天生鍾意神怪科幻，小學已經成日走落圖書館睇衛斯理，最勁試過一日睇六本。到中學有一晚開電視，轉台轉轉下轉左去明珠，套劇講好多罪案都係魔鬼控制人而成，最後男女探員追尋殺人兇手，一番血戰後兇手終於落網，但魔鬼早已離開搵第二個受害人繼續惡行，被捕者只係無辜犯罪。當時明珠台仲係播戲多過播電視劇，加上一星期先播一集唔係太有心機追，呢集係第次睇電視劇集會感受到緊張同驚，同驚覺電視劇都可以咁有劇情同深度。套電視劇就係《X-Files》。當年細個其中一隻最鍾意玩電腦game係《X-Com》此史上最佳策略遊戲，講地球對抗火星侵略，基於大家都有個X字、大家都係講外星人、大家氣氛都係非常不安、大家都係同年期推出（一齊九幾年頭出，會唔會雙方互有影響？），自此成為系列一大fans。
之前未睇過有電視劇咁科幻咁邪門，加上係連續劇，角色同劇情可以長遠發展，唔睇由自可，一睇立即一季一季追落去。劇情主要分兩條線：一條係獨立短篇，每集講一個題材，如超自然現象、異變人、神鬼、傳說、怪物等，間中幾集仲要係玩野喜劇，有時笑到拎埋自己套劇黎開玩笑，好鬼過癮。另一條就係主線，大家睇《X-Files》最愛的外星人。發展係外星人早於史前進入地球，計劃將人類同外星人混種，至2012年侵略地球世界末日，兩位主角為發掘真相同阻止陰謀發生而深入險境，對抗美國政府幕後影子主持人。除左劇情，兩位主角衝突立場亦係編劇吸引人之處，男主角堅信超自然同外星人存在，女主角則從現實科學角度分析，男性同女性、科學對超科學，大家都想令對方放棄己見接受（不）現實，同樣引人入勝，更加開創新一代劇集角色定位。有科幻、有外星人、有陰謀論、亦有非常完整人物關係，而且當年電腦動畫仲未普及之情況下，劇中電腦CG非常真實甚至超越同期電影，《X-Files》係我最鍾意電視劇集系列。唔少得，自然仲有無敵片頭曲，令人對此劇印象深刻，Mark Snow陰深恐怖配樂居功不少。
睇完電視，需要多謝人士有三位：Chris Carter，系列創立人，同《最後一強》提及過之Glen Morgan & James Wong，好多精彩集數都係出自佢兩個手筆。但要留意除原來電視，仲有其中兩季中間電影版。
當中一季（唔記得邊季）播完後，導演話真正結局留番電影版，亦即《Fight the Future》。記得當時仲讀緊中學。因為連接當時電視版，時值系列熱爆期，上到大銀幕所有野大幅加碼，夠緊湊緊張有動作又有大場面，最後仲成隻母船升空，而且角色關係、衝突比電視更加立體，作為《X-Files》fans睇到嘆為觀止。
「這是電視劇改編電影的典範。」
縱使往後過多一兩季，電視版易埋角睇唔睇都冇大分別，本住fans精神照追到尾。電視版結局係影子政府被殲滅、男女主角知道單憑己力不足以同整個外星勢力對抗，毅然放棄X-Files靜候世界末日。又唔算爛尾，不過大家總希望可以講埋落去最後世界到底點、能唔能夠邪（外星人）不能勝正（地球人）。
播完之後，外購劇先至俾明珠台播到濫晒「pop晒」，所以之後大家如數家珍地數睇過邊套邊套（well，各行各業總有「專家」的），《The X-Files》則被遺忘，冇計，一來太早播二來題材唔大路（「睇完都冇得解！又冇女！」）。所以事隔多年後又話有新電影版，相當意外。
如果計番我讀中學時睇上一集電影版《Fight the Future》，同新一集《I Want to Believe》中間有最少十年，雖然遲晒大到，但作為fans睇到戲名副題會覺得「黎料」、知道要俾錢，劇情講乜已經唔太重要，純為支持，況且故事劇情收得好密，trailer都要上畫前個幾月先睇到。睇完trailer第一件事係：
「好似唔多X-Files喎。」
故事發生於電視版結局好耐之後，兩位主角已經脫離FBI。小鎮出現連環兇案（仲唔係抄BlackWine《影子》？），其中一個受害人係FBI探員，唯一線索只得一個天主教神父受神啟示睇到兇案過程，所以FBI決定請兩位老人家出山幫手。
