聞同我想像中有點偏差,加上唔太迷Johnny Depp & Christian Bale,慳番張戲飛睇《Taken》算。套戲睇落非常簡單毫不突出,可以在海外引來牽然大波,全因全世界估計錯誤,製作成本美金二千五十萬,初時人人唔睇好覺得上畫會蝕本收場,點知全球總收益係成本十倍以上,可能係繼《殺人犯》俾人鬧到九彩都可以成為年度票房最高港產片之一後2009電影界另一奇。外國有行內人即撰長文解釋此反常現象,當然事後孔明到爆,鑑於我唔識睇戲又冇文化,要我點樣用文學社會學心理學哲學乜學物學加大量睇都唔明中文修飾詞包裝唔好意思小弟無德無能,我亦唔係因為被如此奇特市場現象吸引而入場。會睇,理由好簡單:


「你知我點解鍾意《The Wrestler》,自然估到我會入場睇《Taken》。」


《血戰新世紀》之後,又要講戲名cliche:十幾廿年黎逢係講到明幾多個鐘頭內救人或完成任務之動作片,差唔多實用《(兩字形容詞)(雙位數目字)小時》方程式,唯一免疫例子可能係《24》。有兩樣野入場先知道:原來套戲唔係史提芬史匹堡完全推翻自己建立十幾年「外星人是友善的」論說套電視連續劇《Taken》電影版。同原來唔係救心Kyushin特約贊助。


睇得太多特技片,而家求祈打場交都要幾十萬美金整CG,反而大家鬥最基本拳腳開槍戲難搵過以前好多,《Taken》大受歡迎唔係冇原因架,CG特技睇得多都悶啦,反而最紮實功夫從來有市場,你睇近幾年吊威也已是最強特技之港產動作片一年有幾多套就知。當然戲院間唔中都睇到同類西片,大多tribute味濃如《Die Hard 4.0》《Doomsday》,而致力復興番唔好玩咁多花臣戒整色整水,代表人物可能係兩個邦:Jason Bourne同James Bond。《Taken》老實講中文名譯得唔夠生氣,全靠張海報令我留意佢 - 雖則設計其實亦非常平淡。好在一望就知道套戲想講乜野,滄桑一人英雄加明顯係反英雄,仲有長褸、皮褸,望到已經走唔甩,又係tribute八十年代之作。


劇情讀完戲名六個字已經知道晒,主線係個女歐遊時俾人綁架,主角隻身飛到巴黎救人之餘順便為民除害。睇開八十年代動作片都知呢類戲劇本不太是重點,就算內堛i折多重,拍埋現今慌死人嫌「唔夠深度」橋段密麻麻再兜兜轉轉風氣,《Taken》簡直腦都唔使用,比本已算較「直去」的Bourne & Bond更簡單。點解大家咁鍾意睇?就係貪佢夠簡單嘛,好多導演同公司開慣大製作,遺忘左其實極具商業潛力之「小品」市場。的確套戲好重非大牌味,攝影已經完全唔大片格,演員除左《X-Men》鳳凰冇個識,而且地點揀巴黎咁遙遠,可能各位傳媒工作者「估計錯誤」,以為故事唔係美國發生、唔玩新奇武打特技,就代表套戲就一定唔會收得。


而且好鍾意拍到好寫實。角色少好在人物關係描寫得好,父女情令人感動,處境亦諗番起2001年尚連奴搭廣末涼子套《Wasabi 青芥刑警》,路線當然非常迴異啦,《Wasabi》笑到你仆街,《Taken》嚴肅得多,會近2008年兩套改編反英雄片,《Max Payne》(嚴重失望)同《Punisher: War Zone》(喜出望外),邪惡理應遭到報應、作奸犯科死不足惜,為求達到目可以用盡所有方法,當然唔合法多過合法。從來反英雄片好睇過正常英雄電影正是壞人得黎好人黑白難辨魅力,因為人人都知高一尺魔高一丈,法律亦太多漏洞,暗地埵香{同離經叛道之以暴易暴反切合當今社會。入場面唔太大期望,後來不斷加印象分因為似《Punisher: War Zone》,由始至終查案手法及動作場面真實得黎專業,遊說到你主角真係受過特訓經驗老到,而唔係求祈一個路人甲拎住槍上路就天下無敵,而且部份大家成日駁的情節呢度順晒各位意,好似最後脅持人質對峙,好多人經常鬧「仲講咁多做乜槍法咁準開槍射佢個頭就得啦」,知大家心意就一槍爆佢頭搞掂睇得爽快。


