赤壁-決戰天下



2008年電影從兩套爛片開始。2009年反傳統地先睇兩套港產片,《機動警察部隊》後,再黎熱切期待的《赤壁-決戰天下》。第一集上年暑假鉅獻,續集就輪到半年後09新年檔期。


「既然講赤壁之戰,第一集叫《赤壁》,第二集點解唔係叫《之戰》?」


第一集上畫引到唔少人入場幾大迴響,唔知係咪因為大家入場先發現俾人呃左,套戲果真如其名只關赤壁事唔關赤壁之戰事?照計第二集講到明會燒船,預告片又有睇頭,應該更多人講至係喎?點知靜到離奇好似冇上過畫噉。反正個市都靜,就承接上集去豪華睇,老戲院睇老戲先夠氣氛嘛,仲要無聊到搵日晏晝射波睇兩點半場,入場人數都唔少喎近半百。散場現場觀眾反應都幾...惡劣。難怪會靜成噉。因為睇完的確冇話可說。


上回講到孫劉聯軍同曹軍各駐赤壁一岸,大戰一觸即發。係我都諗住好快就會開打,因為要之前已經交代晒大半,而且大家入場一心諗住睇燒船、睇所謂史上最高製作成本華人電影可以有幾大陣仗嗟。但做得導演總有自己堅持,如史詩電影必須長篇大論,上下兩集各兩個幾鐘,但資金冇可能打足二百幾十分鐘,加上而家係睇戲唔係打機,自不然用長時間交代劇情。上集你已經話好慢好悶?今集仲死,因為頭三分二基本上全文戲,唯一「打戲」只得草船借箭,到後三分一正式開戰一舖過打到尾。導演今次更想突破佢以往重男輕女傳統,加重兩位女角戲份。成果點?先講講前三分二文戲。


多數人講/寫三國,劉備必屬正派,曹操肯定邪惡,孫權就兩頭唔到岸,吳導演反常從吳國出發,開始冇耐已經講到劉備冇叉用退兵,得番諸葛亮一個獨撐大局,問題係上集劉備軍仲叫做由頭帶到尾,而且係劉方提出結盟、千方百計先昆到吳國共同對抗曹軍,今集做乜事話走就走咁戇居?雖然明知「是個計謀」、你預左臨尾一定出番黎同吳軍會合突襲曹營,可惜處理得實在太樣衰,你只覺導演為挺吳貶蜀滿足自己,最後想兜又兜唔番只好夾硬加番蜀軍落去,最慘係赤壁之戰最出名借東風,充份突顯諸葛亮過人之處,點知佢自己一早講穿左知道黎緊會吹東風而唔故弄玄虛,是為保周瑜顏面之編排?唉。只有話因為演周瑜果位叫梁朝偉,同吳宇森係周瑜fans,所以佢個角色本身加故事改到光怪陸離,可以話全個兩部曲佢做晒主角。其他人除左幾個主要角色全部變晒路人甲,特別曹軍基本上得曹操一個有戲做,其餘接近全部連名都冇出街,就算出鏡對白皆多,睇完都唔知佢叫乜水全無印象,只會見到個人出場時問「咦?點解會多左條友出黎?」特別曹操需要人幫拖、要人幫手續對白時,自然有人彈出黎,魏國果然人才濟濟。另角色關係及性格大錯特錯。諸葛亮今次正常左冇上次咁多無聊但唔好笑的硬滑稽位,孫權同周瑜反變得再加意氣用事。周瑜、諸葛亮兩個今場好好朋友,突然又想對方死,下一幕又friend番晒,打完仗更加大團圓。想點?既生瑜何生亮在那堙H至於女角戲份...算啦。唔加好過加。想喊。


直接去到最後赤壁之戰好過啦。第一集戲中穿插幾段戰役場面,基本上只係睇劉軍大將打三國無雙,最後八卦陣反駁位多(點解曹軍會自己衝入陣咁戇居?同點睇蜀吳聯軍人數唔會少得過曹軍,用少少計突擊再交鋒都贏到,使乜搞咁多野?),拍得好同保持風格就夠,所以第一集動作場面我好享受。今集輪到玩大場面,就由《三國無雙》變成《雷霆救兵》,睇火燒連環船同強攻軍營,人海戰術係噉死人,或者鬧上集太無雙的朋友今次會滿意,不過個人之言新意未夠,我覺得其他同類戲好似《墨攻》同《投名狀》拍大場面更多野睇。


