Speed Racer



自從《變形金剛》,而家真係乜叉都(可以)改成真人版,《Iron Man》作為《Avengers》序幕同Marvel自己落手第一套,動漫改編由以前改邊套死邊套改親俾人小俾人笑,變成電影公司同大眾一致追隨。

「拍得好的話。但睇到《Iron Man》水準咁高,相信改編電影已到吉時翻身。」

但有趣地,個個追求將卡通變成真人,反而有人無聊到用真人做番卡通咁反潮流咁反智。受害人係《賽車小英雄》,一套六幾年日產卡通片,亦係第一套打入美國市場的日本動畫。需知美國卡通片係名乎其實的卡通,係畫俾小朋友睇的,所以全世界人人善良、冇乜機心冇乜鬥爭,相反日本動畫劇情有深度,比一般美國卡通講多d人性同社會現實,派別爭鬥又自然延伸到正義熱血,仲有例牌亦正亦邪暗助主角的神秘角色,都係當時美國卡通搵唔到。加上題材特別,講賽車已經吸引(始終細路都係玩車大),而且唔係鬥快就算係賽車版占士邦,又可以話萬變奇兵crossover賽車,賣點係每部車都有機關武器,次次比賽全場撞到仆街,即使係鬥車唔係鬥人,以當年尺度計已經好暴力。就連人設都唔同,雖然仲有點點東洋味,但明顯畫風模仿美式,人物造型相當西洋化,難怪美國人會咁受。

對《賽車小英雄》主要認識,唔係因為metal(冇錯,Paul Gilbert隊RACER X,就係取自劇中神秘人物Racer X),原著卡通只有幸睇過少少,主要係小學時486玩過。記得隻game好好玩,首先有成個卡通片頭,畫質出奇地唔差,背景有埋卡通首勁低B主題曲(得midi嗟,486年代隻game得三隻磁碟大咋,MP3一首都大過佢啦),舖舖開game都要睇晒個片頭至有得玩,首歌聽到我都識哼。跟住好記得主角叫Speed Racer(冇錯,姓Racer名Speed,美國動漫d人名最少姓氏永遠超型,簡直拍得住《笑傲江湖》),而隻game主要講Racer X單挑Speed Racer,每場大賽開始前Racer X同你講一大輪野,係疑似真人發聲不過當然唔知講乜春啦果時細路,係覺得Racer X好型囉,動畫入面主角永遠係最柒果個,型只限神秘角色同大反派。當時一玩上癮,除左隻game唔差,仲因為自己架車Mach 5有機關,有得用彈弓跳起、出釘呔電鋸、車廂變防彈同潛水,仲可以射飛彈,比賽過程地面天空有好多敵人,一定要善用機關先可以爆機,不過我只會濫用,一開波立即全部機關開晒,然後打著埋火箭噴射引擎turbo,係噉撞人地車尾用電鋸鋸九人,Racer X都冇情講,好屈機好開心,而且你有得用Racer X,但佢部車除左可以跳起同有機槍怒射,唔記得仲有咩特別功能。當年煲到黐晒線隻game,只係估佢唔到地呢套四十年前舊作,而家可以俾人拎出黎翻炒。

「邊個咁無聊?」

就係《Matrix》導演Wachowski兄弟。當一個三部曲已經夠佢地食過世、威盡全世界,講到明唔再拍戲但又手痕,因為鍾意日本動畫而《賽車小英雄》係第一套,就決定將童年美好回憶帶上銀幕。係佢地先有時間加有錢拎得出成億美金出黎,同搵到老細撐,有錢有名真好,做乜都得。

可能年中近暑假檔期,一連幾套典型荷里活式大製作連住上,但講到興趣最大肯定係呢套。但賽車片一向唔普遍,賽得黎仲要咁卡通科幻更少見,遲左一個星期入場,已經要入全戲院最細間院睇,可想而知本地市場同票房會有幾多,但係呢套戲的確要入戲院睇先享受得到。
「所以曾經諗過去IMax睇巨幕版,只係時間就唔到加IMax音響唔太得,都係作罷。」
上畫前宣傳重點,係套戲全CG製作,除左真人其他99%假,呢樣野最驚因為好易玩出火,一係玩好寫實好風格化,例如《300》同Sky Captain乜乜乜(個個話廢片,使我興趣奇大),唔係的話會走另一個極端變成真正卡通片,也就是這不幸例子,而且刻意做到扮卡通唔要逼真要一眼睇得出係假貨,顏色鮮艷到似影音試機,可能我打過隻game睇過卡通,入場擺明諗住睇炒車,但睇到益智得可以/可怕的畫風,同花碌到恐很佈的場面,我就知道,灰爆了。

造型亦刻意走番原著六七十年代近未來,即係充滿一份娘味,主角成日著到動畫入面條友噉,見一次笑一次,好鬼老土架大佬,仲要本來Speed Racer個樣好靚仔,而家個樣老左咁多(已經不是「小英雄」了),但套衫仲係果個靚仔look,難頂呀大佬忠於原著都唔使跟到咁足,改少少都得卦?Racer X就有改到,可惜改得樣衰左,卡通入面係黑面罩白衫塊面勁尖(日本動畫傳統、主角級人馬必定瓜子面),戲中全身黑色,睇預告片拍到佢好鬼肥,一d都唔威武,由矇面超人變成矇面超人反派d卒仔,嘩大佬好慘喎Racer X本身咁型,好在預告片先衰,戲入面好樣得多。其他人物同原版非常似樣,只係睇見五顏六色的畫面都知套戲係拍黎呃細路呃老豆老母,演員的演出是多麼的一級、多麼的益智,就連打鬥場面、打光同風位,以致間場方式、大頭轉場,都學足當年日本卡通。我果場全場得一個小朋友。全場得佢一個識笑、笑得最開心。我苦笑。你就知呢套戲其實拍俾邊個睇。不過我幾鍾意佢種漫畫式分鏡同插敘交代劇情手法,雖然卡通手法一變左真人扮足,效果有點兒爆笑。