「聽見都唔覺得有幾好睇。同，如果受害人唔包括FBI探員，相信單案一定唔會有咁多人去查，從而唔會成X-Files。」
拍出黎得唔得？可以好肯定話你聽，唔得。編劇功力大遜，問題係劇本本身冇驚喜唔緊要，可以用導演功力救番，正如電視版講外星人講超自然某程度上都係陳腔濫調，不過拍到出黎氣氛非常黑暗，吸引到大家每星期俾佢嚇一次。可惜今集電影不在此列。實在好．．．悶。劇情冇驚喜、進程太直線、動作場面冇睇頭，悶到想佢快ｄ完，最後三個字甚至睇到你笑，係有史以黎最大的X-Files。
「就算換左演員，全套戲都唔會覺得有咩問題，而唔會因而不能成為一套完整電影。如此失去《X-Files》神髓，拍出黎有乜意思？」
所以劇情我唔想講。講講其他方面好過。主題係批判信念，各人藉宗教同超自然現象思考面對難題時自己是否堅定。一如劇集慣例，劇中所有野冇明確解畫，全部僅經過兩位主角討論講出晒所有推論信不信由你，而一切哲學同思想層面之討論亦係靠兩位主角對話帶出，只係深度不足未夠發人深省。反而另一個主題較貼近現實：人際生活。因為年份已經到原劇情多年後，二人亦非FBI探員，主角要適應年齡同投入「正常生活」，就如《Die Hard 4.0》都係講「老一輩」、「過氣」、「退隱」的「英雄」點樣適應新環境，同在新世代復出面對幾大困難。所以劇中二人會為應該唔該插手幫FBI爭拗、入到FBI又拗幾時應該停手、一個想安穩另一個想冒險，聚多離少引發更多爭執，是查案以外另一重點，亦係電視版搵唔到：導演拍電視時刻意模糊二人關係，只覺曖昧但冇明確表明發展到邊個程度，明吊各位觀眾癮同令人追落去。可能就係由始至終未能滿足fans，導演藉今集為男女主角關係作個交代，當然係大路過大路，但相信好多人會唔鍾意，因為過左頭半，後來兩個人基本上各有各做近冇正面接觸。之不過噉樣先至合乎現實，在香港生活的你已經知，尤其去到佢地年齡層，電影中的男女問題、兩個人生活唔係悶就係嘈交，咪同大家面對的一樣？只是睇戲目的為逃避現實，因為現實中冇金童玉女自然希望電影中可以見到，所以描寫到兩個人咁疏離肯定唔多人鍾意，正如我只一心想睇佢兩個聯手查案。除左演員熟悉，套戲更接近《千年追兇》此Chris Carter另一超自然系列，一個更加寫實、「唔pop」的《X-Files》。如果係噉，我點解唔睇番《千年追兇》算，起碼前提更加適合，除左知名度遠不及？同有我最鍾意男演員之一Lance Henriksen aka Bishop，佢演繹呢種社會陰暗面，絕對入型入格過《X-Files》兩位？
假如作者因為上集偏官能方面，新一集想集中番角色同思想深度，可以話大失敗，我寧願佢膚淺番少少繼續食外星人老本算數。冇睇開電視版的話，因為劇情本身冇乜連結，就算冇睇過電視入場都得，但亦因咁遷就呢類觀眾，加上導演功力實在不及往時引致大失敗。唔知點解，系列中三個成功幕後都係一上到大銀幕立即冇晒風采又或刻意降格，正如James Wong《死神來了》有趣有新意但商業味過濃、加埋Glen Morgan之《最後一強》自己接受但同時覺得創作組有所保留唔敢冒險，到Chris Carter今次新一集《X-Files》電影版，更加失望到fans都撐唔落，特別臨尾三個字，簡直廢到你唔信。好地地按番上一集拍咪好，點解要咁「創新」？仲能獲得好評只有配樂。睇完真係得一個字。
「唉。」
算客氣了，唔係粗口，不過要講都唔係講唔出。正宗的《X-Files》都係講外星人好。既電視版結局有點兒草草了事，拍新一集電影，點解唔講番兩位主角點樣面對事在必行之外星人侵略、2012年世界末日，一定比現在更吸引，同這才是大家盼望的？全套戲最X的兩個X-Files，一個係套戲居然出到街，另一個係我居然會入場睇。難怪戲名改得咁好。我都好想相信這真是《X-Files》、真係Chris Carter出品。但啃唔落。