「噉當然,果條友本身個頭勁大是抵死的,呵呵∼」


不過作為電影好難完全脫離現實,否則根本冇戲可做,好似主角點可能一個人唔使後援去到邊殺到邊如入無人之境加冇傷冇痛?槍戰片永遠通病、敵人必定射唔中主角相反主角求祈亂射都殺得晒所有人同樣難以避免,如最後上到遊艇,船上走廊只得一個人咁闊,大家直線又冇空間開槍根本冇得避,但主角根本唔使避因為班壞人連噉樣目標唔郁企定都可以射失,仲要一次大家只隔四五步路距離咁近、一次主角係背住敵人,'80s二十年後的今日睇到,就會覺得好馬虎好老土,而且講緊最後一場戲已經噉,之前同類情況梗唔會罕見啦,試過飛車時兩架車並排,枝槍同主角相隔唔過半米,都射唔中。做壞人做到你咁弱就只有嘆句抵死啦。要寫實另一反效果是犧牲戲劇性,戲中雖然打鬥場面多但唔算好有迫力,例如同一場戲俾吳宇森拍的話,主角會一個打二十個,而且每個反派最少身中五槍慘死,一場拳腳交冇兩個字唔收手,完左擺個型pose放幾隻白鴿,《Taken》全部搵唔到,「大場面」極都係一次打三四個,而且次次幾下樸實散手搞掂,相信佔投資總額一大筆之飛車都頗為簡短,你要求十幾部機對住係噉轉角度間中整幾個慢動作一定滿足唔到你。可能資金唔多所以咁「indie」卦。不過有樣野反而非常超現實:一個無名美國人走到巴黎,去到邊度夷平邊度,殺左二三十人(同類電影中算好少了),當中包括歐洲黑幫同印度權貴份子,竟然可以安然回國冇事發生好似去個旅行咁簡單。可能「噉先夠八十年」。劇本中主角只求救女殺戮一班僅屬蝦兵蟹將級,未至於「順手」殺埋教父成個黑幫連根拔起,編劇已經是自制了。


其實導演同編劇部份地方可以包裝得好一點,例如減輕「劇情所需時段以外永遠打唔中好人」症狀(射唔中唔緊要,面對面枝槍差唔多掂到你都射唔中,就誇得滯喎!),同「好人殺人可以合理消遙法外」之類唔好做到咁明顯,加番幕特工同佢會面大家傾掂數秘密送佢同個女返美國都好丫。成功關鍵是簡單之餘全無悶場,就算所有橋段早俾人用過晒,導演拍得出緊張感從頭氣氛到尾一直徘徊中上位,唔似而家好多戲太集中個別時刻,搞到高一陣要經過一段(長)時間低潮先再彈番起,再者演技同設定令觀眾覺得角色非常真實,人物關係建立完整,好多舊戲比新戲好睇,正因以前冇咁多錢同特技支援,場面唔一定豐富,劇本同人物方面落心機拉高番水平,有內涵先至可以持久。返到屋企上網睇番先知,原來係開《Wasabi》間法國公司EuropaCorp拍,難怪睇落咁唔美國。我睇得戲少都感覺到法國電影的確有自己套路,神采別樹一格,「商業」都有氣質過人,例如《的士速逮》系列,美國佬即使有錢,點拍都拍唔出當中神韻。


睇太多特技電影同「後《Matrix》動作片」,係時候摷番old-school野出黎溫故,史泰龍同阿諾舒華辛力加全線走唔甩,其中《獨闖龍潭》不論戲名、內容、年代感都同《Taken》夾晒。諗落諗落,之前錯過左海報勁似的《Gran Torino 驅.逐》,有點失落,或者應該睇番佢先。