假如你同我一樣係經歷過八幾年，同細個會睇亞視、會睇英文台，冇可能會未睇過Simpons或者唔知咩黎，細細個電視卡通已經俾日本壟斷（美國卡通只有中文台朝早同英文台先睇到），但日本動畫點靚點精彩，十幾廿年黎最愛仍然係Simpsons，雖然唔同當時大行其道之日本動畫，冇機械人冇飛車飛機冇打鬥冇血冇暴力（well，其實都幾多打鬥血腥暴力鏡頭的），只得一家人一個鎮圍威喂噉又半個鐘唔似劉Sir鍾意果種野，可以成為劉Sir最愛卡通就係因為好笑，同埋有深度。果時會夜晚播之卡通唔係幾多，除左聖鬥士同城市獵人，就係Simpson，當時係夜晚七點幾做，一面食飯一面睇，當時剛發明麗音，一套戲有兩種語言好高科技架，而Simpsons係第一套麗音卡通片，你見佢係夜晚播就知道唔係卡通片咁簡單，而係真係俾大人而唔係細路睇之動畫電視劇啦，但同成功之迪士尼／彼斯動畫一樣，Simpsons可以橫行廿年就係可以雅俗共賞，講深度係非常有深度，加上生活化之處境同環境大人睇會好有共鳴（只可惜唔係美國人，成長在美國相信會更明白更投入），但就算係細個唔識野，ｄ笑料一樣可以笑到碌地，高深地睇膚淺地睇同樣高興。
好多卡通同動畫過左幾年後會電影化甚至真人化，Simpsons歷史長過好多其他卡通反而咁耐以黎都冇試過，或者難卦，電視版賣點就係大量情節放入廿幾分鐘時間，而好玩好笑得黎係通順，好多時上半節同下半節可以完全冇關連唔關事，但你睇完完全唔會投訴，就係編劇功力高。唔出電影版，可能就係怕達唔到電視版帶俾觀眾之高要求，電影唔係半個鐘而最少個半鐘，加上故事會獨立於正傳，要花多好多心機舖排先可以做到電視版一樣咁成功。咁耐唔出電影版都係好事，一來大家期望好高啦，二來加多（十）幾年時間，自然有更多角色同劇情俾電影版利用發揮。
起初公佈會變成電影，大家最關心梗係兩樣野啦：
「會唔會變成立體CG？會唔會變成真人拍？」
而家仲有咩人唔用CG唔同立體整動畫？只係Simpsons用立體畫會變到成隻電腦game噉好怪，亦唔係各位由細睇到大想見到、自己心目中之最愛變到「不倫不類」（「變形金剛症候群」），第二樣野先死得人：就係唔知點解好多電影公司同製作人鍾意將卡通真人化，尤其是日本仔，但往往由真人拍出黎，對比起卡通造型，立時覺得唔拍好過拍樣衰十幾倍，日本仔真人化電影呢個問題更加嚴重將本身之肉麻造作擴大十倍，好在劇照公開，同電視版一模一樣，可以安心入場睇 － 雖然最後真係變CG變真人一樣係邊鬧邊入場架啦，Simpsons喎大佬廿年由細睇到大喎大佬當朝聖都要啦，同變形金剛道理一樣。
買飛時，發現有困難。好多人都知我鍾意原汁原味，睇戲鍾意睇番英文版，就算係好想睇，但係無線重播中文版，一係開麗音聽番英文一係寧願唔睇，對於漫畫小說電視電影我有呢份執著 － 除左日本野，鬼叫唔識日文，有字幕都叫做聽番日文配音，冇字幕就迫住聽中文啦。所講困難係乜？香港人英文程度日低大家都知，原因之一係冇機會接觸英文，強迫自己去面對或者間接接觸點都會有幫助，只係當而家連電視劇都會加英文字幕幫大家學英文時（只係有幾多人會因此轉睇英文台？），電影反而反其道加廣東話配音「顧及」（應該話「遷就」）市場需要，好多戲院只做中文版，有播英文版做一日都唔會有幾多場，香港人英文程度唔係真係咁低、唔係真係咁需要「顧及」卦？
