《戲王之王》我係上畫後第一個禮拜六去睇，禮拜二先上畫即係今晚係第五晚，禮拜六晚九點幾上到新世紀即場買飛，除左最前兩行後面得番凌散單位，我好耐冇睇過港產片都知道而家港產片好少可會有如此盛況（事實上確係太多廢片），而到第五晚都仲可以咁爆，相信係港產片近年少見之成功。得以咁賣座，詹瑞文自不然係賣點所在，一路都係做串星但次次出親場都笑到仆街（我係《拍兇拍人》fans！！！），《戲王之王》第一次做主角，一定要捧場啦！港產片其實唔係冇料到有輝煌過，除左動作片同警匪片，喜劇都係強項黎，只可惜近年「笑片」同「垃圾片」兩個詞已經同義，哀哉。對電影我亦偏向唔需要用腦之官能娛樂多，所以《無間道》三集之後，好似今晚先再入場睇港產片。

有詹瑞文你都預左會係誇張笑片黎，劇情講差佬進修演技做臥底，立即《喜劇之王》因為好似，似到大家都係衰同一樣野：大家都係分上下面個主部份，前半講對演技有執著之主角去潛心修練最後出山致用，警方派左詹瑞文去演藝學院學做戲準備做臥底，自然係玩同諷刺佢浮誇到爆之舞台劇演技（所以到而家我都唔多鍾意睇舞台劇就係太誇），舞台劇演出之浮誇同電影演出之實在兩者衝突成為笑料來源，但並唔係一味只玩表情同肢體，好多對白同動作笑料真係作得好應，經過太多胡鬧同無厘頭「搞笑」之蹂躪，終於有番一套正正經經真係笑料有深度、令人由心笑出黎之港產笑片，最正係編劇一路落去都好順亦冇悶場，雖然好多枝節亦有好多角色同深層意義想講，但你唔會覺得太多太亂又或者有ｄ劇情過於片面，學院派專業編導就係唔同ｄ，就前半黎講我係非常非常非常之滿意。

我講緊前半，個劇本本身睇落已經好似好無聊好夾硬，喂無聊先好玩喎乜都正正經經有乜癮呀叫得做笑片？後半就係主角「得道」之後被委以重任，只係兩套《王》後半都變成單為左做多ｄ戲而拖長，同「演技」之主題同發揮已經冇咩大關連同發揮，變左一班人柴娃娃玩幾個字就做完套戲，成part 戲出得突然發展超快完左都唔知咩事，搞到套戲有ｄ虎頭蛇尾，較失望就係呢個部份。不過夠架喇，唔無厘頭式搞笑亦有好多野想講，同埋笑料夠多加玩盡港產片，玩最多當然係《無間道》真係好鬼好笑，雖然重點係詹瑞文同「Twins果個」，反而其他任何一個路人甲加一大班客串guest先係重點，客串果班全部都係「我地年代」一睇見就會笑出黎，夏春秋都有呀大佬夠未？同埋林雪＆黃啟發！（唔好意思睇左《暗戰》之後我只記得佢叫黃啟發）《無間道》班底有黃秋生又有曾志偉，仲有杜汶澤扮足曾志偉做韓狂森就知幾玩野，都唔止，麥兆輝真人都有份客串先夠晒吹脹！我最鍾意睇配角，更鍾意睇老演員做戲因為老野做戲更有戲味，《戲王之王》個配角卡士直頭係黃金組合，最路人果個都睇到你笑爆咀！

兩個鐘港產片黎講算好長，除左後面少少唔如意全套都好鍾意，我好耐未試過睇港產片睇得咁心滿意足，亦令我對港產片再次提起興趣 － 只係有興趣還有興趣，仲有冇機會再有一套真係唔敢講。眼前呢套鍾意滿意就算啦唉。未係最好睇亦未到滿分，但作為笑片作為港產片作為香港人，絕對推薦你一定要入場睇支持一下呢套有心之作！就算要我入多次場睇陪你睇我都肯制！就係咁感動！