Skyline



兩個月前睇《精武英雄.陳真》(甄子丹戲已經拍得太密太多,今年睇過佢幾套,《陳真》除左武指十分麻麻,叫過到關只得《葉問2》,同《錦衣衛》(唔係因為徐子珊除衫不過)),片頭播預告片,除左《天凶天城》譯得幾貼題又食字食得好的中文名,同特技場面唔錯(幾百人捲晒上天空場面是十分epic的),仲有兩句。一句係非常潮的「霍金叫你唔好撩外星人」,出街冇耐立即引用食正潮流醒水到爆,另一句係電影宣傳口號之一:


DON'T LOOK UP


自然反應,個個立即向上望,就發現自己柒左,繼而記得套戲。宣傳上《Skyline》非常成功。但除左呢樣,好難再數其他能稱得上「成功」。俾人怒插是正常的。不過我冇問題。因為:


「請記著,看似龐大,這只是一齣獨立電影。」


綜合內容、場面、特技、攝影各方面:


  1. 如果《Cloverfield》講外星人,同唔全部用手提機而真係拍到套戲噉;
  2. 如果《天煞地球反擊戰》唔大美國人類輸;
  3. 如果《D-9》第二集講外星人重臨地球時要殺盡人類;
  4. 如果《War of the Worlds》按照現今電影要求寫實同反映殘酷現實加一定要灰要死方向翻拍;


就是《Skyline》了。只是就戲而言,撻Q撻得幾大鑊。套戲係兩兄弟搞出黎,本身做特技公司幫人整CG,整得人多索性自己落埋手拍戲。可能因為錢唔多經驗更少,預期之內地劇本導演都唔掂。故事基本上唔多得過預告片幾多:外星人黎到,吸晒d人上天空,再派兵落地捉/殺生還者,主角一班人見咁大件事梗係走佬啦。講完。「高概念」嘛。唔係咁一睇就明,點呃到劉Sir呢d膚淺人士入場?只係連表達都簡單到你唔信,我都冇睇過幾多非擺明垃圾電影e.g. Asylum求祈一套,及得上佢咁隨便咁唔完整。男主角班朋友想搵佢一齊搵食而叫佢過去,但實際上每人身份係乜、想一齊做乜,完全冇講過,好似編劇時唔記得左交代噉。大佬《Cloverfield》同一戲路起碼都交代得清楚人物背景同關係啦,仲要花費篇幅少得多,你可以拗人地上畫之前仲燒大把錢玩viral marketing所以冇得比,但單論戲入面,《Skyline》拍埋兩個導演好似唔識導演噉。你話呢d細節野無關痛癢,又文戲多過特技時,到頭來只搞到睇落劇本好鬼馬虎。欠缺演技是意料之內,對indie此方面我比較包容,但劇本搞到冇邊個特別有性格或突出,隨便一個都同出一出鏡就死果d路人甲冇乜唔同,只差在出戲份對白多寡。雖是特技電影,大部份時間卻圍繞匿藏大廈閣樓的主角一伙人,主要講佢地面對世界末日點反應,如此決定有兩個原因:呢種方向先至顯得寫實同「有深度」。同埋,現實,indie,冇錢拍咁多野。睇晒套戲,流程是聚首大廈閣樓時出事,走落停車場,臨出大廈俾外星人趕番入去,之後走番去本來個單位,臨尾上到天台,成班人完全冇離開過屋苑範圍。相信拍攝地點係導演自己屋企黎。(睇見個單位大加靚到爆又有泳池會所,再加幾部相信是私伙靚車,indie得真係有錢)其實外星人災難電影已經濫到喊,講生還者逃生者境況、心理與倫理才是合時(後)現代手法,但實在太廢完全帶唔出任何爭拗或思考,搞到好似想拍特技戲,拍落先發現預算唔夠,唯有臨時飛紙仔攝文戲整到夠長度當套戲上話,本質只達B甚至C以下級數電影水準。