好難得新世紀有一場日頭一場夜晚，夜晚果場仲要就到我收舖時間，立即買飛啦。感想係，
「完全達到Simpsons迷我之要求。」
只長個半鐘，即係三集電視咁長，比想像中短，但出黎效果剛剛好啦，你睇Simpsons想睇到全部都有，除左主角一家人各位大家喜愛的街坊百姓都有出現，同埋主角頹廢、其他人荒唐夾埋而生之笑料，仲有大量美式幽默（以幾近荒謬之態度應對各種人事），同埋Simpsons獨家估佢唔到之笑料。故事好簡單，講春田鎮環境災難，Simpsons一家走佬之後重返家園為救萬民，冇乜特別亦唔大驚喜，一路落去好多片段簡化左，甚至簡單過頭好容易就應付左冇深究落去亦冇交代，但你會介意咩？正如睇睇電視版上半兩節可以差距好遠，明明唔多關連，大家一樣噉睇，全靠當中笑料連結，而笑料係Simpons廿年黎最強武器，笑位超多差唔多每一分鐘甚至半分鐘就有一個由頭笑到尾，但最頂癮係ｄ笑位係估你唔到果隻，望落似熟口熟面覺得以前見過聽過，點知結果完全同你所想相反，又或者荒謬得可以但唔係硬滑稽果隻，即使你完全唔理劇情齋笑，睇到散場都唔會覺得有咩損失有乜問題。
除左笑，仲有三個原因要睇，一樣係感情，同變形金剛一樣大大話話睇左近廿年，今個暑假兩套一齊黎電影版，冇藉口唔去睇啦成長一部份喎。其次係向上一世代致敬。而家人人都玩CG玩立體，仲有幾多個肯一筆一筆人手畫出黎，花錢花時間加「唔靚」？就係鍾意簡單黎得仔細之畫風，雖然而家都用多左software執，唔少場面好似睇flash野噉色調同層次動感不均，好在大場面同多人場景先用，絕大部份時間仍然倚靠人手，都算情有可原。最後係心同深。你當普通卡通睇得，當係細路卡通睇得（雖然點睇都唔多／唔夠細路），當大人電視片集睇都得，甚至睇到你會唔記得左係睇緊卡通唔係真人劇集，咩角度睇都會有得著有得笑，笑之中又有強烈諷刺同批判性，單一開始串人入戲院睇電視劇已經笑爆（但大家好樂意被串），GREEN DAY開演唱會唱左三個半鐘之後想講一分鐘環保立即俾人殺死又係，最正都係「世界末日」時，教堂班神父教徒同酒吧班酒保酒徒走晒出黎，尖叫，然後神父教徒衝入酒吧，酒保酒徒衝入教堂。睇得出想表達ｄ乜，你會笑得好大聲，但唔知係太美式還是唔夠好笑，呢套笑片我睇果場全場好靜，明顯地好笑ｄ位都唔係好多人笑，可能文化始終唔同，香港人浸淫日本文化太深。
對於自己黎講，又好唔好睇？Simpsons真係睇咁多年，從來冇覺得唔好睇過，你話來來去去都係噉、見極都係同一班人，就係睇十幾廿年都唔悶，全靠編劇功力同精彩笑料，電影版亦由頭笑到落尾，劇情唔突出但叫做通順，雖然角色間之感情同發展唔夠深，冇緊要正如從來睇Simpsons你唔會追究劇情有冇意思、邊個同邊個之間點點點，只係睇邊個發傻果個戇居然後笑笑笑。係未夠好，又點？我鍾意就得啦。一個暑假（係我係冇暑假，俾我幻想中懷緬一下好冇？），兩套八九十年代經典一齊登上大銀幕，亦一齊成為暑假最賣座電影，計邊套鍾意ｄ就冇可能架喇，不過要揀的話我諗會揀Simpsons，簡單嘛。始終都係八十年代好。