赤壁



這是多年來最期待、期望最高之港產電影/華人電影。吳宇森《英雄本色》同《喋血雙雄》後已經站於香港甚至世界電影業尖端,雖然過到美國,未達到個人預期之一登龍門(《Face/Off》同樣已是殿堂級,不過理應可贏得更多掌聲),跟住慢慢下滑(但《Paycheck》這套「賀歲片」我自己幾鍾意),彷彿去勢已盡時,聽到佢重回中國,仲要一拍就拍套中國有史以黎最貴大製作、華人世界最史詩電影,而我睇吳宇森睇極都係開槍戲未睇過佢執導之古裝片,用bullet time射箭比劍,夠勾起我好奇心入場了。雖然,單單吳宇森個名,我已經鐵定磅水。


加上題材係三國,而且係三國中最偉大的赤壁之戰。對中史我從來唔感興趣,尤其讀到清潮、近現代,越讀越對中國、中國人感到失望,同覺得中國興盛唔到甚至被西方鄙視係自己抵死。讀過中史多年,只鍾意三國時代,但更正確係《三國演義》,因其武俠小說化,對於三國正史其實一竅不通(...)。另一個原因對三國咁熱衷原因,係細細個已經唔多讀書,但打機反而大把game講三國,日本《三國誌》由DOS打到而家次世代仲有得出,我唔打戰略都仲有Capcom永恆行街經典《吞食天地》,當時電腦仲有《吞食天地》RPG版,同台灣出品格鬥game《武將爭霸》(相信更多人對台灣三國game認識係「飛龍在天」...)。開埋電視,亞視晏晝先播《吞食天地》動畫(好睇!),夜晚再有國產《三國演義》超長篇連續劇,唔讀書齋打機同睇電視都覺得自己變左三國專家,加上同《三國演義》相關往往突出五虎將神勇、諸葛亮智謀同俠義精神,細個睇得/打得好X熱血。所以吳宇森選擇赤壁之戰,非常興奮。


作為史上製作成本最高國民大製作,睇之前,又是否應該諗諗:會唔會黎遲左?成日話中國十幾億人民、五千年歷史、經濟高飛、地大物博、人傑地靈,但歷史短過地方細過人口少過中國的西方大國,多方面通通發展蓬勃過中國,電影更加快得多。外國要幾大場面都拍到出黎,你話人地有電腦所以得?中國有人有地有錢。市場方面你可以話只得翻版市場,但睇《變形金剛》上畫即爆國內票房紀錄、唔少戲院全日所有影院只播一套戲都會場場滿座,市場唔係冇,聲勢同製作夠大就得。唔玩特技,史詩電影亦一向多人入場,唔需要拍到《魔戒》咁大陣仗咁長篇,以戰役為中心,拍得到《300》或《Braveheart》級數已經好足夠。只係地大物博歷史長遠的祖國,唔知點解外國已經拍到唔拍,先至成功出到一套《赤壁》製作規模上及得上外國猛片,而之前冇幾多。


「當然,乜題材唔拍得、物人物對白唔出得街,拍時多忌諱,拍完少少野又可以禁左你唔准賣唔准上,發展步伐慢人咁多,有時都要多謝中央方向的『審慎』。」


仲慘在日本人對三國仲狂熱過自己日本古代歷史,十幾廿年乜野媒體都用過黎做題材,中國人自己反而唔會留意,多年前《墨攻》都係諷刺在係日本人畫完漫畫之後由香港人改編番做電影。所以《赤壁》出現有多重意義,之前擺明截糊之《見龍卸甲》,因為唔算太鍾意劉德華,加上睇過預告片覺得有點爛,見到狄龍做關公笑左出黎,完全冇興趣入場,鬼叫我唔係劉華fans。對於《赤壁》就有點在乎了。我比較膚淺睇戲唔用腦,都講左對三國正史全無認識,《三國演義》亦只係卡通電視打機唔算識得幾多,除非真係改得好好好離譜,例如《吞食天地》咁誇張呂布會走出黎幫曹操打劉備唔識都知冇可能發生,無知是福,我唔會知道電影同史實或小說相差多少、幾成真幾成假。了無牽掛。(雖然,心堶接w係型住會好流)


因套戲咁古老,睇見海報都覺得old-school為左慶祝吳宇森回到過去,應一應景地去老戲院睇《赤壁》,選大角咀豪華戲院,貪佢近我公司放工行一個字到 - 雖然放映時間關係,放完工仲要躝番個幾鐘街先入得場,即係近唔近公司都冇乜關係。個名豪華,間野果然夠豪華,超大棟大廈霸晒先得兩間院,old-school戲院乜都要勁,一間院勁大成個禮堂咁巨型,樓底勁高,相信一個院等於新世紀兩個三個。又勁多位,新世紀字母排A-Z廿六個字都用唔晒,豪華Z之後仲要繼續AA、AB排到四十幾行,全院坐滿上千人,仲要因為樓底高所以排位斜絕對唔使驚俾人遮住睇唔清個幕,見證曾幾何時香港電影業之輝煌,而家當然灰晒啦有八十人睇已經好好,我睇《赤壁》咁大卡士全場四五十人十分一個場都唔夠,基本上不設劃位鍾意坐邊就坐邊。最開心係唔似而家d戲院賤格到爆,飲野食野一定要大會指定,豪華帶乜入場都得,枉我買左兩包牛仔片收收埋埋入自己個袋,去到見到人地個個買到去野餐噉幾大膠袋抽入去,早知唔使煩咁多&買多d啦。大佬,《赤壁》兩個半鐘長,分分鐘睇套戲仲長時間過你去野餐呀真係。