「單講畫功、造型同演技,睇《賽車小英雄》,我覺得好似睇緊(______)。」
以上空格合適答案,包括

  1. 《天線低低B》之類的兒童節目(信我!真係激似!)
  2. 《夢城兔福星》(大家都係真野溝假野,分別係《夢城兔福星》想卡通做真人,《賽車小英雄》想真人做卡通)
  3. 《Inspector Gadget》(一個全身機關之改造人偵探,大家都係衰如果唔係一級片,可以拍得好好睇)
  4. 添布頓玩顏色d戲(睇到眼花)

所以劇情例牌地,講天才車手主角想加入賽車界,先發現賽車體育已經徹底商業化被金錢控制,自然係聯同其他正義之士好似Racer X推翻財團、還賽車體育精神。
「的確益智。」
唔緊要,最重要係賽車嗟,有名你叫。對此我抱好大期望,因為班友本身唔係單純賽車,而係鬥車,就算唔識原著,睇《Matrix 2》中間公路果段,都知導演拍呢種飛車場面幾有睇頭幾強速度感,兩兄弟仲話今次全CG擺明無限制,玩埋「卡夫」。
「咩係『卡夫』?」
要講講歷史。耐到唔知幾耐之前,中國人發明kung-fu。七八十年代,吳宇森開創gun-fu,將開槍變成型到超現實的一回事,自此槍戰電影因一個香港導演變得不一樣。到《賽車小英雄》,Wachowski兄弟玩到car-fu,即係用車打功夫。噉都得真係吹到脹晒。因為最熟係打機,型住叫得做car-fu,成班車肯定打到萬變奇兵噉射晒飛彈開晒槍插晒劍,點知真正有招式出car-fu只得一場,而且主角部車大幅弱化,大部份機關偏向防守,每樣機關只出一次就冇純為劇本所需,得彈弓一樣用足成套戲,結果除左一場有用武器真正car-fu,其他只係大家鬥撞冇咩招式可言,雖然明假CG顏色鮮明度超強烈影像的確凌厲,場面尚算出色,單玩撞唔係大家鬥暗器,同我預期中有出入。有少少唔開心。
「同《Inspector Gadget》衰同一樣野。點解一定要一級?家庭向之哀。」

睇呀睇呀,套戲好似睇極唔完。全套戲一共四場比賽,第三場完左諗住已經埋尾,點知原來只係個開頭,搭路俾主角入最後一場打大佬,完場睇睇錶,嘩頂套戲差唔多兩個半鐘長,係套超長體育勵志片,劇情太簡單冇乜深度擺明俾小朋友睇,只可惜作為一套陷家歡電影步伐又太慢講太多道理。同劇情交代不足。好似主角部車最後死火,劇情話其實仲有個後備引擎(...講晒),但主角唔知道,正常人遇著呢個死火情況,梗係不斷狂試試整番郁部車,但主角唔係,係瞑想然後標童標到知道有後備引擎,好難頂喎大佬。你話佢逐個掣試試到最後終於搵到後備引擎開關掣都好。點知係標童標出黎。灰。另外香港區宣傳重點「亞洲天皇」Rain,可能發行商都知唔響朵冇乜人會入場(唔關我事但,我必入,貪套戲夠白痴!),係唔係都講到明有阿Rain份,但戲份唔重之餘一出場負責俾人打,之後利用主角同Racer X贏左比賽,先發現原來佢係奸人行蠱惑,美國佬眼中典型亞洲人形象全部齊晒,等d細路睇完套戲(理應是套益智家庭電影),細細個已經開始排外,又係美國民族教育之一也。睇香港版另一難頂係譯名,學晒美國佬乜都要(懶)型的衰野,Speed Racer叫駭速(係我都知咁戇居的英文名要譯得好確係好高難度)、Racer X叫雷速、Rain個角色叫天速,即係齋睇名都知班友玩賽車,唔知以為佢地係三兄弟。只係這種譯法實在太娘。同套戲襯到絕。

又唔係唔好睇,只係覺得唔係為左拍俾細路睇,而真正為拍出car-fu電影,必定精彩得多,可能我入場心態問題啦,
「要睇正經賽車,不如睇《The Fast & The Furious》?」
戲中好多場面同鏡頭擺明tribute原版動畫(請留意主角最後贏左冠軍飛身落車個pose),主題曲又經常出現,片尾仲有主題曲廿一世紀remix版,睇見聽見,勾起細個打機時的美好回憶,就放過佢啦。只係噉樣拍法根本就係睇卡通,,我冇諗這種卡通電影除日本市場、兒童節目/電影、錄影帶/DVD、迷你戲院細院線以外,可以咁大模斯樣的全球性上畫。全靠導演個名。因為係佢兩個,先至有老細夠薑俾錢佢地燒,加忍得到佢地將套戲拍到噉,換著係其他人?分分鐘開戲都開唔成。
「名,的確好緊要。」