Returner - 20080305

Returner

可能因為次世代遊戲機成風，又或者九幾年尾美國《Matrix》衝擊實在太大，加上《太空戰士》成功／失敗，一向婆媽、武士道同嚇餐飽加崇洋的日本仔，又跟住拍番幾套特技戲，好似01年有《打機王》（初時覺得白痴，但睇左先發現原來幾好睇仲唔低能值得推介），02又有《武者回歸》。多年前上畫時好似紅過一排，因為有金城武（型呀！靚仔呀！！），同埋少見地來自日本之荷里活式科幻動作片，仲挾「日本破紀錄票房」之名過江，預告片睇落幾吸引，只係日本戲一向冇乜大好感太婆媽太漫畫式跨張，當時又未到好迷睇戲地步，自然冇去到睇啦。Ｎ年後撞著HK Records DVD大殺價一舊水三隻，爛片奇多，當中包括呢隻《Returner》，一隻三十三計番抵玩（雖然隻《Returner》正價都只係貴幾蚊．．．），湊夠三隻就磅水。
「另外兩隻係乜？係年度大project。」
但劉Sir懶到死的習性，買左自然唔會立即睇，梗係擺係度一年半載封晒塵先摷番出黎啦。早排《Jumper》一上畫走左去睇，張poster令我諗番起《Returner》，都係沉色都係Mark哥褸都係果個pose，終於開隻DVD睇睇。

故事冇乜新意：未來地球被外星人入侵，即將滅亡之際，最後一個生還者用時光機回到現代，要三日內改變歷史拯救地球。初時我以為「Returner」就係金城武。點知唔係，回到過去係個靚妹，金城武係現代浪人，撞著個靚妹，就被屈同佢一齊打救全世界。早二十幾年或者好新奇，但廿一世紀荷里活片氾濫睇仲要《Matrix》後睇番，同將Ｎ套西片Ｎ隻PS game合體差唔多。就格局而言點睇都係動作戲，亦因為見到預告片玩bullet time十分期待，只係入到場發現，死，日本戲就係唔同荷里活。美國佬你要打由頭打到尾打足個幾鐘完全冇廢話都得，但日本仔打還打故事要分明，一開始少不免一段金城武表演時間，之後中間幾近全部空檔，只間中有「劇情性」動作場面睇睇，直到結尾幾個字先一連串黎晒。主要劇情透過回憶片段解釋，冇拖慢步伐，只係亦去得太平淡，開頭用差唔多成個鐘舖排，外星人先終於出現帶出一個意外轉折（但驚喜度只屬低下），從頭到尾好多場面似曾相識、太多橋段早會猜到，差唔多每兩三段就出現一次「邊套西片用過／拍過／用過」，唯一冇咁抄，係無論過程還是結局都要賣弄一番日本式溫情，東洋導演特色嘛，但呢ｄ野可能打動到為金城武入場的妹妹仔，我完全冇感覺。即係拍俾睇西片唔算多的日本人或大陸同胞睇或者可以令佢地驚嘆，香港人荷里活戲由細睇到大，反而覺得十分老土同扮野，
「早二十幾年或者好新奇。」

劇情點唔緊要，重點打同特技嗟。叫做科幻動作片，自然係諗住會打到《龍珠》或《Matrix》或《最後一強》個款，點知特技落晒去劇情方面，整外星人、整太空船、整宇宙戰艦，質素同PS2即時運算差唔多，亦即明顯地係電影砌出黎唔多夾人景顏色，只叫做收得貨果隻。或者控制成本所以幾十／百／千外星人太空船同台屠殺人類冇發生過，最大規模只有一幕戰鬥機群轟炸地面，為左做到大場面效果，導演連變形金剛都玩埋，外星人戰機同戰船可以偽裝成地球交通工具，最後一幕成架客機變形宇宙型態，可能係全片投資最大特技場面，只係又係睇慣睇熟，或者因為套戲目標市場係理論上唔會睇太多特技片動作片的金城武妹妹仔fans？至於打，可能演員冇底搵唔到任何拳腳交接，從頭到尾都係槍戰，班演員大牌所以矜貴ｄ？但型先至係重點，槍戰易造作嘛，假設入場睇係妹妹仔多，點計都係金城武慢動作旋轉七百二開槍加送飄逸長髮迴轉大褸吸引，正如睇周潤發，你話《英雄本色》Mark哥同賭神高進型ｄ，定《臥虎藏龍》李慕白型ｄ？當然正常槍戰片一早玩到爛晒，加上唔會夠香港經典鬥，遇著後《Matrix》套戲又擺明抄格，點可以唔玩bullet time？劇情中未來科技發明音速起動器，可以令用者加速二十倍，亦即全世界慢動作得主角一個正常速度行動，
「仲唔係《Matrix》？」
算係全套戲最有睇頭同最貼科幻主題，設計亦唔差，只係秉承全片型仔為主動作為次之大方針，通通點到即止偶一為之，加上得主角一個做到反派全部被屈變左做超級英雄片，簡化過頭冇乜深意可言。
「唉。點解我唔係妹妹仔？」