但,套戲要講反而好短時間講得晒,因為某程度上不要必要地長。以我對三國之皮毛知識,赤壁之戰係曹操大炒劉備,劉備搵孫權聯手,之後赤壁一戰水戰火燒連環船逆大炒曹操(...)。或者吳導演諗住大部份入場觀眾早對赤壁之戰甚至三國有相當認識,所以一開波連跳幾步,未太知咩事已經去到劉備退兵,跟住趙雲救阿斗。我想話我中國人起碼對赤壁之戰前後有點認知,就算唔多交代清楚都叫做自己聯想得番咩回事,但俾著外國人睇點算?另吳導演一向有個毛病:角色建立想好完整、人物關係想好仔細,不過往作唔係長篇點筆落墨剛剛好,《赤壁》作為史詩故事,講人物都要史詩一點,文戲多好多好多,有d劇情你會覺得唔需要咁長甚至唔需要,仲加左d笑位,問題在於吳宇森唔係一個識搞笑之人,好多時係笑位都唔知,又或完全唔好笑,「文戰」場面亦頗為失望,完全冇應有的緊張同敵對。不合乎情理部份相信唔少,我唔熟中史都覺得有唔妥,你話點會冇?好似冇記錯歷史中周瑜因為「既生瑜可生亮」而唔多妥諸葛亮,但戲入面兩個人可以老友到爆,同周瑜文將可以落埋戰場打,而且打得仲勁過各位武將,相比下諸葛亮文戲冇大發揮又唔識打,好似「既生瑜可生亮」佢講似d喎。睇黎吳宇森係周瑜fans。而更大的唔合理,在於戰場內。


為左突顯戰場效果,陣法係重點之一,聽落總比三國無雙合理,但一開場冇耐玩太陽,預告片都睇到蜀軍用反光盾牌制敵。當年技術同戰亂盾牌真係可以磨到咁反光?反出黎真係可以光成噉?記得以前讀書,好似亞歷山大定邊個歐洲將軍先有話玩過下呢招。跟住極大篇幅講八卦陣,好睇,問題係太神。戰役開始曹軍追蜀軍,跟住成班人自己衝入八卦陣,入左陣又唔會衝出去,個八卦陣係步兵排成,而入陣曹軍有步兵有騎兵,單靠騎兵夾硬撞散個陣都得啦,仲點會入面企定定任人殺?即係你覺得牛仔繩圈捉騎兵都諗到,關羽張飛可以馬都唔騎甚至刀都唔帶,自己一個人衝入敵陣赤手空拳抽成隊士兵以至騎兵,直頭接受唔到如此超現實,我諗八卦陣一役睇到你噴血。當中最嘔泡係:


「點解曹軍可以明知有景轟,都照衝入個八卦陣入面咁戇居?」


不過唔好理合唔合理,單影像角度仍然十分吳宇森。關公八卦陣內「借刀殺人」夠絕,你話佢第一次打曹軍打到連把青龍偃月刀都飛埋出去極愚蠢?擺到明。打得好唔好睇先?張飛直頭齋拳腳同成連步兵打,拍出黎勁唔勁先?八卦陣破綻多,但以前有冇人試過先?可能因為我唔熟中史,同我夠膚淺,加我打開機,所以全部野「無雙化」絕對冇問題。唯獨趙雲「百萬軍中藏阿斗」,聽個名就好Q勁,戲中殺幾隻雜卒上馬就走到人安然無事,相當失望,所謂「百萬軍」一百人都唔夠...Boy聖子到?同唔太鍾意周瑜「身痕」落埋場打,作為文將、軍隊謀士同全軍指揮,邊有軍師咁蠢會身先士卒,有乜穿爛成隊軍隊點算?同點解文將可以仲勁過武將、勁到入戰場救埋其他武將?只有話吳導演真係太迷周瑜了,同演周瑜果位係梁朝偉,點都要俾佢威番下。