「話時話,中間大將自爆炸城牆一幕,令我諗起《中華英雄》。都咪話唔灰。」


製作組想拍出陣法之精妙突顯中國色彩加尋求新意,唔止呃鬼佬,連我地自己中國人睇都會覺得精彩,所以上集一開波超現實玩日光鏡,結尾無離啦更都要整場八卦陣。今集出巨盾矩陣,其實可以好大發揮,點知要留番篇幅俾最終對決,略落筆墨就過左,浪費晒大好安排。何解最後對決咁重要?你睇吳宇森咁多套,最好睇係乜?最後幾位主角殺入敵陣以一敵百,之後同奸角持槍對峙,十套有八套係噉但就好睇完全唔介意,此謂成功之個人風格。係估佢唔到連古裝片都玩埋一份。所以最後你見到孫權周瑜兩個一馬當先衝入敵陣無雙亂舞,而蜀軍幾位大將似傍住無雙大將班親衛兵,最後周瑜會曹操,原來又係為女,仲要因為冇槍變成大家拎住劍互指對方。笑晒/喊晒。典型吳戲戲路,問題處境不同,以前拍江湖片警匪片,環境加前提合情合理,而家打緊仗架大佬,你有幾可見打仗做大果班會自己出手?(打機睇卡通睇漫畫除外)梗係叫班靚去打去死架啦,自己傷左死左邊個帶兵點算?同兩陣主將短兵相接,點都會帶定大班靚幫拖架啦,何解幾位大佬一碰頭,居然全場得番佢地幾個,真正開拖係噉樣你望我我望你?立即出兵打對方啦,無雙咩!就算真係一對一,附近仲唔埋伏弓兵暗算?曹操呢d上集到今集都自己睇戲先似做大佬嘛,孫權周瑜一般見識落場打呢d都唔知似乜!《吞食天地》咩!拍得好如上集我理你點無雙,問題今次動作場面真係行貨到喊嘛,救都救唔番。你要吳宇森風格、你不要江山要美人,冇問題,但破曹軍後居然唔殺曹操放佢走,仲勁到由周瑜話唔殺佢叫佢走,在場冇人反對。成班人打生打死就係為左殺曹操。點解黎到呢一步,在場所有人包括誓要曹操死之兩大主帥劉備同孫權,居然冇人落手?而且話唔殺果個係周瑜,亦即將領一名,佢老細孫權都冇話放佢走,幾時到佢話事?噉場仗打黎做乜?吳宇森過頭喇大佬而家唔係拍江湖片呀!


「知唔知點解佢地會放曹操走?如果曹操死左,點樣三國鼎立?冇三國鼎立,點樣開第三集?冇第三集,佢地有鬼飯開?」

「講開又講,有段劇情係小喬走去見曹操,沖茶佢飲拖延時間俾孔明『借東風』。既然佢知道曹操飲硬佢杯茶,沖果陣落毒毒死埋曹操,咪一了百了天下太平?應做的事唔做,女人就是麻煩。」