唔覺唔覺，個半鐘唔夠，套謝就完左。通常呢類穿梭時空改變歷史電影，總會有時空交錯而生之曲折橋段，但同樣地只有少少日式溫情小轉折，同盡量避開有關討論，有點兒浪費同太刻意做到明星片向。連帶人物關係都顯淺得滯。只需要認住三個人：回到現在的靚妹、全職殺手金城武同社團老大反派，正派叫做多個匿埋藥材舖做拆家的阿嬸，亦即正三反一。只係冇一個成功建立得到，加上演技差亦唔夠說服力，最灰係金城武，初時睇見poster以為佢就係Returner，以未來高科技回歸現在以一敵百拯救人類，但噉樣妹妹仔未必受同會太《Matrix》，結果變成普通殺手一個，型時可以好型，但唔型的時候，就同日劇韓劇台劇常見男主角一樣有點兒益智到近白痴果隻，灰到爆。
「有時我寧願你擺明扮型造作，反而扮到盡更有好感，橫掂都係扮《Matrix》架啦咪抄足佢囉我唔介意架。」
只有大奸角演得最好最入戲，佢出場時間甚至不下於主角，亦係建立得最成功一個，雖則行事動機過於正路，或者其他角色實在太悶，奸角神經化表現非常出，最後兩大角色對決，金城武有bullet time避子彈，佢都有「捉子彈」演得出色。從來日本人扮邪惡扮入魔係扮得最神似最入型入格，或者係民族天性黎？你睇《武者回歸》或者係為睇金城武，我絕對係為睇個奸角。只係好不滿結局係反派全軍覆沒再制止到外星人侵略地球，正派居然一個人都冇死到，當中好多見慣見熟場面同橋段，發生在西片會有人死，但呢度冇，好似金城武同靚妹必須要有一次唔夠抽著草，匿到去拆家中藥阿嬸度再俾人跟蹤，阿嬸自然係掩護主角一行人逃走，你諗住阿嬸死硬。點知過左一個字唔夠阿嬸蒲番頭，可以「裝左個炸彈落黑幫架車度炸死佢地」再有命走得甩加帶埋大批軍火支援。為顧及妹妹仔感受為入屋，編劇實在編得太唔實際太白痴喇，頂唔順，原有之驚險刺激同壓迫力冇晒。
「既然正義之士個個咁勁咁神技咁無敵，外星人入侵都唔使驚啦，仲使乜怕區區黑幫追殺呀？」

老實講，真係點睇都唔明，套戲當年點解可以講到咁勁、可以所謂「打破日本票房紀錄」？身為香港人的我點想都想唔透。鬼叫我唔係日本人咩。戲中雖然冇明確宣揚大日本，但暗地裏意識相當明顯：2084年全人類死守西藏，但成個西藏除左幾個喇嘛全部係講英文的西人，只得靚妹一個日本人，最後當然全部外國人死晒要靠日本人救世（但個靚妹好多時又要講英文做到好勁好pro的形象）。片中黑幫可以理解為來自中國的三合會，所有人一律國語溝通，但大奸角後來謀朝篡位，一次過殺晒所有國語人士，重整「正宗日本」旗號。所以論劇本論製作，有睇過多幾套同類西片，冇乜可能會覺得好睇（金城武fans除外），甚至可以話遲到最少十年，日本當地可以咁賣得，除左民族意識作祟，中晒排華排外潛意識之餘係「日產美國級數特技電影」所以入場支持，實在諗唔到仲有其他理由。

「同《Jumper》一樣，睇完《Returner》，又係諗番起李連杰套si-fi action flick《最後一強》，除左又係時空穿梭，動作設計亦好相似。似乎真係走唔甩要睇多次《最後一強》。」