套戲多沙石,要插更加多位俾你入到插到悶都未數夠一半,但我覺得好睇 - 當然短d會更好。原因之一係演技出眾。唔係任何一個出名演員,你一睇就講得出個名果班反而唔多好睇:諸葛亮俾金城武演到好MK,皆因佢典型演技就係如此,但叫佢演呃妹妹型仔甲乙丙好易,諸葛亮唔係要呢種氣質喎大佬。梁朝偉做周瑜,亦做得佢太浪子feel。更可惜在周潤發辭演。香港人睇見只知係大陸演員但唔知咩來頭果班先係正野,關公已經無敵啦,尤其之前《見龍卸甲》搵狄龍扮關公,狄龍係型,不過真係點睇都唔似關公囉大佬,張飛就更加入型入格,曹操亦夠晒奸。無論套戲點多不合實際之處,演員救番。


我就係鍾意在《赤壁》拍到出黎唔似只為賣大陸冇乜國產味,亦唔似當年睇《臥虎藏龍》心情只有平淡。想鬧的各位繼續鬧,我只有話睇《赤壁》,見到吳宇森個名,某程度上你要預左入場為睇風格多過睇歷史。大家睇《三國演義》(係演義唔係誌),接受到文字描述以一敵百、單人匹馬過五關斬六將,但當影像化時(單人,少左匹馬)反而會話乜乜唔得物物冇可能。當年吳宇森憑《英雄本色》話俾全世界槍戰片應該點拍,往後所有同類片只係重覆吳氏風格,果時冇人會質疑點解周潤發可以一枝手槍射六七十槍都唔換彈匣、被百幾個人圍住射居然一槍都射唔中,只會話好X型。噉點解而家要質疑關羽張飛刀都唔帶馬都唔騎就上陣,可以一個人殺幾十個敵兵?對場面同劇情都唔滿意的朋友,我建議你睇番亞視播果套《三國演義》算,仲要係每集前後馮兩努同你嗲兩嗲的「超智版」,唔係講笑,電視版有d場面仲迫真同震撼詔《赤壁》,或者係吳導演過於浪漫化之反效果。至於唔鍾意金城武演諸葛亮...不如睇番香港cult/爛片之一《超時空要愛》,梁朝偉飾演諸葛亮,笑到你爆咀!


「咪住!《赤壁》唔係講赤壁之戰咩?」


冇錯,講極都係陸戰,水都冇滴,點叫赤壁之戰?我都係睇完先知中招。八卦陣都打埋,再過大輪文戲,終於見到落手燒船 - 正如所述真係落手,有周瑜拎住個火把一野點火燒晒成堆模型船。心諗終於到戲肉,點知一著火立即老土到爆地大大隻古字彈出黎

赤壁之戰 下回分解

請寬恕我的愚昧。入場之前,我真係完全唔知道套戲原來分上下兩集,預告片有草船借戰、火燒連環船,點知幾乎預告片中所有令你入場的精彩片段通通下集先出,而宣傳由始至終都唔講明套戲分上下集似乎係特登,如果一早知道今集火花都冇粒、一條船都冇沉到,邊有人入場?個個都等下集啦!雖然我鍾意八卦陣一段。


「今集只係介紹《赤壁》。下集先係《之戰》。」



兩個半鐘,終於捱完了。除左欣賞到首套國民大製作,仲見識埋「前VCD時代」巨型戲院。十幾年前一隻VCD仲貴過戲院買張飛,仲要電腦都唔係話部部睇到VCD、一部VCD機超勁貴,大家自然繼續入戲院睇戲,所以舊戲院一個院可以等於而家新戲院成間咁大、可以擺成千幾張凳。而家新戲上畫可能半個月唔使已經有得BT(感謝偉大的祖國),就算普通買隻VCD都只係十九蚊,換言之你有耐性等番一頭半個月可以慳番最少四五十蚊,仲有幾多人肯俾錢入戲院睇戲?所以而家仲搵得到豪華呢種咁豪之巨型戲院都算難得。但舊當然亦有舊的唔好。唔知本身係噉定套戲長,覺得冷氣超勁,最後個幾鐘坐到個人震晒。全場入座率10%唔夠,大家自己幫自己劃位搞到好多人成日走黎走去調位,當然唔少得大大聲吹水講電話。d凳似打麻雀d摺凳,個背唔夠高所以個頭辛苦,兩個半鐘呀,好在包晒成行坐,我後來支力到打斜個人幾近橫晒噉訓住睇。另一樣衰係舊式戲院音響較差,以前未有甚麼杜比甚麼5.1,全部喇叭砌晒個幕兩邊集中前面,但個場太大所以中後排完全唔夠聲,我坐場中間有時連對白都聽唔清楚,唔知坐到A_行果d點算?。只不過一分錢一分貨,而家片長加價加埋先至$45,平出面最少廿蚊雞,最緊要係果份風味。仲想點?


「同期上映除左《赤壁》,仲有『香港hip-hop王』陳小春領銜主演《精舞門》,英文名《Kung Fu Hip Hop》!」


睇見個名都知廢,最緊要係有陳小春再加范冰冰,同型到爆的英文名,更加想睇。我買飛時睇見有一場全院得一條友。搵次試下黎三十蚊包裝《精舞門》版罪都好喎!


「連油麻地百老匯都冇得睇呀呢dcult片!仲唔轉戰過黎大角咀豪華?」