《赤壁》時講過,我對中史、對原著冇乜認識,三國史知識來自電視劇同動畫,但我唔多識,睇完都覺得劇本好大問題。如我咁白痴都知道,劉備冇退過兵,當初提結盟係佢,蜀方戰到底;孫尚香冇出過戰;小喬冇去過曹營,甚至冇參過戰;草船借箭冇可能會架船開晒窗俾人射箭入船內,同時自己當正唔會射中自己坐正箭雨中間嘆茶咁得閒;臥龍鳳雛冇戲中關係咁好;周瑜份人冇咁大方會陰人;曹操份人冇咁正直會肴底;讀書都有讀過當年係黃蓋出苦肉計先成功燒到船,劇中講周瑜要打「君子之戰」而唔受黃蓋苦肉計提議,同覺得曹操唔會咁蠢中計,前者就算啦後者我覺得講得通,但係連苦肉計都唔要,就一定一定一定俾人狂小。即係我歷史知識薄弱都睇得出好唔對路,上集最多只覺太無雙唔合物理,今次直頭連常理都唔合。你話真係當正套野歷史片噉睇的朋友會有幾憤怒。通常拍歷史戲都會改得簡單d,同將重心放在場面,皆因入場觀眾都係為睇打仗多過睇文戲,《決戰天下》反而相反改到離奇,我印象中之赤壁之戰好似冇咁複雜?另「原著」所有/任何橋段本已夠精彩,唔改照足拍一定好睇過精彩過而家,真係唔明點解要改到離晒譜。完全唔明。就算係外國歷史戰爭片,大多都會按番史實,《決戰天下》都算我睇過改得最離經叛道之一作。因為唔用赤壁之戰掛帥,一定唔會有咁多人入場睇?但當入場都係為睇史實時,你改到噉而且唔係改得好,又有乜謂?電視劇版冇乜改過,但有冇人話唔好睇?索性叫《空想赤壁》好過啦唉,背負赤壁之名,壓力太過重大,就算唔講劇情,起碼唔話改自史實而打到三國無雙噉,大家唔會覺得有問題先。(但有時大家又未免太偏激;《三百伕》更無雙,你又唔鬧?)


另一問題係今次講故事手法非常唔得,步伐慢而且唔順,上集起碼中間有打戲唔係齋講全場,今次留到最後先打,草船借箭唔見得夠魅力,孫尚香d戲又會睇到你灰,悶場非少。最慘今集唔知乜事演員好有問題,好似冇之前咁識做戲,又或失去神韻變左另一個角色,睇落似上下集拍攝時間隔左好耐,同下集導演為趕埋尾令演員準備不足,演出及編劇皆失敗,實難不感馬虎,特別斬旗過場畫面,見一次笑一次,好似細個睇卡通片,超娘,想好一點可不可以?寧願你唔用。仲有樣野想講講:第一集無雙有個好處,就係吳宇森攝影風格結合古裝武鬥同陣法,好睇在東方味重而完全唔老土,令人覺得真係一班中國人拍出黎之史詩大片,今集規模更大,好多攝影手法反而西化感太重,就如大家見慣見熟的西方史詩片,加上少左好多武將solo變成人海戰術,但陣法場面又忽略晒,當初製作組話想拍套中國版《魔戒》,結果視覺效果同場面設計的確《魔戒》,同時冇左舊作種東方武學、中國謀略兼比上作更娘,特別最後《喋血雙雄》...係咪為賣埠,而令自己過份西洋化呢?當年《投名狀》外國上畫,聽聞都剪到九彩,就為怕外國人唔鍾意中式拍法,而家連賣亞洲市場之「原版」都咁洋化,而唔索性東方盡佢到再剪輯先改,會否矯枉過正?


上集唔多關真正之赤壁之戰主戰事,拍得好喎但係噉冇問題啦,今集到戲肉反各方面強差人意,差唔多整個兩部曲所有最唔掂之處,全部谷晒落今集一次過出街,娛樂性,真係分分鐘睇《見龍卸甲》甚至《超時空要愛》仲高。我冇上網睇人地點講,但單就自己感想同其他觀眾反應,都估到肯定被怒插,套戲可能真係只叫《之戰》唔提赤壁,會更好...吳宇森電影非常黑色浪漫,問題係呢種格調唔適合戰爭片,打仗係唔會同你咁講道義、唔會郁下就同你隻抽隻。或者吳導演拍番小規模時裝戲會更好,因為一定比史詩片在行。我對呢個中國首張最大製作非常高期望。可惜,上部唔燒船,燒船又及唔上上部水準,整個兩部曲因下部而失敗。


「話時話,赤壁兩部曲中,白鴿地位全不重要,第一集好夾硬加落去,第二集更加出過場你都唔多覺。會唔會就係輕視白鴿搞到唔老黎?」