未來戰士第四集未上，亦冇預期過拍出黎可以有幾好（你點搵番阿諾州長出黎陪你癲呀而家？），但作為第四集上畫前造勢工具之一，電視開左套「前傳」《Sarah Connor Chronicles》。睇到個名都知，電視版主角唔係未來帶領人類對抗天網之反抗勢力領袖John Connor，而係佢娘親。電視版時空係第二集同第三集中間（第三集Sarah Connor已病死），目的係補充點解第二集已經毀滅左天網，但仍然會有第三集同之後之世界末日情景發生，但當然更重要係搵戲黎做啦，唔係點谷套戲點搵你錢呀？

由於集集未來戰士主線不離制止世界末日，但每次都係制止唔到只能延遲，進而一正一邪機械人來到現代繼續為主角存亡對決，當劇本方向已被規範，而連續劇成本唔會夠大電影鬥，即使稱為「補充兩集電影中空期」，都冇預期可以有何大突破。如果要講到突破呢，可能就係呢樣：追左兩個月左右，突然間，

「完左？」

全季只得九集咁大把，以美國連續劇一季普遍有二十集黎講，呢套算係一個短篇，同時大大影響劇情發展。頭半其實好悶，一正一邪機械人回到過去，主角二人繼續走難，用左幾集講點樣逃避追殺，同電影一模一樣，問題係尺度一定唔夠電影黎，就算集集有兩個機械人打到飛起，始終及唔上電影氣勢，全靠感情分搭救。賣點由動作場面變成囡囡，始終欠缺此項對收視影響可大可小，新一代正派機械人順理成章由州長變成囡囡乙名。比較兩集電影，第二第三集未來John connor派去保護自己果個係亞諾舒華辛力加，電視版變左囡囡，就知主角自己

「真係識嘆，騎騎∼」

只不過Sarah connor電影版健美小姐款，黎到電視修身成功激瘦，就睇唔順眼了。後半交代左天網點樣利用時空重造自己同保障世界末日發生，鞏固番第三集前提，主角一夥再圖瓦解新陰謀，同提及未來發生乜事，就緊湊得多非常有睇頭，而且充分運用電視劇優勝於電影之處：可以用長篇時間深入描寫一個情節，好睇程度贏頭半幾條街。論特技同陣仗只算中規中矩，以現今電視片集CG水平黎講雞左少少，不過大家都係睇條女點樣俾人一掟撞穿幾幅牆再爬番起身一個飛腳踢敵人落街嗟，講打叫做夠架喇。至於電視版補完之目的，提到唔少新野好似原來曾經有大量人士時光倒流過，有時講到仲勁過正傳，就睇你接唔接受，呢樣係好多前傳、回顧式作品通病，但整體總算合理同唔會超過原版設定太多，而且劇本同攝影經常試風格野，睇落冇乜悶場仲耐唔耐有驚喜，特別大結局最後一節亦即全季最後三個字，用Johnny Cash加吳宇森風格低調表達機械人殺晒成隊飛虎隊，同到最後先發現原來局中有局、開估一輪後伏線重重，簡直係導演功力登峰造極之時，單單此三個字已經感動晒。明珠台快手播下一季唔該。

「講起音樂，除左Johnny Cash，『industrial math classical』的片尾音樂一樣好正，十足MESHUGGAH！」

雖然大左結局，電視仲有野睇，新一季《欲骨查》播緊，仲要禮拜三晚，追完上季又好睇，就梗係繼續追啦，雖然個中文譯名仍然覺得好柒；禮拜四晚國際台仲有《靈感應》，一個賣囡囡的鬼眼故事，女主角就係做《舊年暑假搞乜鬼》果位，你有睇套戲就知點解咁好睇，雖然老左殘左唔少，但外國人黎講算保養得唔差，只係有時導演賣女賣得誇張左少少，條女係唔係都要著大低胸緊身衫，係連落街買個麵包都deep晒v果隻，即係好睇一回事，有時覺得似睇王晶ｄ戲，想笑。《Tropic Thunder》結尾頒獎禮一段都有出過半秒鏡，至於搵佢黎客串做乜？就梗係露啦，得半秒仲有乜野可以做？不過唔論演員齋講故事又真係幾好睇的，早排撞到集講一個古典老豆同rock友阿仔的故事，睇完就決定追了。

雖然，有時我都想中文台，只係當亞視晨早宣佈唔再拍劇，無線全無競爭下日益垃圾，睇《溏心風暴》開始，之後直落《家好月圓》《珠光寶氣》一氣過連住落之「三部曲」，演員差唔多故事差唔多方向差唔多玩足Ｎ年，根本拍極不離其本，我未到層次欣賞。所以亞視唔開劇、唔會再有《世紀之戰》出現時，更加唔使奢望無線肯整多套《大時代》，連多年黎只睇無線唔睇英文台的老母，而家都變成每晚開明珠台睇外購劇睇完就熄機訓覺，無線，唔爭氣的話，請收皮吧。