「同一個故事,如果拍成短至中篇電視連續劇,會好睇得多。『劇feel』實在太重。」


調番轉,亦有好的地方。特技是有流位,但整體呃得到人,我覺得比《D-9》好,雖然成本所限出過場只得母艦、走地大怪獸、飛行小怪獸同人形外星人四種,設計是靚的特效又夠花巧,飛天怪物個樣似《Matrix》機械八爪魚生化版,空戰一場整得幾好有點緊張,連核爆都有。如果單為睇特技其實好足夠,只係一用腦,又會頂唔順。故事講外星人侵略地球,因為要用人腦做生物能源黎「繁殖」,即係同《Matrix》用人類做電池條橋一樣,用藍光催眠人類再一次過吸晒佢地上母艦,再派大小怪獸落地面捉埋食埋冇中招生還者,就同《ID4》外星人去其他星球搶晒用盡佢地資源後再搵第二個星球繼續一樣。聽落好合情合理,但此乃十幾二十年前外星人侵略地球思維,而家觀眾冇前以咁簡單會駁戲的,最簡單一樣野:


「你話好似《天煞》係搶人地實際物質資源講得通,但而家講緊生態能源,搶人地星球做殖民地用幾十億人不斷繁殖,會唔會比一次過殺晒幾十億人變做能源有效益得多?」


自問對爛片接受力比較高,比好多人更頂得順劇本點廢點錯,只係臨近結尾,我都開始招架不住。主角班人同架母艦唔差好遠,居然核爆咁大單,佢地人同屋完全冇傷冇痕,連個城都冇乜毀爛個天依然晴朗,主角有提過下輻射,又冇左回事。見核彈冇用,軍方的應對方法,是直昇機掟幾個兵仔上大廈天台控制場面。即係連核彈都做唔低,三個士兵用機槍火箭炮會搞得掂。(我明因為預算唔夠請到三個人扮士兵已經好盡...)最後當然係主角大戰外星人,但劇情所需,講到佢精神上同體能上居然打得贏外星人,連《Matrix》都玩埋脹晒吹到,但點解主角會咁勁?當然是冇解。或者因為佢之前俾外星人藍光照過但又冇俾佢地吸走,跟住核彈爆完輻射點點點,典型老套科幻電影/漫畫主角變超人橋段,但而家只搞到好鬼夾硬。臨尾幾個鏡攝影配樂擺明谷到盡,全套戲最具專業水準就係果兩分鐘,以此作結其實是最完美結局,除視覺效果一流,day three全人類死晒,最後男女主角走黎走去(其實只係同一棟大廈天台走到地下走番去天台...)始終難逃劫數doom到爆,唔會淪落到《Knowing》明明世界末日又要講到外星人拯救人類到第二個星球阿當夏娃地重新開始之流咁過份政治正確。好可惜,導演係都要懶要做到與別不同出奇不意,要加多一段外星人母艦劇情,講到主角男主角勁到個腦俾外星人食左,威水到可以反控制番個外星人轉頭,再用幾格定鏡講主角點樣救走女主角(成個figure廣告噉拍到),立即搞到套戲格調低晒。本來想拍災難心理電影講生還者感情掙扎,已經完全唔合格,加多咁大段,再落一城變普通荷里活CDE片。我寧願吸走左就算,講到變外星人,好好好好好好好敗筆。


「想舖定路拍第二集都唔使搞到咁自已咁爛卦?」


當講到全人類已經接近死清,好難想像下一集會點。講到男主角變左外星人,女主角同佢一樣照過藍光死唔去又輻射感染,而家有左,下集係咪生埋個仔出黎全家一齊打外星人?亦相信照過藍光唔死絕對唔止得佢地兩個,係咪會搵埋其他變種生還者出黎反攻?如果係噉,只有嘆句,真係好柒。已經同原來《Skyline》之原意完全相反了。兩條友不如走番去搞特技算。小到反艇,我仍然抱一點支持心態,只因佢係indie。如果大製作噉級數?死左去算啦。



收檔前,順帶一提:結局day three有三個城市簡短出過鏡,象徵全世界已被外星人收皮,三位佳麗是紐約、倫敦同香港。美國同英國一向是世界強權象徵,而前大英殖民地居然可以同兩強國並列,而唔係「真.強國」中國代表上海or北京又或日本東京,除左維港不論日夜依然是全世最最靚都市景點之一(我真心覺得的),世界上冇任何一個地方似香港咁on9又中又英再炒得出自己一門地道文化同精神,即使內地繁榮地如上海深圳都做唔到 - 某程度上,我因此自豪於香港人身份。只是見到近一兩年香港已經變到同大陸唔差得幾多,就發覺外國人眼中的東方之珠,根本死剩個殼,與其最終完全回歸大陸化,寧願外星人快d黎收晒我地皮算。我想,這是《天凶之城》最重要、最有意思的寓意。